О родстве убо сице 12 страница

К[3756] сему их же не проси, дах ти и богатство и славу, яко несть был подобен ти во царех по вся дни твоя. И аще ходиши по пути Моему и сохраниши заповеди Моя и повеления Моя, якоже ходи и Давид, отец твой[3757], умножу дни твоя. О нем же рече Сирах: Соломон[3758] воцарися во дни мира, яко Бог препокои окрест, да созиждет дом во имя Его и да уготовит святилище вовеки[3759]. Коль упремудрися в юности своей и наполнися, яко река разума и землю покры (л. 902)[3760] душа твоя. Исполнил еси притчам гадания, проиде имя твое во островы далече и возлюблен бысть о мире своем песньми и притчами и приображением. И во искании подивишася страны именем Господа Бога, нареченнаго Бога Израилева. И собра яко медь и злато и яко олово умножи сребро. Но ни сей, что любо написа о себе гордо, приписуя от пророк реченное о Бозе. Но и по приятии мудрости и суда глаголаше[3761], яко Аз раб твой и сын рабы твоея, и человек немощен и маловременен и умален в разуме суда и закон. И аще убо кто будет совершен в сынех человеческих, аще удалится премудрость твоя, ни во что же почтеся (л. 902 об.)[3762] Кто бо человек познает совет Божии и кто помыслит, что хощет Бог? Помышления смертна боязнена и неведомы провидения наша, тело бо тленное отягчает душу и земное житие, одебелевает ум и велие попечение многа помышляюща, едва разумеем иже на земли. А яже на небеси, кто изследи, волю же Его кто позна?

Не буди[3763] правдив велми, не мудрися о себе изобилне, еда когда изумнеешися, благо ти есть содержатися о сем, яко несть праведен человек на земли, иже сотворит благое и не согрешит, не последуй души своей и крепости своей холити в похотех сердца своего, (л. 903)[3764] и не рцы, кто мя поможет. Господь бо мстяй, отмстит ти. Не рцы, согреших и что ми бысть. Како может о себе кто глаголати и написавати: Се царь правдивый царствует и началницы судом владети начнут.

Истина же есть слову, о Господе Бозе и Спасе нашем Иисусе Христе. О нем же Даниил прорече[3765]: И в день царь тех востави Бог небесный Царство, еже во веки не разсыплется. И Царство Его инем не останет, отончит и извеет вся царства, а то станет вовеки, якоже виде. Яко отсечеся от горы камык без руку и отончи глину и железо и медь и сребро. И тому ся[3766] (л. 903 об.)[3767] даст власть и честь и царство и вси людие племена и языцы тому поработают, и власть его власть вечная, яже не мимо идет и царство его не разсыплется. А еже князи его судом владети начнут, сие о святых апостолех, якоже и Давид глаголет, и поставиши князи их по всей земли, якоже и Даниил виде. Зрях, рече, дондеже престоли поставишася. И паки Соломон рече[3768]: Судят языком и обладают людьми и воцарится в них Господь вовеки. И во Евангелии писано есть[3769]: Тогда отвещав Петр, рече ему: Се мы оставихом вся и по след Тебе идохом, что убо будет нам? (л. 904)[3770] Иисус же рече им: Аминь, глаголю вам, яко вы шедшии по мне паки в бытие. Егда сядет Сын Человеческий на престоле славы Своея, сядьте и вы на двоюнадесять престолу, судяще обеманадесяте коленома Израилевыма. И паки апостол свидетелствует[3771]: Не весте ли, яко святии мирови хотят судити? И по мале: Не весте ли, яко аггелом судити хощем, а не точию житейским? И паки ин апостол рече[3772]: побеждающему дам сести со Мною на престоле Моем, якоже и Аз победих и седох со Отцем Моим на престоле Его. И паки[3773]: И видех престолы и седоша на них и суд дадеся им. (л. 904 об.)[3774] и душа усеченных за свидетелство Иисусово и за слово Божие, иже не поклонишася зверю, ниже образу его, и не прияша начертание на челе или на руце своей, и жиша и царствоваша со Христом тысящу лет.

Толкование.

И уже убо святым апостолом учительстии престоли дани быша, ими же языцы световодими суть, дани же будут по Божественному обещанию и в будущем веце на осуждение отринувши им евангельскую проповедь. Якоже Давид глаголет: Тамо бо взыдоша колена, колена Господня свидение Израилево[3775] и прочая. Яко ту седоша престоли на суде. И прочим святым мучеником, (л. 905)[3776] за Христа пострадавшим, не поклонившимся зверю и образу его, дань бысть суд, сиречь власть судити им же бесов, даже доныне, яко зрим, судят с прославляеми Христу даже до настоящаго века и от царей благочестивых и князей верных почитаеми и поклоняеми.

