Смерть олега от своего коня

Въ лето 6420....И живяше Олегъ миръ имеа ко всем странамъ, княжа в Киеве. И приспе осень, и помяну Олегъ конь свой, иже бе поставилъ кормити и не вседати на нь, бе бо въпрашалъ волъхвовъ и кудесникъ: «отъ чего ми есть умрети?» и рече ему кудесникъ одинъ: «княже! конь, егоже любиши и ездиши на немъ, отъ того ти умрети». Олегъ же приимъ въ уме, си рече: «николиже всяду на нь, ни вижу его боле того»; и повеле кормити и не водити его к нему, и пребы неколико лет не виде его, дондеже на Грекы иде. И пришедшу ему к Кыеву и пребывьшю 4 лета, на пятое лето помяну конь, отъ негоже бяхуть рекли волсви умрети, и призва старейшину конюхомъ, рече: «кое есть конь мъй, егоже бехъ поставилъ кормити и блюсти его?» Онъ же рече: «умерлъ есть». Олегъ же посмеася и укори кудесника, река: «то ти неправо глаголють волъсви, но все лжа есть: конь умерлъ есть, а я живъ». И повеле оседлати конь: «а то вижю кости его». И прииде на место, идеже беша лежаще кости его го­лы и лобъ голъ, и сседе с коня, посмеяся рече: «оть сего ли лба смьрть было взяти мне?» и вьступи ногою на лобъ; и выникнувши змиа изо лба, и уклюну в ногу, и с того разболеся и умре. И плакашася людие вси плачемъ великимъ, и несоша и погребоша его на горе, еже глаголеться Щековица; есть же могила его и до сего дни, словеть могыла Ольгова. И бысть всех леть княжениа его 33.

Словарик: въспяти — поднять; си — себе; уклюнути — ужалить.

Дата добавления: 2015-08-20