ИРÆТТÆМ

Иу нæ иннæмæй нал ис, —

Уæд цы кæнай, ироныстæг?..

Туг нæ удты ысмал и:

— Ау, цы лæгтæ, цы хорз ыстæм!..

Алчи алцæмæй барджын у,

Сты æвдæлонæй хъалтæ,

Кæд мæлæт вæййы адджындæр:

— Тох! Æвзистсаргъ АЛАНТÆ!..

Чидæр... Бирæ... Цыдæр-цытæ...

Ары мæлдзыг дæр аууон,

Уæд цы кæныс дæ бæрцытæй,

Ды — æлвæстриу АЛЛАНОН!..

Дæу рæсугъд лæппу хондзысты,

Ард хæрдзысты дæ номæй,

Фæлæ — никæд

Ироныстæг,

Нæй,

Сæттынтæ нæ комы!..

Зилы халон нæ арæнтыл,

Зонут: сау туг ныл уары,

Æмæ иу хатт куы ныббарай,

Уæд æнус-æнус барыс!..

***

Рæсугъд цард, амондæн йæ кар

Нывзийы иу афон, — уый зонын, —

Ныввæййы сыджыты дæлбар, —

Поэт уа, паддзах æви зондджын! —

Æмæ æрцæуы уæд кæрон,

Дæ сагъæстæ æмæ дæ зынтæн:

Уыдис æвзистæхгæд дæ рон,

Ныр мысыс уый, дæ цин, дæ фынты...

Фæстаг фæндарастæй ма ды

Кæсыс дæ адæммæ: цы фесты?! —

Кæд та сæ асайдта сæ фын,

Æви мын сухты цагъд дæр фесты? —

О, уæд ирон лæджы мæлæт

Æцæг тæригъæддаг у... Оххай,

Дæ Иры сæрвæлтау дын кæд

Нæ бантыст ницы — цард уа, тохæй?!

Ныхъхъæрз-иу авддæлдзæхæй уæд,

Кæн-иу дæ рухс ингæнæн пъатæ, —

Фæлæдыл чи кæндзæни мæт,

Кæй хъуыдтæ удæгас уа, мардæй?!

Дата добавления: 2015-09-05