Кытöн и кöр эттшöмыс вöлi ― некин оз тöд, но вöлi.
Кыдзкö бабука пондiс бергöтлыны кудокас кольттесö да казялiс сэтiсь вежö. «Кытiсь нö вежыс, нёжли кинкö гусьöн сюйыштiс?» — думайтö курöг. Лыддис кольттесö ― абу содöмась, даскуим (колö пуктыны даскыкö, но ны коласын вермас лоны тшыксьöм, сiйöн эшö öтiкö содтöны).
Локтiс петух, лыддис кольттесö да висьталiс:
― Даскыкыс чочкомся-чочкомöсь ― нiя миян. Даскуимöтыс веж ― сiя не миян. Сiйö колö чапкыны.
Пондiсö нiя чапкыны вежсö (сiя вöлi золотöй да сьöкыт), а кольтьыс давай видчыны:
― Мый нö тiйö сэтшöмсö кератö? Аслам гортiсь вашöтат! Ме жö тiян пиян!
Курöг да петух сiйö тойыштiсö кудсис:
― Кыш-кыш-кыш! Тэ не миян! Кытчö сылö воштiсьны?
Тарöвтчис беднöйка оградаö, оградасянь ― öтöрö, а паныт сылö ― Кань.
Казялiс Каньыс кольтьсö да шуö сылö:
― Ме тэнö, натьтö, сёя. Кольтьыс ылöтчö:
― Эн вöрöт менö. Менам кышö золотöй да чорытöв, верман пиньтö чегны.
Каньыс кывзiс велöтöмсö и эз вöрзьöт Кольтьсö. И сiя тарöвтчис одзлань.
А сэтöн тюк пантасис Пон:
― Ме тэнö, Кольть, натьтö, сёя. Кольть ылöтчö:
― Эн сёй менö, Пон. Менам кышö золотöй да чорытöв, верман пиньтö чегны. А пиньтöм поныс ― разь пон?
Поныс кывзiс Кольтьсö и мунiс аслас туй кузя, а Кольтьыс тарöвтчис одзлань.
Тарöвтчис, тарöвтчис да и пантасис Петрунькöт. Петрунь видзöт-керис Кольтьыс вылö да висьталiс сылö:
― Сулав-ко, ёртö, ме тэнö, натьтö, сёя. Кольтьыс сылö:
― Эн сёй менö, Петрунь. Босьт-ко да гортат нöбöт, да гор вылö лэбты и кузь гöна шапкаöн вевттьы, а сыбöрын адззылан, мый лоас.
Петрунь кывзiс Кольтьсö да сы моз и керис. Зонкаыт айтöм-мамтöм, некин сылöн абу, и Кольтьсö радöн дынас босьтiс: лоас кинкöт шыасьны, лоас кинöс дозирайтны.
Пуктiс Кольтьсö гор вылö и видзчисьö, мый одзлань лоас.
Чулалiс кынымкö лун, и Кольтьсис петiс золотöй типок. Гажмис сэтöн Петрунь, чожжык каша пуис да типоксö вердiс:
― Сёй пöттöдз да тэрмась быдмыны. Талун ме тэнö верда, а сэсся тэ пондан менö вердны.
Типок шуис:
― Кольттесö месянь он адззыв ― ме петушок Петя. Ме тэныт мöдкодь отсöтöн отсала: понда асыввезнас саймöтлыны.
― И сiя ни бур, Петя.
Петрунь нöбöтiс золотöй кольть кышсö купецлö да вежис нянь вылö, но сiя няньыс только месяц кежö тырмис. И сэк Петя висьталiс хозяиныслö:
― Умöля олан тэ, Петрунь, кöть и уна уджалан. Лок жö клад гарьям.
― Кытöн сiя кладыт?
― Мийö, петуххес, лэчыт пеляöсь ― верста ылынаöдз кылам. И вот öтпыр ме кылi, кыдз öтiк морт мöдiклö висьталiс: «Эстöн, эта косьмöм пожум увтын, клад куйлö, но куллес сiйö некинлö оз сетö...»
― Ö-ö, куллескöт нем и кутчыны! ― öвтыштiс кинас Петрунь. ― Миянлö нiйö не вермыны.
― А менö мыйлö? Кывзы менö, и быдöс бур лоас.
― Но, мед сiдз и ло! Пондывны кошшыны ― не биö пырны, ― согласитчис Петрунь.
И вот нiя кладсö адззисö да ойнас гарйисö: сэтöн куйлöма зарни бекöр.
Петрунь босьтiс бекöрсö да пондiс петны ямасис, а сэтчö кинкö кыдз горöтас:
― Эн вöрöт! Сiя не тэнат!
Нёджжöвтiс Петрунь яма дорсö, адззö: Петясö кытшöвтöмась куллез ― сюраöсь, бöжаöсь, синнэзсиныс би чеччö. Петрунь повзис ― юрсиыс кышöпöн сувтö, кучикыс сiдз и кыртö. «Быдöс, овсис миян!» ― думайтö Петрунь. А Петяыс кыдз чирöстас:
― Кукурек-к-к-у-у-у! Кукурек-к-к-у-у-у!
Куллес чеччöвтiсö да вотьыштiсö бокö, бытьтö нiйö тöв нöбöтiс!
Садясис Петрунь, петiс ямасис и ― гортас пöльтны. Петя сы сьöрö öдва вöтчö.
Локтiсö гортаныс, жын-жын пöднасисö керкуас, пондiсö бекöрсö пешлыны. А бекöрас эшö и золотöй деньга.
― Но, Петя, öнi пондам бура овны! ― радуйтчö Петрунь.
И лöсялiс оланыс: мый юны, мый сёйны ― быдöс тырмö нылöн.
