Хор: Ами́нь. Священник тайно: Поминáюще ýбо спаси́тельную сию́ зáповедь и вся

Священник тайно: Поминáюще ýбо спаси́тельную сию́ зáповедь и вся, я́же о нас бы́вшая: Крест, гроб, тридне́вное Воскресе́ние, на Небесá восхожде́ние, одеснýю седéние, второ́е и слáвное пáки прише́ствие.

Священник: Твоя́ от Твои́х Тебе́ принося́ще о всех и за вся.

Хор: Тебе́ пое́м, Тебе́ благослови́м, Тебе́ благодари́м, Го́споди, и мо́лим Ти ся, Бо́же наш. (Протяжно)

Священник тайно: Еще́ прино́сим Ти слове́сную сию́ и безкро́вную слу́жбу, и про́сим, и мо́лим, и ми́ли ся дéем, низпосли́ Ду́ха Твоего́ Святáго на ны и на предлежáщия Дáры сия́.

Го́споди, И́же Пресвятáго Твоего́ Ду́ха в тре́тий час апо́столом Твои́м низпослáвый, Того́, Благи́й, не отыми́ от нас, но обнови́ нас, моля́щих Ти ся. Се́рдце чи́сто сози́жди во мне, Бо́же, и дух прав обнови́ во утро́бе мое́й.

И сотвори́ у́бо Хлеб сей Честнóе Те́ло Христá Твоего́. Аминь.

А е́же в Чáши сей - Честнýю Кровь Христá Твоего́. Аминь.

Преложи́в Дýхом Твои́м Святы́м.Аминь.

Я́коже бы́ти причащáющымся во трезвéние души́, во оставле́ние грехо́в, в приобще́ние Святáго Твоего́ Дýха, во исполне́ние Цáрствия Небе́снаго, в дерзнове́ние éже к Тебе́, не в суд или во осужде́ние. Еще́ прино́сим Ти слове́сную сию́ слýжбу о и́же в ве́ре почи́вших прáотцех, отце́х, патриáрсех, проро́цех, апо́столех, пропове́дницех, евангели́стех, мýченицех, испове́дницех, возде́ржницех и о вся́ком дýсе прáведнем, в ве́ре скончáвшемся.

Священник: Изря́дно о Пресвяте́й, Пречи́стей, Преблагослове́нней, Сла́вней Влады́чице нáшей Богоро́дице и Присноде́ве Мари́и.

[В двунадесятые праздники и до отдания их поется Задостойник праздника, писан в календаре.]

Хор: Досто́йно есть я́ко вои́стину блажи́ти Тя, Богоро́дицу, / Присноблаже́нную и Пренепоро́чную и Ма́терь Бо́га на́шего. / Честне́йшую Херуви́м и сла́внейшую без сравне́ния Серафи́м, / без истле́ния Бо́га Сло́ва ро́ждшую, су́щую Богоро́дицу Тя велича́ем*.

--------------------------------------------------------------------------------------------

На Литургии свт. Василия Великаго вместо «Достойно есть…» поется:

О Тебе́ ра́дуется, Благода́тная, вся́кая тварь, / а́нгельский собо́р и челове́ческий род, / освяще́нный Хра́ме и Раю́ слове́сный, / Де́вственная Похвало́, из Нея́же Бог воплоти́ся / и Младе́нец бысть, пре́жде век сый Бог наш; / ложесна́ бо Твоя́ престо́л сотвори́ / и чре́во Твое́ простра́ннее небе́с соде́ла. / О Тебе́ ра́дуется, Благода́тная, вся́кая тварь, / сла́ва Тебе́.

Священник тайно: О святéм Иоáнне Проро́це, Предте́чи и Крести́тели, о святы́х слáвных и всехвáльных апо́столех, о святе́м (имя рек), его́же и пáмять совершáем, и о всех святы́х Твоих, и́хже моли́твами посети́ нас, Бо́же.

И помяни́ всех усо́пших о наде́жди воскресе́ния жи́зни ве́чныя (имена).

И упоко́й их, иде́же присещáет свет лицá Твоего́.

Еще́ мо́лим Тя, помяни́, Го́споди, вся́кое епи́скопство правослáвных, прáво прáвящих сло́во Твоея́ и́стины, вся́кое пресви́терство, во Христе́ диáконство и вся́кий свяще́ннический чин.

Еще́ прино́сим Ти слове́сную сию́ слýжбу о вселе́нней, о Святе́й, Собо́рней и Апо́стольстей Це́ркви, о и́же в чистоте́ и честнéм жи́тельстве пребывáющих, о Богохрани́мей стране́ нáшей, властéх и вóинстве ея́. Даждь им, Го́споди, ми́рное правле́ние, да и мы в тишине́ их ти́хое и безмо́лвное житие́ поживе́м во вся́ком благоче́стии и чистоте́.

Священник: В пе́рвых помяни́, Го́споди, Вели́каго Господи́на и Отца́ на́шего, Кири́лла, Святе́йшаго Патриа́рха Моско́вскаго и всея́ Руси́, и Господи́на на́шего, Преосвяще́ннейшаго (имя епархиального архиерея), митрополи́та (или: архиепи́скопа, или: епи́скопа) (епархиальный титул его;), и́хже дáруй Святы́м Твои́м Цéрквам в ми́ре, це́лых, че́стных, здрáвых, долгоде́нствующих, прáво прáвящих сло́во Твоея́ и́стины.

Дата добавления: 2015-08-21