ЧЕГÖМ ЙЫЛА ТОПОЛЬ 2 страница

— Быдöс туяна машинаэсö вöрö иньдö! Быдöс! Вежöртiт? — горöтлiс Макар Кузьмич ассяс учöтжыккес вылын, нельки сьöлöмсö эз жалейт.

Отир тöждiсисö:

— А кыдз жö горючöйнас? Бырсьö эд...

— Не тiян печальыс. Кытчöдз эм — уджалö! Пыкöтасис öтiк местаö — кыв эз тöр. Кыскис и кыскис. А тулыс видзчисьны эз понды. Не сувтöм вöлöн, а сильканнэза тройкаöн лэбзис-локтiс таво льöмвинскöй вöррезö, чожа сылöтiс. Натьтö, первуись Макар Кузьмич аслас векын панталiс тулыссö гажтöма, гудыра сьöлöмöн, видiс сiйö медбöрья кыввезöн и сьöласис лöгувьяс. Горючöй тöдчöмöн бырсис, а сэтöн сибалö вöр кылöтан кад. Посёлокын только сы йылiсь и басни. Семьдесят тысяча кубометр куйлiс öнi Льöмва дорын. Если быглявны сiйö киэзöн, быдса месяц ковсяс, а кин жö оз тöд, что тулысся ванырыс видзсьö быдöссö кынымкö лун! И начальник, кöр думыш керис, что быдöс эта вöрыс вермас «косьмыны» берег вылын, иньдiс нефтебазаö медбур трактористöс — Петька Угринöс.

— Куим лун тэныт сета, — баитiс сылö начальник. — Мун веськыта, бур туйесö эн кошшы, воздухöт лэбзьы, — велöтiс трактористсö.

— Керам! — шуис Угрин и петiс туйö. Посёлокын видзчисисö сiйö эшö тöн рытнас, но

Петька эз лок. Начальник ойбыт бергалiс бокись бок вылö, унаись бергöтлiс вазьöм подушкасö, ойзöмöн да ыш лолалöмöн чеччывлiс ольпасись, петавлiс öтöрö и дзарьялiс пальниковскöй туйлань: оз я мыччись тракторыс? Но ыджыт дизельлöн шумыс некытöн эз кыв. Одз асывнас Макар Кузьмич ветлiс заправкаö, аслас киэзöн пломбируйтiс медбöрья тыра бочка — НЗ, строгöя закажитiс диспетчерлö, медбы трелёвочнöй тракторрез эз петö талун гаражсис. Сьöд кымöрся гажтöмжык сiя локтiс кабинетö и только ештiс пуксьыны пызан сайö да киэзнас кутны юрсö, кыдз Петька Угрин пырис сы дынö косви ва, люммöм сина и косясьöм фуфайкаа. Зонка öдва öшшис кок йылас. Радмис вöлi Макар Кузьмич, чеччöвтiс пызан сайись, лöсьöтчис ыжмитны трактористсö, но кöр буржыка дзарнитiс Петька вылö, вежöртiс: шогмис как раз сiя, мыйись полiс. Шлёпкисис стул вылö, барöтiс синнэсö.

— Кытöн?

— Дак кытöн... Пальник увтас. Только ештi лэдзчыны йы вылö, сэтöн и сунгисис. Кык дизель öнi ковсясö, медбы лэбтыны...

— А горючöйыс?

— Сiя дзонь. Додьыс, тыдалö, лöсялiс плашкот вылö, пуксис непыдына.

Макар Кузьмич пондiс ветлöтны пельöсiсь пельöсöдз. Синнэс сьöртi и тöдчö — ловзис невна, а рожабаннэс сё эшö треситчöны. Смешнöя летъялöны веськыт пель тороккес. Мöйму начальник шедлiс вöравтöн сiсь пу увтö. Ачыс кольччис дзонь, а пельсö поткöтöма кöс ув. Öнi быд дзирыт кадö пель тороккес летъялöны, бытьтö тöв нiйö вöрöтö.

— Шогмас жö, а? — баитiс сiя. — Кыт вöснит, сэт и орö. Кин думайтiс, что эта одза пондас сылöтны!

