ЧЕГÖМ ЙЫЛА ТОПОЛЬ 3 страница

Кыйи асывнас быдса ведра кельчиэз. Поди, панялыштан ваоксö?

— Пу, пожалуй, няньыс менам эм.

Стариклöн избушка учöтик, лажмыт — юр потолокас павкö. Веськытланись пельöсö Игнат тэчöма кирпичись учöтик горок, сы бокö лöсьöтöм паськыт лабич — узьлан места, öтiк пельöсö дорöм пызанок. Стена вылын шваткöтöны ходиккез, правильно ли не ли, а мыччалöны кад — куим час. «Ух тэ, — думыштiс Сергей, — кык часся дыржык дас верстасö локтiмö».

— Кытöн нö дубаса командаыт? — юалiс сiя. Игнат гуддисис ни мыйкö горöдз дынын, жольöтiс котелокöн, ветлöтiс кыккусiнь кöстiсьöмöн.

— И-и, — нюжöтiс сiя и öвтыштiс кинас. — Асывсянь мунiсö турунокла и öнöдз абу. Баита тай, вöрзис юыс, одзöв сылöтны пондiс. Ендiмö, батя, вердчаннэз кыскалöмöн.

Сергей öшöтiс тувйö плащсö, пыркöтiс ыбöс косяк бердö шапка. Гыров ляпкисис шоныт гор бокö.

— Эта мый! Вердчаннэзтöг лун-мöдсö позьö овны. Ми вот горючöйтöг кольччим, талун тракторрез сувтiсö, а как раз вöр тарлавны колö, — баитiс Сергей.

— Кылi ни. Асывнас укнитiс Петькаыс менам син одзын. Юыс вöрзьö ни вöлi, а сiя сёравно пелитчис. Инмис бы лажмыт местаö — вуджис бы, пожалуй, а сiя лöсялöма ямаö. Арнас сэсь поснитик галькасö экскаваторöн колхозным гарйис, клуб увтö...

Старик мыйкö кошшис лабичок увтiсь, мышкырасис сiдз, что кузь тошнас чышкис джоджсö.

— Юртöм тiян Петьканыт, совсем юртöм. Повзьöтiс менö, нечистöй дук, öнöдз кикок дрöжитö. Эд колö жö... Тшöктöм начальникныт Кондовникöт гöнитны леспромхозас, а сiя, кульпиян, гöнитiс веськыта. Сiдз и думайтi — вöйöтас жеребецсö Вильваас...

— Да тэ мый, деда, неужели уйис?!

— Уйис, юртöм. Кыдз война вылын действуйтiс — буля-боля, буля-боля... Бур — жеребецыс вына, а то вöйис бы. А кытшöм этö терпитнытö? Дошлöй сiя, нечистöй дук. Казялiс, что йыыс шоча кывтö, вот и бöрйис сэтшöм кад, кöр ю вылас нем эз вöв, пырис и уйис...

Эта юöрыс, дзик пыжьян, чувйыштiс Сергейöс. «Вон мый сэтöн вöлöма! А ме öшöтi юрöс, кад эстöн öшта, тьфу!» — сьöвзис сiя и уськöтчас ыбöсö. Петька вермис уйны, а сiя, Сергей Комолов, узьмöм я мый я? Тожö уяс. План чужис простöй: вуджны öнi жö деревняö, пантасьны народкöт, корны отсöт. «Вот пукся Петькаыс моз жö вöв вылö и уя». Но старик, кыдз кöин, чеччöвтiс сы сьöрö, крепыта кутiс фуфайка воротöт, трекнитiс сiдз, нельки юр зэгалiс.

— Эн бöбав, кылiн? Пыр керкуас, сёрнитыштам! Адззан, мый ю вылас керсьö?

Вильва вылöт öнi уйис свальнöй йы. Тыдалö, кытöнкö вывланьынжык вöлöма затор, öнi мезмöма и кывтö Пальник увтöт, ферма бокöт.

— Адзза, деда, но вуджны колö.

Стариклö и кывджын эз тöр. Сiя кыскис Сергейöс, кыдз пыксись баранöс, пуксьöтiс лабичö.

— Перво сёйыштам, пукалам-керам. Видзöтан, йыыс и чулалас быдöс. Сэк вöлись и вуджан. Ачым пыжöн вуджöта.