И сия тако суть Исаино речение, не о царех, ни о князех мира сего. Зде лепо есть и последующее слово пророка извести. И будет[3777], рече, человек крыя словеса своя и сокрыется, яко водный поток, и явится в Сионе, яко река источник текущии славный в земли жаждущей. Сион бо не ино что разумеется, разве святая церковь, (л. 905 об.)[3778] а яко река источник текущи в земли жаждущей святое священное Евангелие. Таже пророк глаголет: И к сему не будут уповающу человеки. Уповающе человеки, глаголет, то есть се, якоже и Давид глаголет: Не надеятися на человеки. Аще и царие и князи не надейтеся, рече, на князя и на сыны человеческия, в них же несть спасения. Изыдет дух его и возвратится в землю свою. В той день погибнут вся помышления его. Блажен, ему ж Бог Ияковль, помощник его, упование его на Господа Бога своего, сотворшаго небо и землю, море и вся, яже в них, хранящаго истину ввек, творящаго суд (л. 906)[3779] обидимым, дающаго пищу алчющим. И прочее. Приложи же и пророк таковая же речения, но уши дадят на послушание и сердце изнемогшихся вонмет послушати. Сия рече о апостолех, овогда убо глаголаху, приложи, Господи, нам веру, иногда же, скажи нам, Господи, притчю сию, то есть усердие слышания является. Иногда же паки: Господи, камо идем? Живота вечнаго где имамы? К ним же и Господь глаголет: Имеяй уши слышати, да слышит. А еже пророк глаголет языцы немующих, скоро научатся глаголати мир. Мир не ино что, но Христов мир, то есть Евангелие, якоже и сам Господь глаголет: (л. 906 об.)[3780] Мир Мой даю вам, мир Мой оставляю вам. Таже паки пророк глаголет: И к сему не рекут юродивому владати. И к сему не рекут слуги твоя, помолчи, юрод бо юродове совещает и сердце его тще разумеет, совершает беззакония и глаголати к Господеви прелесть, яко разсеяти душа алчны и душа жаждуща тща сотворити. Совет бо злых беззаконная совещевает, разсыпати смиренныя словесы неправедными и разсыпати словеса смиренных на суде. Сия словеса пророческа толку не требуют, якоже глаголется, истина суть о беззаконницех, иже не повинуются (л. 907)[3781] евангельским заповедем.

Приложи ж по сих и о апостольстем взаконении, глаголя: Благочестивии же смысленне совещаша. Той же совет устанет, то есть станет и не изменится вовеки, аще и преписуют нецыи на своя беззаконная веления, но Господу свидетелствующу. Небо, рече, и земля мимо идет, словеса же Моя не мимо идут. И инде рече: Не прейдет от закона, дондеже вся будут. И уже много Господем нашим Иисусом Христом и святыми его пророки и апостоли збышася и збываются, по сему и последующая имать збытися. И иже ныне гордии законопреступо(л. 907 об.)ваху[3782] зело и Божию честь и славу преписующе на свою и подписующе под ногама своима и коня и орла, пророческия таинства, град царя великаго, Бог в тяжестех его знаем есть. Знаем есть Господь судьбы творяй, в делех руку своею увязе грешник. Не[3783] восхоте разумети да ублажит. Не восхоте разумети, взысках Господа и услыша мя и от всех скорбей моих избави мя. Не восхоте разумети: Се нищии, возва, и Господь услыша и и от всех скорбии спасе и. Не[3784] восхоте разумети, смирихся и спасе мя господь. Не восхоте разумети, аще не Господь созиждет дому, всуе труди(л. 908)шася[3785] зиждущии, аще не Господь сохранит град, всуе бдя и стрегий. Не восхоте разумети, Господь низводит и возводит, убожит и богатит, смиряет и высит. Услышат[3786], иже ныне содержащии множество и гордящиися о народех язык, яко дана бысть от Господа держава им и сила от Вышняго, иже истяжет дела ваша, и помышления испытать, яко слузи суще царства его, не судисте право, ни сохранисте закона, ниже по воли Божии ходисте, сокрушение скоро явится вам, яко суд жесточайшии на тех в находящих бывает. Не лишает бо ся лица (л. 908 об.)[3787] всех владыка, ниже усрамится велможи[3788], яко мала и велика сей сотвори, подобне же проразумевает о всех, державный же крепко совесть испытание Господь бо Бог ваш. Сий Бог Богом, Бог великий, крепкий и страшный, иже не зрит на лица, ни возмет дара, творяй суд пришелцу и сироте и вдовице. Услышит, иже хваляйся о высоте престола своего и о множестве богатства своего, услышит Бог и смирит их сый прежде век. Несть бо им изменения, яко не убояшася Бога, яко Господь судия есть и несть у Него славы лица.

