Федька Федотов — зоночка интереснöй. Мыгöрнас абу öддьöн ыджыт, но паськыт корпöса, ён, чужöмыс биöн öгралö. Голубöй синнэс Федькалöн дзуз видзöны и пыр хитрöя сералöны. Весёлöй сiя морт, шутник. И школаын велöтчö бытшöма. Геня Тюшинлöн, шуам, арифметика сьöртi пыр тройка, а Федялöн вексö пять. Да только разь арифметика сьöртi. Почти быдöс предметтэз сьöртi сiдз.
Таво тулыснас, кöр Федя кончитiс нёльöт класс, учительница шуис сылö:
— Вöлiн бы тэ, Федотов, круглöй отличникöн, но вот сьылан умöля. Ковсис пуктыны сьылöмыс понда четыре.
Федя, конечно, эз лöгась. Сьылö сiя былись умöля. Этö сiйöн, мыля голосыс абу пö, да и мукöд кыввесö зоночкаыс неправильнöя баитö, буква öтiк оз пет. Юалö, кыдз сiйö шуöны, и Федька горöтчас смех сорöн:
— Педька Педотов.
Некыдз сiя оз вермы горöтчыны буква «ф». Кыдз бы эз старайтчы зонкаыт, а сё петö «п». Вот и шуöны сiйö школьниккес Пепеöн. Но да ась шуöны. Федька и эта понда оз лöгав. Сылöн эм öтiк дума: быдмыштас и лэбзяс ракетаын Тöлiсь вылö. Сэк, небось, дугдасö серавнытö! А мый?
Гожумнас таво вöлi жар, и Федька öтiк зоночкакöт, Геня Тюшинкöт, одз асывсянь и сёр рытöдз чулöтiс кадсö ю дорын. Ваыс юас шоныт-шоныт, пыран и совсем неохота петны сэтiсь. Зонкаэз тульöтчöны садь быртöдз, вöтлiсьöны öтамöд сьöрын, гайзöны. А сэсся петасö васис и куйлöны песок вылын, жаритчöны. Кыкнанныс сiдз сотчисö, бытьтö нiйö саöн мавтiсö Федька унажыксö любитiс куйлыны гатш. Öддьöн ни охота вöлi, мед и чужöмыс сьöдöтiс, дугдiс бы öгравны. И понпутшшез бы öшисö. Но весь. Коккез сьöдöтiсö, кынöмыс тожö, нельки тшöкаыс сьöдöтiс да кульсис, а чужöмыс кыдз вöлi, сiдз и кольччис гöрдöн. И мыля эта сiдз — некыдз не вежöртны.
Федя и Геня — соседдэз. Керкуэз нылöн ордчöн сулалöны, и школаын нiя пукалöны öтiк парта сайын. А вот дружба ны коласын оз артась. Аскодя кытшöмкö Геняыс: вöв вылын гöняйтны полö, расокö öтнас мунны оз лысьт. Öтнас сiя и вуграсьны некöр оз лэдзчы: полö, медбы ю дорас нем эз шогмы. Лоас ли сэтшöм мортiсь кытшöмкö толк? «Но да ладно, — думайтö Федя. — Мый лоас — адззылам...»
Август пондöтчикö колхозниккез кутчисö дзимлявны урожай. И кык зоночка, кыдз и быдöс велöтчиссез, пондiсö öктыны шеп. Öтпыр, ыб вывсянь локтiкö, Федя казялiс кузница дынiсь тöдтöм детинаöс. Вöлi сiя ляксьöм комбинезона, кирзовöй сапоггеза. Чужöмыс детиналöн солидолöсь, юрсиыс пашмöм. Тöдтöм морт сулалiс ыджыт гусеничнöй трактор дынын и ключöн бергöтлiс кытшöмкö гайка.
— Эй, углан, тэ мыля сэтшöм гöрд? — юалiс сiя, кöр казялiс Федясö.
— Озъягöд унаöв сёйи, — шуткаöн горöтчис зонка и матöжык локтiс тракторыс дынö. Машина дынсянь пöльтiс шоныт ру. Тыдалö, неважын локтöма: моторыс абу на сайкалöм.
— Гм, озъягöд! Тэ гажа мортыс вöлöмыт, — горöтчис тракторист. — Ноко отсав меным тракторсö лöсьöтны, миськав вот этö.
Детина сюйыштiс Федька киö кытшöмкö сьöкыт банка и тшöктiс гывьявны сiйö соляркаын. Федя любитiс машинаэс дынын гуддисьны и эз откажитчы. Керис быдöс сiдз, кыдз тшöктiс трактористыс.
— Кыдз этö детальсö шуöны? — юалiс сiя.
— Эта — фильтр. Он разь тöд?
— Пильтр? Первуись адззыла.
— Не пильтр, а фильтр. Тэ — паськыв?
— Паськыв, дядя, — эз лöгась Федя. Сылö охота вöлi тöдны, мыйлö татчö локтiс эта трактористыс, и кутчис юасьны. Том детина висьталiс:
— Ме — шеф. Локтi отсавны тiянлö. Колхозаныт öнi уджыс тыр. Колö вердчан силосуйтны, нянь дзимлявны, государстволö сiйö кыскавны да эшö öзиммез кöдзны. Вот и иньдiсö менö леспромхозiсь. Вежöртiн?