Бурöсь вöлiсö кыввес, и баитiс старик спокойнöя, убедительнöя. Да и ачыс казялiс Сергейыс, что вöв вылын öнi Вильвасö он вудж, жамнитасö гырись йы пласттэс. А мый жö керны? Дона вöлi быд минута: рыт гöгöрас должен вöрзьыны и Льöмва — Вильвалöн притокыс, вöр тарлавны ковсяс. Уна я сiйö киэзöн туплялан?

И öзйис сьöлöмын биок.

Сiя, эта биокыс, важын ни чепсасис, гыжьясис моросас учöтик бичироккезöн, пондывлiс гусьöн шаитны, но дзик эз тырмы воздух — куслiс бöр. И только Петькалöн уйöм йылiсь юöрыс пöльтыштiс свежöй ру — и чавкнитiс би, вына и быдöс сотана. И сьöкыт ни вöлi сiйö кусöтны.

«А мый, если?..»

Смелöй да дерзкöй решеннёэз кöть кöр локтöны видзчисьтöг и сэк жö корöны, медбы нiйö чожжык пыртiсö олöмö. Сiдз и öнi. «А мый, если?..»

— Ладно, деда, пу чериватö. Мед сiдз и лоас: пукала татöн, кытчöдз йыыс оз кывт, — шуис Сергей. — Сёравно нем он кер. Унажык чериоктö пукты, а ме муна видзöта, кыдз йыыс уйö.

— Вот эта мöдiк басни!

Берег дорö лэдзчикö, Сергей шедтiс йöрись кузь, но вöснитик потш, пешлiс сiйö — крепыт я? Дзарнитiс öтмöдöрö. Некин некытöн абу, только сайись берегас, деревня увдöрас, колхозниккез кыйисö саккезöн чери. Ю важмоз колöтiс и пизис, йы кывтiс орлытöг. Берег дорöт, лэчыт доррезнас мусö гöрöмöн, уйис сажень кык кузя, сöнöгöн вевттьöм йы пласт. Зэр воттез пышналöмась сiйö, бытшкалöмась, дзик пыжьяннэзöн, но пласт вöлi эшö крепыт, дорыс кöдзыта свиттялiс, кыдз югыт мрамор. Сергей кокнита чеччöвтiс сы вылö, потшсö пыкöталiс берегас. Дикöй, öддьöн дзирыт чувство сывьялiс вывтырсö, сьöлöм токöтiс сiдз, бытьтö дзескыт лоис местаас. Пластыс дрöгнитiс и секунда кежö кынмис местаас, кажитчö, думайтiс, кывзыны мортсö или не?

— У-у-ух! — горöтiс Сергей и мымда вын пондiс пыксьыны потшнас. Йыыс жагöника вешшис и вешшис ванырыслань.

— Серёга, берт, берт, нечистöй дук! — чирзiс Игнат, öвтiс киэзнас и готов вöлi ачыс пырны ваас.

Но сёр ни. Дырöв эз кватитчы старик, что ылöтас сiйö бöбмöм зон. Чожа мыйись и петiс избушкасис öтлаын Гыровкöт, котöртiс ю дорö, но сёрмис. Сергей калькалiс ни берегыс бердiсь. Йыыс кывтiс юыслö поперёкмоз. Ваныр кокнита петкöтiс сiйö ю шöрас, медвизыв местаас. И öдззис бергöтлыны сэтöн, качайтны да тойлавны мöдiк пласттэз вылö. Гырись вачиррез чеччалiсö сажень сувда, зубыта бытшкалiсö йыжоллезöн чужöм, шучкöп вадiсö паськöм. Но Сергей эз ни кыв зубытсö, эз видзöт вачиррес вылö. Сiя пессис ванырыскöт, старайтчис петкöтны йысö визыв местасис, иньдöтны сiйö мöд береглань. Эта сылö эз удайтчы, и сiя лöгалiс, гырчигалiс пиннезöн. И кöр вежöртiс, что ванырсö сёравно не вермыны, Сергей примитiс виль решеннё: потшнас матынсьöтiс дынас мöдiк йы пласт и думайттöг лэбзьыштiс паськыт сьöд колас весьтöт, усис кыминь, ёна дойдiс пидзöссö, но потшсö эз лэдз кисис и чожа сувтiс кок йылö. Эта пласт вывсянь сiя чеччöвтiс мöдiк вылö, куимöт вылö. Чылiс ур моз и мыйкö чирзiс, кинöскö видiс, кинлöкö грöзитiс. Морт действуйтiс.

