Кытшöмкö царствоын, кытшöмкö государствоын олiсö да вöлiсö мужик да инька. Олiсö нiя хуторын, пырся уджын да тöждöмын, но некöр эз видчö-етшасьö. А челядьныс ― зон да ныв ― тожö уджын быдмисö и вöлiсö счастливöйöсь.
А хутор саяс, дзибья вöрын, олiс колдун. Сiя вöлi öтка да лёкся-лёк и синнас эз адззы счастливöйесö. Этасянь да öтiкöн олöмсянь нач сьöдöтiс да косьмис.
Кöр тöдiс колдун, что хуторас быдöс бур да бытшöм, оныс öшис: кыдз этö позьö йöзыслö овны гажöн, кöр сiйö, колдунсö, нем оз гажöт?
И шуис сiя тшыкöтны этö семьясö:
«Мужик гозъяыс вылö лэдза лёк шогöт, медбы нiя кулiсö, а челядьныс аймамтöг и сiдз куласö».
Лэдзис сiя шогöтсö тöв ньылат, но тöлыслö жаль лоис бура олiсь семьясö, и сiя эз пырт хуторас шогöтсö.
Тöдiс эта йылiсь колдун да иньдöтiс зэра-гыма кымöркöт виль шогöт, но и кымöрыс боки мунiс.
Сэк колдун лэдзис шогöтсö видз вылiсь сук туманö. Мужик гозъя петiсö видз вылас ытшкисьны да пондiсö шогавны и сэсся эз ни веськалö.
Ваню да Маню кольччисö öтнаныс да горесяняс кутчисö синваöн миссьыны. А колдун, кöр тöдiс эта йылiсь, нельки чужöмнас югмис.
Оланыс хуторас умöль лоис, ой кытшöм умöль!
Но бурыстöг умöльыс оз жö овлы: кывсис бедаыс йылiсь деревенсалö, и нiя отсалiсö челядьыслö кытöн кылöн, кытöн уджöн. И соя-вона эз чапкö гортнысö, асьныс хозяйство бердö кутчисö: зоночка ― ыб вылын, нылочка ― керкуын керö. Эта бердö нiя аймамныссянь велалiсö, а бытшöм отсалiссезöн нылö вöлiсö лэчыт син да мывкыда юр.
Хуторын жагвыв оланыс лöсялiс, соя-вона вились пондiсö лöня и дружнöя овны.
Колдуныслöн гортас не кöш, не нöш абу, а лöгыс да завидыс уна. И пондiс сiя дзугны соя-воналiсь лöня олöмсö.
Иньдöтiс сiя сьöд канькöт дзуг да видчöм, но Манюлöн Кот Котович сьöд каньсö хуторыс дынö матö эз сибöт.
Иньдöтiс колдун дзугсö да видчöмсö сьöд понкöт, да Ванюлöн Дружок поныс сьöд понсö дзиб вöрö вашöтiс.
Сэк пöрись колдун пöртчис том зонкаö и, кöр Ваню абу гортас, пондiс вовлыны Маню дынö. И аслас колдовскöй вынöн чожа мыйись рамтiс нывкасö, и Маню пондiс радейтны колдунсö да дугдiс кывзыны вонсö.
Умöльсö медодз казялiс Кот Котович: кöр локтас том зонкаыс, кань пондö пышкайтны, пиннесö да гыжжесö мыччавны.
― Йöрт-ко тэ сiйö амбарö, ась шыррезкöт тышкасьö, ― велöтö Манюсö колдун. ― Сылö и миянлö буржык лоас.
И Маню Кот Котовичсö йöртiс иган сайö. А колдуныс амбарас вашöтiс сэрпöсь шыррезöс. Кот Котович нысянь сэрпасис да и кулiс. Сэсся умöльсö казялiс Дружок. Кыдз локтас вöралансянь да нюкайтас колдуныслiсь коктуйсö, сэтшöм норöн да нёштöма унньöвтас, что сысянь колдунсö гортас кезöтö.
― Оз я шогав миян Дружокным? ― тöждö Ваню. ― Али Кот Котовичсö оз вермы вунöтны?
