Фыды рæстдзинад

Хъæбул, нæ дын кæнын ныхæстæ

Мæхи ысраст кæныны охыл:

Хъысмæт мæн бафтыдта æлгъыстау,

Тызмæг, æнæхайыры тохыл.

Æмæ-иу аззадтæ ды фæсвæд

Мæ хъуыдытæй... Цыдысты бонтæ, —

Фыдбылыз-иу цыди мæ фæд-фæд, —

Зæры бонмæ фæцардтæн сонтау.

Мæ тох рæстдзинады сæрвæлтау

Мæ чысыл хурæй баскъуыд уаз дæр! —

Нæ царды сусæггаг æрфæнты

Нæ вæййы уыцы зынæй карздæр.

Нæ цард нæу аив быд ныхæстæй, —

Кæд дæм уый искæд бон æрхъара,

Дæ туджы кæд фæуа мæ хъæстæ,

Уæд базондзынæ мæн æмбарын.

Зыдтон æз алкæмæн дæр барын:

Мæлдзыджы номæн кодтон табу,

Фæлæ рæсугъд сæгуыты марынц,

Уæд та-иу растади мæ раст уд

Тызмæглæджы ныхмæ, — йæхицæй

Хуыцау æнхъæл чи у, æцæг та

Сæрæй къæхты бынмæ у ницы,

Уæддæр æрæхгæны дæ фæндаг

Бæрзонд, рæсугъд сæнтты æфцæгмæ, —

Гъе уый та у, мæ хур, — поэзи,

Цы ’взагыл дзуры лæг æцæгтæ,

Сæргуыбыр — паддзæхтæ йæ разы,

Стæй фарны адæмтæ... Кæй бон у

Зæрдæйы къæсæй лидзын дардмæ! —

Æмæ мын, чи зоны, йæ номыл

Ды дæр мæ рæстдзинад ныббарай!

Дата добавления: 2015-09-05