ЧЕГÖМ ЙЫЛА ТОПОЛЬ 4 страница

Старик öдва ештiс отвечайтны.

А неделя бöртi Кона отрубö вайисö газета. Микша дзарнитiс первöй листбок вылас и кынöмсö кутiс. Ах, лешакпиян! Былись снимайтöма осьтаöмаöс. Ха-ха! Видзöт, кытшöм генерал петöма! Пукалö вöв вылын, киас шать, кыдз сабля, тошыс моросöдз — жаль, погоннэз абу. И öтöрыс, кытшöм вöлi, сэтшöм и петöм: вöр орлытöг кыссьö горизонт сайöдз, керöс йыввес тыдалöны, пода сэтöн вот йирсьö. И быдöс эта мир вылын хозяиныс — Микша дед. Пукалö сiя вöв вылын, и, кажитчö, вöрыс кок увтас ольсассьö. Дошлöй морт эта корреспондентыс, кужöмöн снимайтöма. Только павкас, натьтö, сылö: старик вöвтöг подасö пастучитö, а сэтöн на тэныт — чуть ли не жеребец вылын пукалö.

Мый бы сэтчин эз вöв, а Микша осторожнöя вундыштiс газетаись снимоксö да öшöтiс избушкаас стена вылö. Любо вöлi мукöдпырся дзарнитны ас вылас: öддьöн ни боевöй петöма...

Да, бур вöлi гожумнас, казявтöг кадыс чулалiс. И куканнез казявтöг быдмисö. Тулыснас куканёк баля кодь вöлi, а öнi видзöт, мöс вылö вачкисьö. А мыля? Да только сiйöн, мыля дед Микша бура дозирайтiс. Эх, вöлi бы кинкö ордчöн, дак старик лунтыр бы висьтасис, кыдз дозирайтiс подасö. Перво-наперво... Да мый, некин ордчöн абу. Некинлö висьтасьны. Кöть бы бöра корреспондент я мый я вовлi. Может, бöра бы карточка керис...

Нiя, фотокарточкаэс, диво ни öксисö. Мöйму дед тожö пода пастучитiс. И не умöльжыка тавося. И давай старикöс быдлаöт кыскавны. Корлiсö районнöй совещаннё вылö и тшöктiсö висьтасьны, кыдз подасö вердö. Старик нем эз сайöвт, быдöс висьталiс. Сылö шовкöтiсö киэзöн, ошкисö, сетiсö премия и, конечно, фотографируйтiсö. Фотографыс вöлi не öддьöн дошлöй, но сё жö неумöль снимок керöм. Кöр старухаыс дзарнитiс сы вылö, первуись жöниксö Никифор Павловичöн шуис. А перво мый вöлi? Пашу Микша да Пашу Микша!

Корлiсö и окружнöй совещаннё вылö. И бöра тшöктiсö висьтасьны, и бöра шовкöтiсö. И стариклöн гортас фотокарточкаэс эшö содiсö.

Сэсся асланыс колхозiсь подавöдитiссез чукöртчисö. И дед Микша бöра джын час баитiс. Быдöс висьталiс, дзик книга лыддьöтiс. И сiдз велалiс баитны — нельки сельхозтехникумöдз кывсьöма. Тöвнас старик получитiс техникумсис письмо: корисö лыддьöтны велöтчиссезлö лекция. Мöдiк, может, и откажитчис бы, а дед Микша эз. Мунiс городö и кык час баитiс кафедра вывсянь, висьтасис, кыдз дозирайтö куканнесö, мыйöн вердö, кытшöм турун подаыс радейтö, а кытшöмö оз. Лекцияыс сiдз и шусис: «Кыдз ме дозирайта куканнесö гожумнас». Öддьöн бура висьтасис, и велöтчиссез шуисö стариксö академикöн.

«Таво, натьтö, бöра корласö, — думайтö дед. — Ох и висьтася бöра, сьöлöм бурмытöдз баита...»

И дзарнитiс аслас куканнез вылö. Пöтöсь быдöнныс, ёнöсь. Уна яйыс лоас!

— Мишка, Мишка! Тэ мый, бöбöв, куйлан? Ах, нёштöм кымöс, ноко чеччы да йирсьы!

Старик локтiс öшка дынö, малалiс боккесö, кыскис карманiсь кытшöмкö таблеткаэзöн баночка, сетiс öтiк таблетка куканьыслö.

— Давай йирсьы. Таблеткаыс аппетит тэныт содтас и сразу ёнмыны пондан.

Чирскан никсiс старик дынын, зыртчис коккес бердö.

— Тэнат, кöин öбедлöн, кöть кöр аппетитыт бур, — стыдитiс сiйö старик. — Бöра сёйны коран? Но, лок инö, чöскöт öмтö няньторöн.