(л. 909)[3789] Услышат иже ныне Божие имя и славу, прекладают на свою честь и славу, и тем хвалят имя Господне и славу его, якоже негде пишет апостол: Имя[3790] бо Господне вас ради во языцех хулится. И инде: И похулиша имя Бога имущаго область над язвами сими и не покаяшася дати ему славу. Познается, иже ныне разширяяся достоинством церковным и мирским, егда не будет суда, но ответ, но негодование.

Паки, ответотворче, пишешь: Матфей Властарис, толкуючи, для чево ходил царь в олтарь к тайным таинством. Глаголи ми меж иными речми и сия для того, что (л. 909 об.)[3791] есть помазан от Бога, и для того наставляют патриархи, могут выбирать, и архимандриты и игумены не могут ли выбирать.

О Матфее. От законов святыя соборныя церкви не ведаем, кто он есть. И о чем мы имамы святыя соборныя церкви уставы святых апостол и святых отец седми вселенских соборов и девяти поместных. О инех же по правилу святых апостол 85 и Лаодикийскаго собора по 58-му правилу и прочих святых отец, паче инех известныя Климентом апостольския заповеди написаныя, но за некое от иноверных татебно вверженое отвержены от святаго Вселенскаго собора. И мы по 7-го (л. 910)[3792] Вселенскаго собора 1-му правилу отметаем. Аще бы ты или ин сказался и аггел быти, проповедая ново что, анафема буди по Божественому апостолу.

А еже ты глаголеши: Для того царь ходил в олтарь, что помазан от Бога, и то ты солгал. Помазан есть чрез архиерея на царство и таковых мы православных правил не обретаем. Обретаем же святаго Вселенскаго Шестаго собора правило 69.

Токмо[3793] царь един, ин же никто от мирских человек во очистилище да внидет.

Толкование.

Не достоит никому же от всех, в мирстем житии живущих, внутрь священнаго олтаря входити. (л. 910 об.)[3794] Токмо же се никак не возбранено есть царстей власти и господьству, егда хощет принести дары создавшему его Богу по некоему преданию древних отец. И сия тако суть. Но царское величество сего правила не сохраняет. Не точию что приносит создавшему его Богу по некоему преданию древних отец, но и прежде даное святей велицей церкви благочестивыми прежде бывшими цари и великими князи все усвоил в свои потребы, движимыя и недвижимыя вещи, о них же писано есть выше. Богу самому заповедающему[3795]: И да не явишися пред Господем Богом твоим тощь, (л. 911)[3796] кождо по постижению руки своея, по благословению Господа Бога своего, иже дал есть тебе. И паки инде речеся[3797]: Не явися пред Господем тощь. Все бо се заповеди ради и приношение праведнаго похвалит олтаря и благоухание его пред вышним. Жертва мужа праведнаго приятна и память ея незабвенна будет. Оком благим прослави Господа и не умали от начатка руки твоея во всяком даянии. Укроти лице твое и веселием освяти десятину. Даждь[3798] Вышнему по даянию Его и оком благим очищение руки, яко Господь воздаяй есть и седмицею воздаст ти. Дар бо бес труда не приемлет, ни приближит бо ся (л. 911 об.)[3799] жертв неправеднаго, яко Господь судия есть, и несть у Него славы лица. Не[3800] приимет лица о убозем и молитву обидимаго услышит. И кто есть обиденный, паче святыя соборныя великия церкви, ныне есть паче сира и вдовицы. Но не имать Господи презрети молитвы сираго и вдовицы, егда извещает беседу, не слезы ли вдовицы по ланитома текут и вопль нанесшаго ей, утоляяй благоволением прият будет. И молитва его до облак дойдет, молитва смиреннаго пройдет облаки, дондеже приступит, не утешится и не имать отступити, дондеже посетит Вышний судити (л. 912)[3801] в правду. И сотворит суд и Господь не замедлит и не имать долго терпети на них, дондеже сокрушит чресла немилостивых, донележе потребит множество досадитель, и скипетры неправедных сокрушит, дондеже воздаст человеку по деянию его и по делом человеческим и по помышлению их, дондеже судит судом людем своим и возвеселит я, иже в милости Его. Красна есть милость в день скорби Его, якоже облацы дождевнии во время бездождия.