Ферма дынын кузь тоша старик чеччалiс кокись кок вылö, вылына лэбтывлiс киэсö неболань, дзик мöдiс лэбзьыны, кутны этö повтöм детинасö, а может, кеймисис енлö и корис берегитны том мортсö.

— Мый жö лоас? Эх, мый жö лоас?! Вöяс, лешакпиян!

«Сiдз сылö и колö, арттöмлö...» — серöмтчис ас кежас Гыров.

Но йы вылас мортыс пессис, пессис мыдзтöг, гажöн тышкасис юыскöт, эз и думайт сетчыны сылö. Вот сiя пыдына татшкис ва пыдöсö потшсö, лэбтiсьыштiс воздухö, секунда кык кежö кынмывлiс сэтöн и, дзик борда, плавнöя усис паськыт йы тор вылö, кöда увтсянь фонтанöн кайисö чочком вачиррез. Дед Игнат эта коста куньлiс синнэсö и мыйкö шушкис лöзöтöм тырппезöн, тошыс треситчис.

Юыс некыдз эз мöд лэдзны ассис пленниксö. Вына сiя вöлi öнi, орсiс мортыскöт, кыдз шыркöт кань, бергöтлiс йы торресö, паздiс, а öтлаын ныкöт мöдiс пизьдыштны и мортсö. Мукöдпырся кажитчис ни, что вот-вот юыс вермас этö повтöмсö, ньылыштас. Но морт эз сетчы. Сiя пессис. Хитрöй юыс тулыснас. Но и мортыс не дурак. Сiя лöг и тожö хитрöй, пессьö кужöмöн: чеччалö как раз нiя йы торрез вылö, кöдна вöлiсö надёжнöйжыкöсь, крепытжыкöсь.

И вот матын ни берегыс, вит метр кольччис, не унажык. Паныт зонкалö котöртöны ни мужиккез, нiя öвтöны киэзöн, горöтлöны — любöй минутаö готовöсь сетны отсöт.

— Вуджис эд, вуджис, лешакпиян! — радöн и кокнит сьöлöмöн чирзiс старик. — А мый!

И вдруг ыджыт йы пласт, кыдз бöбсялöм, чуйнитiс кысянькö берег дорсянь, петiс видзчисьтöг васис и быд вын сöтiс Сергейыс йы тор кузя, керис сiйö няж-няж. Зонка мöдiс, тыдалö, чеччöвтны эта бöбмöм пласт вылö, но эз ешты и сунгисис ваас.

И дзик не Сергейсö, а Игнатöс кöдзыт ваыс сотыштiс биöн, осьта сикöджöт пырис моросö, сьöлöм дынö, пемдöтiс синнэз.

— Вöйис! Морт вö-öйи-ис!

Старик шупыта бергöтчис Гыровлань, дзик мöдiс корны отсöт.

И шатöвтчис, бытьтö одзас сулалiс кытшöмкö чумнöй: Гыров шыннялiс! Да, сiя шыннялiс. Чужöмыс сiдз и югьялiс, кыдз солдатскöй бляха.

— Тэ мый? Тэ мыйлö радуйтчан? — рявкнитiс Игнат.

— А мый меным, горзыны я мый я? Мый кошшис, сiйö и адззис. Ачыс пырис, некин эз тойышт.

Кокнит походкаöн Гыров мунiс избушкалань, эз и дзарнит бöрас.

— У-ух, подлец! — мороссö видзикö шуис старик и шляпкисис му вылö. Сiя пукалiс вöрöтчытöг, кыдз тувдöм — öшöтчöм тоша, лöзöтöм чужöма, куньöм синнэза. Игнат нем эз вермы горöтчыны и молитваэсö шушкыны эз ни письты.

Но вот сай берегас радöн пондiсö горöтлыны черикыйиссез, чирзыны сiдз, что ваыслöн шумыс эз вермы пöдтыны нылiсь голоссэзнысö:

— Сувт, сувт коккез вылö!

— Да эн ни тэ уй, сэтöн лажмыт!

— Кутчись зорыс бердö. Э-эй, кутчись!

Игнат осьтiс мигайтан синнэсö, перыта чеччöвтiс местасис. «Слава тэныт, господи!» — кокнита ловзисис пöрись морт, кöр казялiс люзьва Сергейöс. Зонкаыс мымда прок чеччалiс сай берегас, старайтчис шонавны. Кинлöнкö заботливöй киэз чöвтiсö ни сылiсь сьöкыт паськöмсö, асьсö кыскисö деревняö. Но Сергей эз вунöт бергöтчыны фермалань. Сiя казялiс стариксö, вылына лэбтiс веськыт кисö, шынньöвтiс счастливöя да гажöна:

— Деда-а! Дзирытжыка пу чериватö, чожа локта!

