О родстве убо сице 13 страница

Сие ведяще, яко ветхии наш человек с ним сраспятся, да упразднится тело греховное, яко к тому не работати нам греху, умерый бо оправдися от греха. Аще ли же умрохом со Христом, веруем, яко и живи будем с ним. Ведяще, яко Христос воста от мертвых, к тому уже не умрет, смерть на нь к тому не обладает. Еже бо умре греху, умре единою, а еже живет, Богови живет.

(л. 930)[3866] Тако и вы помышляйте себе, мертвым убо быти греху, живым же Богови, о Христе Иисусе Господе нашем, да не царствует убо грех в мертвенем вашем теле. воеже послушати ему в похотех его, ниже представляйте уды ваша оружие неправды греху, но представляйте себе Богови. Яко от мертвых живы и уды ваша оружия правды Богови, грех бо вами да не обладает. Несте бо под законом, по под благодатию, что убо согрешим ли, зане несмы под законом, но под благодатию, да не будет. Не весте ли, яко Ему же представляете себе рабы в послушание, рабы есте (л. 930 об.)[3867] Его послушаете, или греха в смерть или послушания в правду. Смотри апостольское завещание, что имать ползовати крещение, аще дел не будет, от празднаго имени христианскаго не будет спасения, якоже и Великии Василии пишет в правиле 45: Христиан[3868] сый ругаяся Христу, от наречения ползы не приимет.

Толкование.

Вера без дел мертва есть, никая же бо полза от наречения, еже нарицатися христианину, Христовы же заповеди отметати и делы злыми тому ругатися. Но есть ли кто крестився во Христа Иисуса, а заповедей Христовых не творит, таковый клятвопреступник есть, (л. 931)[3869] понеже завет положил со Христом во всем святыя Его заповеди слушати и творити, и не сотвори по воли Его, биен будет много. Сам Господь свидетельствует: И не точию заповедей Христовых кто не сотворит, но аще кто и святых ученик апостол и учителей не послушает, И иже аще рече: Не приимет вас, ниже послушает словес ваших, исходяще из дому или из града того, отрясите прах ног ваших. Аминь, глаголю вам, отраднее будет земли Содомстей и Гоморстей в День Судный, неже граду тому.

Виждь, како Господь с клятвою извещает, что будет, иже не приемшим словес святых его ученик (л. 931 об.)[3870] и апостол и святых учителей. А иже кто крестився и обет со Христом положив хранити святыя Его заповеди, и не сохрани завета Божия и своего обещания, которых мук будет достоин? Не паче ли тех, которыя не прияли в дому своя, ниже послушали словес апостольских, их же Господь осуди паче содомлян и гоморян. А иже кто сам не хранит заповедей Божиих, но и хранящих гонит и всяко ненавидит бес правды, и не просто гонит, но и о заповедех Божиих не радети соблаговолит, что тому будет?

Господу глаголющу: Аще[3871] кто по Мне не пребудет, извержется вон, якоже розга (л. 932)[3872] изсышет, и собирают ю, во огнь влагают и згарает.

О клятвопреступницех же смотри Василия Великаго правило 64.

Клятвеник[3873], рекше кленыйся во лжю, или преступаяй истинную клятву, десять лет запрещение приимет, два лета да плачется, три да послушает Божественых писаний, четыре же лета припадает и едино лето да стоит с верными и потом Божественаго общения причастится.

Того же Василия Великаго правило 82.

По[3874] нужди кленся, по шести лет прият будет, а иже без нужди, по дванадесятом.

Толкование.

Клятся некто сего (л. 932 об.)[3875] или иного не сотворити, якоже се судиа сый, ни подписати суда нанесенаго на некоего. И потом понужден быв от болшия власти и подписав, преступи клятву, таковый легчайшим запрещением повинен есть, нужди ради, за шесть бо лет запрещение приимет. Аще же кроме некия нужди преступит, о нем же клятся, два лета да плачется и два да послушает Божественых писаний, пять лет да пребудет с припадающими и два лета прият будет с верными и милостыни с ними приобщится. И тако по первомнадесятом лете тела и крове Христовы да сподобится.