Како же ты толкуешь государю приходити во олтарь во время причастия, не сицевая творя. Господу рекшу: Аще принесеши дар твой (л. 912 об.)[3802] ко олтарю, и имать нечто брат твой на тя, остави ту дар твой пред олтарем и, шед, смирися с братом твоим и тогда, пришед, принеси. А на него, государя, мати его святая великая соборная церковь, которая породила водою и духом и хрисмою на царство помаза, обидима плачет яко сирота последняя и яко вдова обругана от прелюбодея Крутицкого митрополита, прося отмщения, присно предстоя у двора его. Он же, государь, не точию мстит, но и соблаговоляет прелюбодейству его. Сам же: вся сущие ея вещи в дом свой посилова, еже чада церковная и нищая питашеся, злым (л. 913)[3803] человеком емля, истощевает соколником и псарям и прочим неблагодарным злодеем, иже угодная ему творят, якоже и при патриарсех, елико нужнейших на церковной обиход и на нищих потребу изобиловаше малые останки к нему ж в руце отхождаху. Сим образом устав положен не вем по каким законом, еже празднуючи патриарси Успения Пречистыя владычицы нашея Богородицы и Приснодевы Марии и Неделю Ваия и преставление святаго Петра митрополита Московского и всеа Росии чюдотворца, и в таковыя три праздники призывается от патриарха и от всего священнаго собора царь и со всем сигклитом на праздники. И по совершении святаго праздника зовет патриарх царя (л. 913 об.)[3804] хлеба есть, и по ядении хлеба подносит патриарх царю великие дары от останков церковных вещей. И царь приемлет те дары, отсылает во свою царскую казну. И в том все останки церковных оброков скончаваются от года до года. А лепо было на таковые великие три праздники самому царю и царице и царевичем и царевнам и князем и бояром и всем вельможам и всем людям приносити дары, по писанному: Да не явишися тощ пред Господем Богом твоим, кождо по постижению руки своея, по благословению Господа Бога своего, иже дал есть тебе. Якоже и инде Господь заповеда, глаголя[3805]: Заповедь ж сыном Израилевым. И глаголи к ним, рекии: Дарове Мои и даяния Моя и приноси Мой. В воню (л. 914)[3806] благовония да снабдите приносити Мне на вся праздники Моя. Начаток[3807] же от гумна и от точила твоего да Ми принесеши, первенца сынов твоих да Ми даси. Такожде твориши от телца твоего и от овцы твоея и от осляте твоего и начаток стрижения твоего. Они же претворше сие Божественное повеление на ся, вси сошедшеся в праздник в церковь Господню, ничто же приносяще даров Господеви. И по совершении святыя литоргии, у патриарха напитавшеся доволно и приемше дары, отходят в домы своя, радующеся и веселящеся, ничто же благо пред Господем сотворше или дары принесше, но сами аки оброк вземше от Божественнаго наследия. Кого тако вси пощадят, (л. 914 об.)[3808] Бога не щадяще и достояние Господне? И глаголют: Патриарх сим и сим благословил сего и оного. А патриарх со всякою нуждею аки оброчник покупает драгою ценою у сего и оного, а неблагодарнии людие, ведая обычное патриарху к празднику пристроение, сугубые и трегубые цены емлют, за сребряные сосуды, за соболи и за золотые бархаты и отласы, и за камки и прочие потребы. И почто таковым в храм Божии приходити? Сами не приносят ничто ж, но и собранное истощают. И слышано есть выше сего, колико зло есть обида. Е се ли не обида? Ей, обида есть и немала святей велицей церкви. Понеже от боязни (л. 915)[3809] и страха не может сего патриарх преложить, аки Божия устава или обета. Сами, якоже царское величество, во святей церкви при святом крещении отречеся сатаны и всех дел и всех аггел его и всея службы его и всего студа его и всея славы его. И сочетася Христу царю и Богу, и верова, и исповеда святый символ, якоже святая церковь прият.

Сочетание же Христу не ино что, развее веровати во Отца и Сына и Святаго Духа, Святую Троицу единосущную и неразделную, во едино Божество и во святое священное Евангелие и святых апостол и святых отец седми вселенских соборов, якоже и самое то свидетелствует молитвословие (л. 915 об.)[3810] в начале оглашения ко крещению, еже наложив руку, архиерей глаголет: Слушай зде самыя истины. О имени твоем, Господи Боже, истины и единороднаго Твоего Сына и Святаго Твоего Духа возлагаю руку мою на раба Твоего, сподобльшагося прибегнути ко святому имени Твоему и под покровом крил Твоих сохранитися. Остави от него ветхую оную прелесть, исполни его еже в Тя веры и надежди и любви, да разумеет, яко Ты еси един Бог истинный и единородный Твой Сын Господь наш Иисус Христос и Святый Твой Дух. Даждь ему во всех заповедех Твоих ходити (л. 916)[3811] и угодная Тебе сохранити, яко аще сохранит сия человек, жив будет в них.