Сэсся сувтiс Угрин одзö, чикыртiс синнэсö:

— Бур, что эн вöй. Вермин бы и менö сьöрат кыскыны... Мун, шоччись гортат час мымда, веж паськöмтö. А сэсся пуксьы вöв вылö — босьт менчим жеребецсö, сiя чож — и гöнит Кондовникöт леспромхозö. Ылынöв сэтчинöт, но зато пос — рискуйтны оз ков. Висьтав леспромхозас, мый шогмис, отсöт кор, синваэз уськöт. Сiдз пö и сiдз, виноватöсь. Вежöртiн?

Петька петiс кабинетсис, а начальник бöра öдззис ветлöтны пельöсiсь пельöсö. Колiс, мый бы эз вöв, а судзöтны горючöй. «Косьмас» кö берегын не öтiк дас тысяча кубометр вöр — лоас адззывлытöм скандал. Но кысь öнi босьтны горючöйсö? Кондовник пыр кöр эшö сiйö ваясö, а сэтöн — сплав. Может, иньдыны Пальникö машина? Нем и думайтны: первöй жö логын пуксяс кынöм вылас. А трактор? Этö бы позис, да мыйöн иньдан? Бакас эд васö он кисьт.

— У-уф! — сьöкыта шлёпкисис аслас стул вылö да сöтiс кулакнас пызан кузя Макар Кузьмич. — Пöрись дурак! Кытöн тэ одзжык-ту вöлiн? Мый думайтiн? Кин вылö надейтчин? Идиот!

Видiс асьсö. Дыр видiс, кыдз кужис. А сэтöн и решеннё чужис. Иньдыны подводаэз. Да, да! Кык телега. Ямщиккезнас — томмезöс. Народ боевöй — отсаласö. Медперво, конечно, Сергей Комоловöс. Мöйму пожар коста сiя кык кагаöс биись кыскис. А старшöйнас кинöс?

И сэтöн Макар Кузьмичлö тöдвылас усис мастер Гыров. Сiйö! Сэсся некинöс. Зонка том, здоровöй, сэтчö жö активист — собраннёэз вылын вон кытшöм визыв да боёк.

Дыр думайттöг Макар Кузьмич корис кыкнансö аслас кабинетö, висьталiс, кытшöм делоö шедiс лесопункт, и тшöктiс öнi жö петны туйö да, кыдз сiя шуис Гыровлö, «тыртны государственнöй важностя заданнё».

* * *

— А горючöйсö миянлö не босьтны. Не босьтны, Серёжа. Этö ме тэныт веськыта висьтала, — синнэсö куньöмöн баитiс Гыров.

— Мыля?

— Мыля, мыля! Сибдам кытчö-нибудь... Комолов бергöтчис. Юрсö öшöтöмöн сiя пондiс думайтны ассис. Гыров, конечно, эз тöд, что Сергей — эта ён и здоровöй детинаыс, эта ёкмыльыс — медбöрья кадö эз понды вермыны узьны. А талуння ойсö сiя чулöтiс совсем умöля: онмöссис только югдандорас, но и сэк шоччисьны эз удайтчы — только кунис синнэсö и вöтасис Лена Базуковаöс. Ятнöя, öддьöн бура адззылiс, кыдз клубись петöм бöрын нывка баитiс бытьтö сыкöт, Сергейкöт, мыйкö дзирыта шушкис пель одзас, сэсся кытiсь и усис сэтчö Гыров, и Лена колис кавалерсö туй шöрас, чожжыка лякасис Гыровыс бердö, кöдакöт и мунiсö пельöс сайö окасьны. Окасисö-чупöтiсö сiдз, что öнöдз пеллезö вачкö.

Нем сэтöн он кер — эд Сергейыслö только неважын тырис двадцать. Льöмваö тулыслiсь локтöмсö сiя казялiс таво быдöнся одзжык. Эшö сэк, кöр öтöрын вежмасис февральскöй пурга, зонка кылiс ни, кыдз сьöлöмас чавкнитiс öддьöн дзирыт шондi, югдöтiс сэтчинiсь быд пельöсоксö, и том жилаэзöт öдззис визывтны, конечно жö, не тулысся ва, а сэтшöм дзирыт вир, кытшöм одзжык некöр эз вöвлы. Сергей нельки эз и казяв, нельки синöн кваркыш эз ешты керны, кыдз сы моросö пырис Лена Базукова. И пондöтчис мыйкö невежöртана. Одзжык, вöвлi, петас тракторöн делянкаö и öдззас быдöнöс дивитны: кыдз лун — сiдз и виль рекорд. Только удж йылiсь, только вöрсö заптöм йылiсь юрын думаыс. А öнi? Неетша мырресö да кокораэсö пизьдiс аслас тракторöн. Öдззас думайтны нывкаыс йылiсь и — тырк! — каяс кöньöс кыза колода вылö. Осьтас синнэсö, трекнитас юрнас, дивуйтчöмöн дзарнитас öтмöдорö, а кынымкö миг бöртi кут да любуйтчы: Лена бöра ни сулалö сы одзын, хитрöя видзöтö вазьöм кабина стекло пыр, шыннялö воздухас и дзик нерö трактористсö.