(л. 933)[3876] Усмотрил ли о клятвопреступницех суть, како узаконоположися, яко ни церковнаго стояния, ниже с верными молитвы достоин есть. Ноли и сего не содрогаеши? Послушай самого Христа, ко всем глаголюща: Слушаяй вас, Мене слушает, и отметаяйся вас, Мене отметается. Послушайте же Василиа Великаго правила 73.

Христов отметник во всем житии своем да кается

Иже от Христа отвержется, во все время живота своего должне есть плакатися. На исходе же жития сподобится святого причащения.

Како же ты глаголеши, царю обирати патриархов и митрополитов (л. 933 об.)[3877] и архимандритов и игуменов, не имеющи власти и своего обещания к Богу не сохранив ни в чем? И того ради ни входа церковнаго достоин и вся дни живота своего клятися, и во исходе жития своего сподобится причащения. Откуду ты такия блядивыя проклятые законы приносишь и глаголешь во олтарь царю входити причащатися? Ему же Божественный Златоуст на праг церковный вступати не повеле, аще и царь есть клятвопреступник. Царь же не единою, но трегубо, едино убо во крещении, и другое на поставлении царьстем, егда архиерей помаза его на царство, тогда завет (л. 934)[3878] ему положи, глаголя: О Святем дусе господин и возлюбленный святыя церкве и нашего смирения, царь и великии князь Алексей Михайлович всеа Русии самодержец. Се отныне от Бога поставлен еси царь и великии князь по данней нам благодати от пресвятого и животворящаго Духа рукоположением нашего смирения со освященным собором во святей велицей церкви Успения Пресвятыя Богородицы. И ты, господине сыну, боговенчанный и православный царь и великии князь Алексей Михайлович всеа Русии самодержец имей страх Божии в сердцы и сохрани веру христианскую греческаго закона чисту и непоколебиму. (л. 934 об.)[3879] И соблюди царство свое чисто и непорочно, якоже ныне приял еси от Бога, и люби правду и милость и суд правый, и к послушным милостивное. Ко святей же соборней церкви и ко всем святым церквам имей веру и страх Божии и воздавай честь, понеже в ней царю второе порожен еси, от святыя купели духовным своим порожением и ко святым честным монастырем велию веру держи к нашему смирению и ко всем своим богомолцам о Святем Дусе царское свое духовное повиновение, по Христову евангельскому словеси: Слушаяи бо вас, Мене слушает, и отметаяйся вас, Мене отметается, отметаяйся же ся (л. 935)[3880] Мене, отметается и пославшаго Мя. И сего ради ведяще и се, елико кто честь святителю воздает и та честь самому Христу восходит, от него же и мзды приимут сторицею, и прочее пространнее сего выше написано есть. И ничто же от сицевых сотворил, но все ни во что положи.