— Вежöртi, — шуис Федька и лöсьöтчис гортас.
— Э-э, углан, — сувтöтiс сiйö трактористыс. — Локтi ме кузь туйсянь, мыдзи, кынöм сималö, а деревняаныт не магазин, не столовöй абу. Ноко висьтав пель одзам, кин тiян самогонöн торгуйтö?
— Самогонöн... — нюжöтiс зонка. — А мый сiя сэтшöмыс?
— Тьфу! — лöгасис детина. — Тожö морт!
Эта кадö кузница дынö локтiс тоша мужик Ведень Иван, шамыртiс трактористлiсь кисö: — Здорово, Алёша! Кысянь, кытчöдз?
— Здорово, дружок, здорово! — радмис детинаыс. — Öзим кöдзны иньдiсö.
Ведень Иваныс и трактористыс öдззисö шумöн баитны, и Федька вежöртiс, что нiя тöдсаöсь и, тыдалö, друггез.
* * *
Рытнас Пипудзуркын, деревняас, кытöн олiс Федькаыс, гырись кыдззез увтö öксисö нывкаэз да зонкаэз, пондöтiсö песняэз. Руас горалiс смех, чанöтiс деревня дорись вöрсö говкöн.
Чожа гажöтчиссез дынö локтiсö Ведень Иван да шеф Алёша. Трактористсö öнi сьöкыт вöлi тöдны. Сапоггез туйö кöмалöма штиблеттэз, пасьталöма басöк костюм, чочком йöрнöс и нельки галстук кышалöма. Алёша паськыта нюжлалiс Ведень Иванлiсь гармоння, басöка орсiс и сьылiс песняэз. Ведень Иван öдва сулалiс кок вылын: юöма вина. Кодкодь вöлi и трактористыс.
Деревняын кывсис ни, что Ведень Иван да Алёша кöркö öтлаын уджалöмась леспромхозын. Но Ведень Иванöс вашöтöмась сэтчинiсь пируйтöм понда. Кывсис и сiя, что Алёша сувтчöма квартируйтны Иваныс ордö. Вот и юыштöмась кык тöдса пантасьöмыс могись.
— Иван, дружок! Давай гажöтыштам отирсö! — чирзiс Алёша.
Иван пöлiнясьöмöн петiс кругö, а Алёша пуксис кер вылö, пöлiньтыштiс юрсö и давай базанитны. Нывкаэс да зонкаэс, а ныкöт и Ведень Иван, мымда прок йöктöны, сералöны. Алёша орсiс, орсiс и сетiс гармоннясö Иванлö:
— Серöт, дружок! Öнi ме йöктышта! — шуис сiя, пиджаксö чöвтiкö. Сэсся пöрччалiс йöрнöс киззесö, юрсö чатыртiс да кыдз öдззас! Коккес сiдз и мелькайтöны, киэс шовкöтöны, а частушкаэз киссьöны öмсис дугдывтöг.
Öддьöн бытшöма йöктiс трактористыс. Быдыс ошкис сiйö, быдыслö лоис сьöлöмви. Гленитчис и Федькалö. «Вот эта морт! — думайтiс сiя Алёша йылiсь. — Натьтö, Тöлiсь вылас сы коддесö и иньдасö перво». И нельки завид невна кутiс.
А гортас Федька кылiс Алёша йылiсь мöдiк басни. Айыс баитiс:
— Мыйкö öддьöнöв шефным гажöтчö. Эз ешты локны, а вина ни юыштöм, ойшöрöдз готов йöктыны,
— Ведень Иваныс кодь жö, тыдалö, — горöтчис мамыс. — Вон Иваныслöн и баня лонтiсьö. Оз я самогон пуö?
Федькалö охота вöлi висьтавны, кыдз сiя тöдсасис трактористыскöт, но нем эз ешты горöтчыны: лунся удж бöрын куньсисö синнэс, зонкаöс нырыштiс он.
* * *
Дзирыт, öддьöн дзирыт вöлi кадыс. Быдыс, кин прокмис, вöлi ыб вылын. Уджалiс и шеф Алёша. Аслас тракторöн сiя пемытсянь пемытöдз кöдзис öзим. Ведень Иван ошшасис:
— Вот зонкаыт! Дзик кöдзыв старайтчö!
— Уджалö, бытшöма уджалö. — паныт баитiсö колхозниккез. — Только вот...
Да, только вот... Деревняын кывсис, что локтас Алёша ыб вывсянь, миссяс, вежас паськöмсö и пуксяс Ведень Иванкöт сёйыштны. Пуксяс садьöн, а чеччö ляшмасьöмöн: кык друг быдпырся чурскисö самогон.
— Кыдз только вермöны сiдз керны — быд рыт коддзытöдз юны! — дивуйтчис отир.
— Не весь эд татчö иньдiсö. Баитсьö тай: «Нате сiйö тiянлö, кöда оз ков миянлö...» Ведень Иван не только вина юны велöтас...
