О родстве убо сице 11 страница

Такожде[3651] же Иисус Навгин заповеда сыном Израилевым при Ерихоне, глаголя: Град сий проклят, все же, еже в нем, Господеви сил. Вы же снабдитеся от клятвы и да некогда помыслите вы взяти от клятвы и сотворите полчище от сынов Израилев клятва (л. 876 об.)[3652] и потребите ны. Злато же все и сребро и медь и железо свято да будет Господеви, в сокровище Господне да ся несет. И бысть егда град запалиша огнем со всем, еже бе в нем, разве злата и сребра и меди и железа, отдаша в дом Господень внести.

Разсмотри, богоборче, князю Никито, како глаголеши, яко слободы патриарши и митропольи и владычни и монастырския не все ли суть Божие и мы Его есмь, развее тебе и подобных тебе? Не Его вы есте. Не все ли изначала бысть по Божию велению и заповеди, священническая часть, Божия часть и достояние? Почто преминув (л. 877)[3653] болшаго, еже Бога, к меншим низходиши, то есть к нам, смиренным, и называеши Божию часть и достояние. Наше достояние, не суть ли наше достояние[3654], Божие есть достояние, и якоже древле по Божественной заповеди одесятствоваша людие, тако и в Новом законе давали благочестивыя цари, якоже Константин Великии, иже есть писано выше сего в заповеди его.

Такожде и на Русии великии князь Владимир, крестивый Рускую землю, и подобныя тем, давали во святыя Божия церкви, Пресвятей и Живоначалней Троице и Господу Богу и Спасу нашему Иисусу Христу, и Пресвятей (л. 877 об.)[3655] Пречистей Преблагословенней владычицы нашей Богородицы и Присно девей Марии, и святым аггелом и архаггелом, и святому Иоанну пророку и Предтечи, и святым всехвалным верховным апостолом, и святым великомучеником, и святым верховным учителем и святителем, и преподобным и богоносным отцем, и всем святым, а не патриарху и митрополитом и владыкам и монастырем, якоже свидетельствуют писанныя их заповеди, великаго царя Константина и великаго князя Владимира и прочих боголюбцев и христолюбцев жаловалныя грамоты и вкладныя. Ов убо дал Пресвятей и Живоначалней Троицы, (л. 878)[3656] ин же святому Спасу Христу человеколюбцу, ин же Пресвятей Богородицы и прочее, якоже выше сего писано. И быша таковыя слободы в послужение святым Божиим церквам вместо левит, якоже выше сего писано, якоже и святых апостол правила показуют.

Правило 38.

Да[3657] управляет епископ властельски церковное имение и ничто же от него сродником своим да не даст, аще токмо не суть убози.

Толкование.

Не подобает епископа разсуждати о правлении церковнаго имения, достойно бо ему есть властию таковое правити, яко пред лицем самого Бога. Не достоит же ему (л. 878 об.)[3658] от таковых что свое особно сотворити, ни ближним своим Божия дому раздавати. Аще же суть убози, да подобает им потребная, яко и прочим нищим, изветом же тех церковнаго имения ничто же да не продаст.

Правило 40.

Церковное[3659] имение и особое епископье да предлежит яве, да епископ завещавает о своем, якоже хощет, и церковное да пребывает без пакости.

Толкование.

Подобает епископу, внегда хотят его поставити епископом, да яве покажет все имение свое и препишет пред всеми, такожде и церковное, да и в животе и по смерти даст (л. 879)[3660] и оставит от своего, ему же хощет. Церковь же свое да имать не вредно.

Правило 41.

Повелевает же епископом обладати церковным имением, аще бо честныя человеческия душы поручены суть им, больми паче имение поручити им подобает, яко да по сих власти все управляют и убогим требование подают рукама честных презвитер и диакон, со страхом Божиим и благоговением. Подобает же и тому самому, аще требует взимати себе на нужную потребу, еже хощет, и приходящую странную братию гостити и кормити и ничто же (л. 879 об.)[3661] потребнаго не лишити их, ибо закон Божии повелевает[3662] служащым олтареви от олтаря кормитися, понеже ни воинник не может о своем имении оружия нанести на противнаго.

