Данько-вöралiсь янсöтчис аймамыс дынiсь да сувтöтiс аслыс керкусö вöр дорö ― зверь да пöтка дынö матöжык.
Олiс, олiс, öтнаслö гажтöм лоис да и гöтрасис: вайöтiс мича чужöма Дуняöс, кöда стрась бура гöрдззисис да вурсис. И сэтшöм олан керисö, что нысся шудажык отир эз вöлö.
А кытöнкö ордчöн семьяöн олiс Чомор. Кин сiя сэтшöмыс ― Чомор?
Мукöдыс шуöны, что сiя сэтшöм жö Вöрись, только виззя. А дыржык олiссес мöднёж висьталöны: Чомор ― сiя видззезлöн, рассэзлöн да ыббезлöн хозяин. Да, сiя виззя. И эшö уссэза, но сюртöм. Морт вылö вачкисьö.
Вот сылö, эта Чоморлö, öддьöн и гленитчис Данькоика Дуня. И Чомор орöттöг пондiс локны Данько ордö. Бытьтö бы могöн вовлö: гортiссес понда вурны да гöрдззыны Дунялö ваялö, а юрас нач мöдiк пизьö.
Дунялö эз бы и ков Чоморыскöт тöдчыны, да зэв ни бура сiя уджыс понда вештiс. А вöрас кытiсь эшö сымдасö шедтан? Вовлiс, вовлiс Чомор да и пондiс корны Дунясö:
― Мунам, Дуня, ме ордö овны! И пасьтöтны, и кöмöтны понда ― быдöс снитки виль! Только пукав да гöрдззись-вурсьы.
Дуня эз кывзы сiйö: счастье дынсяняс оз пышшалö. Но Чоморыт сы понда и Чомор, медбы берсянёж ылöтчыны-бöбöтчыны.
Дыр мыйись али чожа мыйись, но Чомор кужис бöбöтны Дунясö да нуöтiс гортас.
Локтiс Данько вöралансянь, а иньыс оз пантав сiйö. Öтпыр кытсöвтiс ― эз шыась, мöдпырись ― эз шыась, а куимöтпырсяс лöньсис: вежöртiс, что Дуня сы ордiсь мунiс. И сэк жö и казялiс, кин этö керис.
И вöралöм йылiсь вунöтiс, и мöдiк удж йылiсь дума öшис.
Кык лун и кык ой пукалiс, куимöт лунас решитiс адззыны да мездыны Дунясö. «Кыдзи öнi ог мезды, дак Чоморыс аслас уджöн сiйö кувтöдз вайöтас».
Решитнытö решитiс, а кытöн Чоморыс олö, оз тöд.
«А-а, бур отирыс мирас эмöсь жö, кинкö сёравно отсалас!» ― öдззöтiс асьсö.
Тэчис сiя котомкаö косьтöм нянь, босьтiс пишаль да и мунiс видззез кузя да рассэзöт, кытчö кокыс нуöтiс.
Лун я, кыкö я мунiс ― Чоморлiсь керкусö эз адззы. Этö ачыс Чоморыс Данькосö мöдöрöт новйöтiс, горт дынас эз сибöт. Вынтöмсялiс Данько, пуксис пу увтö шоччисьны, пукалö да тöждö:
«Кыдз нö Чоморлiсь керкусö адззыны? Нёжли некин оз отсав?»
― Ме отсала, ― кылiс сiя юр вевдöрсис негора голосок. ― Отсала, дугдан кö сэсся миянöс вийлыны.
Дзарйöвтiс Данько ас гöгöрас, адззö: ув вылын ур пукалö.
И юалiс Данько:
― Не тэ я, Ур, мöдан меным отсавны?
― Ме иньдöта тэнö Чоморыс ордö, кыдзи ме сьöртi керан. Кöр и кытöн сэтшöмыс вöвлi, медбы вöралiсь эз вийлы уррезöс? Данько сiдз оз вермы!.. Но и Дуняыстöг не олöм!
Думайтiс-керис да и кöсйисис мужикыт, что öнiсянь ур увтырсö оз понды вöрöтны.
― А тэ то этадз шу: «Кыдзи ме бöбöта урсö, дак мед Чоморыс пыр кежö нуöтас Дуняöс».
Керны вöлi нем ― ковсис Даньколö сэтшöм клятвасö сетны.
Ур нуöтiс Данькосö пыд кырасö, мыччалiс лапаокнас баддяинлань:
― Чоморыс ордö эстöн туйыс.
― Кытöн нö эстöн? Эстöн тшöк кусттэз!
― Тэ паськöт кусттэсö да нёджжась.
Данько нёкыртiс кусттэсö и казялiс му пытшкö осьта, сы одзын тöдчис туёк.
― Но, спасибо тэныт, Ур, отсöтыс понда! Ме öнi адзза ни Чоморыслiсь гортсö.
Пырис Данько осьтаас, а пытшкас дзирс пемыт, тальччыны полöм петö. Но эд муннытö колö!
Адззис бедь да сiйöн пондiс тюкöтны, слепöй моз туёксö кошшыны. А туйыс лэдзчис увлань пемытiнас, му пытшкас пырис.
Мунöв-керис, и одзас тыдыштiс гудыра югыт. Данько иньдöтчис сэтчин да инмис петны кушинö, кытöн цветитiс берся цветыс, но некытшöм дук эз кыв.
Кушин дорсянь пондöтчисö кык векнитик туёк. Кöда кузя мунны?
Думыш керис да кежис веськытланяс, но чожа туйыс пыртiс тöлöн жугдöм вöрö: öтмöдöрын пуэс куйлiсö куим-нёль сувда.