Третие же, егда молил царь Новгородскаго Никона митрополита со освященным собором на патриаршество, и Никон много отрицался такова великаго беремене. И по многом царьском молении и всего священнаго собора Никон митрополит царю и великому князю Алексею Михайловичю всеа Русии говорил во святей (л. 935 об.)[3881] велицей соборней апостольстей церкви, Господа Бога и Спаса нашего Иисуса Христа свидетеля поставляя и Пресвятую Пречистую владычицу нашу Богородицу и Приснодеву Марию и святых аггел и архаггел и святаго славнаго пророка и Предтечю крестителя Господня Иоанна и святых славных и всехвалных апостол и святых отец седми Вселенских соборов и всех святых пред священным собором всем и пред его царским сигклитом и пред всеми людьми. Егда изволит Бог Никону митрополиту на патриаршестве и Никон митрополит, усмотря во царе и великом князе порок, которой противен евангельским святым заповедем или противно что (л. 936)[3882] святым апостольским и отеческим правилом, ему, Никону, по писаному во псалмех, не стыдяся говорити пред цари о заповедех Господних и святых апостол и святых отец, и пред бояры. А ему, государю царю, и ево государевым бояром слушати во всем. И он, государь, и ево государевы бояра все обещалися во святей велицей церкви пред Господем Богом и пред Святою Богородицею и пред всеми святыми и всем священным собором заповедей Христовых и святых апостол и святых отец правил слушати и ничто же инако коею любо тщетною хитростию по преданию человеческому и по стихиям мира сего мудрствовати. И от исперва убо был царь (л. 936 об.)[3883] благ, кроток, послушлив, и Никон на патрирашестве был, а как царь и великии князь развратился со святою соборною апостольскою церковию и святыя Божия заповеди и святых апостол и святых отец правила в презрении положил и Никона Патриарха не почал слушать, но и укоряти неподобно. И Никон Патриарх засвидетелствовав в той же велицей соборней апостольской церкви пред Господем Богом и Спасом нашим Иисусом Христом и пред Святою Пречистою Преблагословеною владычицею нашею Богородицею и Приснодевою Мариею и святыми аггелы и всеми святыми, и царю и великому князю с ризничим посылал, написав своею рукою, (л. 937)[3884] чево ради Патриарх Никон отходит, лая место гневу царскому. И он, государь, не ведомо чол или нет, толко то писмо Никона Патриарха назад прислал. И Никон по триех днех с Воскресенского подворья сшол в Воскресенской монастырь. И царь государь и до сего времяни непрестанно гнев свой держит на Никона Патриарха неведомо за что, и всяким ложным оглаголникам веру имет, и многих добрых людей розослал священников и дьяконов и монахов и мирских чрез Божественныя заповеди, и сам на ся чин святительскии и власть церковную восприял чрез Божественыя уставы и чрез свою клятву, еже трегубо клялся, (л. 937 об.)[3885] ово во крещении, ово во царское поставление, ово в Никоново Патриарха поставление, еже не мудрствовати паче, еже подобает благочестивым царем. Он же, государь, не точию архиереов, архимаритов и игуменов и священников и дьяконов во свою волю привлече, множицею и Никона Патриарха в суд нудил с Романом Бобарыкиным и с Ываном Сытиным перед своим околничим Осипом Сукиным и перед думным дворянином Иваном Баклановским. И Никон Патриарх говорил тем думным людям и дьяком, что не подобно то царское величество деет, еже нас, архиереов, чрез Божестве(л. 938)нныя[3886] уставы мирским судиям судити Патриарха. И епископа всею епархиею судят, аще ли невозможно, менши 12 нелзе судити, презвитера 6 епископов, диякона 3 епископа, А митрополита без патриарха не судит. И Осип Сукин говорил Никону Патриарху, смотря в наказ государев: Будет ты не станешь отвечать и с Ываном Сытиным и с Романов Бабарыкиным, и государь укажет по своему разсмотрению указ учинить, а для зделки пришлет два приказа стрелцов и велит так учинить, как ему годно. И Никон Патриарх говорил, что тех гроз царских не страшится, понеже имать (л. 938 об.)[3887] Никон своего царя и владыку Христа, глаголющаго: Не убойтеся от убивающих тело, душу же не могущих убити. ей, глаголю вам, кого убойтеся, убойтеся имущаго власть по убиении воврещи в дебрь огненную, того убойтеся. И говорил Никон Осипу околничему: Будет есть у тебя указ от царя такой, еже убити мя, Никона, Никон того не боится. И открыв ребра своя Никон, околничему давал, да убивает. И он говорил: Коли де такой указ государев будет, не посоромимся. Да Никон же Осипу говорил: Что Никон ино смерти своей радит, (л. 939)[3888] ни о имении коем любо, а в суд не идет чрез Божию заповедь, глаголющую: Хотящему с тобою судитися и ризу твою взяти от тебе, не возбрани ему и срачицу.

