Неылын сiя местасянь, кытöн öнi сулалö Купрöс-Волок посёлок, важся-важ кадö вöлi сiмöм ваа нюр. Некин сэтчин эз ветлы и некин эз тöд, ыджыт я сiя, но быдöнныс сiйö лыддисö пыдöстöмöн да олантöмöн. И вот сiя нюрын кытшöмкö годö мыччисяс кинкö ловья, кöда лунтыррезöн корöтöмöн узьö, и сiя горыс-корöтöмыс ылö-ылö кылö.
Повзисö отирыс: эта пö умöль одзын! И сiдз и лоис: деревняэзсис пондiс öшны пода. Ежели югытöн оз пöдналö подасö ― беда!
Но асьсö корöтiсьсö некин эз адззыв, и утлянно висьтавны, что сiя гусясьö, эз вермö: может, кöиннэз пö сiдз ыжмалöны?
Решитiсö ойнас караулитчыны да тöдны, кин горшалö.
Кык ой видзчисисö, да некин эз мыччась.
Куимöт ойнас корöтiсьыс гусялiс понöс. Караульщиккес умöля адззылiсö сiйö, но шуисö, что горшалö борда кöин.
Чукöртчис сход, и сiя шуис: кытчöдз абу на сёр, колö вийны корöтiсьсö.
И вот медбура лыйсиссес керисö ньöвьёссез (сэк пишаллес эз на вöлö, вöралiсö ньöлöн да ньöвьёсьöн) и одз асылöн мунiсö нюрö. Лунтыр мырсисö, медбы корöтiсь дынö сибöтчыны матöжык, да нем эз пет, сiдз кыдз борда кöин водöм сэтшöм местö, кытчö нач оз туй пырны.
Ашынас мунiсö мöдiккез, да нылöн тожö нем эз пет: нюрыс пö сэтшöм дзибья, что не подöн, не пыжöн сэтчин он пыр.
Панöвтчисö отирыс: пондамö пö буржыка дозирайтны подасö, а сэсся, может, и мунас татiсь борда кöиныс.
А кöиныс быд лунöн пондiс öддьöнжык горшавны, баляэз ни гусявлö. И сэк кöсйисис вийны кöинсö Роман, том лыйсись. Том, да немись оз пов и берсясö кужö керны.
― Эн ни мун, ― шуöны сылö. ― Сэтшöм, тыдалö, миян судьба.
Роман асныралö:
― Колö вийны сiйö, нето податöг кольччам. Романлöн ньöлыс зэлыт, ёссес лэчытöсь да бура инмöны, ачыс чож да вына. Мыля бы и не кутчывны кöиныскöт пессьыны?
Медодзза лунас кокнитика мунiс, медбы видзöтчыны, кысянь нюрас буржык пырны. И вежöртiс, что зверьыс позсö керöма мед ни дзибья местас.
Мöдпырся нюрас пырис лямпаэз вылын. Нюр дорас кералiс уввез да кусттэз, сэтiсь керис посок, кöда кузя позяс кöиныс дынö матöжык сибöтчыны.
Куимöт лунас босьтiс ньöв да ньöвьёссез, шодз да чер. Шуис сiдз: нежели пö ньöвьёсь оз вий, дак шодзыс бытшкас, ежели и шодзыс оз вермы, дак черыс, мый колö, керас ― эд зверьыс сёравно сы вылö уськöтчас.
Бура вöлi думайтöм, да умöля шогмис: корöтiсьыс дынöдз эз инмы ― посокыс оз видз, вöйöтö. Сiдз и этадз пондылiс ― нем оз пет. Керрез чапкис ― вöйисö, нюрыс ньылыштiс, плот керис ― оз туй уйны. Мырсис, мырсис, мыдзис да öдва гортас бертiс.
― Шуисö тэныт: эн мун! ― алейтöны Романсö отирыс. ― Бур, кöть ачыт ловья.
Ашынас деревняас лэбис эшö ыджытжык шум-гам: борда кöин идзасовöй крыша пырйöт гусялöма кык баля!
И Роман вились мунiс нюрас, медбы кошшыны шудсö мöдöр боксяняс. Гöгöртiс нюрсö, да эз адззы, кысянь позис бы сидзны кöиныс поз дынö. Мыдзис, пуксис шоччисьны, юрсö мышкыртiс.
Нюрсис чеччöвтiс лягушка, вургыштiс да мыйкö не лягуша моз, а дзик кыввез шувлö.
― Мый инö, чеччавка, сiдзи вурган? ― дивуйтчö Роман. Лягушаыс сы дынiсь пышшикö шуис:
― Кöдöрö ме, сылань и ваыс! Кöдöрö ме, сылань и ваыс! Думайтöв-керис Роман, мый йылiсь лягушкаыс висьталiс, и вежöртiс эд: эстi колö шордыны нюрсö.
Сiдз и керис зонкаыт ― гарйис канава, и неделяöн нюрыс сымда чинiс, что Роман поссö керис кöин позыс дынöдз да пöрöтiс сiйö. Куим ньöвьёсь только и видзис.
Медодзза ньöвьёсьнас Роман писькöтiс зверьыслiсь веськыт синсö. Зверьыс саймис, чеччис, и лыйсись казялiс сэк, что сiя не кöин, не кай, а тöдтöм зверь. Мöднас Роман писькöтiс зверьыслiсь шульга синсö, и сiя лэбзис.
Куимöт ньöвьёсь инмис сьöлöмас, и пода сёйись усис нюрас. Усис как раз сiя дзибьяинö, кытöн öнöдз зыбун, и пыдöстöм нюр ньылыштiс сiйö. Роман только и ештiс казявны, что горшалiсьыслöн юрыс вöвлöн кодь да унаöн кузьжык, тушаыс ― зверьлöн, но эмöсь борддэз да змейлöн кодь кузь бöж.
Сы йылiсь, кыдз Роман вийис лёк зверьсö, етша ни тöдöны, а нюрсис шордöмсö, кöда сыбöрын лоис шорöн, öнöдз шуöны сы нимöн: Романшор.
Дата добавления: 2015-11-16; просмотров: 44 | Нарушение авторских прав
| <== предыдущая страница | | | следующая страница ==> |
| БУСЫГИНСКÖЙ КЕРÖС ЙЫЛIСЬ ЛЕГЕНДА | | | Вступление Несколько слов о том, зачем я написала эту книгу |