— Ах, бес, эшö сералö сiя пöрись морт вылын, тешитчö, юртöм!

Игнат мыччалiс паныт кулак: ужо, локтан пö тэ, нечистöй дук...

* * *

Дед Игнат лонтiс избушкаын гор, вештiс би дынö ваöн котёлок и, уссэзас блаженнöя шыннявтöн, кутчисис весöтны чери. Сiя пöвсиннас гусьöник дзарьялiс Гыровлань, кöда пукалiс пызан дынын, кадiсь кадö баитiс велöтöмöн:

— Небытшöма тэ керин, зонка, öддьöн небытшöма. Он тэ пов грехсис: радуйтчан, кöр другыт шедiс бедаö.

Старик эз ни дрöжит, кыдз берегас, повзьöмыс сылöн чулалiс, чулалiс и Викторыс вылö лöгыс и, если баитiс сё жö кöритöмöн, то этö просто привычка сьöртi.

— Морт должен отсавны ёртыслö, а радуйтчыны сы бедалö оз вермы. Сiйöн сiя и морт. Да не простöй, а советскöй. Вот сiдз.

А сай берегас эта коста пизис удж. Эз чулав и дас минута мымда, кыдз чукöртчисö сэтчö мужиккез да зонкаэз, вайисö геззэз, трос, скобаэз. Кинкö ештöм ни доддявны вöв и öнi кыскалiс кыськö кыз керрез; кинкö котрасьöм складö ― вайис горючöй качайтан насос, шланггез.

— Кöркö, кынымкö год бöрланьын, эз тырмы фермаын вердчан, — висьтасис Сергейлö важын ни бриттöм тоша, важ зипуна да ыджыт сапоггеза мужик. — Мый керны? А этадз жö йы кывтiс, тулыс вöлi. Зэрö — не пырны, не петны. Но ми лöсьöтiм плот, тэчим турунсö сы вылö быдса зород, домалiм плот бердас трос и чапким конецсö сай ладорас. Вöввез кыскисö плотсö. Сымда и вöлi.

Сергей умöля вежöртiс, но гогинялiс юрöн. А мужик — сiйö ёрттэс шуисö Зинко Прокопöн — висьталiс ни быдöнлö, мый колö керны, мый бердö перво кутчисьны. Недыр мыйись берег дорын камöтiсö черрез, кылiс смех, а Зинко Прокоп горöтлiс командирскöй басöн:

— Э-э-й, курöггез-морттэз, уджалö буржыка, подзöтö кисойезнытö, адззат, кадыс оз терпит! Вöрöтчö, вöрöтчö, мыся!

Ачыс босьтiс зор, давай быглявны керресö ва дорас, мöдiккез отсалiсö сылö, и чожа вит пу водiсö ордчöн.

Плот керисö надёжнöйö, крепытö. Öтмöдöрсянь кутiсö скобаэзöн, каттисö тросöн, клячалiсö тран-тран — кöть мореöт уй. Важ обоновка бердiсь гыжтöтiсö кузь трос, домалiсö сылiсь öт конецсö плот бердö, а мöдсö Прокоп сетiс кытшöмкö паськыт пельпона, неыджыт мыгöра детиналö, кöда лöсялiс бокас:

— Кут, Петрован, да чапкы троссö сай берегас. Тэ — вына!

И серöмтчис, дзик вöв гöрдлыны пондiс: го-го-го! Петрован кутчисьö вöлi тросыс бердö — чапка пö, но Прокоп кокнита тойыштiс сiйö.

— Гöгыт петас. Тросыс двадцать пуд мымда лэбтö. Домав давай кузьжык гез. Сiйö чапкан.

Трос бердö домалiсö гез, гез конец бердö кытшöмкö кöрттор — медбы сьöкытжык вöлi — и Прокоп пуктiс кыкнан кидолоньсö öм дорас, дзик рупор керис:

— Э-э-й, морттэз-курöггез! Дед Игнат! Кытöн тэнат инькаэт? Кутö гезсö! Да вöввесö доддялö, вöввесö доддялö, мыся!