Зриши ли, ответотворче, ругателю Христов и попирателю святыя православныя веры, что в начале священнословие показует. Даждь ему, рече, во всех заповедех Твоих ходити и угодная Тебе сохранити, яко аще сохранит сия человек, жив будет ввек. И сие слово не разнит и от самых святых евангельских словес. Господу глаголющу ко пришедшим к нему июдеом[3812]: Аминь, аминь, глаголю вам, яко слушаяй словесе Моего и веруяй пославшему Мя, (л. 916 об.)[3813] имать живот вечный и на суд не приидет, но прейдет от смерти в живот. А не веруяй уже осужден есть, якоже на ином месте речеся: Отметаяйся[3814] Мене и не приемляй глагол Моих имать судящаго ему слово, еже глаголах, то судит ему в последний день.

Что же чюдно царское величество по святему Евангелию сотворил любо, дабы и мы свидетели были добрых его дел, по писанному: Яко да видят ваша добрая дела и прославят Отца вашего, иже на небесех. Не слышал еси, яко вера без дел мертва есть, и аще кто верует без дел, умерл (л. 917)[3815] есть прежде общая смерти таковый. Господу свидетельствующу: Не[3816] всяк глаголяй Господи, Господи, внидет во Царство Небесное, но творяй волю Отца Моего, иже есть на небесех. Мнози рекут Мне в он день Господи, Господи, не во твое ли имя пророчествовахом и Твоим именем бесы изгонихом и Твоим именем силы многи сотворихом? И тогда исповем им, яко николи же знах вас, отъидете от Мене делающии беззаконие. И аще чюдеса сотворшии о имени Господни отриновени будут, а иже ничто же добро сотворшии, но и противная Евангелию, где будут, прелестниче?

Но паки на молитвословие возвратимся. (л. 917 об.)[3817] Таже глаголет архиерей прочее воследование: Напиши его в книзе жизни Твоея, соедини его стаду наследия Твоего, да прославится имя Твое святое в нем и возлюбленнаго Твоего Сына Господа нашего Иисуса Христа и живот творящаго Твоего Духа. Да будут очи Твои, взирающе на него, милостию в ыну, и уши Твои, еже услышати глас моления его, возвесели его в делех руку его.

Зри же и зде опаство слову, еже услышану быти гласу моления его, а не кроме молитвы. Такожде: и возвеселитися ему в делех руку его. В которых делех? Не во иже дрова делати (л. 918)[3818] и прочая дела, но в милости и щедротах, якоже слову правда скажет: Блажени милостивии, яко тии помиловани будут. И по сих обще всем рече: Радуйтеся и веселитеся, яко мзда ваша многа есть на небеси. Но паки и во ином молитвословии услышим не менее сих.

Молитва 4.

Сый[3819] владыко Господи, сотворивый человека по образу Твоему и подобию и давый ему власть жизни вечныя. Таже отпадша грехом не презревый, но устроивый вочеловечением Христа Твоего спасе мира. Сам и созданиа твое сие избавль от работы вражия, приими в Царство Твое Небесное, отверзи его очи мысленныя, (л. 918 об.)[3820] воеже озаряти в нем просвещению Евангелия твоего.

Такожде и святаго крещения в первой молитве священник моляся захотяща креститися, глаголет: И во образи Христа твоего в хотящем паки родитися моим окаянством и назидай его на основании апостол и пророк твоих, и да не низложиши, но насади его насаждение истинны, во святей твоей соборней и апостольстей церкви и да не восторгнеши, яко да преуспевающу ему во благо честии, славится и тем всесвятое имя Твое, Отца и Сына и Святаго Духа ныне и присно и во веки веком. Аминь.

