Мæ райгуырæн боныл
Нæ барайдзæн алчи,
Уый зонын:
Кæмæнты ызнаг дæн —
Æнæхъуаджы,
Чи мæ
Æцæгдæр йæ рыстæй æфхæры.
Нæ сæм кæнын хъыг,
Мæ удыл дæр абон
Нæ кæнын дыгъуырццæг...
Ызнаг, — уый ызнаг у!
Тæргай мын чи кæны,
Гъеуый дæр
Бæстон-бæрæг зоны:
Тызмæг æз нæ уыдтæн,
Фæлæ мæ нæ царды уавæртæ
Дæлдзинæджы ранмæ æппæрстой,
Æмæ уæд нæ барстон
Мæ хъулон хъæбулæн дæр
Никуы...
(Æртæ хатты æрæхснырстон:
Æвæццæгæн, раст у
Мæ ныхас.)
Мæ мардыл нæ кæудзысты,
Уый дæр ма зонын,
Фæлæ иу бон сæ зæрдыл æрлæууæд:
Мæн фæндыди æгъдауæй,
Рæдауæй фæцæрын
Мæхи хуызæн кусаг,
Изæрæй —
Цæлуарзаг адæмтимæ,
Æмæ уыйфæстæ
Иу рæсугъд райсом
Расхъиуын арвы цъæх кæрæттæй,
Стъалыйау!
ÆЗ ФЕДТОН АХÆМ НЫВ…
Цыдысты уынджы мад æмæ йæ чызг.
Уыд горæт рухс: къуырддзыкку тау — йæ цъæхыл.
Æрттивы, ризгæ, худгæ хуры зынг,
Цынæ цæрæгой байрайы нæ зæххыл.
Бæрзы цонгау, — рæсугъд, æвæлмон, хин, —
Сæрыстыр чызг, нæрæмонау, æрттивы:
Рæхснæг синтыл дывыдойнаджы джинс
Æддæг-мидæг кæны, цæхæрау, ивы.
Йæ фæсчъылдым — йæ мад: хъæзау — мæллæг,
Тæсауыгъд хæст йæ дзуринаг, йæ низ у...
Уый нал кæны хæрзамондмæ хæлæг,
Йæ комыкъултæм рог къæбæр нæ хизы.
Æрмæст фæзæгъы: о, мæгуыр мæ бон,
Хуыцæутты Хуыцау, бакæн-иу тæригъæд:
Æппын кæд нал и а цардуагæн ивæн,
Уæддæр ныл ма скæ тугуарыны бон!
Дата добавления: 2015-09-05; просмотров: 62 | Нарушение авторских прав
| <== предыдущая страница | | | следующая страница ==> |
| ФÆСМОН | | | НОГ АЗЫ КУЫВД |