И велел Никон казначею что есть в казне денег серебряных принести, и по сыску сыскалось шестьсот рублев. И положили на стол в Крестовой, да будет кого Никон преобидел, и он да возмет со страхом Божиим. А будет не достанет, и он бы велел в церкви образу окладныя, книги, колокола имать и на монастырских дворах скотских скотину, какая есть. И он, Осип, велел Роману имать денги. И Роман за пожатую (л. 939 об.)[3889] рожь, которую Никон велел зжать на своей земли, которою землею Роман завладел насилством, за 66 чети ржи всю шестьсот рублев. А как та рожь зжата, и в те поры покупали рожь четверть московскую в полтину. И после того по государеву указу присыланы в Воскресенской монастырь от царя и великого князя думной дворянин Иван Баклановский да дьяк Василей Зверев со многими людьми, с подьячими и с стрелцы. И Патриарху Никону говорили, чтоб Патриарх с Романом зделался. И Патриарх Никон говорил, что он Романовою землею не владеет, а владеет своею купленою, а Роман (л. 940)[3890] напрасно вклепывается. И они, думной дворянин Иван Баклановский и дьяк Василей Зверев сказали: Нам де та спорная земля велено отвести Роману по ево скаске. Да и поехали на землю отводить.

А как стали отводить, и Никон Патриарх пошел во святую Божию церковь з братьею и пел молебен святому и животворящему Кресту Христову и молитвы святыя говорил псаломския пристойныя в напастех бываемым по уставу Афанасия Великаго, архиепископа Александрийскаго. И во вторый день Патриарх з братьею пели молебен по тому же чину, а в те поры был Роман в монастыре у молебна и ничего не говорил. И после того (л. 940 об.)[3891] многое время спустя Роман доволил на Никона Патриарха, будто Никон Патриарх проклинал государя царя с царицею и с царевичи и с царевны и со всем домом. И для того во 171-м июля в 18 день присыланы в Воскресенской монастырь боярин князь Никита Адоевской да околничей Родион Стрешнев, да думной дьяк Алмаз Иванов, да голова стрелецкой Василей Философов и с стрелцами и с ыными многими людми. Да с ними Гаский митрополит, сказывался Паисеом, зовут Лигаридиус. Нецыи же о нем поветсвуют. яко не суть православныя святыя восточныя церкви, но западнаго (л. 941)[3892] римскаго костела был у Папы 30 лет дьяконом и в Мутьянах де был многое время и велми насеян римския ереси. Много попам вдовым велел на других женах женитися и чернцам молодым и черницам брачитися и мяса ясти. И Мутьянской митрополит писал ко вселенским патриархом, и они ево прокляли и платье велели с него снять. И он из Мутьян ушол в Полшу и в Польше многое время при короле был и по всем костелам службу отправлял. Да на него ж свидетелство привез святыя Афонския горы монастыря Констинова[3893] архимандрит Феофан, книжицу (л. 941 об.)[3894] толкование "навеличит душа моя Господа". А та книжица друкована в Риме, и в ней имя его Паисеино есть мирское и Марк. Да и здесь де он живет никакова чернеческаго правила не держит и к церкви не ходит на вечерю и на заутреню и на литоргию. Нецыи глаголют, яко и мяса ест, Федор Татьянин сам видел, как табак пьет. Да с ними же были Астраханской архиепископ Иосиф, Богоявленской архимандрит Феодосии, а приехали в вечерю. И после вечерни присылали к Патриарху Никону, что он, боярин князь Никита Адоевской, с товарыщи и власти (л. 942)[3895] присланы от великаго государя царя ко мне, Никону Патриарху для великаго государева дела. И Никон Патриарх говорил, коли они, боярин с товарыщи, присланы от великаго государя, и они бы шли. А с ними де есть сказывается Газскии митрополит Паисей, и тот бы, будет у него есть вселенских патриарх грамоты отпустныя, якоже правила святых отец показуют, да и к нам от братей наших вселенских патриарх. И боярин сказал, что де у него есть отпустныя грамоты от святейших вселенских патрирах. И как пришли бояре и власти к Патриарху в сени, и Патриарх говорил по чину (л. 942 об.)[3896] монастырскому "Достойно есть" и молитву за царя и за царицу и за царевичев и за царевен. И по совершении молитвы боярин князь Никита говорил: Великии господин святейшии Никон Патриарх, великии государь царь и великии князь Алексей Михайлович всеа Великия и Малыя и Белыя Росии саможержец велел тебя о здоровье спросить. И Никон Патриарх говорил: Милостию Божиею се жив есмь. Как его, великого государя царя и великаго князя Алексея Михайловича всеа Великия и Малыя и Белыя Росии самодержца, Бог милует? И боярин сказал: Как де мы поехали, и он, государь, дал Бог в добром (л. 943)[3897] здоровье был. и потом говорил боярин: где де тебе говорить государево дело, здесь ли в сенях или в келье? И Патриарх говорил: Добро пожаловать в келью. И бояря и власти, вошед, стали на преднем месте, а власти у печи. И боярин говорил: По челобитью де Романа Бабарыкина присылан по государеву указу для розводу думной дворянин Иван Баклановской да дьяк Василей Зверев. И как де тое землю начали розводить, и ты де с архимандритом и з братьею пели молебен, а на молебне многие молитвы говорил с клятвою и государя де царя проклинал и детей его государевых. И Патриарх (л. 943 об.)[3898] говорил: Молебен пел и псалмы говорил по уставу Афанасия Великаго пристойные случая печалей, а государя не проклинал, за государя Бога молил. И то нестатное государя проклинать, а говорил молитвы святы о его государеве многолетном здоровье и о государыне царице и о государех царевичех. И на обидящих нас каковы молитвы сложены от Давида пророка и царя, иже той молился в своих скорбех и гонениих ко Господу Богу, на врагов своих, и я те молитвы говорил. А что в них писано, и мне того нелзе убавить, так без убавки святая церковь прияла и по вся недели исполняет устав той. (л. 944)[3899] А как было, и вы подите за нами в церковь и сами услышите, как было. И князь Никита святыя православныя церкви отрекся, у нас де много своих церквей, а в твою де не идем.