Толкование.

Аще и во области даются епископом церковная имения, но не о себе самому сия управляти, но с ведением и по совету презвитер и диакон своих таковая строити повелевают Божественая правила, и яко нужныя потребы токмо подобно есть себе взимати епископом от церковнаго имения.

И аще бо Древнии закон и храм и жертва сень будущих, то есть Новаго закона и церкви и священс(л. 880)тва[3663] толикою честию почтена, колми паче подобает Новаго закона церкви и священству быти предпочтеннейше, ея же ныне обезчестисте, и все, елико им прежде на послужение мало слобод на Москве и по градом, все усвоисте на свои потребы. Кто же ныне нужнейшыя церкви и архиерею послужит, то есть стражбу и прочая потребы церкви, якоже Господь Бог заповеда Моисеом, иже выше назнаменано есть? Никто же, разве чюждих. Не слышасте ли реченное Богом, яко всяк прикасаяйся иноплеменник смертию да умрет? Иноплеменник же есть не иже кроме Израиля от язык, но иже (л. 880 об.)[3664] кроме племени Левиина, якоже Корей и Дафан и Авирон, их же не избра Бог, сами потекоша, и того ради пожре земля, якоже есть писано[3665]: И прогневаша Моисея в стану и Аарона, святого Господня, отверзеся земля и пожре Дафана, и покры на сонмище Авирона, и разжеся огнь в сонме их, пламень попали грешники. И[3666] простре Иозия руку на киот Божии придержати, и ят за нь, и порази его Господь, и умре пред Господем.

Тако и вси, елицы на святую Божию церковь вадяще и ненавидящей и глаголющей, яко патриарши слободы и митропольи и монастырские мало взяша, а болшее свое погубиша. (л. 881)[3667] Взяша тысящи, а погубиша тмы многи, ово междоусобием, ово мором, ово воинами и иными многоразличными напастьми и бедами, их же кто может и списати или исчислить порознь.

Но мы о Монастырском приказе и о мирских судьях и подобных сим совопросниче написали. Ты же, ответотворче, аще хощеши и с сущими с тобою, тамо обретай. А еже во ответе своем пишешь: Пускай то бы было, что преж сего не бывало Монастырского приказу или был, то подлинно наш всещасливый царь Алексей Михайлович учинил, что привел к сущему делу как тот, (л. 881 об.)[3668] который любит лутчии порядок и умеет к доброму и достойному речи приводить, паче иных на добрейшии суть. Оправдания надобе, чтоб сидел судиа на своем месте и слушал бы челобитья и расмотрял бы, которы имеет и чиа правда, и указ бы чинил добрых оправдать, а виноватых смирять тым же обычаем, что Бог благословит и венчает праведнаго и смиряет.

Писано убо есть: Разсыплет Бог кости человекоугодником, таковому, якоже тебе, глаголющему от своих. Богу свидетелствующу: А еже от себе глаголет, лжу глаголет. Где есть писано, еже бы царем (л. 882)[3669] и князем и бояром и дьяком и судиам патриарха и митрополитов и архиепископов и епископов и архимаритов, игуменов и попов и дьяконов и причетников судить? В которых правилех писано? Но паче судимым тем самем быти, а не судити. И еже убо патриарха судити, никоторыя правила устав в себе имут, аще вся изочтеши, развее не христанских и мучителских закон. А еже митрополита кроме патриарха со инеми по 9-му правилу 4-го Вселенскаго собора, епископа же по 12 правилу святаго Карфагенскаго собора всея области епископом, аще не будут вси, менши 12 да не будет, (л. 882 об.)[3670] презвитера 6 епископов, диакона 3, причетника епископ един.

Ты же по которым законом подтвержаеши устав оный беззаконный, в Монастырском приказе судити простым людям митрополитов и епископов, архимандритов и игуменов и попов и дьяконов и причетников. Такожде сего ж собора 20 правило повелевает и 108-е, о сем доволно есть показано ниже сего.