Кытчöдз фермаын доддялiсö Сергейлiсь вöввесö да домалiсö додь бердö чапкöм гезсö, Зинко Прокоп ештiс висьтавны небывальщина:

— Вот, значит, локтасö Вильва дынö öтпыр старик гозъя думайтöны: кыдз мöд ладорас вуджны? Старик и шуö: «Кутам вон пусö, ме пукся сы вылö и уя. А тэ кыдз-нибудь локтан ни бöрсяням». Ладно, кутiсö васис кыз кер, старик вожасис сы вылö, старухаыс домалiс коккесö пуыс бердö воннезöн — полö, значит, медбы эз вöй юр вердiсьыс. Вот бур дело, ладно. Домалiс и тойыштiс керсö! Старик сэк жö сунгисис ваас, только коккес, кыдз майöггез, мыччисисö ва вевдöрас. Старухаыт клоп вачкис боккес кузя и горöтлö:.«Ай, пöрись, пöрись! Видзöт, кытшöм дошлöй: эз на вудж юсö, а нинкöммесö косьтö ни!..»

Может, сотняись ни Прокоп висьтасис этö, но быдöн, кин вöлi берег дорас, дружнöя сералiс, синваэз петтöдз ваксис. Сералiс öтлаын и Сергей. Гажа лоис сылö, долыт. Эта дружнöй отир отсалас сылö, горючöй лоас сай берегас. Вот и трос нюжалö ни, кыдз струна, дрöгнитiс кок увтын плотыс, жагвыв вöрзис местасис, юкйöвтiсö öтмöдöрö йы торрез.

— Давай, да-а-авай, ыскöвт, милöй! — горöтiс Прокоп. Ачыс зорöн тойлалiс йы пласттэсö, кöдна норовитiсö люкавны плотсö. Но повны вöлi немись: ыджыт плот и трек эз кер, уйис колöтöмöн, только ва öтмöдöрö резсис.

— Уйöны! Ах тэ, кынöм висян, кытшöм бура уйöны! — радуйтчис ферма дынын дед Игнат. — Бура уйöны.

Гыров эз и вöрзьы местасис, шы эз сет. Сiя нельки отсасьны эз понды, сулалiс öшöтöм юра, думайтiс.

Ферма дынын колхозниккез тэчисö пустöй бочкаэсö плот вылö, бура домалiсö гезöн и сiдз жö, кыдз локтiсö татчö, уйисö бöр вöйöм тракторыс дынö. Сергей осьтiс цистерна горловинасö и чуть синваэс эз петö — сэтшöм сылö любо вöлi кывны горючöйлiсь тöдса дуксö... Шоччисьлöмöн — перво öтiккез, сыбöрын мöдiккез — качайтiсö горючöйсö бочкаэзö, шутитiсö.

Погоддя тшыксис. Лажмыта уйисö сьöкыт кымöррез, дугдывтöг пызитiс и пызитiс поснитик зэрок. Но тöдчис — не ар öнi, а гора тулыс. Деревня улицасянь жольöтiсö Вильваö визыв шоррез, юас бульчикайтiсö йы пласттэз, ветлiсö сьöд валлэз. Да и воздухыс не арся: кöть зэрö, а сёравно кылö тулыслöн лолалöмыс — уль тöлок вайöтö вöр ладорсянь сылöм лыслiсь сира кокнитик дук. И уджассьö кокнита, гажöна, не сiдз, кыдз арнас, кöр зэрö.

— Бур, бытшöм делоыс, — баитiс старик Гыровлö. — А тэ радуйтчин ёртыт бедалö. М-да. Не öддьöн сöстöм тэнат душаыт. Кыдз сьöд ой.

— Эн жевгы, пöрись чёрт! Кер ассит уджтö!

— А-а, вон мый вöлöма... Кöин мыччалö ассис пиннесö!

Старик шысеттöг дыр видзöтiс Гыров вылö, дзик мöдiс бытшкыны сiйö аслас пöрись синнэзöн, сэсся тырппес пондiсö дрöжитны, нырыс гöрдöтiс. Игнат эз вермы видзсьыны и чирöстiс быд вын:

— Тэ кинкöт сiдз баитан? Кинкöт, мыся, сiдз баитан, а?! Вот ме тэнö...

Гыров дрöгнитiс, кыскис юрсö бöра сiдз жö пельпоннэзö, кыдз öнтай вöрас. Но не старикыс горöтлöмсянь сiя повзис. Избушка дынö видзчисьлытöг вöрсис петiсö нывкаэз. Вöв вылын пукалiс Вера, а додяс шыннялiс Лена.

