БЫДÖССЯ ВЫНАЖЫК ВА

Кывзö жö мый вöлi...

Öтiк инькаöс зэлöтiс беда: бандиттэз вийисö мужиксö. Да мый мед ни умöльыс ― нывныс син одзын. И пондiсö мама-ныла синва кисьтны шорöн да горесö панявны содззезöн.

Сiдз нiя олöны месяц, и кыкö, и куимö. Инькаыс жагвыв пондiс бурасьны, а нылыс вуджöр моз ветлöтö, айсö некыдз оз вермы вунöтчыны. Мый только эз кер мамыс ― нем оз отсав. Туйдöтiсö мамсö тöдiсь дынö, кöда пö вермö веськöтны шогалiсь мортсö ыджыт тöждöмсянь.

Инька мунiс тöдiсьыс ордö, кеймисьö сылö:

― Кер жö сiдз, медбы нылö вунöтiс айсö вийöм йылiсь.

― Сэтшöм бедаэсö ме ог ни вермы вашöтны ― пöрисьми.

Но велöта, мый керны: асыв ладорын эм ю, кöдаын ваыс ― быдöсся вынажык. Адззан кö сiйö васö, дак, может, и нывтö веськöтан...

Дöва игналiс керкуоксö, кышалiс сивьяс ыджыт котома, босьтiс киас бедь да мунiс нылыскöт му кузяс кошшисьны: может, кинкö висьталас пö туйсö сiя ю дорö.

Лун бöрсянь лун, лун бöрсянь лун ― и неделяыс кыдз бытьтö эз и вöв.

Локтiсö мама-ныла сьöд вöр дорö, и сэсся туйыс эз ло. Мöдiсö ни бертны, да вöр пытшксис казялiсö важмöм керкуок и мунiсö сэтчин. И нылö бура лöсялiс: сэтöн олöма бытшöм сьöлöма старуха. Сiя пыртiс туй морттэсö гортас, удiс-вердiс, юасьöв-керис да велöтiс:

― Ме туйдöта тiянöс сойö дынö. Сiя пятьдесят годöн месся одзжык чужис и тöдö унажык. А сы понда меным ваятö, ежели адззатö, быдöсся вынажык васö ― сiя веськöтас менчим вынтöмсялöм коккезöс.

Мамыс радся-рад: мöдö лöсявны эдö. А нылыс важмоз кымöра чужöмöн ветлöтö да сё чöлö и чöлö.

Эта старуха ордö нiя кольччисö ой кежö да джодж миськалiсö, песласисö и шогалiсь старухасö баняын пывсьöтiсö. И асьныс, конечно, миссисö.

Ашынас чеччисö эшö пемытöн. Хозяйкаыс нiйö вердiс да туйö петiкö велöтiс:

― Сета тiянлö ассим туйдiсьöс, сiя вайöтас тiянöс сойö дынöдз, ― и пуктiс ны одзö нинiсь кыйöм чочком тшакыль. ― Кытчö сiя тарöвтчас, сэтчин и мунö. Сiя тiян туйдiсь и дорйись лоас. Да эд жö вунöтö, мый ме кора!

― Огö, огö вунöтö, бур мортiньöй! ― шуисö мама-ныла да петiсö одзланись туйö.

Тарöвтчö ниновöй тшакыль пуэз коласöт, орддьö колодаэсö, гöппесö. Мама-ныла öдва вöтчöны сы сьöрö.

Мунiсö, мунiсö ― паныт кöин пыть-пыть петiс да лöсьöтчö чеччöвтны морттэс вылö. Ниновöй тшакыльыс кыдз рявкнитас, кыдз эрöстас ― кöиныс бöжсö шамыртiс да пуэс коласö вотьыштiс.

А тшакыль сё ылöжык да ылöжык тарöвтчö, сы сьöрö мама-ныла тэрмасьöны.

Лун бöрсянь лун, лун бöрсянь лун ― и месяцыс кыдз бытьтö эз и вöв.

Кöр вöрыс шочамис, мама-ныла кушин дорись казялiсö важмöм керкуок. Тшакыльыс веськыта сы дынö сибöтчис, посöдзö чеччöвтiс, куимись ыбöс бердас вартсис. Ыбöс оссис да лэдзис пырны локтiссесö.