Паки пишешь: Прошу, учинил ли коли нибудь таков суд Никон, седел ли коли нибудь на своем судебном месте, чтоб слушал жалобы и зависти чьей нибудь? Николи, толко он де(л. 883)ржал[3671] мирских, которые судили в его приказе и челобитныя роздавал людем своего двора, и они некогда прямое кривым чинили, а кривое прямым. Так ли делают судьи? Так ли патриархи к сыном своим, которые суть отцы отцем?

Речешь ми, враждотворче, и потязаеши нас, патриарха, что мы сидели коли нибудь на своем судебном месте, что слушал жалобы чьей нибудь, николи. Мы убо присно сидели на своем судебном столе. А тебя кто посадил на Божием месте, еже патриарха посуждати? И откуду еси ты и по которым законом нам судиею ставишися? И глаголеши: (л. 883 об.)[3672] Так ли патриархи к сыном своим, которые суть отцы отцем? Како же ты не суть отец отцем, но аще бы еси и православен был и яко сын, како бы мог отцу отцем законополагати? Правила святых отец не оставляют патриаршии суд никому посуждати, не точию пришелцу, но ни всем епископом. Пришелцу же Божественныя правила запрещают в чюждей епископии учити или законополагати, и от сана измещут, и ни во исходе жития причастником быти Христовых таин. Святое же священное Евангелие соблазн творящим, камень жерновный повелевает таковым обязати овый и повержену быти в море. (л. 884)[3673] О тебе же вси сведущии глаголют, яко у Папы Римскаго был 30 лет дьяконом и свидетелство приносят книжицу глаголемую ѕ[3674] друкованую в Риме, в ней же написано есть имя твое.

И Божественые правила святых апостол 10 и 11 и 12 глаголют: Моляися со отлученым, отлучен, и приемляй неприятого, сам не приятен.

И 45 правило святых апостол глаголет: Моляйся[3675] с еретики да отлучится, аще же яко причетники приимет я, да извержется.

Толкование.

Епископ или презвитер или диакон, аще поломится токмо с еретики или в дому или в церкви, да отлучется. Аще же и повелит им (л. 884 об.)[3676] служити в церкви, яко презвитером, или ино что от священных содевати, яко причетником, таковый да извержется.

Святаго собора, иже в Лаодикии, правило 33.

С[3677] еретики и со отвергшимися от соборныя церкве да не помолится никто.

Толкованье.

Аще помолится кто с еретики или со отлучившимися своею волею, от соборныя церкве сам отлучен да будет. Еретицы же глаголются, иже о вере блазнятся и согрешают. Отлучившии же ся от соборныя церкви сии именуются авдиане, иже убо веру имеют, якоже и соборная церковь. Множайшии от них в монастырех (л. 885)[3678] пребывают и со всеми на месте не молятся, и хулят епископов наших богатства ради. Другия же ради инех вин и со июдеи Пасху особно творят, имеют же некия особныя распри, недоразумная словеса Божественаго писания, неправо сказующе.

Того же святаго собора правило 37.

Со[3679] июдеи и с еретики никто же да не празднует и да не приимет, яже глаголется, от них праздничное.

Толкование.

Несть никоего же общения свету ко тме. Сего ради убо християном не праздновати с еретики или со июдеи, ни приимати, яже в праздники их творят якоже (л. 885 об.)[3680] се, опресноки или что таковое.

Святаго Карфагенскаго собора правило 9.

Не[3681] приобщеному приобщаяся, и сам не приобщен.

Толкование.

Аще котораго презвитера или диакона отлучит свой епископ и другии епископ, ведый его отлучение, и приимет и сподобит его с собою служити, и сам отлучен и той, его же служити сподобил есть, недостойна суща. Такоже аще кто еретиком приобщается и молится с ними, но от церкве да изринется.

И сия тако суть: Аще и церковь есть сия законопреступаяй, повинен сим будет. А еже глаголеши, яко аз (л. 886)[3682] николи сидел на своем судебном месте, чтоб слушал жалобы и зависти чьей нибудь, толко он держал мирских, которые судили в его приказех и челобитныя роздавал людем своего двора. И сие не бес правды, еже мирским людям судиям быть под повелением патриаршим. Сие и у всех обретается, у митрополитов и епископов в Росии. Обаче же патриаршескии уряд по закону мирских людей имать, якоже и Карфагенскаго собора показует правило 76: Да[3683] не стужают епископу, да будут местницы.