А колдун Манюлö висьталö:
― Бöбсялiс поныт. То ме лекарство лöсьöтi, тэ верд сiйöн Дружоксö.
Рытнас, кöр Дружок бертiс вöралансянь, Маню сетiс сёяноксö поныслö, и ашынас Дружок вöлi ловтöм ни.
Ваню думайтö: мый пö лоис Дружокыскöт? Пондiс юасьны сойыслiсь, и Маню висьталiс лекарство йылiсь. Ваню вежöртiс: вийисö понсö лёк отир.
Ванюлö жаль понсö, некинкöт лоис вöравны. Пукалö да тöждiсьö. Сэтчö оградаö пырö том морт, небыт сёрниа да рамыник. Маню казялiс сiйö, да чужöмыс сiдз и пыкнитiс биöн, а Ваню сьöлöмнас кылiс, что локтiсьыс ― умöль мöрт. Гöсь шуис, что олö ылiсь деревняын, и сэк жö веськыта висьталiс:
― Сет, Ваню, сойтö ме сайö. Ваню орöтiс:
― Некöр ог сет! Мун татiсь и сэсся эн вовлы! И сойыслö эз тшöкты сыкöт тöдчыны.
Мунiс кортöм гöсьыс, но сэк жö и бöр локтiс, кыдз Ванюыс гортсис петiс. Локтiс да шуис:
― Давай, Маню, пышшам татiсь.
Маню оз бы: горт пельöсоксö жаль чапкыны. Но и зонкасö жаль: пондiс эшö ёнжыка радейтны.
― Сэки то кыдз керам, ― шуис вежöм чужöмаыс. ― Лэдзчись висянö да висьтав, что висянтö вермас веськöтны только кöин йöв. Сiя мунас кöин йöлысла да и пыр кеж кольччас сэтчин.
Рытнас Ваню ыб вывсянь локтiс, а Маню куйлö да ружтö.
― Мый лоис, сойö? ― юалö воныс. А сойыс шуö:
― Сэтшöм висян кутчис, нельки лэбтiсьны ог вермы. Не веськавны лоас, он кö отсав тэ, вонiньöй.
― Ме быдöс кера, только висьтав, мый колö.
― Вöтаси ме, бытьтö кöин йöв юи да веськалi. Вот бы йöвсö адззин!
Ваню кöсйисис, но кысь адззыны ― некöр эз кывлы.
Мунiс сiя пöрись вöралiссез ордö, а нiя гортаныс абу. Мунiс вöрö и панталiс сэтчин сьöд шляпаа том вöралiсьöс. (Этö колдуныс жö вöралiсяс пöртчöма.)
― Вöралiсь, а вöралiсь! Он я тэ тöд, кысь кöин йöв адззыны?
― Кыдз не тöдны? Вот мун эта туёк кузя. Сiя пыртас тэнö вöрö, сэтчин кушин вылiсь казялан керкуок. Сiя керкуокын олö бытшöм старушка. Сылöн быдкодь йöлыс тыр.
Некытшöм керкуок вöрас эз вöв, а вöлi сэтчин лёк кöиннэзлöн поз. Ваню котрасис гортас гырничла да и пырис висьталöм туй кузяс. Мунiс, мунiс, туёкыс öшис сук тэльын, а сы одзö сувтiс рукйöсь гöна мампöв кöин, эрзöмöн юалiс:
― Мыйлö вöр-р-рас пыр-р-рин, зонка? Кыдз лысьтiн дзугны миянлiсь лöньсö? Эта понда тэ юртö татчö колян!
Ваню, кöр чулалiс полöмыс, висьталiс:
― Ась кöть мый лоö, только ― öддьöн кеймися ― перво сетыштö невночка ассиныт йöвнытö, кöда сiдз колö менам шогалiсь сойöлö.
― Миян йöлыс морттэс понда абу, ― висьталiс айпöв кöин да жекыртiс пиннесö.
― Ноко öвсьы, пöрись, ― панöвтiс сiйö мампöв кöиныс да рамжыка ни шуис: ― Ме сета йöлöс, босьтас кö мортыс менчим шогалiсь пиянöс да вердас мöс йöлöн. Сэк, может, и оз кув пиянö.