Ниновöй тшакыль кайис сы öлöдзö да лöньсис.

Мама-ныла кöсйисö старухалö:

― Вöснитик шöрток тэныт, баб! Ми томжык сойытсянь тэныт юöр вайим.

― Адзза, адзза: сылöн туйдiсьыс тiянöс вайöтöма. А мыйлö бы ме ковся?

Дöва висьталiс аслас горе йылiсь, быдöсся вынажык ва йылiсь, и старуха шуис:

― Ме кывлi сэтшöм ваыс йылiсь, но кытшöм юын сiя, этö ог тöд. Иньдöта тiянöс пöрисьжык сойö дынö. Сiя сто годöн месся одзжык чужöма и унажык тöдö. А сы понда меным быдöсся вынажык васö ваятö, ежели адззат. Сiя менчим юр висянöс вашöтас.

Мамыс радуйтчö, что делоыс лöсявны мöдö, а нылыс чöлö да ыш лолалö.

Кольччисö мама-ныла узик кежö да берся уджöн старухаыслö отсалiсö: джодж миськалiсö, песласисö, нянь пöжалiсö. Эшö старухасö баняын пывсьöтiсö да и асьныс миссисö.

Ашынас мама-ныла чеччисö медодзза петуххескöт да и туйö лöсьöтчисö. Старуха велöтö нiйö:

― Томжык сойöлöн туйдiсьыс мекöт кольччас, а тiянкöт мунас менам туй мыччалiсьö. Сiя туйсö бура тöдö и мунiкас быднёж отсалас. Мунö сы сьöрö повтöг да и ме понда васö эд вунöтö босьтны.

― Огö, огö вунöтö, бытшöм мортiньöй!

Старуха чапкис джоджас узöра йи, йиыс тшакыльтчис кольцо моз ― да ыбöс дынö. Ыбöс оссис, йи чеччöвтiс посöдзö, и мама-ныла тэрмасьöмöн петiсö туй мыччалiсь сьöрö.

Йиыс то кольцо моз тарöвтчö, то змеёк моз кыссьö ― мунiссес öдва вöтчöны сы сьöрö. А одзаныс ― не вöрок, не мысок ― сё волькыт видз да видз.

Мунiсö, мунiсö ― ёгтурун колассис шарк петiс рукйöсь зверь да мöдiс уськöтчыны морттэс вылö. Мама-ныла и ойнитны эз ештö, кыдз йиыс бöбись рявöстiс. Рукйöсь зверь шамыртiс бöжсö да бöр татшкисис ёгтурунас.

Лун бöрсянь лун, лун бöрсянь лун ― и эшö öтiк месяц чулалiс. Сэк вöлись волькыт видзыс бырсис, и мама-ныла казялiсö ыджыт керöс, а сы увтiсь ― изовöй нето сёйись вартöм керкужуг.

Туй мыччалiсь вартсис ыбöс бердö, ыбöсыс оссис, и локтiссес казялiсö старушкаöс. Сiя вöлi учöтик да кöсыник, но визыв уджалiсь ― анькытш йикиись перыта бöрйис анькытш.

Йиыс чеччöвтiс старушка пельпон вылö да водiс шоччисьны.

― Сто пуд анькытш тэныт! ― кöсйисö хозяйкалö мама-ныла.

― Ми шöрöт сойытсянь тэныт юöр вайим.

― Адзза, адзза: сылöн туй мыччалiсьыс вайöтöм. А мыйлö бы ме ковся?

Дöва висьталiс аслас горе йылiсь, и старушка шуис:

― Ме тöда, кытöн сiя юыс, но тiянлö сы дорöдз не локны. Менам олiкö уна ни пондылiсö сы дорö петны, да бöр эз и бертö. Охота овны ― мунö гортаныт.

― Отсав, бытшöм мортiньöй! ― кеймисьö дöва. ― Мый бы эз ло, а ми мунам. Сiя ватöг миянлö шудсö не адззывны.

Старушка жалейтiс шудтöм инькасö да дугдiс сэсся панласьны:

― Мед инö лоас сiдз, отсала. Сета тiянлö ассим медбöрья отсасисьöс. Мöддэс öшисö сiя ю дорö мунiкö. А сiя юыс ― му пытшкын, пыранiныс ― из пытшкын. Сюран му пытшкись мирас ― шудтö панталан, он куж ― беда панталан.