— Мый эстöн шогмö? Мыля шум? — юалiс Вера, кöр казялiс лöгасьöм старикöс.

Лена чепöссис Гыров дынö:

— Тэ мыля öтнат? Кытöн Сергейыс? Гыров чöлiс.

— Неыджыт комедь петiс. Кöин жекыртiс пиннесö, — висьталiс старик да юрнас мыччалiс Гыровлань. Игнат вöлi лöг и лöгувьяс висьталiс быдöс, мый шогмис ю дорас.

— Быль сэтшöммес йылiсь баитöны: видзöтан — клад, а гарйыштан — яд. Кыдз гуткулантшак.

— Сiдз ме и тöдi, — шуис Лена и лэдзчис ю дорас.

Гыров вежöртiс, что керны эстöн сылö сэсся нем Колö мунны. И сiя, бытьтö вартлöм, коккесö му бердöт кыскöмöн, оськалiс посёлоклань. Мый сэтчин сiйö видзчисьö? Кыдз быдöс чулалас? Эх, да мый лоас, сiя и ло! А эд моментыс кытшöм! Кытшöм удобнöй случайыс вöлi! Эз вермы пыртны олöмö ассис мечтаэз, ассис планнэз. Охота вöлi берездöтны Макар Кузьмичöс, охота вöлi аслыс пуксьыны сы местаö, да нет — ковсяс видзчисьыштны.

Вöр дорас сiя сувтiс, невна думайтыштiс. Стой! Кытчö мунö? Мыйлö? Кин тöдö, что сiя мöдiс лоны начальникöн? Некин оз тöд. И мыйсянь сылö волнуйтчыны? Но, шыннялiс берег дорын, радуйтчис йöз бедалö... Но, небытшöма видзис асьсö туйын... Но и мый? Чепуха быдöс эта. Гыров эшö воюйтыштас.

Сы юрын чужисö виль планнэз, моросын мыччисис виль надежда, и Гыров бергöтчис бöр. Оз ков волнуйтчыны, оз ков öштыны юр. Колö пессьыны. Но кыдз? Может, вунöтны быдöс и миритчыны судьбакöт?

Морт шедiс кытшöмкö арттöм колесоö, пондiс бергавны, кыдз öшöм.

А ферма дынö уйисö ни колхозниккез. Нiя вайисö плот вылын горючöй. Квать бочка. Эта совсем не умöль. Квать бочка тырмасö лун-мöд кежö. А сэтчин и Кондовник пыр горючöйсö ваясö.

— Серёга! Нечистöй дук! Кытшöм чериваыс петiс! Веськыта шуа — генеральскöй! — чирзiс дед Игнат. — А ноко, чожжыка пызан сайö!

— Некöр, дед! Мöдпырся, — шуис Сергей и гöрдöтiс.

Сiя казялiс Ленаöс.

— Серёжа, тэныт колö сёйны, — баитö Лена. — Тэ öбидитан дедöс.

— Вот, вот! Öбидитас, нечистöй дук!

— Но, если сiдз...

Черива и былись вöлi генеральскöй. Бытшöм кöра, дзирыт. Дед абу жалейтöма черисö. Но сёйны сiйö досповна сёжö эз удайтчы. Шумöн локтiсö колхозниккез, юöртiсö:

— Вöр кывтö.

Вот тэныт и на! Кытшöмкö лесопункт пондöтöм ни сплав. Эх! Колö тэрмасьны. Дона öнi быд минутаыс. Кадыс оз видзчись.

И вот нiя вились туйын. Одзын мунöны Комолов да Лена, бöрас вирскö кынмалöм нырнас Гыров.

— И кысь нiя только мыччисьöны сё? — баитö Лена. — Мунам бы одзлань, а сэтöн гыроввез кыскасьöны.

— Баитiс меным кыдзкö öтiк тöдса колхозник: медсьöкыт, шуö, ыб вылын пессьыны ёгтурункöт. Нетшкан сiйö, нетшкан, быдöс нилян да сотан, а дзарнитан лун-мöд бöртi — и дивуйтчы! — бöра ни йöныс сералö тэ вылын... Но чулалас кад, и öтiк йöн оз кольччы. Колö шуны, эта счастье Гыровыслöн, что миян коллективö шедiс. Сiя эшö лоас мортöн. Ми сылö отсалам. И — тырмас сы йылiсь. Тэ лучше висьтав, кыдз татчö сюрин? — юалiс Сергей и топытжыка вешшис Лена дынö.