Толкованье.

Убозии от силнейших озлобления и обиды (л. 886 об.)[3684] подъимаху и того ради приходяще к епископом, стужаху им и молящеся помощи им. Епископи же овогда помогающе, овогда же не возмогающе, сице изволиша отцы собора сего просити у царя, да промышлением епископов изберет и поставит местников. Местницы же казнители суть церковнии, да противятся насилию и мучителству богатых и отмщают убогия от насилия их. И епископи того ради не стужаеми пребывают.

Того же святого собора правило 97.

От[3685] царя да испросится соглаголник, рекше помощник заступлению о церковных главизнах, иже (л. 887)[3686] хитрость имеют, отмщати вещи церковныя и яко святители о приключающихся удобно возвещати могут.

Толкование.

И паки изволися отцем собора сего, якоже в 75-м правиде угодно бысть просити от царя, яко да вдаст им власть поставляти местники в церкви, еже суть кознители и судии. То самое служение и хитрость имущих церковныя вещи отмщати. Яко да противятся святители прилучающимся, коль краты аще нужда будет и удобь зело могут в судищи ходити и церкви о таковых возвещати и оттуду помощь приимати.

(л. 887 об.)[3687] И по сим правилом узаконися и в патриаршеском судищи мирским судиям и не без воли церковной, но и от царьска чина суть бояре и околничие, да егда прилучится суд от царска чина людем с церковным причетником, тогда не имут зазора рещи, яко патриарши судии судили одны и неправедно, но и царска чина судьи. Якоже той обычай и до днесь святая церковь держит, обаче волею патриаршескою, прежде нас ыбсть и при нас такожде. Того ради и местницы и соглаголницы нарекошася, яко да могут в судища ходити и церкви о таковых возвещати и оттуду помощь приимати, (л. 888)[3688] понеже по церковным законом не всегда мощно есть епископом ко царю приходити, якоже правила собора Антиохийскаго 11 и 12 и Карфагенскаго собора 106 правило показуют. Зде же в Росии не точию ко царю приходити епископом или архимандритом и монахом, но ни на двор царскии прощено есть. Всем убо еретиком, жидом, махаметом и лютором и калвином невозбранно приходити, единою точию епископом православным и архимандритом и игуменом и монахом приход на царскии двор возбранен есть. А еже прямое кривым делать, а кривое прямым, (л. 888 об.)[3689] я того не видал. Вижу ныне, что ты прямое кривишь, и кривое прямишь, Божественныя законы ни во что полагаешь, а новые свои несведомые святей церкви обновляеши.

И глаголеши: Блажени алчющии и жаждущии правды, яко тии насытятся. Правда живет во веки, которая когда одна есть, то все может справедлиый Господь, есть бо светлейшии паче солнца, все добродетелства имеют цари и патриархи для того, что они суть образцы всем, а наипаче правде, всех добрых дел царицу, для чего старинные люди хотели назвать все добрыя (л. 889)[3690] дела. Одным назвать правдою, есть то истина, что "блажени алчющии и жаждущии правды, яко тии насытятся". Почто же ты не взалкал, ни вжадался таковы правды, но всюду чрез Божественныя уставы враждуеши на правду, везде кривишь, якоже самыя твоя писания и являют? И глаголешь: А что может наставливать государь архимариты и всякия власти, то есть одно с привилей царских и извычай общих народов уряды роздавать. Солгал ты зде, якоже везде лжеши, что с привилей царских извычаи. Нигде есть о сем в царских законех, еже бы царем (л. 889 об.)[3691] обирати епископов или архимаритов и прочих властей, но паче сопротивни во святых апостольских и святых отец правилех, такожде и царских законех.