Мый сэтöн керны? Тöдсасьны! Öнi жö тöдсасьны!

А если сiдз, то колö действуйтны. Не сэтшöм полiсь морт Сергей Комолов, медбы эз лысьт сибöтчыны нывка дынö да кольлавны сiйö гортöдззас. Дженыт, конечно, туйыс клубсянь Лена керку дынöдз, но кужан кö баитны, етшажык кö пондан дзарьявны тöлiсь вылö, дак вермас шогмыны сiдз, что нывкаыс, кöдö кольлалан, первöй жö рытас козьналас тэныт шынь-серöм, а может, и ыш ловзисяс, калитка дынын янсöтчикö.

Сергей, колö думайтны, вöлi не осьтаöма и баитiс Ленасö кольлавтöн не только тöлiсь йылiсь. Нывкаыс сё частожык и частожык пондiс вовлыны делянкаö, быдпырся сувтчывлiс эстакада дынö и видзöтiс, кыдз уджалöны Сергей да сылöн чокеровщик Иван Истомин.

— Привет и салют тэныт, Леночка, рабочöй классянь! — чирзö Сергей.

— Тiянлö сiйö жö! — шыннялö Лена. И быдöс. А мый сэсся? Бур!

Этадз тöдсасьöм бöрын Сергей бöра пондiс вöрас чудесаэз мыччавны. Мыдзöм йылiсь и некытшöм басни абу. Только удж йылiсь и думаыс юрын. Кыдз лун — бöра виль рекорд. А сё Лена кузя.

Комолов йылiсь пондiсö баитны перво посёлокын, сэсся леспромхозын, а сыбöрын сэтчöдз делоыс локтiс, что газетаö портрет печатайтöмась и быдса статья гижöмась. Эта тожö шогмис аскадö. Вöлi öддьöн лöсялана. Не весь эд баитöны: нывкалöн сьöлöмыс не пуись керöма. Вöрзис сiя, сьöлöмыс, и сылiс досповна трактористлöн трудовöй слава югöррез увтын. Баитiсö ни отирыс, что майскöй праздниккезнас, кöр Сергей Комолов лоас коммунистическöй удж сьöртi ударникöн, посёлокын орсасö свадьба.

Но не веськытöсь любитöмыслöн туйес. Шогмис сэтшöм, кöда йылiсь буржык бы вöлi не касьтывлыны. Лöгасисö. И лöгасисö, кыдз частожыка овлö, нем понда. Сергей кöсйисис öтпыр мунны Ленаыскöт клубö, кöсйисис локны одз и сёрмис мылякö. Лена дыр сулалiс тулысся кöдзыт тöв вылын, неетша кынмис и, кöр зонкаыс локтiс сы дынö, нывка топнитiс кокнас, висьталiс, медбы Комолов сэсся и пантасьны некöр эз лысьт. Вот сэтшöм история. Быдса неделя ни пансьö мыйкö арттöм. Быдöс каттисис-дзугсис, быдöс сувтiс онняюрöн. Сергей нервничайтö, места аслыс оз адззы, а Леналö и горе абу. Кывсис, танцуйтö пö быд рыт Гыровкöт клубын, сiйö только и тöдö — гажöтчö, кыдз кужö.

«Мый жö нiя баитöны ме йылiсь? — думайтö талун Сергей и сьöкыта дзарьялö Викторлань. — Кышалöма, понпиян, юр вылас кытшöмкö верблюд горб и радуйтчö. Вот локны да сöтны бы ныр кузяс, мед оз сюй сiйö, кытчö оз ков...» Медбы кöть невночка кусöтны лöгсö, Сергей сьöлöмсянь сьöвзис канава сайö, пуксис телегаас, öвтыштiс плетьöн.

