Ирмос: Просветивый сиянием пришествия Твоего Христе, и осветивый крестом Твоим мiра концы, сердца просвети светом Твоего богоразумия, православно поющих Тя.

Пастыря овцам великаго и Господа, иудеи древом крестным умертвиша: но Той яко овцы, мертвыя во аде погребенныя, державы смертныя избави.

Крестом Твоим мир благовестив, и проповедав пленным Спасе мой оставление, державу имущаго посрамил еси Христе нага, обнищавша показавый Божественным востанием Твоим.

Богородичен: Прошения верно просящих, Всепетая, не презри: но приими, и сия доношай Сыну Твоему Пречистая, Богу Единому Благодетелю, Тебе бо предстательницу стяжахом.

Предтече Спасов Иоанне моли Бога о нас

З емля́ израсти́ всеи́стинна проповѣ́дника, гла́са, всѣ́мъ проповѣ́дающа язы́комъ Ду́ха, Дѣ́вы Сы́на, Пра́вду, съ небесе́ на на́съ прини́чущую ве́щію тѣле́сною.

Предтече Спасов Иоанне моли Бога о нас

П оложи́ Госпо́дь всеи́стинна свѣти́льника тя́ Христо́ва, вся́ просвѣща́ющаго, еди́ны одѣва́юща вражду́ющія Ему́, я́ко ри́зою, въ сту́дъ, нело́жно Бо́жія Сло́ва Сы́на проповѣ́дающа.

Предтече Спасов Иоанне моли Бога о нас

В есели́тся вся́ тва́рь твои́мъ рождество́мъ, боже́ственнѣ: ты́ бо зе́мленъ а́нгелъ, Предте́че, и небе́сный человѣ́къ показа́лся еси́, небе́снаго Бо́га провозвѣща́я на́мъ воплоще́нна.

Пресвятая Богородице спаси нас

Богоро́диченъ: О тъ Тебе́ ражда́ется отъ Отца́ Сы́й, съ Тобо́ю при́сно, Сло́во присносу́щное и нераздѣ́льное, я́ко Сы́нъ Единоро́дный, и напослѣ́докъ отъ Дѣ́вы То́йже отъ Свята́го воплоща́ется Ду́ха.

Предтече Спасов Иоанне моли Бога о нас

З вѣзду́ проугото́валъ еси́, Пра́вды Со́лнце, Крести́теля Твоего́ Іоа́нна, отъ обѣща́нія рожде́ннаго дне́сь и ро́ждшаго разрѣ́шша гла́съ

Предтече Спасов Иоанне моли Бога о нас

Н е вѣща́й, не сопроти́въ глаго́ли, ста́рче освяще́нне, Гавріи́лъ бо глаго́летъ ти́, пе́рвый во арха́нгелѣхъ, Бо́жія та́инства и е́же къ на́мъ Того́ сни́тіе сказу́я

Предтече Спасов Иоанне моли Бога о нас

С та́рче, не невѣ́руй, Бо́гъ бо обѣщава́етъ, я́ко въ ста́рости роди́ши сы́на, его́же о рождествѣ́ мно́зи возра́дуются, то́й бо пріи́детъ си́лою Иліино́ю.

Предтече Спасов Иоанне моли Бога о нас

П роро́че, проповѣ́дниче, Предте́че, е́же отъ непло́ды прозябе́ніе, возвѣсти́телю покая́нія, пусты́нное овча́, Свѣ́та свѣти́льниче, о всѣ́хъ моли́, чту́щихъ тя́ вѣ́рно.

Пресвятая Богородице спаси нас

Богоро́диченъ: Я ко две́рь непроходи́му, и купину́ неопали́му, и несѣко́му го́ру, отъ нея́же ка́мень усѣче́ся, Иже изъ Тебе́ воплоща́емый, воспѣва́емъ, Влады́чице, Ма́ти всѣ́хъ Творца́.

Вси святии земли Русской молите Бога о нас

Великаго Новаграда первопастырие, Никите, Нифонте, Иоанне, Феоктисте, Моисее, Евфимие, Ионо и Серапионе, и прочии чуднии святителие, в дому Премудрости Божия, яко финиксы, процвели есте, словесы благоплодными и непорочным житием.

Вси святии земли Русской молите Бога о нас

Светло да похвалятся князие Новгородстии, Владимир, Святыя Софии пречудныя устроитель, с материю своею Анною, и Мстислав, и Феодор, с ними же и вси от рода князей Российских житием богоугодным просиявшии, Божественными да воспоются песньми.

Вси святии земли Русской молите Бога о нас

Дивнаго Варлаама, велика Новаграда славу и украшение, всероссийскаго молитвенника, и Антония славнаго, от ветхаго Рима на камени по волнам морским преплывшаго, Савву же, и Ефрема, и Михаила кто достойно прославит от земных?

Вси святии земли Русской молите Бога о нас

Едемскаго рая, приидите, видим цветы присножизненныя и богопрозябенныя, подвиги отец, в пределех Новгородских просиявших, ихже есть един Делатель Господь.

Вси святии земли Русской молите Бога о нас

Всеволод кроткий и Довмонт, Пскову стена необоримая, и Никола блаженный и Корнилий преподобный, святым крещением чудь Ливонскую просветивый, песньми да воспоются.

Вси святии земли Русской молите Бога о нас

Веру православную пред латины проповедавший, к вечным востекоша обителем Исидор пресвитер и с ним собор мученический во Юрьеве, граде Ливонстем, Царю царей ныне предстояще, молятся о нас, почитающих память их.

Слава.

Авраамия Богоноснаго, Смоленска украшение, и Евфросинию, радование Полотское и девам сияние, Христе мой, Тебе приводим молитвенники, ихже ради спаси нас.

И ныне.

Богородичен: Заступница теплая иногда великому Новутраду была еси и ненадеющихся надежда и людей бедствующих Помощница, и ныне оком милосердным призри на нас и, скорби наша видевши и воздыхание услышавши, знамение милости яви нам, Пречистая.

Дата добавления: 2015-09-06