Избушка дынö сибöтчикö, дед казялiс Даньколiсь пельöсын сулалан пикасö, босьтiс сiйö киас и дыр бергöтлiс сiдз и этадз, сэсся, уссэзас шыннялiкö, сюйыштiс бедьсö слега коласö: ась тöвйö сэтöн, мöдчид пригодитчас Даньколö. Избушкаын Микша любуйтчыштiс аслас фотокарточкаöн, лукавöя чикыртiс синнэсö и, сiдз кыдз öддьöн охота вöлi баитыштны кинкöт-нибудь, горöтчис Чирсканлö:

— Кин эта вöв вылас пукалö, а? Тöдан сiйö? Этö ме — Никифор Павлович. Думайтан, шутка, а? То-то жö...

И эз ешты сiя сьöлöм бурмытöдз баитыштны, кыдз Чирскан ньöвьёсьöн чепöссис öтöрö. Перво лявгис-вувтiс кинöскö, а сэсся пондiс радöн никсыны. Кинлö бы öнi локны?

— Деда-а, тэ гортын? — кылiс старик Даньколiсь голос. Кылiс и сразу чепöссис ыбöслань.

— Гортын, гортын. Лок пыр, — радмис сiя: вот и морт локтiс, вот и баитыштны позяс! Только мыля Данькоыс не школаын? Мыйлö татчö локтiс?

— Мыйкö разь шогмис гортын? — юалiс Микша.

— Посадö тэнö öнi жö корисö. Пастуххез öксьöмась сэтчин. Ась пö локтö да висьтасьö бöра, кыдз привессэз понда пессьö, — юöртiс Данько.

— Ах, чомору! Видзöт жö, мый сэтчин вöлöма, — радмис старик. — Сiдз и шуисö, ась пö обязательно локтö?

— Сiдз и шуисö. И эшö ме кылi öтiк басни: тэныт премия мöдöны сетны. Лок öнi жö.

— Ах, чомору... Да конечно локта. Ужо, сулав, кыкöн и мунам.

И старик шупыта пасьталiс куртка, волькöтыштiс тошсö, кусöтiс горись би. Öтöрö петтöн эшö öтпыр дзарнитiс снимок вылö, шынньöвтiс лукавöя: адззылiн, кыдз аркмис, пöрись дзодзог! То-то жö...

Ю дынöдз нiя локтiсö ордчöн. Ордчöн кайисö посок вылö. И только сэтöн старик тран сувтiс, дзик кынмис местаас.

— Некытчö ог мун, — чорыта шуис сiя.

— Кыдз этö он мун, корисö да?

Микша бергöтчис избушкалань, дыр видзöтiс куканнес вылö и вöлись юалiс лöгöнмоз:

— Висьтав, внучек: кин жö öнi праздничайтö, кöр подасö дозирайтны колö? Эх, Данько, Данько, весь тэ татчö локтiн. Мун велöтчы. Сёрман школаас.

— Да нем куканнескöт оз ло. Мунам чожжык! — горöтчис зоночка.

— Нем оз ло! — лöгасис старик. — Гожумбыт олiн мекöт, а нем абу вежöртöмыт. А вдруг быдöнныс петасö загонсис и пышшасö вöрас? А вдруг нiя сёйны оз пондö и привессэс чинасö? Эта йылiсь тэ думайтiн? А эшö животноводöн, шуан, лоа...

Данько юрсö öшöтiс и шы эз сет. И пастух тожö дыркодь чöлiс. Пöрись морт думайтiс, мунны я не я. Охота сё жö баитыштны, да и отирсö важын ни эз адззыв. Быдса куим неделя, пожалуй, эз ветлы гортас. Данько внучекыс и котрасьлiс няньла да мöдiк сёянла. А может, ар йылiсь думайтiс. Видзöт, кыдз лун-мöдöн гöгöр вежсис. Кыдззез да пипуэз кельдöтöны, небоыс гожумбыт голубöй вöлi, а öнi рудсялiс, лажмытжык лоис. И шондiыс чудитны кутчисис: асывнас петавлiс жö, койыштлiс югöрресö, сэсся казявлiс, что природаыс гажтöм, и тэрмасьöмöн пыравлiс бöр кымöррез сайö...

Кин тöдö, мый йылiсь думайтiс пöрись морт.

Но вот бергöтчис сiя бöра внучекыслань, шуис не öддьöн горöн:

— Котöрт правленнёас да висьтав быдöнныслö: некöр пö öнi стариклö кывнас изны, тöвнас пö сiя баитнытö любитö. А муна кö талун да загрек рытöдз баита, сэк тöвнас мый керны? Привессэс чинасö талун, и висьтасьны нем йылiсь лоас!

Данько мунiс деревняö, а дедыс шагнялiс аслас табунлань. Оськалiс нетэрмасьöмöн, важнöя да гордöя, и вöлi сы чужöм вылын ыджыт достоинство. И эшö бы! Том и пöрись сiйö одзжык шуис Пашу Микшаöн, а öнi посадын и городын величайтöны уважительнöя нимöн и айнимöн — Никифор Павловичöн. Эта разь шутка?

А баитны охота, öддьöн охота. Но да ладно. Тöлыс, батя, локтас. Локтас мороззэза да пургаэза. Сэк вöлись и позяс баитыштны, гожумсö касьтывлыны.

Дата добавления: 2015-11-16