― Ме сiдз и кера, ― шуис Ваню. ― Миян эм мöсыс. Мампöв кöин сылö сетiс ассис йöвсö да пиянсö.
Гортас Ваню чожжык сетiс вайöм йöвсö сойыслö да висьталiс:
― Ю, сойö, да тэрмась веськавны!
Воныслö Маню и спасибосö эз шу, а йöвсö кисьтiс сэрпöсь ведраö, кöр воныс петiс гортсис.
Чулалiс кынымкö лун, и вежöм чужöма колдун вились велöтö Манюсö:
― Лэдзчись висянö да кор ош йöв. А ошшес керасö ассиныс делосö.
Сiя жö лунö Маню корис вонсö:
― Дона вонiньöй менам! Ме эд бöра шогала ― не ки, не кок ог вермы вöрзьöтны. Эн жö чапкы менö, отсав!
― Ме быдöс кера, мый верма.
― Вöтаси ме, бытьтö юи ош йöв да веськалi. Вот адззыны бы сiйö!
― Пондыла, сойö.
Босьтiс Ваню гырничок да мунiс дёка вöралiссез ордö, а сылö паныт пöрись вöралiсь, но юр вылас сiя жö сьöд шляпаыс, кöдö томыс новйис (эта бöра колдуныс вöлi).
― Вöралiсь, а вöралiсь! Он я тöд, кысь позьö ош йöв адззыны?
― Кыдз не тöдны? Мун эта туёк кузя, сiя вайöтас тэнö керкуок дынö, сэтöн бур лекарь олö, сылöн быдöс эм, ― висьталiс колдун.
Ваню мунiс, мунiс и пырис дзиб вöрö, кытöн только ошшес и олöны. Кытшöвтiсö ошшес Ванюсö ― лöгся-лöгöсь.
― Мыйлö миян ошпозъяинö пырин? Али аслат оланыт не дона?
― Оланö дона, ― шуис Ваню. ― А эшö донажык ― сойöлöн оланыс. Одö кö сетö ассиныт йöвнытö, дак сэсся не овны сылö.
― Миян йöлыс морттэс понда абу, ― висьталiс пöрись айпöв ош.
А мампöв ош шуис:
― Ме сета йöвсö, босьтан кö менчим шогöтöсь пиянöс гортат да юкталан мöс йöлöн. Сэк, может, и оз кув сiя.
― Ме сiдз и кера.
Вайис Ваню гортас йöвсö да ошпиянсö и сэк жö сойыс дынö:
― Ю-ко, сойö, ош йöвсö да веськав перытжыка! Колдунлö и öнi эз лöсяв, и сiя решитiс мöднёж вийны
Ванюсö. Вайис Манюлö ядсора чери да тшöктiс рыт кежас керны черинянь. Маню пöжалiс чериняньсö и ужнайтiкас пуктiс пызан вылö.
― Талун пöжалi тэныт медчöскыт сёянтö, вонiньöй, ― шуис Маню. ― Сёй пöттöдз, а ме муна подасö вердны.
Ваню эз и юав, кысь чериыс, кутчис черинянь бердö, но кöинпиян кутiс сылiсь соссö да унньöвтiс нёштöма:
― Уй-ю-уу!
― Мый нö тэ уннялан, ёртушко? Чериняньсö сёян бы? Дак на тэныт! ― И чапкис кöинпиянлö торок.
Кöинпиян нюкайтiс торсö да несйис.
― Он сёй, дак пöт, ― висьталiс Ваню да бöра черинянь бердас кутчис. Но сэтчö кöинпиян да ошпиян öтдруг унньöвтiсö:
― Уй-ю-уу!
Лöгасис Ваню, чорыта шуис:
― А ноко порогувтö! Эд мешайтö меным сёйны! ― И пондiс ни сёйны да кылiс:
― Эн сёй! Кулан! Ваню синнэсö барöтiс:
― Кин этö баитö?
Кöинпиян да ошпиян öтiк öмись горöтчисö:
― Этö ми, тэнат бытшöм ёрттэз.