Да ты же де клал пред крест и пред образ Пресвятыя Богородицы государеву грамоту, розвертев, и по молебне де тое государеву грамоту ты чол, для чего? И Патриарх говорил: Грамоту государеву пред святый крест и пред образ Пресвятыя Богородицы клал и по молебне чол для того, что земля под Воскресенским монастырем Иверскаго монастыря. И та земля, которую по государеву указу Роману отвели, куплена и возложена Пресвятей Богородицы в Ыверской монастырь, (л. 944 об.)[3900] и тот у меня болшой монастырь.

А в государеве грамоте написано: А кто будет по нас сие наше царское вечное повеление чем презрит и сию нашу жаловалную грамоту какими мерами или которыми причинами нарушит, или из дому Пречистыя Богородицы Иверския те вотчинные села и деревни и рядки и погосты и починки и пустоши и озера и рыбные ловли или иныя какия угодья отъимет, или не учнет вечно творити и ходити о всем так, как в сей нашей царской жаловалной грамоте писано, и того судит Бог, якоже и прежних неправедников, которым за их великое согрешение в сем веце, (л. 945)[3901] не стерпев, Божие милосердие погубило без милости, а в День Судный да воздаст Господь Бог, якоже Июде и прочим злодеем. И да обрящет себе Бога ратующа и затворит от них двери щедрой своей милости. А яже при нас зде за всякую обиду и за всякое немилосердие казнь. И чтоб та государева клятва на нем, Романе, утвердилася.