Видиши ли всюду (л. 919)[3821] крещаемый запоручается святым евангельским заповедем и апостольским и пророческим учением, якоже и в последней молитве молится священник, глаголя: Явися, Господи, на воде сей и даждь претворитися в ней крещаемому, воеже отложити убо ветхаго человека тлеемаго по похотех прелести, облещися в новаго, обновляемаго по образу создавшаго его. Да быв сраслен по подобию смерти твоея крещением, общник и воскресения будет и сохранив дар святаго твоего Духа и возрастив залог благодати, приимет почесть горняго звания и сопричтется перворожденным (л. 919 об.)[3822] написаным на небеси, в тебе Бозе и Господе нашем Иисусе Христе вкупе со безначалным Твоим Отцем и и со пресвятым и благим и животворящим Твоим духом.

И сия тако суть о святом крещении всякому любо во Христа, аще и царь, не ино тому, но тожде. Такоже заповеди и обетование едино и не вем что любо царское величество делает, от евангельских заповедей, но своя человеческия предпочел паче Христовых. А еже бо самому ему государю хранити святыя Божия заповеди, не вем[3823].

Господу глаголющу: Аще[3824] любите Мя, заповеди Моя соблюдите. (л. 920)[3825] И паки: Имеяй[3826] заповеди Моя и соблюдаяй их, той есть любяй Мя. Заповеди которыя? Не иныя, но тыя, якоже закону учителю сказал Господь: Возлюбиши Господа Бога твоего всем сердцем твоим и всею душею твоею и всею мыслию твоею. Си есть первая и болшая заповедь, подобна же есть ей и вторая: Возлюбиши искреняго своего яко сам себе. В сию обою заповедию весь закон и пророцы висят. И аще бы государь царь любил Бога, любил бы убо Мене, якоже пишет: Любяй Бога, любит ближняго своего, якоже и Господь сам свидетельствует[3827]: Не любяй Мя, словес моих не соблю(л. 920 об.)дает[3828]. И слово, еже слышасте, несть Мое, но пославшаго Мя Отца. И паки: Иже есть от Бога, глаголы Божия послушает. Сего ради вы не послушаете, яко несте от Бога. Божие слово и не погрешает е, и кто может его разорить. Аще и странно и кто любо не услышав слова зазрит. Нам же паче подобает подражати Писания, якоже в Деяниих[3829] извествуется: Петр же и Иоанн, отвещавше, к нима реста: Аще праведно есть пред Богом вас послушати паче, нежели Бога судите, не можем бо мы, яже видехом и слышахом не глаголати. И паки инде: (л. 921)[3830] Отвещав[3831] же Петр и апостоли, реша, веровати подобает Богови нежели человеком. Тако и Господу учащу: Не[3832] бойтеся убо, всяк убо иже исповесть Мя пред человеки, исповем его и Аз пред Отцем Моим, иже на небесех. А иже отвержется Мене пред человеки, отвергуся его и Аз пред Отцем Моим, иже на небесех. И что страшнее есть сего, еже не любити Господа Бога своего, и еже отвержену быти на небесех. А не любяй Бога, како может брата своего любити. Аще кто речет, Бога любити, а брата своего ненавидити, ложь есть и в сем истины несть. Глаголяй[3833], во свете быти, (л. 921 об.)[3834] а брата своего ненавидит, во тме есть доселе и во тме ходит и не весть, камо идет, яко тма ослепи ему очи. Не[3835] любяй брата своего, пребывает в смерть. Всяк ненавидяй брата своего, человекоубийца есть, и весте, яко всяк человекоубийца не имать живота вечнаго, в себе пребывающаго.

Не мое се слово, апостольско есть. И аще не любяй брата своего, пребывает в смерть и человекоубийца есть и живота вечнаго не имать, в себе пребывающа. Аще и тело предам, воеже сожещи е, любве же не имам, никоея же ползы ми есть. А иже Бога не любя (л. 922)[3836] и святыя церкви коликим мукам будет повинен. Не любяй бо, рече, не позна Бога, занеже Господь Бог обоя святыя сеи заповеди велики нарече, еже любити Господа Бога своего. Си есть первая и болшая заповедь, всяко за первую и болшую будет болши и мучен преступаяй. И вторая подобна ей: Возлюбиши, рече, искренняго своего, яко сам себе. И паки иная: Алчен бе и напитасте жажден, и напоисте. И прочее. Просящему, рече, у тебе, дай, и хотящаго от тебе заяти, не отвратися. И еже любити враги своя и добро творити ненавидящим, благослови кленущая, и молитися (л. 922 об.)[3837] за творящих напасть и изгоняющая. И милостыню творя, не являти, и молитися в клети, и должником оставляти долги, оставляти. И еже отпущати грехи и поститися, не помрачающе лица и не на показание человеком и сокровищ не скрывати на земли, но на небеси. Двема господинома не работати и не пещися, что ясти и пити и во что облещися, и еже что хощем сами творити умом. А иже не просто не любит, но и гонит и не еже питает, но и сущее отъемлет, которых мук будет достоин? Апостолу глаголющу: Всяк не творяй правду, несть от Бога. И инде: Иже (л. 923)[3838] несть от Бога, не послушает нас. И Господь: Отметаяися вас, Мене отметается, отметаяйся Мене, отметается и пославшаго Мя. По сему и познают вас, яко Мои ученицы, аще любите друг друга. Аще мир вас ненавидит, ведите, яко Мене прежде вас возненавиде. Аще от мира бысте были, мир убо свое любил бы, якоже несте от мира, но Аз избрах вы от мира. Сего ради ненавидит вас мир, поминайте слово, еже Аз рех: Несть раб болии Господа своего. Аще Мене изгнаша, и вас ижденут. Аще слово Мое соблюдут, и ваше соблюдут, но сия вся творят (л. 923 об.)[3839] вам за имя Мое.