Но дзирыт кадö эта йылiсь йöзыслö унасö баитны вöлi недосуг.
* * *
Öтпыр, павжун бöрын, Федялö шуис айыс: — Колö посадö запаснöй часттезла ветлыны, а вöвсö, Буланкосö, некысь эг адззы. Тöн сiя йирсьöма Гогыт мыс увтын, а талун некытöн и след абу. Ветлiн бы, Фёдор, Гогытыс увтö, может, адззан вöвсö нюр дорсис.
Гогыт мыс — öддьöн паськыт ыб. Мыля сiйö шуöны Гогытöн — некин оз тöд. Оз тöд этö и Федя. Но кылiс, что шеф Алёша уджалö как раз эта ыбын. «Ноко видзöтам, кыдз сiя кöдзö», — решитiс зоночка.
Сiя сюйыштiс карманас нянь шöрöм, босьтiс сермöт да ыджыт джыннян и петiс öтöрö. Айыслö висьталiс:
— Буланкоыс öддьöн хитрöй. Сiя тöдö, кöр кошшöны, и сайöвтчö ылöжык. Но ме сысся хитрöйжык. Бöбöта. Мöйму адззылiн, кыдз сiйö бöбöтлi?
— Быль! — радмис айыс. — Бура тэ сiйö бöбöтлiн. А ме и вунöтi. Но ладно, мун. Адззан, дак лок мастерскöй дынö.
Мунö Федя улица шöрöт, а паныт сылö Геня Тюшин.
— Тэ кытчö? — юасьö Федялiсь. Федя висьталiс.
— А джыннянсö мыйлö босьтiн?
Федя и этö висьталiс. Джыннян сiя босьтiс сы понда, медбы бöбöтны хитрöй Буланкоöс. Эд кыдз сiя, дышкучик, керö? Асыв кадö, кöр кошшöны, дзебсисьö понуляинö и нельки пельöн оз вöрзьöт. Кошшан, кошшан сiйö, а казявны он вермы. Öтiк кылöн шуны — хитрöй.
— Нем эг вежöрт, — шуис Геня.
— Да мый сэтöн не вежöртнытö? — дивуйтчис Федя. — Понуллес коласын гажа сылö öтнаслö али гажтöм? Конечно, гажтöм. Сылö эд тожö ёртöс колö. Но и видзчисьö ёртсö. Муна ме вöрöт и — трон! — джынняннас кера. Буланко думайтö: вöв сэтöн. И пондö корны дынас, гöрöвтö гусьöник: лок пö татчö, эстiсь некин миянöс оз адззы. Öнi вежöртiн?
— Вежöртi, — шуис Геня. — Только ог верит.
— Он верит, дак мунам кыкöн. Адззылан ачыт. Геня вирснитiс нырнас и иньдöтчис Федякöт.
* * *
Кытшöм бы эз вöв луныс жар, а вöрын, Гогыт мыс увтас, сёровно ыркыт. Сiсьмöм тшак дука ульсöт пöльтö шор ладорсянь, кок увтын кышöтö небытик нитш.
Но эстöн эмöсь кушиннэз, кытöн косви путриктö турун. Сэтшöм местаэзö и лэдзöны вöввесö йирсьыны.
Векнитик туёк чуклясьö понуллез коласöт, мунö ордчöн ыбыскöт. Зоночкаэз кылöны, что трактор горалö почти вöр дорас: говкыс сiдз пельö и пуктö.
Геня Тюшинлö охота мыйкö баитны. Сiя часто дзарьялö Федялань, видзöтлö юасьöмöн. Но Федя быд пырся öвтö кинас: чöв пö, баитны оз туй. Кылас кö Буланкоыс тöдса голоссэз, сэк кöть ойбыт тронгы джынняннат, гöрдлыны оз понды.
Зоночкаэз петiсö неыджыт кушин вылö. Кöркö эстöн тожö быдмöмась ыджыт пуэз, а öнi только мыррез тöдчöны да поленич местаэзын пес плашниккез валяйтчöны. Сiсьмыны ни пондöтчöм мыррес дынö петöмась лапытик кöзоккез, быдмöма ситурун, мукöдлаын пежьялöны цветтэз.
Федя думайтiс вöв йылiсь и часöт сылö нем эз ков. А Геня перво летiс цветтэз, сэсся казялiс озъягöд туссез и öктiс нiйö. Озъягöдыс вöлi öддьöн небыт да кöра. Чапкан öмö, и сiя, кыдз сахар, сылö.
Öтiк мыр дынын ягöдыс вöлi зэв ни уна, и Геня чепöссис сэтчö, но эз ешты босьтны нельки тусёк: бокöн-бокöн котöртыштiс ёртыслань. Ачыс дрöжитiс и кваркышалiс синнэзнас.
— Мый тэкöт? — гусьöн юалiс Федя.
— Вон, сэтöн... Кинкö чочком куйлö...
— Эн лёб, — öмалiс ёртсö Федя. — Чочком зверрес татöн абу.
— Быль... лыссэс увтö пырöма... Бокыс только тыдалö.