О сем чти святых апостол правило 30-е, Лаодикийскаго собора правило 13 и святаго Вселенскаго 7-го собора правило 3-е, и собора Антиохийскаго правило 19[3692]. И елицы аще обрящутся избраны мирскими властели, Божественная правда не оставляет таковым быти, но изверже. И иже избрали таковых, аще и царь будет, повинен есть епитемии. А иже от таковых избранных епископов поставлены, не суть поставлены, (л. 890)[3693] крещены, не суть христиане. О сем много есть писано выше сего, комуждо подобает знати и хранити своя мера. Саул жертву вознес, царство погуби, Иозия покадив, опроказися. Аще царь есть, пребывай во своих уставех.

Глаголеши ли, яко сердце царево в руце Божии. Тогда сердце царево в руце Божии, егда внутрь Божиих уставов пребывыает. Тако Самоилом рек, яко уничижил еси глагол Господень[3694], и уничижит тя Господь, не быти тебе царю во Израили. Како же ты глаголеши, не ищи от Господа власти, ниже от царя достоинства, пишет Сирах так.

Ответ.

Не всяко тако пишет, есть[3695] инде пишет (л. 890 об.)[3696] той же Сирах: Царь не наказан, погубляет люди своя.

И Еклисиаст: Горе тебе граде, в нем же царь твои юн и князи твои рано ядят[3697]. Мерзость цареви творити злая, милость и истина сохранение царю и обыдет престол его в правду.

Что имеет царь владение дати власть и честь?

Ответ[3698].

Имеет убо царь власть в своих, ему даных от Бога, уставох давати власть и честь мирским людем, а не епископом и архимаритом и прочим властем, якоже и сам пишешь ты: Яко которыя суть вышния суд Божии, а которыя суть земныя, суд царскии.

И паки пишешь: Для (л. 891)[3699] чево двоеглавый орел пишется, что он разширяется удостоинством церковным и мирским.

Ответ.

Есть то правда, что царское величество разширился над церковию, чрез вся Божественыя законы, своим достоинством, а не законом коим любо Божиим. И не до сего точию ста, но и на самого Бога возгорде широтою орла, еже ныне издаде друком лист: Лета от воплощения Слова Божия 1663, на нем же есть написан орел двоеглавый. На орле же царь на коне, в гордости велицей зело. А свыше его на таблице написано, еже Соломон о Христе пророчествова, то царь на себя преписа. Писание ж се (л. 891 об.)[3700] Песни Песней глава 3: Дщери Сиони, изыдите и видите во царе Соломоне в венце, в нем же венча мати в день женитбы его.

И другое писание, еже Исаия о Христе воцарении вечном, глаголя[3701]: Се царь правдивый царствует. И паки другое писание[3702]: Аз поставих царя с правдою и вси путие его прави. Сей возградит град Мой и пленники люди Моих возвратит не по мзде, ни по дару. Рече Господь Саваоф яко: Мне поклонится всяко колено и исповесться всяк язык, Богови глаголя. Правда Израилева к нему приидет и посрамятся вси, отлучающиеся от Господа.

И се не о царе Алексее Исаия прорече, (л. 892)[3703] но о царе царствующем Господе Бозе и Спасе нашем Иисусе Христе. О нем же и Давид глаголет: Рече Господь Господеви моему, седи одесную Мене. И паки: Сел еси на престоле, судяй вправду. И паки: Господь судит людем. И паки: Судит во языцех, исполнит падения, сокрушит главы на земли многим. И инде: Господь воцарися, в лепоту облечеся. И паки: Предзрех Господа предо мною выну, яко одесную Мене есть, да ся не подвижу. И возрадовася язык мой, еще же и плоть моя вселится на упование.

Пророк убо сый и ведый, яко клятвою клятся ему Бог[3704]: От плода чресл его (л. 892 об.)[3705] по плоти воздвигнути Христа[3706] и посадити на престоле его. И Божественный апостол Павел глаголет[3707]: Подобает бо ему царствовати, дондеже положит вся враги под ногама своима. И паки: Многочастне[3708] и многообразне древле Бог глаголав, отцем пророки напоследок днии сих глагола нам в сне. Его же положи наследника всем, им же и веки сотвори[3709], иже сый сияние славы отча и образ и ипостаси Его[3710]. Но ся же вся глаголом силы своея, собою очищение сотворив грехов наших, себе одесную престола величествия на высоких. Толико лучши быв аггел, елико преславне паче их (л. 893)[3711] наследствова имя. Кому бе рече когда от аггел: Сын[3712] Мой еси ты, Аз днесь родих тя. И паки Аз буду ему во Отца, и той будет Мне в сына. И по мале: Престол Твой, Боже, в век века. Жезл правлению, жезл царстия Твоего, возлюбил еси правду и возненавиде беззаконие. Сего ради помаза тя Боже Бог твой елеом радости паче причастник твоих.