― Кин велöтiс тiянöс баитнытö?
― Сiя бедаыс, кöда тэ дынö локтiс.
― Но, спасибо тiянлö! ― висьталiс Ваню да корис сойсö и юалiс:
― Маню, висьтав ноко, кысь тэ черисö босьтiн? Ме öнi важын ни эг кыйлы.
Бöбöтiс Маню:
― Деревняись вайисö. Бытшöм отир. Ваню сылö:
― Чериняньсö эн сёй, сiя ядсора.
― Кин висьталiс? ― дивуйтчис Маню. Ваню мыччалiс пызан вылö:
― То гуттэз потшшуйтчисö ― коккезнысö вывлань лэбталiсö...
Ашынас локтö радся-рад колдун: надейтчö, что Ваню абу ни ловья. И кöр тöдiс, что зонка ыб вылö кайöм, стрась лöгасис. И вились Манюсö велöтö:
― Лэдзчись шогöтö и тшöкты вайöтны вöр сайись лекарьöс. Лекарь баня лонтас да тшöктас тэнö баняас вайöтны. Воныт вайöтас, а сэсся лекарьыс ас мознас керас.
Этö баснисö кылiс кöинпиян да висьталiс ошпияныслö. И шуисö нiя: öммез кытчöдз не осьтлыны, а кыдз локтас лекарь, сэк висьтавны Ванюлö, мый мöдö керны колдун.
Ашынас Ваню лöсьöтчö мунны ыб вылö, а Маню сё ольпасьын туплясьö.
― Мый нö лоис, сойö? Он я шогав?
― Дона вонiньöй менам! Тöн ме черитор сёйи да сiйöн ачымöс тшыкöтi. Тэ бы корлiн вöр сайсис лекарьсö.
Вермис я Ваню не кывзыны сойсö? Сiя доддялiс вöв да вайöтiс лекарьсö, кöдö важын ни тöдö. И эз казяв сэтшöмтор: лекарь некöр эз новйыв шляпа, а сэтöн шляпа пуктöма, да как раз сэтшöм сьöдö, кытшöмöсь вöралiссес новйисö.
Кöинпиян да ошпиян казялiсö лекарьсö да лöга мурзьыштiсö, но эз на пондö шумсö лэбтыны. А баняыс лонтiсьтöн, висьталiсö Ванюлö колдунлöн лёк удж йылiсь.
Ваню ошкис ёрттэсö, но керис сiдз, бытьтö нем оз тöд сойыс йылiсь, кöдö тшыкöтiс колдуныс.
Вот лекарь ветлiс баняö да видзöтiс ― ештiс я? (А шуны кö веськыта, дак колдун баня гор вылас тэчис яд.) Локтiс керкуас да висьталiс Ванюлö, мед сiя нуöтiс сойсö баняö.
Баня посöдзас лекарь тшöктiс:
― Мун-ко, Ваню, коросьсö кой, кытчöдз мийö чöвтчам. А Ваню сылö:
― Дак ме ог тöд, кыдз тэныт койны. Пыралiн бы ачыт.
― А мый не тöднытö? Кöш ва шульгалань, кöш ва веськытлань, кöш ва корось вылас.
― Но, коя инö.
Пырас Ваню баняас, койыштас васö. Кылö: öтöрсяняс ыбöссö пыкöталiсö.
«Но, видзчись, лёк морт! Тэ öнi босьтан ассит!» ― лöгасис Ваню и, медбы не пöдны ядсора жарас, чожжык полатёк увтас пырис. А сы увтын, кöд коста баняыс лонтiсис, зонка стена увтас гарйис осьта, и öнi кокнита петiс öтöрас, тупкалiс осьтасö да енöвтчис баняö пыранiн дынас.
Лекарь видзчисьöв-керис да пырис баня пытшкас, медбы видзöтны кулöм Ванясö.
А Ваню шарк пырис баня посöдзокö да и пöдналiс колдунсö баня пытшкас...
Сiя кадсянь Маню бöра лоис бытшöм мортöн да сойöн ― Ванюкöт пондiс керны öтувья.