Тронгыштiс Федя джынняннас, кывзiсис. Нем оз кыв. Кин повзьöтiс Геняöс? Федя шупыта котöртiс мырыслань, павтыралiс понуллесö. Геня вöтчис сы сьöрö, повзьöм голосöн шуис:
— Вон, вон! Адззан? — мыччалiс сiя кинас.
Федя видзöтыштiс Геня вылö, а Геня — Федя вылö, кыкнанныс вöлiсö дзик öшöмöсь: мешöк? Мыля сiя сэтöн? Кысянь сiя?
Мыр бокас куйлiс былись сю мешöк. Сiйö чапкöма кинкö турунас, вевттьöма лыссэзöн и только öтiк бокыс бель видзис мырыс ладорсянь.
Буланко йылiсь дума бытьтö эз и вöвлы.
* * *
Думайт кöть сiдз, кöть этадз, а сю мешöк локны вöрö ачыс эз вермы. Сiйö кинкö вайис татчö. Мыйлö вайис? Мыйлö ковсис вевттьыны сiйö лысöн? Зоночкаэз, конечно, вежöртiсö: делоыс эстöн не сöстöм. Колö öнi жö мунны деревняö и юöртны йöзыслö, что кинкö гусясьö.
— Мунам? — юалiс Федя.
— Мунам. Котöртам чожжык, — горöтчис Геня. Зоночкаэз чепöссисö веськыта вöрöттяс. Но ыб дорас Федя сувтiс, кутiс Геняöс киöт.
— Мунам деревняас, а эта коста мешöксö нöбöтасö. Кысь сiйö сэсся адззан? Давай, Геня, пуксям мешöкыс дынö и видзчисям ворресö. Нiя эд сёровно локтасö. Кутамö...
— Да тэ мый, Федя? — повзис Геня. — Кыдз ми нiйö кутам? Да и ой сибалö. Меным некыдз оз туй кольччыны: мамö видчыны пондас...
— Мый понда видчыны?
Геня чöлiс минута-мöд, мыйкö думайтiс. Сэсся решительнöя зэгнитiс юрнас:
— Не, меным оз туй... Давай мунам, юöртам йöзыслö.
Но Федя эз и думайт вöрзьыны. Сiя вежöртiс, что Геня полö. Охота вöлi видны сiйö, но видчыны Федя эз куж и, натьтö, эта увья шуис спокойнöя:
— Мун öтнат. Висьтав айöлö, что ме татöн, мешöк караулита. Сiя вежöртас и локтас ме дынö...
Геня радувьяс чепöссис котöртны, а Федя бертiс мешöкыс дынö, пуксис понуллез сайö. Вöрын лöнь. И кöр трактор мунас мыс сайö, кылö, кыдз кышöтöны кöс уввез вылöт кöдзыввез да кöз йыввез мыйкö шушкöны öтамöдкöт. Гажтöм. Юрын ветлö дума: «Кин дзебис мешöксö? Мыйлö?»
Августовскöй шондi ештöма ни мыдзны, тэрмасис сайöвтчыны. Сылöн медбöрья югöррес эзö вермö дзарьясьны уввез коласöт. Лоис пемыткодь.
Федялöн пессис сьöлöмыс, токöтiс горöн. Мыйкö кильöтiс моросас. Полöм сёжö петiс. Вдруг шогмис мыйкö умöль? Может, мунны гортö? Но зонка сэк жö вашöтiс этö думасö. Не, мунны оз туй. Только мунан, а сэтöн и нöбöтасö мешöксö. И Федя терпитiс. Медбы эзжык вöв гажтöм, сiя кутчис лыддьыны, кыным круг керас Гогыт мыс вылын тракторыс. Вот сылöн зыкыс кылö совсем матын, ордчöн. Вот бергöтчис и, кылö, мунö мöд ладорас: зыкыс сё ылынсялö и ылынсялö. Кынымкö минута бöртi бöра ёнжыка кылö — шеф Алёша локтö Федяланьö. «Стой! А не сiя ли? — мелькнитiс дума. — Тю! Пондас сiя гусясьны! Сылöн деньгаыс, натьтö, тыр карман, леспромхозын эд уджалö. Мыйлö сылö сюыс, кöр няньсö и сiдз сетöны, мымда колö! Дак кин жö сэк?»
Ветлöны и ветлöны зоночка юрын думаэз. Сьöкытöсь нiя.
Вöрын совсем ни пемыт. А деревняись сё эшö некин оз лок. Может, Геняыс эз и висьтав некинлö? Трактор керис эшö öтiк круг. Сэсся локтiс вöр дорас, мотор шовкнитiс медбöрьяись и дугдiс чанöтны пеллез. Федялö эшö гажтöмжык лоис. Не котöртны я гортö? Может, талун некин оз и лок...
Эта минутаö ыбланяс дзуркнитiс телега, несйис вöв. Федя ляпкöтчис понуллез коласö, жмитчис му бердас. Локтöны...
Перво кусттэз вевдöрын мыччисис дуга, сэсся Федя казялiс вöвлiсь юрсö, и вöлись петiс телега. Телегаас, коккесö öшöтöмöн, пукалiс пашмöм тоша мужик. Зоночка сразу тöдiс сiйö: Ведень Иван. Луннас сiя кыскалö трактор дынö ва, горючöй, мукöдпырся кöдзыс.