— А ми Веракöт! Локтiс сiя посёлокас и висьталiс, что Вильваыс вöрзис. Адззылiн бы тэ, кыдз начальникным медбöрья юрсисö летiс! А сэсся корис дынас техничкаöс, Марфа тёткаöс, и тшöктiс сылö мунны тiян дынö. Висьтав, шуö, нылö, ась горючöйтöг оз локтö. Ась, шуö, Кондовник пыр мунöны, а горючöйсö ашын кежö вайöны. А Марфа тёткаыс, ачыт тöдан, чожа пенсия вылö петас. Кытчö сылö эттшöм туяс? Вот ме и вöзйиси...

Лена жмитчис Сергей бердö, содтiс гусьöн, дрöжитана голосöн:

— Кыдз ме полi... Ох, кыдз ме полi. Ме эд тöдi, что Вильваыс тэнö оз сувтöт, сёравно пыран...

— Чудачка! Мыйись повны? Быдлаын бур отирыс тыр. Быдыс отсöт сетас. Сэтчö жö — тулыс. Мыйись повны?

— Да тулыс...

Нiя баитiсö ассиныс. Гыров чöлiс. Чöлöмöн буржык думайтны. А думайтны ковсис уна, думайтны вöлi мый йылiсь.

Ва да нять. Нять да пидзöсви ва. Öтöрын вöлi пемыт ни. Небосянь сё пызитiс и пызитiс, ю дорын горалiс тулыс, колöтiс визыв ваöн, орсiс йы торрезöн, ыджыт керрезöн, и только берег дорись пемыт вöр увгис гажтöма и тревожнöя, дзик бöрдiс, мыля сылiсь одзöв дзугис тöвся кыз онсö эта тулысыс.

БАИТНЫ ОХОТА

Гожумнас вöлi бур, öддьöн бур. Дзар керан шондiыс вылö, видзöтыштан ас гöгöрись природасö, и сьöлöм пот мунö — гажыс, гажыс мымда!

Бур вöлi эшö и сiйöн, мыля Микша дозирайтiс подасö не öтнас. Татöн, Кона отрубын, отсасис пастухлö сылöн внучек Данько. А эта сэтшöм морт, что гажтöмтчыны некöр оз сет: асывсянь рытöдз öмыс оз тупкассьывлы. Данько велöтöма школаын сотняся унажык песня и гожумбыт сьылiс нiйö Кона отрубын. Шондiыс оз на и мыччись эшö, а Данько сьылö ни. Пондöтас перво «Гулял по Уралу Чапаев-герой», сьылас горöн-горöн, сэсся пондöтас «Широка страна моя родная» да бöра сьылас горöн-горöн. Быдöс песняэсö, мымда тöдö, сьылас. А Микшалö мый сэсся колö? Шондi ваксьö-сералö, быдлаын турун лöзöтö-пежьялö, цветтэз дзардöны, пуэз вылын паськыт листтэз шушкöтчöны, и Данько басöк песняэз сьылö. Бур!

Данько гожумбыт мечтайтiс вийны ошöс. Сiя черöн волькöтiс кузь бедь, йывдiс сiйö, дорис конецас лэчыт кöрттув. Быльнöй пика шогмис.

— Деда, — чирзö ачыс, — петас рукйöсьыс, дак то тайö! Затшка моросас — и готов!

Стариклö и эта сьöлöмви. Челядь дак челядь и эм — мед орсö-гажöтчö. Но ош эз мыччисьлы таво, ветлöтiс мöдiк местаэзöт. Даньколö эта эз гленитчы, а старик вöлi довольнöй: ошыстöг гажажык овнытö.

Тöн Данько мунiс деревняö. Сылöн пондöтчис виль велöтчан год. Пикасö мöдiс перво нöбöтны гортас, но сыбöрын видзöтiс-керис и чапкис избушка сайö. Микша кольлалiс внучексö джын туйöдз, закажитiс буржыка велöтчыны и бертiс бöр. И сэтшöм сылö гажтöм лоис — киö нем оз пыр. Охота кинкöткö баитыштны, да кинкöт баитан? Öтмöдöрын вöр, пуэз дун керсьöмась, пипуэз вежöтöмась ни. Мыйкö шушкöны нiя, а мый — Микша оз вежöрт. Натьтö, норасьöны пуэс, мыля одз локтiс арыс, бöрдöны. Стариклö нiйö жаль, но мыйöн отсалан?