Ныне же вкратце речем, что есть царь правды: Добре[3713], седек бо правда глаголется, Амелхи царь, убо Мелхиседек царь правды есть.

Зриши ли во именах описание, кто де есть царь правдивый, но разве Господь наш Иисус Христос, царь (л. 893 об.)[3714] Салимскии, царь мира сказуется, еже Салим, еже паки есть Христово. Сей бо нас праведных сотвори и умиротворил есть, яже на небесех, яже на земли. Кии же человек, царь есть правды и мира, но разве Господь наш Иисус Христос. А иже от пророчества поемля прореченное о Христе Бозе, приписуют себе, что чюдно сотворил любо.

И во Откровении Иоанна Богослова пишет[3715]: И слышах глас народа многаго, яко глас вод многих и яко глас громов крепких, глаголющих "Аллилуиа", яко воцарися Господь Бог наш Вседержитель. Радуимся и веселимся и дадим славу Ему, яко прииде брак агньчи.

(л. 894)[3716] Толкование.

Глас народа и многих вод и громов являет проразителное и прослывущее в песнословии всех аггельских небесных безчисленных сил, яже нецыи воды разумеша сущия превыше небес. С ними же и всяческое праведное исполнение славословит создавшаго. Воцари же ся Господь Иисус Христос, ими же естественне, яко содетель владычествова над сими, чрез человеколюбие воцарися или по умному присвоению, или по области царствует и судии подобающей. Брак же агньчи церковное ко Христу совокупление и смешение, а не времени мира сего царю или князю обручена есть церковь. Его же строители Божественнии быша апостоли, чрез них же ей обручение дадеся духовное, (л. 894 об.)[3717] яко восприемлющии тогда лицем к лицу чистое и святое смешение сущее.

И[3718] видех небо отверстое, небо отверстое и се конь белый, и седяй на нем нарицаемый верный и истинный и в правде судит и брань творит. Очи же его пламень огненный и на главе его многия диадимы[3719].

Толкование.

Еже отверзну быти небеси являет, яко с небесе приидет пришествие судиино, якоже зде завесе сопрятание и согбвение, судииское на земли на повинных осуждение и изречение. Белый же конь знаменует святых светлость и веселие будущее, на них же яздяй, судит языки очима своима пламенныма и огненныма, сиречь своею на(л. 895)зирателною[3720] и разсмотрителною силою, разделяяй пламень огненный, праведным убо просветителный, но не опалителный, грешным же опалителный, но не просветителный. Многия же венцы[3721] или над всеми его царство сущими на небеси и на земли знаменуют, толикия бо, елики и во аггелех чины и на земли скипетра и во святых человецех соборы и множества, или победу во всех строениих окрест нас на грешники чрез долготерпение, якоже глаголет Давид[3722]: И победиша внегда судити сущее. И[3723] имать на ризе и на бедре своей имя написано, царь царей и господь господей[3724].

Толкование.

Имя же царь царей являет Божественаго вочеловечения неразсекомое, (л. 895 об.)[3725] понеже Бог сый плотию пострада[3726] и человек сый царь царей есть, воцарившихся над страстьми. И господь господей стяжавшии поспешением Христовым на грех достоинство и державу, и сих, иже с ним воцарятся в будущем веце.

Сущее. И[3727] видех единаго аггела, стояща в солнцы, и возва гласом велиим, глаголя: Всем птицам парящим в средонебесии, приидитеся и соберитеся на вечерю великую Божию, да снесте плоти царей и плоти тысящо[3728] началников, и плоти крепких, и плоти конии и седящих на них, и плоти свободных, всех же и рабов, и малых, и великих. И видех зверя и царя земныя и воиства их собранная, сотворити брань с седящим на кони (л. 896)[3729] и с воинством его.