Подвода локтiс мешöк весьтö, и Иван чеччöвтiс телегасис. «Сейчас пуктас и нöбöтас, — думайтö зоночка. — Мый керны?» Иван былись кыскис турунiсь мешöксö, кокнита чапкис телегаö. Сэсся мешöк вылас тэчис поленич пыдöсiсь пес плашниккез. Хитрöй, бытьтö пес вайö... Но, ужо!
Федя чеччис да кыдз тронгис джынняннас! Вöв чеччöвтiс местасис, а Иван чуть гатш эз пöр.
— Кин сэтöн, окояннöй? — горöтiс сiя, вöвсö кутiкö.
Федя эшö мымда вын тронгис джынняннас.
— Этö ме, дядь Иван, — чирзiс ачыс. — Сюсö сё ровно он гусяв, ми тэнö кутам!
И эта кадö кинкö зубыта сöтiс Федялö юр кузя, и сiя суньöн-паньöн мунiс кынымкö шаг, сэсся усис кыминь. Зоночка эз и казяв, кыдз бöрсяняс локтiс шеф Алёша и öбыртiс кулакнас.
— Вия понпиянöс! — горöтiс Алёша и сувтöтiс Федяöс кок йылö. — Ноко висьтав, мый эстöн керин?
Синнэс сылöн югьялöны, öмыс пиньöвтчöма, рожабаннэс пöльтчöмась сiдз, что лолавны оз вермы. Лöг. Сiйö и видзöт — ульöн сёяс.
— Сюсö дозирайтi, медбы эд гусялö, — шыасис Федя.
— Висьталан йöзыслö? — бöра чорыта юалiс шеф.
— Конечно, висьтала! Ме жö пионер!
Локтiс Ведень Иван, лöгöн дзарнитiс Федя синнэзö, муркнитiс ош моз:
— У-у, зараза!.. Сöт сылö, Алёша. Эстöн некин оз адззыв.
Алёша макнитчис, но сьöкыта ойнитiс и ыш ловзисис. Кинлöнкö вына киэз шамыртiсö сiйö косöт, пöрöтiсö турунö.
— Молодец, Фёдор! — кылiс Федя айыслiсь голос. — Кылi джыннян шытö и котöртi. Геняыс эз куж висьтавны бытшöмика. Сiйöн и дыр тэнö кошши. Кöбы не джынняныт, дак эг и адззы бы...
* * *
Ашынас посадiсь локтiс милиционер, гижис акт. Сiдз и гижис, что колхозник Ведень Иван да леспромхозiсь тракторист Алёша гусявлöмась кöдзыс сю, медбы вузавны сiйö. И кутiс нiйö пионер Федя Федотов.
Алёшасö да Ивансö нуöтiсö посадö. Томмез и пöриссез кольлалiсö нiйö смех сорöн:
— Шедiтö, кык кöин! Öнi юыштатö винасö. Пондат тöдны...
Федя сулалiс сэтöн жö. И кöр Алёша лöгöн дзарнитiс сы вылö да грöзитiс кулакнас, Федя шуис горöн:
— Шеп! Адззылiм ми тэ кодь шеппесö!
Федя мöдiс шуны «шеф», да адззат, мый шогмис? Но талун сы вылын некин ни эз серав. Нельки Геня шы эз сет. Сiя сулалiс öшöтöм юрöн и полiс дзарнитны Федяыс синнэзö.
ШЕДIС
Медбы сюрны районнöй посадсянь Шерва посёлокö, колö пуксьыны моторнöй пыжö и уйны ва паныт нёль час мымда. Но Ванька Ушаков решитiс мунны подöн. Тэрмасьны некытчö, а сьöлöм вылын сэтшöм долыт! Зоночка тöн кончитiс кватьöт класс, школаын сетiсö сылö бур отметкаэзöн табель,— и талун, гортас мунiкö, сылö охота сьывны песняэз.
— Раз, два! Раз, два! — Шагнялö сiя вöрöт, нöбöтö спина сайын неыджыт котомка книгаэзöн, конувтас летъялö фотоаппарат. Таво тöвнас, как раз сiя лунö, кöр Ванялö тырис тринадцать год, айыс козьналiс этö фотоаппаратсö, и зоночка некöр эз кольлы сiйö гортас, прокод новйöтiс сьöрас.
Мунны кокнит. Ваня дзик лэбзьö, тырморосöн лолалö сирöн да быдкодь цветтэзöн боссьöм русö. Неважын цветитiсö льöмпуэз, мыччисисö кыдззезлöн да нинпуэзлöн листтэз. Гожумся шондiыс пöжöма кыдззесö, и вöрас öнi койö öтмöдöрсянь свежöй корось дукöн. Радуйтчö зоночка. Бур, что вöрзис подöн. Мымда эстöн басöк картинаэсö адззылас, мымда фотографируйтас. Вот только бы ештыны петны ю дорöдз, не енöвтчыны вöрас ой кежö, — полöм сёжö петö.
