Царды цин

Цæрынмæ хъавын æви цард фæци?..

Цы фарн сагъуыди, ичъийау, мæ удыл?..

Ныххау дæ уаты, райсом ног æрчъиц, —

Ныххойы чидæр тарваз æмæ худы!..

Ныййазæлы тъæлланг-мæллангæй ком, —

Уый боны маргъ тæрс-къудзитæй ыстæхы!

Ныхыйас хур, сывæллонау, æргом

Ныццин кæны йæ базырты æртæхæй!

Æз та хуыссын!.. Цæй сонт лæг и мæнæй!..

Зынгæмбæрзæнау, асхойын мæ хъæццул...

Кæсын... Адзал мæ дæлфæдтæм фынæй...

Цæугæ, сылваз! Ды рагæй дæ дзæгъæлдзу!..

Æмæ цæуын сæууон хурмæ, цæрын, —

Мæ мид-зæрдæйы сисын райгæ зарæг!

Æниу æй зонын, иу афоны рын

Уыдзæн мæ удæй хуры ’хсæн хæдарæн.

Фæлæ нырма мæ сагъæсы сæр нæу,

Ыстæй мæ зæрдыл иу рæстаг дзырд дарын:

Ис царды цин, йæ сæрыл кæн быцæу,

Æндæр куырыхон, сиргæ зонд цы мары?!.

***

Куы раног вæййынц мæ мæстытæ,

Куы нал вæййы цардæн фезмæлд,

Уæд ферттивы æваст мæ цæстыты:

Æрцæр та мæ уды, ме знæт!

Куы дыл æвварс кæной кардзыдæй

Гуымыдза фыркъа æмæ дзылы,

Цы ис уæд рæдауæй, уарзынæй,

Дæ сабыр — дæхи фыдбылыз!..

Ызнаг дæ ызнагыл дæ лæмæгъæй

Куы нæуал нымайа царды,

Цы уæлдай и уæд, цъæл хъæллæгъау,

Дæ удæгасæй — дæ мардæй?

Лæгау дын салам куы нал зæгъой

Хæлæрттæ, — дæ хорз уæд рох у! —

Уæд чи нæ бацæудзæн а зæххыл

Йæхи уды сæрыл тохы?

Хъæр нал хъуысы фидæн-амондæй,

Уæртджын хæфсау у йæ фезмæлд,

Уæд сидын: æрцæут рагбонтæй,

Мæ удвидар æмæ ме знæт!

Дата добавления: 2015-09-05