И князь Никита и товарыщи его почали говорить: У нас есть роспросныя речи строителя твоего Аарона, что де ты государя проклинал. И Никон Патриарх говорил: Вы говорите, что я клял. И прошал строителевых роспросных речей, и они и не показали. И Патриарх спра(л. 945 об.)шивал[3902] бояр, хто ево роспрашивал. На соборе де его роспрашивали митрополиты и архиепископы да и сюды де прислали с собору властей Газского митрополита да архиепископа да архимарита. И Патриарх спрашивал: Для какова дела прислали и по которым святым правилом? А сего, его жзе вы глаголете Газский митрополит, сказывал у себя грамоту от вселенских патриарх, и он нам ныне бы дал. И боярин сказал: Есть де у государя от вселенских патриарх грамота. И Никон говорил: Которая у государя, та государю, а не нам. Мы законныя истязуем по уставу святых апостол (л. 946)[3903] и святых отец. Непристойно и государю царю таковых приимати чрез Божественныя заповеди. И говорил Патриарх: Господу глаголющу[3904]: Аз бо от Бога изыдох и приидох. О себе бо не приидох, но Той Мя посла. И паки инде рече[3905]: Яко един несмь, но Аз и пославый Мя Отец. И в законе писано есть[3906]: Яко двою человеку свидетелство истинно есть. Аз есмь свидетелствуяй о Мне самом и свидетелствует о Мне пославый Мя Отец. И о себе ничесо же не творю, но якоже научи Мя Отец Мой: сия глаголю, и пославый Мя со Мною истинен есть, яко снидох с небесе, да не творю волю Мою, но волю (л. 946 об.)[3907] пославшаго Мя Отца. И паки[3908]: Глаголяй о себе, славы своея ищет. Аще Аз свидетелствую о Мне, свидетелство Мое несть истинно. И паки Божественный апостол: Аще приходит к вам и сего учения не приносит, не приемлите его и радоватися ему не глаголите. Глаголяй бо ему срадоватися, сообщается и делом его лукавым.

И паки заповедает Господь, глаголя[3909]: Внемлете от лжих пророк, иже приходят к вам во одеждах овчих, внутрь же суть волцы. От плод их познайте их. И паки инде рече: Блюдетеся, да некто вас прелстит. Мнози бо приидут во имя Мое. И Божественный апостол (л. 947)[3910] рече[3911]: Никто же вас да лстит суетными словесы. И паки инде рече[3912]: Повелеваем же вам, братие, о имени Господа нашего Иисуса Христа отлучатися вам от всякого брата, безчинно ходяща, а не по преданию, еже прияша от нас. Аще ли же кто не послушает словесе нашего, посланием его сказуйте и не примешайтеся с ним, да посрамится.

Такожде же, приискав, и Божественныя чол правила.

Святаго Антиохийскаго собора правило 11.

Епископ[3913] или презвитер или диакон сам о себе к царю приходя, бес повеления сущаго во области митрополита, с причащением и сана да отпадет.

Толкованье.

Непокорство во всем (л. 947 об.)[3914] святии отцы измещуще и благочиние соблюдающе, возбраняют епископом и презвитером и инем всем священническаго чина бес повеления и бес писания митрополита своего к царю отходити или слухома его стужати и возвещати о неких вещех. И того ради без воли митрополита своего, отходящаго епископа к царю или презвитера и от сана изврещи повелевают и от причащения упразднити.

Святых отец Сардикийскаго собора правило 21.

Иже[3915] добре и богоприятне изведеныя буестию поколебати покушается, несть епископ. Виден же быв епископ, грядый в стан, (л. 948)[3916] пакости да не приимет, аще позван будет прежде реченных ради грядый. Аще же инако, да увесть, яко без общения есть.

Толкование.

Иже не хранит добре и богоугодне исправленых заповедей, но буестию и гордостию ино нечто паче заповеданных творити дерзнет, и чести и сана епископьскаго да извержется, понеже уже исправлено есть, инако не ходити епископу в стан царев, аще не царскими грамотами позван будет. Аще убо мимо грядый епископ хотя ити в стан царев и обитает у другаго епископа, подобает убо епископу, у него же обитает, во(л. 948 об.)просити[3917] вины шествия его, чесо ради грядет, и аще обрящет его по тому образу, якоже прежде рехом или обидимых ради сирот же и вдовиц, да помолитеся о них, или инех ради таковых полезных вещей в стан царев грядет, да не спакостит ему никако же, но и с честию отпустит его, и да пишет о нем к сущим во области братии своей, епископом всем приимати того не зазорно, яко шествующа по правилом же и без соблазна. Аще же инако обрящет того в стан царев грядуща или показатися цареви хотящу или о неких непотребных вещех (л. 949)[3918] молитися, яже неподобна суть архиереом, не приобщатися к нему, ни грамот подписывати, ни промышления ни единаго же отнюдь сподобити того.