Вöввез содтiсö оськöв.

* * *

Вöрас сьöрсьöн-бöрсьöн усисö эшö кынымкö сiсьмöм пу. Öтiк кöс пожум нёштöма дзуркнитiс и брякнитчис почти туй бокö. Гыров дрöгнитiс, чожа дзарнитiс öтмöдöрö: «Вот ляпкöтас эшö...» Но сэк жö вашöтiс этö думасö, сьöвзис ас кежас. Мыля ляпкöтас? И мыля непременно сiйö, Гыровöс? Сергей вон одзас мунö, — жамнитны, дак перво сiйö и жамйыштас. Но настроеннёыс сёравно тшыксис.

Туман кöвьясьö вöрас. Ульсöт пырö моросöдз. Кöдзыт — киэз-коккез дрöжитöны. Гыровлöн дзугыльтчис сьöлöмыс. Колö бертны бöр. Этадз и простудитчыны недыр.

Одзаныс бöра мыччисис лог. Не сiдз и паськыт, а пыдын. Сыын дорресви сулалö сöнöга ва. Логсö вуджтöн кыкнанныс люзь вамисö. Медбы не тувдыны, Сергей джын верста мымда котöртiс телега бöрын, бура шоналiс. Гыров полiс нятьöсьтны басöк сапоггесö и некыдз эз решитчы лэдзчыны му вылö, мыр моз пукалiс телегаас, ляскöтiс пиннезöн и баитiс чуть ли не синвасорöн:

— Нем эта лешаччöй делоись оз пет! Давай бертам гортö.

— Горючöйтöг? А премиясö кин получитас?

— Да но сiйö! Мед получайтö, кинлö охота.

Гыров эшö мöдiс мыйкö висьтавны, но эз ешты. Вöрас, совсем неылын ны дынсянь, öдззис чанавны песня. Кинкö локтiс нылö паныт Пальник ладорсянь и сьылiс:

Пельминборö, Пельминборö, Голубöй Весляна ю дорö как раз, Менö корö, менö корö, Пым сьöлöмö кыскö каждöй час.

Песня вöлi бодрöй проглаза и гора, кыдз тавося тулысыс, и сьылiс сiйö приятнöй женскöй голос öддьöн кужöмöн, душевнöя. Позис вежöртны, что сочинитiс песнясö ачыс сьылiсьыс, сочинитiс аслас любимöй йылiсь, аслас милöй йылiсь. Голосыс сьöртi Сергей тöдiс, что этö сьылö Вера, Пальниковскöй мöсвöдитан фермаись заведующöй.

Чожа чукыль сайсянь мыччисис кокнитик дортöм розвальö доддялöм вöв. Додьын, коккесö öтiк ладорö öшöтöмöн, пукалiс югыт чужöма, кузь голубöй плаща нывка. Лесопунктлiсь подводаэсö казялöм бöрын сiя джын кыв вылын орöтiс песнясö, перыта лöсьöтiс гöрд чышьянсö и сюйис сы увтö кымöс вывсис лэдзчисьöм кудриэсö, ачыс шынньöвтiс.

— Привет и салют тэныт, Верочка, рабочöй классянь! — приветствуйтiс сiйö Сергей. — Кытчö сiдз?

— Здравствуйте! — горöтчис Вера. — Йöв тiян детсадö кыска.

— Сiдзкö, йöв — детскöй садö? Эта бур. А ме думайтыштi ни, мыся, былись Пельминборö вöрзин.

Вера гöрдöтiс, дзебис синнэсö.

— Этö ме сiдз. Гажтöм вöрас, вот и öдззи сьывны.

— Бура сьылан... А гортын ли менам приятельö, дед Игнатыс?

— Гортын. Сiя чери сё кыйö. А тi не горючöйла ли?

— Сыла.

Вера дугдiс шыннявны, бытьтö повзьыштiс.

— Весь, пожалуй, мунатö... Вильваыс эшö асывнас вöрзис. Не вуджны öнi сiйö. Петька Угрин пантасис меным, дак Кондовник пыр леспромхозас мöдö мунны.