А ю дорас позяс узьны. Эм сэтöн неыджыт керку, и олö керкуас бытшöм дед. Мöйму школаö мунтöн Ваня дыр шоччисис дед Прокоп ордын, сёйис черива, узис небытик и чöскыт дука турун вылын сарайын. Эта местаыс шусьö «Перевалочнöй базаöн». Посадсянь груззэз кыскöны татчöдз ва вылöт катеррезöн, а лесопунктö тасянь иньдöны машинаэзöн. Берег дорас эм ыджыт склад. Вот сiйö и дозирайтö Прокопыс.
Ваня тöдö, что дед Прокоп аслас уджöн довольнöй. Шутка висьтавны, быдса склад сылö доверитiсö. Мымда сэтöн товарыс, может, и лыддьыны оз позь. Сэтчö жö, местаэс татöн öддьöн гажаöсь: ордчöн ю, береггез дорын сулалö паськыт вöр, эмöсь кушиннэз. Öнi гожумнас, кöр быдлаын цветитö, кöр вöрас дзульзьö быдкодь пöткаыс, а ваын тульöтчöны чериэз, — старикöс татiсь и кыскыны он вермы...
— Раз, два! Раз, два! — Мунö Ваня и думайтö дед Прокоп йылiсь. Здоров я сiя? Ловья ли? Кыдз чулöтiс тöвсö? Мöйму гожумнас старик шогалiс, нельки больницаын куйлiс. Бытшöм сьöлöма сiя, добрöй и öддьöн любитö природасö. Кайезöс любитö, зверрезöс. Некинöс сiя оз вöрöт, некинлiсь поз розоритны оз сет. Только кöиннэзöс да ошшезöс и повзьöтлö аслас берданкаöн. А лесопункттэзын эмöсь эшö сэтшöммес, кöдна любитöны бöбавны. Мöйму öтiк мужик лыйöма ю дорас лосьöс. Старик кылöм лыйöмсö, котöртöма сэтчин. Кутны мöдöма лосьвийисьсö. Да кытчö тэ — мужикыс бузгöм старикыс коккез кузя дробöн, чуть абу вийöм. Дед месяц куйлiс больницаын...
Сизим километрся унажык ни оськалiс зоночка, фотографируйтiс уна местаэз. Мыдзис. Кöть рыт ни сибалö, а сё эшö жар. Ваня чöвтiс курткасö, пöрччалiс йöрнöс киззез. Шерва дорöдз, натьтö, километр-мöд эшö лоас. Вöрнас любуйтчикö, Ваня эз и казяв, кыдз небоыс пондiс пемдыны, кыдззез öшöтiсö листтэзнысö, шай-пай лоисö. Зэрны мöдö, эд не весь лунтыр сiдз пöжис. Вот и гымалö ни. Гур-гур-р-р... — керис кытöнкö. Гымалiс ылын, натьтö, Шерва посёлок сайын...
Ваня дугдiс смекайтчыны, содтiс оськöввез. Зэр коста вöрын гажтöм, полöм петö. А гымалöмыслöн говкыс кылiс матынжык ни, кынымиськö вирдыштiс, и быд вирдыштöм бöрын чаркнитлiс öддьöн горöн, дзик ыджыт иззэз быглясисö небоас, сöталiсö öтамöд кузя, люкасисö лöгöн. Гу-у-рр! Б-у-у-мм! И эна шыэз коста зоночкалöн лэчыт пеллез кылiсö эшö кытшöмкö мöдiк шыэз. У-у-п-п! У-х! — керис кынымиськö не öддьöн горöн. И кылiс эта не небоас, а дзик кытöнкö му пытшкын. Может, вöрас усялiсö ыджыт пуэз, натьтö, чарöтiс нiйö. Зоночкалö лоис недолыт. Сiя полiс, медбы эз чарöт матiсь пуэсö. Чарöтöм пуыслöн чайдöм тор вермас сöтны юр кузя.
Эшö кынымиськö чаркнитiс, и эшö кынымиськö кылiсö нетöдса шыэс: У-у-п-п! У-х!
И вдруг быдöс лöнис. Гымалöмыс мунiс кытiкö бокöт, кылiс сё ылынжык Шерва сайын. Небоыс чожа лоис бöра голубöйöн, только посёлокыс ладорын вöлi сьöдкодь: сэтчин, тыдалö, зэрис. «Дас километр и эм посёлокöдззас, а видзöт мый шогмö, — думайтiс зоночка. — Сэтчин зэрö, а татöн öтiк воть эз усь. Полосаöн зэрыс мунö».
Берег вылö сiя петiс шондi пуксян дорын ни. Стариклöн керкуок нёджжасис юыс сайсянь кык öшынокöн, стеклоэз свиттялiсö шондiлöн медбöрья югöррезсянь.
Дед Прокоп уйис юыс шöрöт пыжын и мыйкö куталiс васис сачокöн. «Неужели чериыс сымда, что Прокопыс не вугыррезöн кыйö, а сачокöн гумалö?» — думайтiс Ваня.
— Деда-а! Деда-а! Примит гöсьöс! — ыкöстiс сiя.