Святых отец Карфагенскаго собора правило 23.

Епископ[3919] да не идет на он пол моря, аще от старейшины страны своея отпустную грамоту не возмет о прехождении.

Толкование.

Ни епископу, ни причетнику далече отходити от своея церкве несть достойно без повеления и без отпустныя грамоты митрополита своего, якоже Средческии и Лаодикийскии собор повелевает.

Того же святого собора правило 106.

Некия[3920] ради нужды хотя к церкви отъити (л. 949 об.)[3921] да яве сия сотворит к Архидонскому епископу и Римскому и отпустное послание да возмет, аще ли ни, без общения есть.

Толкование.

Епископ или причетник аще восхощет поити к церкви да скажет первое вину к Архидонскому епископу, ея же ради идет, и возмет от него грамоту отпустную и, в Рим пришед, покажет ю епископу римскому и да явит ему вину, ея же ради идет к цареви, и той да разсудит. И аще будет подобна вина, да возмет и от того грамоту, ею же от царя приимет помощь. Аще же кто от епископ или от причетник инако к цареви отъидет, да будет (л. 950)[3922] без общения, сиречь да отлучится. И о сем ищи правило 11 Антиохийскаго собора и 9 правило в Средце собора.

И сего ради государю неподобно есть несведомых приимати и присылати к нам чрез Божественныя заповеди и святых правила. И кто его знает, что он есть митрополит или аще был митрополит и есть извержен или отлучен. А кто с таковым молится и о таковых пишет святых апостол правило 10.

Моляися[3923] со отлучеными сам такожде да отлучен будет.

Толкование.

Аще кто молится с еретики в церкви или в дому со отлучеными (л. 950 об.)[3924] от церкви, сам такожде да отлучен будет.

Правило 11.

Моляися со извержеными, сам такожде осужден будет.

Толкование.

Аще кто молится, рекше, аще служит презвитер в церкви с презвитером, его же епископ изверже от сана, да извержен будет и сам.

Правило 12.

Приимый инде не приятнаго сам не приятен.

Толкование.

Аше некии причетник от епископа истязан, есть ли достоин поставитися презвитером во святей Божии церкви, он же сведый своя согрешения, не терпя испытания, отуду отшед и пришед к другому епископу, прият будет (л. 951)[3925] от него бес писании ставилных, являющих его непорочную веру и житие, да отлучена будет оба и той и приемый его епископ.

И нам не точию лепо его послушати, но ни на монастырь пускать не годно. А кто сим образом деет и о себе никоторого исправления не покажет, и о том святого собора во Антиохии Сирстей правило 13.

Аще[3926] никим же позван, ни умолен быв епископ, во иную область отшед, и поставит презвитера или диакона или правление некое церковное творит, таковая не тверда и разрушена да пребудут, а он да извержется.

Толкование.

Многа правила (л. 951 об.)[3927] обрящеши о сем возбраняюща, еже не преходити епископу от своея области во иную и поставляти в ней презвитеры и диаконы, или иное что епископьское творити, токмо аще где позван будет, умолен от страны тоя епископа таковое что творити. Аще же от своего дому во иную область пришед, поставит презвитера или диакона или строению церковных вещей некое правление сотворит, нетвердым и разрушеным быти от него сотвореным и самого изврещи правила повелевают.

Того же святаго собора правило 22.

Такоже[3928], якоже и третиенадесять правило сего собора (л. 952)[3929] и се правило глаголет, еже коемуждо епископу в своем пределе владати и поставляти презвитеры и диаконы, во ин же предел не ити, ни поставити презвитера, ни ино что епископьское творити свене воли епископа предела того. Аще же дерзнет и сотворит что таковое, да будет извержен и повинен и поставленыи от него презвитер или диакон.