Толкованье.

Воинствующая убо со диаволом, воинства множествене именова за многораздирателное греха и разделенное.

Сущее. И[3730] ят бысть зверь и с ним лжепророк, сотворивый знамения пред ним, иже прелсти приемшия начертание звериино[3731], и поклоняющияся образу его жива вврежена будета оба в езеро огненое, горяще жупелом. И прочии убиено быша оружием седящаго на кони, исходящим из уст его, и вси птицы насытишася от плотей их.

Толкованье.

И прочии убиени быша мечем седящаго на кони, двема смертма сущема. Первей убо разделению души и телесе. Вторей же (л. 896 об.)[3732] отсланию в геену. Аще убо на воинствующих со антихристом возрим, слово да имать, яко первая смерть телесная предварит оружием Божиим, сиречь того повелением. Таже сице последовати имать вторая и благо бы имело. Аще ли же ни, то и сии приобщатся со прелстившими я, вторая смерти вечныя муки. А еже насытитися птицам от плотей их, по предизданному и ныне восприяхом. К сему же зане, якоже глаголет некоим Исаием Бог, зане бысте ми в сытость, суще и святым всякое движение плотское безсластно есть и тяжестно и мерзостно.

Смотрити же зде потреба велми опасно, како святии (л. 897)[3733] аггели на себя Божественныя славы не восприемлют, по писанному: Отдадите убо кесарева кесареви и Божия Богови. Не безбедно есть рабу царским себя чином, именем и достоянием почести. Тако и царю не без муки, еже предпочитати самому себя и описоватися между Божественых таинств Ветхаго и Новаго заветов, разширяяся. Зри на устроние святых аггел.

Сущее. И[3734] падох под ногама его поклонитися ему, и глаголет ми: Зри, ни клеврет бо твой есмь и братии твоих и имущих свидетелство Иисусово. Богу поклонися, свидетелство Иисусово есть Дух пророчества.

Толкование.

Глаголет Божественный аггел ко Иоанну, ни клеврет твой есмь, (л. 897 об.)[3735] не кланяйся мне, яко будущая пред глаголющему. Исповедание бо, сиречь свидетелство о Христе, си есть пророческаго Духа подателно. Тем же не кланяйся мне, клеврету своему, но поклоняйся вся содержащему и от сего смиреномудрие навыцаем святых аггел, како не присвояют себе славу Божественую, по горким и убийственым бесом, но сию создателю своему и владыце приносят. Яко да научимся и мы не преписовати на ся Божественую славу, глаголанную от пророк на апостол, ниже написоватися, разширяяся посреди Божественных таинств Ветхаго завета и Новаго, якоже есть написано в Библии московскаго (л. 898)[3736] друку царское изображение на орле и на коне гордо велми и с приписании пророческими, иже о Христе пророчествоваша. Божественыя же таинства древния и новые Христовы, крест и воскресение, ово якож крест Христов, то есть распятие, мало превыше, но в тесноте и безславии, ово же, якоже воскресение Христа Бога нашего сточнил себе и славе своей, коню и орлу, ово же, якоже самого Христа Бога нашего прениже всякоя своея славы и под ногама коня и орла и в тесноте некакой безславии. Ох, ох, увы, увы, люте, люте! В каковы времена достигохом! Збышася писанное: Измениша бо славу Божию в славу человеческу (л. 898 об.)[3737] и четверногих скот и птиц. И паки другое писание: Возлюбиша славу человеческую нежели славу Божию. Сего ради предаст их Бог в страсти безчестия, воеже творити им волю языческу. И паки ино писание: Безумие бо их явно будет всем.

