МÆРДДЗЫГОЙÆН

Куыд æвæлмон дæ, оххай-гъе, мæ бон...

Æниу, мæ хур, цæмæн тонай дæ рустæ, —

Ныр де знагыл нытталынг ис йæ бон,

Дæуæн та дуне — рухсæй рухсдæр!..

Йæ табæтыл ысхæцыдтæ уæззау, —

Уый кад кæныс йæ саударæг хъæбултæн.

Кæсыс æм ды: рæсугъд цæсгом ныссау, —

Дæ цæстыты — мæйтæ ’мæ хуртæ.

Йæ хицæуттæн дæ фæзынд у æгъдау,

Фыруæзданæй ысхæцыс семæ пъатыл:

— Кæй æвдæлы... Фæлæ — зиан, уæд, ау!.. —

Куыд хъуамæ бада хицау-лæг йæ уаты?

Цæуыл худыс? — Ныр нал хъæудзæн тæрсын,

Дæу хондзысты сæ разагъды лæг иууыл;

Цæуыл кæуыс? — Мæнмæ та уæд кæсы:

Дæ фидæныл,

Æрмæст дæхиуыл!

***

Нæ мæ уарзыс, фæлæ æз уарзын дæу,

Фыдæбоны, æлгъыстаджы сылгоймаг!

Дæ рæсугъддзинад уа диссæгтæй нæу,

Фæлæ уæддæр æз фесхъиуын дæ коймæ.

Цырагъы рухсæй дардмæ лидзы сырд,

Мæн та хъæуы нæргæ артæн йæ цæхæр...

О Стыр Хуыцау, цы ма мæ домыс ды! —

Мæ цин уыд цард, мæрдтыбæстæ — мæ къæсæр.

Фæлæ... Æз уарзын дæу... Æмæ Зæххыл

Мæ удæгасæй иу лæг нал у райгонд,

Уæддæр-иу зон: сæурайсомы цъæхыл

Æвæгæсæгæй айсæфти дæ амонд!

Дата добавления: 2015-09-05