Святаго вселенскаго 4-го собора в Халкидоне правило 5.

Преходящии[3930] из града во град иже от них правилом повинни суть.

Толкование.

Речено есть в третиемнадесять правиле, иже во Антиохии собора, яко не дерзнути епископу (л. 952 об.)[3931] преити от своея области во иную и поставити презвитера или диакона без воли сущаго во области той епископа или ино что епископьское творити правление. Аще бо и сотворит что таково, праздно и нетвердо да пребудет и той месть да приимет своего бесчиния и извержен да будет от своего сана Святою Троицею, тако бо и зде написаное правило повелевает.

Святаго собора в Средце правило 2.

Аще[3932] кто от града во град прешед и молвы творит, от народа приимая себе поборники, да глаголют, желаем и молимся, да будеши нам епископ, той ни на самой кончине не причастен.

(л. 953)[3933] Толкование.

Аще который епископ в толико шатание и неистовство пришед, и дерзнет просити и преити от града во град, глаголя, яко хотят мене людие града того, и оттуду взем грамоту, показует написаное к нему от всех граждан моление, якоже дабы им епископ был, еже яве есть, яко смышлением и хитростию таковое бысть, мало неких мздою и дары и честию возмогл привлещи к себе, да в церкви ставше, молву сотворят, глаголюще велегласно, просяще имети того епископа. Таковаго убо яко зело смевша и таковое сотворша и познана бывша в том, вельми святый сей собор (л. 953 об.)[3934] осуди. Отрече бо тому ни во исходе от жития достойну быти причащения и назнамена. Странно бо се и страшно есть, еже ни во исходе жития не сподобитися причащения, его же не обрящеши во всех правилех написана, о инех ни о коих же гресех такова запрещения.

Того же святого собора правило 3.

Никоторый[3935] же епископ не позван во град да не приидет. И епископ с епископом аще имать прю, чюжаго епископа да не призовет. Аще ли же ни, да судит Римскии, ту будут чюждии.

Толкование.

В различных правилех речено есть, еже никому же дерзнути (л. 954)[3936] от своего предела во иную область преходити, аще не будет позван от области тоя митрополита и от сущих с ним епископ. Тожде убо и сей святый собор повелевает, но аще который епископ с другим епископом о некоей вещи распрю имать и с ним да судится пред собором тоя области, в ней же есть. И не подобает от иныя области разума ради неких епископ призывати, но от единех тоя области епископ судитися. И аще не угоден ему будет суд и мнит, яко не по праву осужден быв, судивый его митрополит и епископи, да возвестят Римскому Папе (л. 954 об.)[3937] писанием вину и суд, како осудиша и. И аще не восхощет того суда и той, или сам разсмотрив суд, аще право осужден бысть, возвестит им писанием. Аще ли же ни, тамо близ их сущия области епископом повелит, да сотворше собор, судят ему паки второе.

Того же святаго собора правило 12.

Позван[3938] епископ от епископа, позвавшему же его невежде сущу, да не глаголет почасту на людех, порок бо есть невеждному и обругание епископии его, и обое не бес порока.

Правило 13.

Без нужди тяжки бедно есть епископу свою (л. 955)[3939] церковь надолзе оставляти.

Толкование обема правилома.

Аще который еспикоп в другий град прейдет, позван бысть епископом страны тоя, и аще же будет позвавый его епископ невежда, не ведый добре Божественых Писании и учительству неискусен, позваный епископ да не учит прилежно люди и да не глаголет в народе много Божественых Писании. Таковое бо дело мятеж составляет и преобидение творит позвавшему его епископу. Мнит же ся указанием таковаго учения, чюжду себе обручая церковь и люди к себе привлачая и тщася преданую ему церковь оста(л. 955 об.)вити[3940] и в ту преити. Сего ради убо повеле сей святый собор да позваный епископ вящше трии недель от своея церкве да не останет, но к порученым ему людем да возвратится, аще не некая нужда тяжка и вещь неудобна сотворит его вящше того пребыти от своея церкве.

Дата добавления: 2015-08-02