Сергей öшöтiс юрсö. Быд торсö сiя видзчисис, только не этö. Вöрзис кö Вильва, то он ни сiйö вудж, а тракторыс вöйöма сай берегас. Лесопунктiсь вöрзикö Сергейлöн вöлi ни юрас план: качайтны горючöйсö бочкаэзö и быглявны нiйö йы вылöт. А öнi мый?

— Баитi ме тэныт — бергöтчам бöр, дак эн кывзы! — шыасис Гыров.

Сергей эз и дзарнит сыланьö. Бергöтчыны бöр некöр абу сёр, да мыйöн бергöтчан?

— Фермаас вермам петнытö? — юалiс сiя Вералiсь.

— Ме тай локтi. Только Шагыра логö чуть эг пöр: умöль сэтi. Ме бы тiян местаын, конечно, бертi. Горючöйсö öнi не босьтны.

— Не, Вера, оз туй простоöн локны. Тракторрес сулалöны. Мунам, Гыров, — горöтчис Сергей и трекнитiс вожжисö.

Гыров мыйкö бобгис ас кежас, но горöн протестуйтны эз понды.

* * *

Вöлi бы Комоловыс внимательнöйжык, туяс жö петтöн бытшöмика дзарнитiс бы сiя Виктор чужöм вылö и, конечно, сэк жö казялiс бы, что Викторыс юрын ветлöны кытшöмкö тревожнöй, но долыт думаэз. Чужöны кытшöмкö интереснöй и сьöлöм вöрзьöтана планнэз. Сiя, Гыровлöн чужöмыс, дугдывтöг «орсiс»: то вевттисьлiс паськыт шынньöлöн, то вöлi гажтöм, кыдз арся кымöр, везъясьлiс тревогаöн. Но чулавлiс кынымкö минута, чулавлiс, может, етшажык минутася, и Гыровлöн чужöмыс бöра ни свиттялiс, кыдз волькалöм тракторнöй башмак, синнэс койисö шоныт югöррез. Внимательнöй морт сразу жö вежöртiс бы, что эта коста сы юрын думаэс вöлiсö приятнöйöсь, ачыс Гыров вöлi довольнöй, сы син одзын вöйсасис бур перспектива. А сэк, кöр тырппес жмитчывлiсö, синнэс куслiсö и быдöс чужöмыс вевттисьлiс гажтöм везöн, — наблюдательнöй морт шуис бы, что перспективаыс Гыров одзын ненадёжнöй.

Колö висьтавны, что Виктор эз и думайт сайлавны аслас чужöмлiсь «орсöмсö». Сылö вöлi öддьöн охота, медбы Сергей Комолов ачыс быдöс казялiс и ачыс юалiс, мый йылiсь сiя думайтö, мый сiйö волнуйтö. Эта понда сiя öдззывлiс причинатöг пильскыны-серавны, загадочнöя и хитрöя шыннявны, мигайтны пöвсиннас. Сiя эз вермы спокойнöя пукавны и кажитчис, бытьтö сылö косысся невна улöжык кинкö дугдывтöг чуткалö пыжъянöн. Гыров нельки чеччалiс, кыдз школьник, кöда талун öддьöн бура велöтiс урок, классас медодз и медвылына лэбтiс кисö, но сiйö некыдз оз корö доска дынö. Гыровлö öнi жö, эта жö минутаö, колiс баитыштны Комоловыскöт аслас планнэз йылiсь, сiдз кыдз вежöртiс, что нiйö, планнэсö, пыртны олöмö öткöн оз вермы.

Но Комоловлö часöт вöлi не сы дынöдз: сiя орöттöг мечтайтiс Лена йылiсь и дзарьявны Гыров чужöм вылö, конечно, эз вöв кадыс. Вот мыля Гыровыслö аслыс ковсис пондöтны колана баснисö. Сiя перво серöмтчис, кыдзкö хитрöя нюмыртiс тырп дорресö, сэсся брезгуйтöмöн сьöвзис пиннес коласöт и вöлись юалiс:

— Кывзы, Сергей, висьтав веськыта: любитан тэ миянлiсь Макар Кузьмичсö, уважайтан сiйö?

Сергей веськöтiс спинасö, чышкис чужöм вывсис вачиррез и бöра чеччис телегасис, мед буржыка вежöртны, мый йылiсь баитö ёртыс.

— Мыйлö тэныт этö?