Старик пуктiс сачоксö пыжас и бергöтчис Ванялань. Синнэс сылöн вöлiсö ныжöсь и, медбы казявны зоночкасö, ковсис дыр нёджжасьны. Сэтчö жö, мешайтiсö шондi югöррес. Старик пуктiс öт кисö козырёкöн кымöс вылас и вöлись шыасис:
— Но бур, локтiн дак...
Сiя берегын, кытöн сулалiс Ваняыс, вöлiсö кыминьтöмöсь кынымкö пыж. Зонка бöрйис öтiкö, кокнитжыкö, адззис пелыс и тойыштiс пыжсö ваас. Юыс вöлi паськыткодь, но не öддьöн визыв.
— Уна чериыс, деду? — юалiс Ваня, кöр ровняйтчис старикыскöт.
— Э-э! — öвтыштiс Прокоп кинас и содтiс лöгöн: — Адззан мый врагыс керис? Тьфу, не морт!
И зоночка только öнi казялiс, что ваас, чочком кынöммезöн свиттялöмöн, жагöник уйисö унася-уна черипияноккез. Уйисö ва ньылат, эз и вöрöтчö. «Да нiя жö неловьяöсь!» — мелькнитiс дума. А Прокоп куталiс и куталiс черипияннэсö, лэбталiс пыжö. Только эз вермы быдöс кутавны. Öддьöн уна нiя вöлiсö, почти сваль кывтiсö ва вевдöрас, ордйисö стариклiсь пыжсö и кылалiсö увлань.
Ваня мыйкö мöдiс юавны старикыслiсь, да эз ешты осьтны öмсö. Совсем неылын тасянь, вывланьынжык ыпнитiс взрыв. Ы-ы-пп! У-у-ф! Дак вот мый сэтöн вöлöма! Эд гымавтöнняс Ваня кылiс как раз эттшöм взрыввез. Зонка вежöртiс: кинкö совсем неылын глушитö чери, кольмöтö аммоналöн. Ыджытжыккесö, кöдна кольмасö и лэбтiсясö ва вевдöрö, сiя, натьтö, куталö, а черипияноккес сотняэзöн кывтöны увлань. Вон нiя мымда татöн, лыддьыны оз позь!
— Деда, кин сэтчин?.. — юалiс Ваня.
— Враг, мыся, эн разь кыв... Вон мымда бöра тшыкöтiс... Не морт сiя. Кыдз только пондiс гымавны, сiя и öдззис гудыртны юсö. Этчин, Варлам йирас, бöбалö... А хитрöй — гымавтöн глушитö, медбы эз кыв некин...
Старик ведра-мöд ни куталöм поснитик черисö, вöлi мыдз и öвтыштiс кинас:
— Тшыкас, быдöс тшыкас... Вот жö, не морт! Да разь позьö чери глушитны? Этадз сiя быдöс черипияннэсö тшыкöтас. Эх!
Аслас керкулань уйикö, Прокоп эшö дзарнитiс юыс чукыльлань, гогинялiс юрöн, мыйкö шушкис гусьöник. Пельпоннэс сылöн дрöжитiсö, тошыс треситчис.
— Деда, вот бы кутны сiйö! — дзирыта горöтчис Ваня. — Милицияö нуöтны...
— Э-э! Кутассис, видно, менам. Адззан, вийсьö погоддяыс. То зэрö, то пöжö öддьöнöв. Быд коска менам висьö эттшöм погоддянас, быд жила дзуртö.
Старик петiс берегас, чуманöн чапкис пыжсис ва, а черипияннэсö тэчисö ведраö.
— Жальöсь нiя, да кытчö воштiсян. Колас кöть понлö вердны...
И мунiс крöмликтöмöн склад дынö. «Оз сiя вермы некинöс кутны, — гажтöма думайтiс Ваня. — Неужели врагыс накажиттöг кольччас?..» — Ваня чöвтiс пельпон сайись котомкасö, чапкис сiйö посöдзас. Мöдiс чапкыны и фотоаппаратсö, но вдруг чужöмыс сылöн нюжамис, синнэзын югйöвтiсö биоккез...
— Деда, кутны колö!
Старик пуксис поспу вылö, чöлiс. А Ваня кыскис фотоаппаратсö, горöтчис гажöн:
— Ми, деду, мушка вылö сiйö босьтам, судзöтам... Дед осудитöмöн дзарнитiс сылань, но шы эз сет. А Ваня баитiс дзирыта:
— Фотографируйтам сiйö! Ю вылас и фотографируйтам. А карточкасö милицияö сетам...
— Ах тэ, стрижпиян, — радмис старик, — былись эд! Сiйö, значит, берегсянь — чик! — и милицияö! Да эта жö дело!..
* * *
Варлам йир дынö дед Прокоп да Ваня петiсö сёрöн ни. Шондi койыштiс медбöрья югöррез и саясис вöрас. Вöлi ыркыт. Юыс сай ладорсянь пöльтiс уль ру. Кышöтiсö листтэз. Ваня öддьöн полiс, что сёрмасö и оз вермö фотографируйтны чери глушитiсьсö. Но дед Прокоп бодритiс сiйö:
— Некытчö оз мун! Матын посёлоккес абу. Значит, ылiсянь локтiс. А если ылiсянь, то и аппетитыс ыджыт. Дыр эшö пондас бöбавны...