Талун сiя чеччис одз. Вöлi эшö пемыт. Лонтiс избушкаын гор, сувтöтiс горöм одзö котёлок тöнняся шыдöн, петiс öтöрö. Кöдзыт тöлок рознитiс ю весьтiсь туман. Туруныс кельдöтöм. Чорыт сiя лоис, лöсьöтчö косьмыны. Куканнез умöля сёйöны вöрсис арся турунсö, и Микша вашöтiс нiйö ю дорас, виль загонö. Учöтик понок Чирскан гöгöртiс табунсö, ляв-ляв керис, дзик висьталiс куканнеслö: эд петö загонсис, — и никсöмöн локтiс Микша дынö. Гажтöм и сылö, тыдалö. Мунiс Данько деревняö, некинкöт орсны...

— Мый, кöин öбед, ар локтiс? — баитö старик. — То-то жö... Этö тэныт не гожум. Вот чожа зэрны пондас, дак шучкöп пасёктö вадас...

Чирскан кивыляйтiс бöжнас, видзöтiс гöгрöса синнэзнас веськыта Микша чужöмö, вувтыштiс. Оз куж баитны Чирскан. Кужис, дак висьталiс бы, натьтö: эн повзьöтлы менö, не учöтик. Меным и арнас бур. Пыра лапытик кöзок увтö — и некытшöм зэр оз вад. А тэныт, хозяин, умöль. Тэныт баитны охота, а некинкöт...

Да, некинкöт баитны. А öддьöн охота. Кöть бы газетчик я мый я бöра локтiс.

Гожумнас Кона отрубö газетаись корреспондент вовлiс. Неыджыт мыгöра, гöрд рожабаннэза, совсем эшö зоночка. Локтiс сiя верзьöмöн — деревняас вöвсö сетöмась — и сразу жö öдззис сярзьыны:

— Здорово, деда! Газетаись ме локтi, висьтась давай, кыдз уджалан.

— Лок пырам избушкаас, сэтчин и баитам, — рочалiс старик.

Но корреспондент шупыта чеччöвтiс седлоись и эшö шупытжыка кыскис карманiсь блокнот.

— Öтöрас и баитам. Бур татöн. Ужо, деда... Старик эз ешты кваркыш керны, кыдз корреспондент киын лоис фотоаппарат.

— Пуксьы, деда, вöлыс вылö да дзарнит этадз... Но, тöдан, боевöя, шыннялöмöн. Пуксьы, пуксьы, эн пов, рам вöлыс!

А Микшалö мый — тшöктöны, дак колö пуксьыны. Корреспондент отсалiс сылö кайны седлоö, чатыртiс вöвлiсь юрсö. Дед волькöтыштiс тошсö, уссэз гардыштiс, шляпасö бытшöмжыка пуктiс и дзар керис öтмöдöрö. Мирыс, мирыс кытшöм! Кона грива вывсянь быдöс, кыдз ки долонь вылын, тыдалö. Вон керöссэз, ойланяс вöр ны вылын быдмö, куканнез йирсьöны мыс покат вылас, ю сереброöн свиттялö. Видзöтiс, видзöтiс природасö Микша да кыдз горöтас:

— Э-э-э-й!

— Э-э-эй! — паныт шыасис говк.

А корреспондент чеччалöмöн ветлöтiс сы гöгöр, сят да сят только керлiс аппаратнас.

— Но, лэдзчы, деда, öнi эшö му вылас фотографируйта!

— Кыдз сiдз — лэдзчы? Тэ вöв вылас потогривуйт! — шыасис дед.

— Готово. Бура фотографируйтi! И одзсянь и бöрсянь...

— Ах, чомору! Видзöт, кытшöм перыта уджалöма! Да кыдз жö сiдз? Неужели осьта öмöн карточка вылас пета? Ха!

Корреспондент фотографируйтiс сiйö эшö и му вылас. Перво öтнасö, сэсся öтлаын Чирсканкöт. И öдззис юасьны: кыным кукань табунас? Уна я содöны суткинас? Правленнёын висьталiсö пö, что Никифор Павлович табунын привессэс медыджытöсь — кило двестиöн куканнес содöны. Эта быль?

Дата добавления: 2015-11-16