Кто преславнее Моисея в роде сем бысть, его же сам Господь свидетелствова яко: Аз на се ис тое воздвигох тя. И паки: Се[3738] дах тя Бога фараону. Сей же отвещавше Богу: Кто есмь аз, яко да иду к фараону, царю египетскому, да изведу сыны Израилевы от земли Египетския. Молю ти ся, Господи, избери могуща иного, его же послеши, яко несмь речист, худогласен и косноязычен. Кто[3739] праведнее Давида, о нем же (л. 899)[3740] сам Господь свидетелствова: Обретох Давида Иессеова, мужа по сердцу Моему, иже сотоврит вся хотения Моя. И паки инде речеся[3741]: И избра Давида, раба своего, и восприят и от стад овчих и от доилиц поят его, пасти Иякова, раба своего, и Израиля достояние свое, ему же даст Господь Бог низложити человека исполина на брани. И отъят Господь поношение от сынов Израилев и во тмах славу прият. И отъят Господь грези его и вознесе рог его вовеки. И дасть ему Господь завет царьск и престол славы его во Израили. Но си сей не похвалися гордо, глаголя[3742]: Се бо в беззакониих зачат есмь и во гресех роди мя мати моя. И паки: Аз[3743] есмь червь, а не человек, поношение человеком и уничижение людем. И инде: Яко[3744] (л. 899 об.) не оправдится пред собою вся живый. И паки: Нищ есмь аз и в трудех от юности моея. И паки: Смирихся и спасе мя. И паки: Благо мне, яко смирил мя еси, да научюся оправданием Твоим. И паки: Грех юности моея и неведения моего не помяни. И паки: И[3745] вниде Давид и седе пред Господем и рече: Кто есмь аз, Господи мой, Господи. Или что дом мой, яко возлюби мя до сего и согреших пред Тобою много, Господи мой, Господи. И что приложит Давид еще глаголати к Тебе, и ныне Ты веси, Господи мой, Господи, раба своего. И инде речеся[3746]: И благослови царь Господа пред всем множеством. И рече: Благословен еси Господи Боже, Израилев отец наших от века вовеки. Твое есть, (л. 900)[3747] Господи, величество, и сила и слава и одоление, исповедание и крепость, яко ты всем, иже на небеси и на земли, владееши. От лица Твоего, Господи, исправится всяко царство и всяк язык. Тебе бо, Господи, богатство и Тебе Царство и величество во вся и во всяко начало. От Тебе богатство и слава. Ты всех начало, Господи, начало всякаго начала и власть в руку Твоею, величество и царство всех, в руку Твоя милость и вседержителство вся. Ныне убо, Господи Боже наш, исповедаемся Тебе и хвалим имя Твое преславное. Кто есмь аз и кто людие Твои, яко возмогохом сия тебе вся благовонне обещати. Твоя бо суть вся и иже (л. 900 об.)[3748] от руку Твоею прияхом, дахом Тебе. Путницы бо есмы пред Тобою и пришелцы, якоже и вси отцы наши, яко сень на земли дние наши.

Кто[3749] же есть мудрее Соломона, о нем же свидетелствова Господь Давиду, глаголя: И будет, егда скончаются дние и уснеши со отцы твоими и воставлю семя твое по тебе, иже есть от чрева твоего, и уготовлю царство его, и той созиждет дом имени моему, и управлю престол его до века. И Аз буду ему по отце и той будет Мне в сына.

И[3750] царствуя Соломон, и возлюби Соломон Господа, и ходи в научениих Давидовых, отца своего. Ему[3751] ж, Соломону, явися Господь во сне нощию. и рече: (л. 901)[3752]

(л. 901)[3753] ему: Проси, что хощеши и дам ти. И рече Соломон: Аз есмь отрочищ мал и не веде исхода своего и входа. Раб же твой посреде людей твоих, яже избра люди многи, яко песок иже при мори, его же никто же не изочтет от множества. Сего[3754] ради даждь рабу своему сердце смыслено на послушание и сужение людем твоим в правду, иже разумети посреди добру и злу, яко кто может судити людем твоим тяжким сим. И угодно бысть слово се пред Господем Богом, яко испроси Соломон глагол. И рече Господь к нему: Занеже проси от Мене днии много и не проси богатества, ниже проси душа враг твоих, но испроси себе мудрости (л. 901)[3755] и разума, да послушаеши суда. Се сотворих по глаголу твоему, се дах ти сердце смыслено и мудрость, якоже несть был муж пред тобою и по тебе не поставлен подобен тебе.

Дата добавления: 2015-08-02