— Да просто сiдз. Охота тöдны, мый тэ думайтан эта обормот йылiсь. Ме дак синöн бы эг адззы сiйö. Бöбöв кытшöмкö, асныра: пыксяс мыйö-нибудь, дак вöрзьöтны он вермы. Кыдз козабаран. Весь только деньга получайтö.

— Толкыс сыись быль етша, — согласитчис Комолов. — Мый понда жö любитны сэтшöмсö?

Гыров радмис. Басниыс пондöтчис неумöля.

— Быдöс лесопунктыс синöн оз адззы сiйö, пельтöм кöинöс. А леспромхозовскöй начальстволö кöть бы мый. Видзöны. Только тырмас! Давай, Серёжа, отсалам лесопунктыслö, тарöвтамö рушмöм кушманöс местасис!

— Кыдз — тарöвтам?

— Да вот сiдз! Бертам горючöйтöг — и шлёпнитам сiйö ва гöпö. Горючöйтöг лесопункт оз вермы пондöтны сплавсö. А сэтшöм дело понда оз ошкö, сетасö сивилёнас.

— Вон мый вöлöма! А тэ думайтыштiн сы йылiсь, кинлö ми ыджытжык вредсö керам? Макар Кузьмичлö или государстволö?

— Мый сэтöн государствоыс?

— Вöрыс кинлöн? Макарлöн? Если не кылöтны вöрсö аскадö, сiя сiсьмас берег вылас. Кинлö убытокыс лоас?

— Этö юаласö сылiсь, лысöй чёртлiсь. Иньдöтасö решётка сайö — сымда и дело. Зато лесопунктыс ловзисяс кокнита. Да и вöрыс оз сiсьмы. Кыдз-нибудь кылöтам. Народ миян боевöй.

— Боевöй... Горючöйтöг неуна чеччалан. Нет, Гыров, ми ваямö горючöйсö и этöн отсалам лесопунктнымлö. А баитны кö Макар Кузьмич йылiсь, то не миянлö сiйö тарöвтны. Миянтöг сивилёнас сетасö.

Гыров осудитöмöн дзарнитiс сы вылö, пондiс мыйкö думайтны ас кежас. Нет, баитны Комоловкöт, тыдалö, не öддьöн кокнит. Видзöт, мый йылiсь пондöтiс — государство йылiсь... Мый жö керны? И Гыров лэдзчисис отчаяннöй шаг вылö. Серöмтчис бöра: мый лоас, дак сiя и ло, колö вайöтны делосö конецöдз.

— Эн тэрмась, Серёжа, — шыасис сiя. — Колö быдöс думайтыштны бытшöмика и действуйтны. Лэдзны сэтшöм удобнöй момент — эта лоö сiя жö, что керавны увсö, кöда вылын пукалан. Тэ только вежöрт: Макар Кузьмичлöн судьбаыс миян киэзын. Быдöс рабочöйес пондасö ошкыны миянöс, если берездöтам сiйö. Мыйлö миянлö сэтшöмыс? Командуйтö, чирзö лёкгоршöн, отирсö нем туйö пуктö, а ми терпитам. Оз туй сiдз!

— Миянтöг, мыся, сетасö лёнас. Вежöртiн?

— Кывзы менö, эн мун. Давай бергöтчам и висьталам, что горючöйсö ми босьтны эг вермö. Мед босьтö сiя, кин тракторсö вöйöтiс. Миянлö колö мездiсьны эта начальниксянь, пöрöтны сiйö. Висьтала веськыта: ме сiдз радми эта идеясянь, что быдöс сета, только пыртны бы сiйö олöмö. Кöр общественнöй дело корö, ме ассим нем ог жалейт.

— Эта интересно.

Гыров дзарнитiс öтмöдöрö, бытьтö мöдiс тöдны, оз я кывзiсь кинкö вöрас, и шуис гажöна:

— Мед сiдз и лоас — сета тэныт Ленасö. Тэ эд любитан сiйö? Конечно, любитан. Ме и ачым, шуны, любита и рад бöбалыштны сыкöт, да мый керан? Тэ только согласитчы мекöт — калькала Ленаыс бердiсь.

А тэ дöжмась сыкöт. Ме отсала тiянлö миритчыны. Этö öддьöн кокнит. Корамö Первöй майнас клубö, невна йöктыштамö, сэсся тэ кольлалан гортас...