ЮТУЙДIСЬ
Важынся-важын öтiк ю дорын сулалiс ыджыт деревня. Отирыс сэтöн олiс бура и етша мыйись тöждiс: юыс юкталiс, миськалiс да и вердiс. Но аслас бур понда отирыссянь юыс тöдiс да адззис öтiк лёк: вельмöм морттэс сыö кисьтлiсö нятьöсь ва, чапкисö ёг да кулöм пода и берся неколантор.
Мывкыда юра стариккес велöтiсö:
― Эд сэрпöсьтö васö, отир! Юыс лöгасяс да пышшас миян дынiсь. Мый пондам юны? Мыйöн подасö юктавны, миссьыны, миськасьны, карчйöррез киськавны? Кысь ваям черивасö да чериняннесö?
Отирыс эз кывзö стариккесö, и юыс эз ло. Вот сэк и повзис деревняыс: кыдз одзлань овны? Мыйсянь юыс косьмис?
Кинкö мывкыда юраэс коласiсь висьталiс:
― Юыс дзебсисис му пытшкас. Колö адззыны сiйö да бöр татчö бергöтны.
Кыдз висьталöма, сiдз и керöма.
Косьмöм ю пыдöсас гарйисö пыдын яма. Сэтшöм пыдынö, что лэбтöм мусис шогмис керöс. А ваыс абу.
Гарйисö эшö пыдынжыка ― лэбтöм мусис шогмис мöдiк керöс.
А ваыс абу.
Пырисö муас сы пыдына, что лэбтöм мусис керöсыс кымöрöдззас кайис.
А ваыс абу. Но яма пыдöсас адззисö осьта, кöда кежис кытчöкö бокö.
― Этö миян юным сэтчинö пышшис, ― шуисö мывкыда юраэс. ― Кинлöкö колö мунны сы туй кузя.
Кыдз висьталöма, сiдз и керöма.
Иньдöтiсö öтiк старичокöс, кöсыникöс да учöтикöс, но зэв чожöс, и тшöктiсö:
― Видзöт, мый сэтчин. А панталан кö юнымöс, дак пондыв корны, медбы отирыс дынö бертiс.
Мунiс старичок бокись осьтаö. Перво кынöм вылас кыссис, сэсся нёльподöн сувтiс, а сыбöрын и сувтсöн пондiс мунны.
Мунiс, мунiс, и оссис сы одзын ыджытся-ыджыт пещера. И вöлi сэтöн не югыт, не пемыт, а дзардiс кытшöмкö лöзкодь югöр. И быдлаын боргис да польöтiс ва: сiя вöлi кок увтас, шульгаланьын и веськытланьын, и нельки юр вевдöрас, но сэтiсь улö и воть эз вотьышт, а учöтик шороккезöн паськалiс потолокöттяс.
Ылалiс старичок да эз и казяв, кöр сы дынö сибöтчис учöтик, только сы пельпонви, морток. Сiя ляч пасьтöм, и кучикыс лöз видзис да свиттялiс, дзик тöлiсь югöрсянь. А киас вöлi кузь шатин.
― Кысянь тэ локтiн, мортöй? ― юалiс мортокыс.
― Деревнясянь, кöда му вевдöрас.
― Мый тэныт месянь колö?
― Ме не тэ дынö.
― Сэк мун эстiсь. Но тöд: мöдiк ловьяöс татiсь он адззы.
Эта му вылын хозяиныс ― ме, а шуöны менö ― Ютуйдiсь. Быдöс, мый эм эстöн и саясжык, сё менам. Ме весöта васö, бергöтла иззэз да туйда юсö сэтчин, кытчö меным колö. А юэс менам быдкодьöсь. Вот видзöт, ― сiя нуöтiс старичоксö саясжык да сувтчис чочком юок дорö. ― Эта ― киселёвöй берега йöла ю, а сы сайын ― огурец берега винаа ю. Ны увтöт котöртö вира ю, а юр вевдöрат ― биа. Бöрйы, кытшöмö колö, ме янсöта сэтiсь шорок.