Доволно ли ти есть к оказанию всякому крестившемуся во имя Отца и Сына и Святаго Духа о заповедех Христовых. По чему познавается христианин или ни? Аще и царь будет достоянием у мнения и еже от гонящих бегати, еже не любити отца и матере паче Бога, и еже любящих Бога и творящих святыя Его заповеди любити паче отца и матере и братии и сестр. Ноги омывати, чашу студены воды во имя Господне подати, праздного слова не износити. К сим же и блаженны против коегождо дела не будет от славы. Господу тако свидетельствующу: Ведая раб волю господина своего, а не творя я, (л. 924)[3840] биен будет много. И неверный в мале, и во мнозе неверен есть, и не творящее древо плода добра, посекаемо бывает. И прочее.

Како же сяковому кто любо будет во святый олтарь приходити, еже о Божественых святых заповедех нимало радя, ниже писаному евангельскому закону повинуяся. Глаголющему: Слушаяй вас, Мене слушает, и отметаяйся вас, Мене отметается. И другое писание: Братие, повинуйтеся наставником вашим и покаряйтеся, тий бо бдят о душах ваших. Како же той послушник Божий будет, иже не слушает Божиих учитель. но и отметник (л. 924 об.)[3841] есть таковый, и не просто не слушает, но и себе повелевает архиереом Божиим слушати, и не просто слушати, но и повиноватися. Божие слово учит нас: Аще согрешит к тебе брат, шед, обличи его. Аще не послушает тебе единаго, поими с собою единаго или двух, да при двою или триех свидетелех станет всяк глагол. Аще ли преслушает, повеждь церкви, аще же и церковь преслушает, буди тебе, яко иноязычник и мытарь. Тако и Божественный апостол к Тимофею пиша, глаголет: По первом и втором наказании, сих отвращайся. Ведый, яко таковый (л. 925)[3842] развратился есть.

О таковых древле писано есть[3843]: Не приемли имени Господа Бога твоего, не очистит бо Господь прилагающих имя Его туне. То есть, якоже древле, аще бы израильтянином нарицался, дела же сопротивная мудрствовал, якоже и апостол Павел пишет: Не вси, иже суть от Израиля, сии суть Израиль. Ни занеже иже от Авраама, сии суть сынове Авраамли, но иже беда Авраамская сотворит, той сын Авраамль есть. Тако и иже не всяк крестивыйся христианин спасется, но иже дела христианская достойна обещанию сотворит, той по труду своему мзду приимет. (л. 925 об.)[3844] Сего ради Христос многообразно о сем показа. Овогда глаголя: Что же Мя зовете, Господи, Господи, и не творите, яже глаголю. Иногда же: Мнози рекут Ми в он день Господи, Господи, не Твоим ли именем пророчествовахом? И прочее. Таже притчею рече, еже созда храмину на песце, ей же разрушение бысть велие. И еже изыде сеяй сеяти и сеющу ему, два падоша при пути и другое паде на камени. И прочее. И еже уподобися Царство Небесное человеку, сеявшу доброе семя на селе своем, спящим же человеком прииде враг его и всея плевелы посреде пшеницы и отъиде.