Гыров курччöвтiс кывсö. Сiя казялiс, что Сергейкöт шогмö мыйкö неладно. Зонкаыс перво гöрдöтiс, сэсся быдöс чужöмыс сылöн вевттисис паськыт бурöй пятноэзöн и вöлись бледöтiс, чочкоммис, кыдз бумага. Сергей гырчигалiс пиннезнас. Вежöртiс Гыров: лишньöйö баитiс. Вежöртiс, да сёрöн: Сергей сувтöтiс вöввесö. Кыкись и ковсис только чеччöвтны, медбы локны Гыровыс дынö. Гыров кöрчитчис, кыдз важ чуман, юрсö кыскис пельпоннэзас, пондiс вачкисьны кытшöмкö нёштöм, мöдiк планета вылiсь усьöм существо вылö. Быд подлец, тыдалö, смелöй только сэтчöдз, кытчöдз оз тальччö бöж вылас.

— Тэ этö мый, а?! Кин йылiсь сiдз баитан? — пиннес пырйöт шуис Комолов и кутiс Гыровöс моросöт. Неыджыт мыгöра, но паськыт пельпоннэза, сiя чорыта сулалiс повзьöм Виктор одзын, ранитöм зверь моз видзöтiс веськыта чужöмас и готов вöлi быд секундаö трекнитны сiдз, медбы подлецлöн и коскаэс киссисö. Пидзыртöм кулак ачыс лэбис Гыровыс юр вевдöрö. И кин тöдö, мый бы лоис, если эта кулакыс молот моз камгисис бы верблюжöй малахай вылö. Но эта кадö неылын бöра мукнитiс лось, паныт сылö шыасис мöдiк и чожа пондiс кывны, кыдз лöг пороззэз öдззисö пичöтны öтамöдöс. Сергей сайкалiс и жагöника лэдзис кулаксö.

Неылын вöрас, паськыт кушин вылын, тышкасисö лоссез. Кöть не ятнöя — мешайтiс туман, — но сёжö позис адззыны, кыдз нiя ордчывлiсö öтамöд вылö, сувтлiсö бöрись коккез выланыс, баксiсö нёштöма и люкасисö. Страшнöя тышкасьöны лоссес. Нiя пичöтöны öтамöдöс сэтчöдз, кытчöдз öтыс оз усь кок вылiсь, оз вийсьы. Медбы дугдöтны этö тышкасьöмсö, Сергей сюйыштiс öмас куим чунь и шутньöвтiс разбойник моз, сэсся босьтiс бедь и давай клёнöтны пу бердö. Вылына ордчалöмöн, лоссес сьöрсьöн-бöрсьöн пырисö чашьяö.

— Адззылiн, мый шогмö? — юалiс сiя Гыровлiсь, кöда дрöжитiс быдöс вывтырнас. — Да дугды тэ, эн пов! Ме сёжö не вöрпороз, ог понды тышкасьны. Но висьтала: эшö öтпыр казьтан Лена йылiсь — джагöта. Вежöртiн? А öнi — мунам, кытчö иньдiсö.

Подводаэз вöрзисö. Нять да ва. Ва да ырöш гуща кодь нять. Тумансянь ульсöтыс пырö коскаöдз. Сьöлöм сайкалö.

Гыров эз ни чеччав аслас телегаын, эз ни серав да пильскы, эз кеслы пиннесö. Думайтiс. Петiс öддьöн умöля. Кин бы вермис шуны, что Сергей Комоловыс сэтшöм асныра? А эд моментыс кытшöм! Öддьöн ни бур моментыс. Эх! Иньдасö жö сэтшöм лешаксö. Дзугас быдöс планнэз...

Спокойнöя и дыша нöбöтö ассис сöстöм васö таёжнöй ю Вильва гожумнас. Сереброöн свиттялö сiя югыт шондi увтын, орсö сингусялана переливвезöн. Лажмытик местаэзын — перекаттэзын — сiя бергöтлö учöтик галькаэз, больöтö уна шыöн, быд вынiсь старайтчö буржыка волькöтны иззэза пыдöссö. Мукöд гожуммезö, кöр дырöн оз овлö зэррэз, ваыс син одзын пакмö, кокнит парöн кайö неболань, и сэк Вильвасö вуджтöн позьö и кокпятаэз не вадны.

Но полöм петö видзöтны эта ю вылö тулыснас, кöр сiя ружтöмöн чеглалö кыз йы, вöтьö лажмытик береггез и, кыдз лöг пороз, люкалö береглiсь чукыллез.