Старушка шовк вачкис оча долонь, и кысянькö петiс тоин да сувтiс мама-ныла одзö майöг моз ― ме пö лöсьöтчи ни туяс.

Дöва висьталiс старушкалö спасибо да иньдöтчис нылыскöт тоин сьöрö.

Не кузь, не дженыт тоиныс, но чож да паок: изторö оз чужйись, гöпсö орддяс, из колас вевдöрöттяс чеччöвтас.

Лун бöрсянь лун, лун бöрсянь лун ― сiдз эшö месяц чулалiс.

Мама-ныла паськöм-кöмкöтнысö бырöтiсö, неетша тшыгьялiсö, но тоин сьöрись эз кольччö. А тоин вайöтiс ва кошшиссесö сьöд иза керöс дорö и пондiс ветлöтны иззэс коласöт.

Дöва вежöртiс: му пытшкö пыранiныс кытöнкö эстöн, и быд ыджыт изсö видзöтiс, но нем сэтшöмсö эз казяв. Малалiс кинас ― нем жö эз адззы, только ыджыт из бердiсь торок пельдiс.

Тоин казялiс этö, вештiс инькасö бокö да вартiс кокнас сiя местö, кытiсь торокыс пельдiс, и сэк жö изыс шовк потiс. Тоин мöдпырся сöтiс ― шогмис юр тöрик осьта. Куимöтпыр вачкöмсянь изас шогмис морт сувда колас.

Полöм петiс му пытшкас пырны, но тоин чеччалiс-пырис пемытiнас, и мама-ныла вöтчисö сы сьöрö.

Мунiсö, мунiсö, и вот лоис нач югыт, дзик му вылас жö, только öддьöн лöнь да некин некытöн ловьяыс оз тыдав.

Чулалiс расок, петiсö видз вылö, а сэтi котöртö юок да тожö лöня-лöня.

Дöва радувьяс гумыштiс васö туистыр, но тоиныс уськöтiс туиссö, и туиссис киссис не ва, а петiсö кытшöмкö гаггез-дзöдзыввез да пырисö юокас.

Тоин куимись берездасис да куимись кузьжык лоис и посокöн водiс юок вевдöрö. Мама-ныла сы кузя вуджисö мöдöрас. Посокыс бöра тоинöн керсис, и быдöнныс иньдöтчисö одзлань.

Мунiсö, мунiсö ― мöдiк юок дорö локтiсö.

Дöва гумыштiс туисас ва, но тоиныс и сiйö пöрöтiс, а туиссис пондiс котöртны дзирыт сир.

Тоин кватись берездасис, лоис кватись кузьжык да посокöн водiс юок вевдöрас, и сы кузя мама-ныла вуджисö мöдöрас. Кыдз вуджисö, посокыс бöр тоинö керсис да нуöтiс мунiссесö одзлань.

Мунiсö, мунiсö ― ю дорö локтiсö. Юокыс, кыдз и одзза кыкыс, котöртiс лöня-лöня, а ваыс вöлi сöстöм-сöстöм ― ва увтас быд песок тусьыс тыдалiс. А пыдöсас быдмисö сэтшöм жö цветтэз, кытшöмöсь му вылын быдмöны, и ны коласын югьялiсö югытся-югыт звездаоккез да уялiсö зарни чериэз.

И мамыс сэтöн вöлись вежöртiс: эта юын ― быдöсся вынажык ва.

Сiя миссьöтiс киэсö, чужöмсö ― и быдöс мыдзыс сэк жö чулалiс. Гумыштiс васö быдса туис, пешлiс öмнас кöрсö. Öтпыр ньылыштöм бöрын сылö лоис гажа и сьöлöм вылас кокнит.

Юкталiс ванас нывсö, и нылыс сэк жö шынньöвтiс...

Нiя, вились тырöмöсь вынöн да гажöн, бура-бытшöма петiсö му пытшкись. А гортаныс бертiкö кежалiсö куимнан старухаыс ордö да сетыштiсö нылö быдöсся вынажык васö.

А кыдз не сетны: тэныт отсалiсö ― и тэ отсав.

Дата добавления: 2015-11-16