И[3845] еже восхоте стязатися о словеси (л. 926)[3846] с рабы своими и приведоша ему единаго должника тмою талант, не имуще ему отдати, повеле продати, и милосердовав, долг отпусти ему. И за непомилование клеврета своего повеле его предати мучителем. И[3847] еже уподобися Царствие человеку домовиту, иже изыде купно утро наяти делателя в виноград свой, и за роптание, возми, рече и иди. Где иди? Во тму кромешную. И[3848] еже человек некии, имяше два сына, и пришед к первому, рече: Чадо, иди днесь делай в винограде моем. И един хотяше ити, и не иде, и другии, не хотяше ити, последи раскаявся, поиде. И паки рече, человек некии бе домовит, (л. 926 об.)[3849] иже насади виноград и оплотом огради его, ископа в нем точило и созда столп, и предаст делателем и отъиде. И паки рече[3850]: Уподобися Царствие Небесное человеку царю, иже сотвори браки сыну своему, и посла рабы своя празвати званныя на браки, и не хотяху приити. И прочее.

И паки[3851]: Уподобися, рече, Царствие Небесное десяти девам, яже прияша светилники своя и изыдоша во сретение жениху. Пять же бе от них мудры и пять юродивы. И прочее. И[3852] якоже бо человек некии, отходя, призва своя рабы и предаст им имение свое, и овому убо даст пять талант, овому же два, овому же (л. 927)[3853] един, комуждо противу силе и отъиде абие. И прочее.

Видел ли еси Божественое изоображение, что имать нас ползовати, еже звати Господи, Господи, и не творити, яже Божественая заповедь повелевает. Самому Господу глаголющу: Не всяк глаголяй Ми Господи, Господи, внидет в Царство Небесное, но творяй волю Отца, иже есть на небесех. Аще бо матере и братии отрече Спас, кто суть мати Моя и братия? Сии суть слышащии Слово Божие и творящии, той есть братия Моя, сестры и мати Ми есть. Что же имать ползовати кого, здание неутверженое, сеяние неснабдимое, рабство (л. 927 об.)[3854] непотребное, наимство ропотливое, сыновство непослушливое, винограда делание неугодное, брака небрежение, девьство непросвещеное, талантов неусугубление, крещение несохранное, заповедей Христовых небрежение. Яко вера без дел не спасет, тако ни христанское имя не спасет, аще дел не сотворим христианских, якоже выше речеся: Что же Мя зовете, Господи, Господи, и не творите, яже Аз глаголю. И паки инде рече: Неслышателие праведни, творцы, блажени бо суть слышащии Слово Божие и творящее. Зане аще кто слышатель есть, а не творец, уподобися (л. 928)[3855] мужу, смотряюще лице бытие своего, усмотрив, отъиде, абие забыв, каков бе. Что же Мя зовете, Господи, Господи, и не творите, яже Аз глаголю. Глаголяй, яко познах Его, и заповеди Его не соблюдает, ложь есть. Что же Мя зовете, Господи, Господи, и не творите, яже Аз глаголю. Слыши, аще кто речет, яко люблю Бога, а брата своего ненавидит, ложь есть. Что же Мя зовете, Господи, Господи, и не творите, яже Аз глаголю. Слыши, и яко всяка лжа от истины несть, о таковых древле речеся убо: Да[3856] не приимеши имени Господа Бога твоего всуе, не очистит бо Господь Бог твой прилагающему имя его всуе. Се есть клятва (л. 928 об.)[3857], еже обещатися Господеви и не воздати. Якоже глаголется: Не во лжу кленешися, воздаси же Господеви клятвы твоя. Послушай, что есть клятва. Аврааму[3858] же обетова Бог, понеже ни единем имяше болшим клятися, клялся собою, глаголя: Истиною благословствуя, благословлю тя, и множа, умножу тя. Зри клятвы образ. Се[3859] есть Бога Отца клятвы образ ко Аврааму. Послушай сыновни клятвы. Егда убо кленется: Аминь[3860], аминь, глаголю вам, яко слушаяй словеси Моего и веруяй пославшему Мя имать живот вечный. И инде паки: Аминь[3861], аминь, глаголю (л. 929)[3862] тебе, веруяй в Мя не умрет. Емлиши ли сим веру? Тако и Давид клятся. Кляхся, рече, и поставих сохранити судбы правды твоея. И паки: Клятся Господеви обещася Бог Ияковлю. И прочее. Зри, клятва не ино что, точию завет к Богу, яко во крещении отрицаемся сатаны и всех дел его. Также по сем рече и сочетахся Христу, еже есть обещахся Христу. То есть клятва, якоже апостол глаголет[3863]: Или не разумеете, яко елицы во Христа Иисуса крестихомся, в смерть его крестихомся, спогребохомся убо с ним крещением в смерть. Да якоже воста Христос от мертвых (л. 929 об.)[3864] славою Отчею[3865], тако и мы во обновление жизни ходити начнем. Аще бо сообразны быхом по подобию смерти его, но воскресению будем причастницы.

Дата добавления: 2015-08-02