Петя, медбы гажажык вöлi, вайöтiс курöжокöс, кöда ныкöт ордчöн олiс. Сера гöна, гажыник, но чотiсь, мый понда и эз радейтö сiйö сойес. А Петялö сiя вöлi сьöлöмви.
Сiдз Петя керис семья. И решитiс: колö и хозяинсö гöтравны.
Петрунь вöлi мича чужöма да бур сьöлöма зон. Да и мывкыднас мöдiккезся эз вöв умöльжык. Только полiськодь вöлi да лöня олiс, нельки рыттэзнас деревняас орсаннэз вылö эз петавлы.
Кыдзкö рытнас Петя чеччöвтiс йöр вылö да только лöсьöтчис китöстны, но кылiс инькаэзлiсь сёрнитöм:
― Аннуш, тэ мöдiк зонкаöс ни вашöтiн. Сiдз пондан керны, дак нывкаöн и пöрисьман.
― Оз гленитчö нiя, мамук. Ме Петруньöс радейта, а сiя оз корась.
Петя кур-пар лэбзис Петрунь дынö:
― Гöтрась Аннушыс вылын! Сiя öнi висьталiс, что тэнö радейтö!
Петруньлö Аннушыс тожö гленитчис, только эта йылiсь зонкаыс некинлö эз висьтась. И недолыт вöвлi, кöр нывкасö корасьлiсö мöдiккез.
Аннушсö корасьны Петрунь мунiс Петякöт, сiдз кыдз зонкаыслöн не сой, не вон эз вöлö. Аннуш сiйö эз вашöт, но бур кывсö сэк жö эз мыччы.
― Может, шуан, ме беднöй? ― висьталiс Петрунь Аннушкалö. ― Дак мийö Петякöт клад адззим, деньга миян эм.
Аннуш сэтчö горöтчис:
― Ужо, думайтышта. Но тöд: ме пета бы морт сайö, не деньга сайö.
Рытнас Петя чеччöвтiс йöр вылö да мöдiс сьылыштны ассис «кукуреккусö», да кылiс инькаэзлiсь сёрнитöм:
― Менö Петрунь корасьö, ― шуис Аннуш Настя подругаыслö.
― И тэ мöдан петны сы сайö? Кöть сiя и мича чужöма, да киссьöм паськöма.
― Öнi богатöй: клад адззöма.
Настя сэтчö бöрдчис:
― Ох ме, горе куралiсь! Курыт олан менам, шудтöм ойлун!..
― Тэ мый сiдзи, подруга?
Настя шуö: ― Да радейта ме Петруньсö! Эн мырддьы сiйö менчим, Аннуш! Сытöг гажа луныс меным гажтöм! Кула Петруньыстöг!
Аннушлö жаль лоис подругаыс:
― Ме ог пет сы сайö, Настя. Тыдалö, оланыс абу лöсьöтöм сыкöт овны.
Петя кутiс да и висьталiс эта йылiсь Петруньлö, и зонка сэк жö шуис:
― Оз кö вермы овны метöг Настяыс, дак ась лоас меным иньöн. Ашын корасям сiйö.
Висьталöм ― керöм. Чулöтiсö свадьба, пондiсö овны.
Петрунь уджалö, а Настя зеркало одзын бергалö ― виль паськöм да берся мöдöтчан меряйтö. Петрунь оз и думайт, что иньыс не сiйö радейтö, а сылiсь деньгасö. Велалiс сiя базарись виль паськöм небны, нельки сёянсö дугдiс пуны. А Петруньлöн деньгаыс чинö, кыдз тулысся йы сылö.
Эта вылö видзöтiкö Петя пондылiс хозяиныслiсь синнэсö осьтны, но Петрунь только и шуис:
― А мый деньгасö жалейтны? Ась пасьтасьö. Вон кытшöм басöк лоис ― деревняас некин сы кодьыс абу.
А Настя тыртiс доброöн кык коробья, курмыштiс Петруньлiсь медбöрья золотушкаэсö, небис вöв-телега да ыскöвтiс гортсис. Только Петялö шуыштiс:
― Висьтав Петруньыслö, мед виль инь адззас. Петруньöс дыр гореыс нöитiс, да зонкаыт эз жö сетчы сылö.
― Весь дöнзьöм деньгаыс эз отсав миянлö, ― шуис сiя Петялö. ― Вай-ко, вонö, уджын пондам шедтыны деньгасö.
Чеччöвтiс Петя йöр вылö да аслас «кук-курек-куöн» мöдiс ошкыны Петруньсö, но кылiс инькаэзлiсь сёрнитöм:
― Ашын тэнö корасьны локтасö, ― баитiс Аннушлö мамыс. ― Тэ сэсся эн ни откажитчы.
Аннуш сё ассис:
― Меным некинöс оз ков. Ме Петруньöс радейта.
Петя радувьяс горöн-горöн куимись китöстiс да вöлись висьталiс:
― Мун, хозяин, Аннушсö корасьны. Сiя видзчисьö тэнö!
Петрунь кывзiс Петялiсь тшöктöмсö, и нiя кыкнанныс мунiсö Аннуш ордö. Аннуш пыртiс нiйö гортас кыдз меддона гöссезöс, бытшöма потшшуйтiс да согласитчис петны Петрунь сайö.
Аннушлö эз ков деньгаыс, колiс морт ― сьöлöмшöр Петрунь.
И пондiсö нiя гымöтны-овны да горе не тöдны.
А Петя сiя кадсянь йöз сёрниэсö дугдiс кывзыны.
Дата добавления: 2015-11-16; просмотров: 49 | Нарушение авторских прав
| <== предыдущая страница | | | следующая страница ==> |
| ВАНЬКА-ВАКЫСКАЛIСЬ | | | МАНЮ ДА ВАНЮ ― СОЙ ДА ВОН |