Вопрос, 284.

И аще не законными, но зазорными: то где тако они порицаются незаконными, но зазорными? изъявите и о сем от святаго писания.

Ответ на сии вопросы [283 и 284].

Прежде убо, нежели во ограду разрешения сих вопросов внити, судихом на предверии ответа мало покосневше постояти, еже побеседовати нечто о различии многих языческих и еретических законов, нарицаемых сим гласом, и о силе христианскаго закона, еже и к вышшему ответу прикладно обрящется.

Понеже во святем писании различныя слышим быти законы. Овыя благия церковныя, с небесе, по свидетельству вселенскаго учителя [Беседы, лист 1062], от Бога снесенныя, овы же поганския и еретическия.

И о божественных убо и церковных законех псаломник к Богу вещает [Пс. 118]: "Благ мне закон уст Твоих, паче тысящ злата и сребра".

О других же законах, поганских и еретических, в книге Кирилове сице пишет [лист 307]: "И учения их или обычаи или законы и нравы многим неразсудным человеком красна и сладка быти мнятся, но всяко неистинна, и горка вконец обретаются, и вечной муце ходатаи бывают". И творец книги О вере, взем от пророчества Даниилова, глаголет: "Беззаконнующии (рече) завет неведут с прелестию, и осквернят священия", и проч.

Темже, по вышепредложенным свидетельствам, о различии законности православной с еретическою: леть есть православную законность нарещи церквозаконною: языческую же или еретическую невозможно тако возъименословити, разве токмо законною, по причащению единому языческой или еретической законности: и носит едину точию человеческую правину. Якоже Матфей правилописец, приводя во свидетельство Василия Великаго, о церковозаконном браце глаголет: "Брак есть божественныя и человеческия правины приобщение" [состав г]. Убо и языческой брак может правину иметь токмо человеческую: божественныя же тогда причастится, егда благословения архипастырскаго приобщен будет. Понеже не точию в последующее, но и в первенствующее церкви время брак с ведения епископскаго бываше, якоже священномученик Игнатий в послании к Поликарпу, епископу Змирньския церкве, засвидетельствует: о чем зри Барония, лето Господне 57-е.

Тако убо дети, от ельлин или от еретик рожденныя по тех законности, могут законными нарещися. И мы якоже брак, тако и от того рождьшаяся чада законнаго нарицания не отмещем.

Понеже святая церковь и от многоженных и беззаконных браков родившихся, за порочных и беззаконных быти не полагает: якоже святаго царя Константина, и российских князей Бориса и Глеба, и прочих безчисленных. Но что много глаголати. И сам Христос Спаситель корень своего по плоти рождения влекущийся имеет от беззаконных браков. Ибо от Июдова колена род Его происходит. Июда же, глаголется, смесивыйся с Фамарою, своею невесткою, от нея же роди двоих близнят Фареса и Зару. От Фареса же поколение даже до Христа Матфей евангелист родословит, и многих исчитает во оном поколении, беззаконовавших во браце. О чем вопросителя отсылаем прочести евангелие с толкованием в неделю пред Рожеством Христовым.

Обаче Христос в рождении своем по плоти, сих ради беззаконновавших его прародителей в браце, никоего порока не имеет; темже убо и мы никоего же имеем омышления о нарицании рожденных от еллин или от еретик законными чады. Якоже и правила повелевают не точию таковых, но и от блуда рожденных производити в священство: "Не осуждаются бо (реша) родительных ради беззаконий" [Кормчая, во ответствии Никиты Ираклийскаго, лист 585 на обор., и в Номоканоне правило 190 Никифора патриарха].

Дата добавления: 2015-07-12