Данько бöр петiс кушинас да мунiс мöд туй кузяс, но и сiя öшис увсьöн-вевсьöн куйлан пуэз коласö ― не мунны, не орддьыны.
Сулалö сiя тöлöн пöрöтöм вöр дорас да тöждiсьö: «Тыдалö, не адззыны меным Чоморыслiсь гортсö, не мездыны Дуняöс...»
А бöрсяняс кылö голосок:
― Эн тöжды, Данько, ме отсала тэныт.
Бергöтчис Данько, адззö: кöчка вылын кöч пукалö. Эта абу ни сылö диво: ур сiдз жö шуис и эз бöбöт.
― Отсав, кöчиньöй, ме тэныт сы понда спасибо висьтала. Кöч шуö:
― Отсала, кыдзи тэ öнiсянь он понды кöччесö вийлыны. Думайтiс-керис Данько да бöра кöсйисис не вöрöтны сэсся кöччесö.
― А тэ то кыдз шу: «Кыдзи ме бöбöта кöчсö, дак мед Чоморыс пыр кежö нуöтас Дуняöс!»
Керны вöлi нем ― ковсис Даньколö сэтшöм клятвасö сетны.
Сэк кöч висьталiс: ― Чоморыслöн туйыс вон сiя выскыр увтö дзебöм, ― кöч мыччалiс лапаокнас вуж сорнас пöрöм пу вылö. ― Мун сы сайö.
Данько кежис выскыр саяс, казялiс волькыт-паськыт туй.
«Но, öнi ме Чоморсö адзза!» ― гажмис Данько. Да сы моз эз шогмы: туйыс öшис петшöра, жельнöга да шышыбара шутём пытшкö. Вежöртiс Данько, что этö ыжмалö Чоморыс жö. Но мортытлö нем ни повны: мысок вылын тыдалiс Чоморлöн керку.
Данько веськыта жельнöг-петшöрöт уськöтчис керкулань ― и зубытсö эз кыв, ― да сэк жö панталiс Дунясö: сiя кайöтлiс ва. Дунялö радуйтчыны колö, а сiя видчö:
― Мыйлö локтiн? Мун бöр, а то Чоморыс вияс тэнö. А меным эта кабалаын куим год ковсяс мырсьыны.
Данько эз понды кывзыны Дунясö, а тшöктiс ведраэсö чапкыны да сыкöт, аслас жöниккöт, мунны. Дуня полö, пыксьö:
― Чоморыс сёравно вöтас миянöс да гортас пыртас. Буржык лоас, ежели ме этчö öтнам кольчча.
― Пондас вöтны дак, дзебсисям.
― Сы шогья он дзебсись, сылöн нырыс зверься буржыка кылö.
Данько сэсся эз понды баитны: кутiс иньсö кипöлöт да кыскис сьöрас, может пö, Чоморыс чожа оз казяв, и нiя ештасö сы му вылiсь пышшыны.
Но Чоморыт сiйöн и Чомор, медбы отирыслö лёксö керны, сiйö сiдз просто он бöбöт. Пышшиссес только ештiсö петны жельнöга-петшöра тэльсис, а Чоморыс пондiс ни Дунясö кытсавны.
Дуня повзис да сувтчис, пондiс корсьыны бöр:
― Мун, Данилушко, öтнат! Сёравно миянлö сы шогья не дзебсисьны, а отсöтсö некинсянь видзчисьны.
Сэтчö тэльсис петыштiс руч да горöтчис:
― Ме отсала. Но не весь: ась Данько сэсся дугдас вийлыны руччесö.
Данько кöсйисис и одзлань висьталiс: «Кыдзи ме бöбöта ручсö, дак мед Чоморыс пыр кежö нуöтас Дуняöс!» Руч только и шуис:
― Дак видзöтлы, Данько, медбы сыбöрын эн вунöт клятватö! А öнi пышшö. Ме понда коктуйнытö чышкыны да ассим дукöс лэдзны.
Данько да Дуня вуджисö кушинсö да пырисö вöрö. Руч ны бöрсянь котöртö, коктуйнысö чышкö да ассис дуксö лэдзö.
А руч дукыс быдöс дуккесö вермö, и Чомор сiйö терпитны оз вермы.
Недыр мыйись Чомор петiс кушинас, нырас вачкис ручлöн зына дук. Чомор чепöссис-кежис бокö, но и сэтчин Дунялöн туйыс эз тöдчы. Чепсасьö Чомор: мый пö сэтшöмыс, мыля морт дукыс оз кыв? (Сiя вежöртiс ни, что Дуня сы ордiсь пышшис.)
Котöртiс Чомор веськыта пöрласьöм пуэс вевдöрöт, медбы одзавны пышшиссесö да кутны нiйö му пытшкись петiкö, но Данько да Дуня петiсö ни, а сэтчин Чоморлöн волшебнöй выныс абу.
Вот сiдз Данько-вöралiсь мездiс Чоморыс кипод увтiсь ассис иньсö. И пыр видзис тöдвылас, кин сылö отсалiс керны этö некокнит уджсö, и ассис клятвасö эз дзуг.
А Дуня, кöр кольччывлiс öтнас, тöдтöм мужиккесö сэсся эз лэдзавлы гортас. И Чоморыс сылö сэсся эз мыччась: тöдiс виззя, что сэтöн сылö нем ни оз дöнзьы.
Дата добавления: 2015-11-16; просмотров: 38 | Нарушение авторских прав
| <== предыдущая страница | | | следующая страница ==> |
| МАНЮ ДА ВАНЮ ― СОЙ ДА ВОН | | | БУСЫГИНСКÖЙ КЕРÖС ЙЫЛIСЬ ЛЕГЕНДА |