Старичок думайтöв-керис да шуис:
― Тэ видзчись невна. Ме отирыскöт баитча, сэсся висьтала.
― Видзчися, мортiньöй. Меным эд тэрмасьнытö немлö. Ме ог пöрисьмы, ме некöр ог кув.
Петiс старичок отирыс дынö, отирыс бöрйисö медмывкыда юраэсö, и нiя пондiсö думайтны: кытшöм ю босьтны Ютуйдiсьлiсь.
Пукалöны косьмöм ю дорись берегас, бергöтлöны юраныс: киселёвöй берега йöла ю ― öддьöн бур! Лоас тэныт и
рись, и ви, и берся кисельыс ― сёй, мый тэнат сьöлöм сьöртi!.. Но, а мыйöн миссьыны, мыйöн киськасьны? Мыйись шыд да черива пуны ― йöвсис жö?
Оз, оз лöсяв деревняыслö киселёвöй берега йöла юыс. Может, винаа юсö?
Сiя бы неумöль: гумыштiн юсис ведраок вина ― и празднуйт праздниксö, ачыт ю и мöдiккезöс потшшуйт, а деньгаыт ― дзонь. Но эд сiдз-ту йöзыс мерасö öштасö и бурыс туйö беда лоас.
Оз, оз лöсяв деревняыс понда винаа юыс.
Вира да биа юэз йылiсь мывкыда юраэс и баитны эз пондö: нысянь öтiк лёк.
Кольччö öтiк: Ютуйдiсьлiсь корны ваа ю, кытшöм вöлi отирыслöн одзжык. Сiдз и баитчисö-шуисö.
Мывкыд юра учöтик старичок вились иньдöтчис му пытшкö.
Локтiс Ютуйдiсь дынö, висьталiс:
― Оз ков миянлö некытшöм ю, сет миянлö сэтшöмö, кытшöм вöлi одзжык, да мылякö косьмис.
― Ö-ö! ― шуис Ютуйдiсь. ― Дак тэ как раз сiя деревняись, кöда сулалö косьмöм ю дорас?
― Сiдз, сiдз и эм.
― Этö ме пышшöтi тiянлiсь юнытö, ― висьталiс Ютуйдiсь.
― Мыля? ― дивуйтчö мывкыд юра старичок. ― Мый мийö умöльсö тэныт керим?
Ютуйдiсь шуис:
― Тiйö умöльсö керит не меным, а матушка-юыслö. Сiйö эд берегитö, эд жалейтö и быдсöн сэрпöсьтiт. Сiдз видзöны только сэтшöмтор, кöда оз ни ков.
― Но ваыстöг миянлö некыдз оз позь! ― горöтыштiс старичок.
― А одзжык мый нö думайтiт?
Мывкыд юра старичок сувтiс пидзöс вылас, пондiс кеймисьны валöн хозяинлö:
― Шондi вылас миян садитöмным косьмö! Подаыс умöльтчö да баксö! Миян челядьыс да пöриссес ютöг кулöны!
Му пытшкись морт нем эз кывзы:
― Асьныт тшыкöтiтö юнытö, и мöдiкыс тiянлö оз ло. Но ватöг отирсö ог коль.
Сiя öвтыштiс борган шатиннас. Кытöнкö ылын пондiс мыйкö гымöтны-камöтны, и сы бокöт уйыштiс ыджыт из, а изыс бöрсянь пондiс больöтны ва ― сöстöм, лöзвевья.
Ютуйдiсь шуис старичокыслö:
― Мун, морт, горт деревняат да висьтав отирыслö сiдз: «Ютуйдiсь тiянланьö иньдöтiс ва сöн. Кошшö васö му пытшкись».
Сiя кадсянь, шуöны, и кутчöмась колодеццесö гарйыны. Вот и сказка помассис ― вöлi, да висьтассис.
Дата добавления: 2015-11-16; просмотров: 43 | Нарушение авторских прав
| <== предыдущая страница | | | следующая страница ==> |
| ПЕТРУНЬ ДА ПЕТЯ-ПЕТУШОК | | | КЫДЗ ДАНЬКО ИНЬСÖ МЕЗДIС |