Эшö вöрись петтöдз нiя кылiсö ловзьöм юыслiсь шысö. Вöрзис Сергейлöн сьöлöмыс, тырис тревогаöн. А Гыровлöн — петух моз сьылiс: шиш öнi босьтан горючöйсö! Макар Кузьмич таралас...

— Локтiмö тёща ордö как раз блиннэз сёйны, — шуис сiя тешитчöмöн.

— Эн бобгы, нярьян, — öмалiс сiйö Сергей. — Тэ жö мастер. Наверно, эшö Макар Кузьмичыс местаö лöсьöтчин?

Дрöгнитiс Гыров — кыдз сiя, эта кикимораыс, тöдiс сылiсь думасö? — и бергöтчис, сайöвтiс синнэсö, öшöтiс юрсö.

Мöсвöдитан ферма дынын, шонтiсян керкуок бокын, Сергей сувтöтiс вöввесö, сетiс нылö турун. Ачыс сэк жö котöртiс Вильва дорö. Ю визывтiс паськыта, увгис и бульчикайтiс, дзик бöбсялöм. Йы пласттэз мыччисьлiсö чукыль сайсянь, уйисö бергалöмöн ю шöрöт, мукöдпырся пыдына сунгисьлiсö пыдöсö, сувтлiсö онняюрöн и, дзик ловьяöсь, люкасисö и зыртчисö öтамöд бердö. Ва пизис ны коласын, бытьтö котёлын.

Öтвыв йы торрезкöт, тожö öтмöдöрö бергалöмöн, кывтiсö вужсорöн летыштöм неыджыт пожуммез, унавожа мыррез, быдкодь колодаэз.

Сергей дзар керис деревнялань и казялiс васис неыджыт цистерна. Сiя сьöд видзис лажмытик берег дорас и, кажитчö, вöрис — перыта кывтiс вапаныт, а трактор бузгисьöма, кытшöмкö ямаö сiдз, что тыдалiс только кабина юрыс, кöда тожö дзик уйис вывланьö. Петька Угрин, тыдалö, мöдöма вуджны юсö перекатöт, но сорасьöма невна и лöсялöма ямаö. «Эх, и сунгисьöма жö! — дивуйтчис Сергей. — Интересно, кыдз сiя ештiс чеччöвтны?»

Тридцать метр... Да, быдöссö тридцать метр мымда вöлi тракторыс дынöдз. Но не весь жö чужис поговорка: «Матын гырдззаыт, да он курччöвт». Весь, пожалуй, локтiсö, кыкöн эстöн нем он соровт.

Дзик тувдöм сулалiс Сергей ю дорас, видзöтiс цистернаыслань и сiдз ылалiс думаэзнас, нельки дрöгнитiс, кöр сы спина сайын кылiс тöдса голос:

— Здорово, нечистöй дук!

Бергöтчис Сергей и адззö: сулалö сэтöн дед Игнат, фермаись сторож, öт кинас малалö важын ни сынавтöм дзор тошсö, мöднас видзö вешьянсö, кöда, тыдалö, оз öшшы кöс кадж вылас. Старик пасьталöма дзелёвöй воротника пась, кокас сюйöма ас керöм калошиа пимиэз. Сулалö и шыннялö кыдзкö хитрöя. Быдöнöс — и шофёрöс, и трактористöс, каждöй механизаторöс — старик шуö нечистöй дукöн, мыля ны паськöмсянь нырö вачкö солидолöн, бензинöн да соляркаöн.

Радмис Сергей, шынньöвтiс дедлö паныт:

— Здорово, здорово, деда! Адззан, гöститны бöра локтi.

Старик только кинас öвтыштiс:

— Самöй раз! Мöдöдз лун няньтöг пукала. Оссис Вильваыс, эг ештö гортö ветлыны. Асывнас Öльöксаникалöн жöникыс вердö бы вöлi миянöс — чапкис сай берегас няньöн сумка — да кытчö тэ: эз вермы миян дынöдз иньдыштны, юыс кватитiс сумкасö.

Старик серöмтчис беззаботнöя, дзик рад вöлi, что сумкаыс усис ваö. Кöс тырппесö нюлöм бöрын шуис невна ошшасьöмöн:

Дата добавления: 2015-11-16