— Оз, — веськöтiс сiйö Ваня. — Ми кидтам. Вот адззылан...
— Чöв. Эн баит горöн, — öлiс старик. — Может, кывзiсьö...
Старик да зоночка, почти кыккусiнь кöстiсьöмöн, жагöник вешшисö тшöк баддяинöт юыслань. Старик павтыртлiс уввез и дырöн видзöтлiс одзас, кывзiсис. Ваня сувтлiс кокчуннез вылö, нюжöтлiс вöснитик голясö и тожö видзöтiс йирыс весьтö. Сэсся чувйыштiс кинас Прокоплö бокас, шыасис гусьöник:
— Эм, гад... Вон пыжын пукалö...
— Быль?
— Ага. Сьöд тошока кинкö, вывтас брезентовöй куртка... Да вон сiя, вон... Видзöт, талань уйö, тэрмасьö...
Старик эз адззы некинöс, но кылiс, что кинкö былись уйö ны ладорö. Чольс, чольс! — шумитö пелысыс. Ваня лэбтiс фотоаппаратсö, метитчис бытшöмика. И самöй сiя минутаö, кöр сятнитiс затворыс, ю вылын ыпнитiс бöра взрыв. Ыджыт валлэз петiсö пыдöссис, фонтанöн кайисö исьöкыта ковöтöмöн пуксисö бöр. Мужикыс, тыдалö, сiйöн и тэрмасис талань, медбы взрывыс эз пöрöт пыжсö.
— Пишаль сылöн, деда, пыжас. Вон дулоыс тыдалö, — юöртiс Ваня.
— Пишаль? Вот не морт! Полö сытöг... Тэ фотографируйтiн пишальсö?
— Шедiс öтлаö...
Тöдтöм мужик старайтчис öнi бергöтчыны. Сэсся босьтiс сачок, лöсьöтчис кутавны кольмöтöм чериэсö. И эта кадö Ванялöн чужис дума. А мый, повзьöтны кö сiйö? Но, кöть бы шыасьны ли мый ли?
— Деда, тэ ыкöст ёнжыка, а ме шутньöвта... Повзьöтам...
— Давай.
И Ванялöн шутньöвтöм косялiс рытся лöньсö. Пу уввез вылын дугдiсö сьывны кайез...
— Э-эй! Тэ! Кывзы-ы! — рявкнитiс дед Прокоп.
— Эй-эй! — чирзiс Ваня.
И шогмис сiя, кöдö некин эз видзчись. Сьöд тоша мужик шлёпкисис пыжас, сэсся мый и лоис — пыжыс кыминьтчис. Пишаль, чер, кытшöмкö сумка усисö ваö, а мужиклöн только юрыс мелькнитiс глушитöм чериэз коласын.
— Эшö вöяс, пожалуй, — тöждiсис дед Прокоп. — Не весь шуöны: вор аслас вуджöрись полö. Видзöт, мый аркмис...
— Оз вöй! — радъялiс Ваня. — Вон пышшö бы, сай берегас уйö. Эй, тэ! — чирöстiс сiя мужикыслö. — Весь пышшан! Ми кутiмö ни тэнö! Да, да! Кутiм. Ашын лок милицияö ассит фотокарточка видзöтны!
Мужик буля-боля петiс сай берегö, тэрмасьöмöн пырис вöрас. Сылöн кыминьтчöм пыж жагöник уйис «Перевалочнöй базалань»...
— Оз пышшы, — горöтлiс старик. — Кутам! Тэ только, Ваню, старайтчышт, буржыкöсь кер карточкаэсö...
— Керам!
* * *
Недель бöртi Шерва посёлокö почтальон вайис письмо. Конверт вылас вöлi гижöма: «Ваня Ушаковлö, Прокоп дедсянь». Осьтiс Ваня конвертсö и лыддьöтiс: «...А мужиксö сiйö кутiсö... Эта вöлöма Шорйыв посёлокись конюх, пельтöм Игнат. Мыччаласö сылö жарсö, эта пельтöмлö! А ю вылас öнi спокой, некин оз бöбав...»
— Вöлись шедiс! — радöн шуис Ваня и пуксис гижны Прокоп дедлö ответ.
ПОМ
КАЙНЫ ЙЫЛÖДЗ ↑
Пыртöма вордö 2005' во коста
Медбöръяись веськöтöма 2006'11'20'
Сорасьöммез йылiсь кора юöртны этчö:
enye_lav@mail.ru
* кушöдз
* Шатласьö
* дзуг
* öтпырöн
* Таборитны — чукöртны керрез, петкöтлыны туй дорö
* ен
* дзик кулöмлöн лоöма
* Басурманин — мöдiк странаись морт
* юр дурмис, дикмис.
* пöльтiс шонытöн.
Дата добавления: 2015-11-16; просмотров: 56 | Нарушение авторских прав
| <== предыдущая страница | | | следующая страница ==> |
| КЫДЗ ЛÖГ ИНЬКА РАММИС | | | 1 страница |