О умножении любве и искоринении ненависти и всякия злобы

На проскомидии:

Господи, Иисусе Христе, боже наш, заповедь новую давый учеником Твоим, еже любите друг друга, прими жертву сию во оставление грехов всех нас, прихожан Святаго Храма сего, (или рабов Твоих) имя рек, правоверных рабов Твоих и иссякшую в нас, к Твоей благости и к искреннему долготерпению, любовь Духом Твоим Святым обнови и крепко сию водрузи в сердца наша, да тою заповеди Твоя исполняющее, не своя на земли взыскуем, но яже к славе Твоей, и искреннего созидания и спасения.

По рцем вси:

Господи Боже наш, милостивно, яко Благ призри на изсохшую в любви землю сердца нашего (или рабов Твоих) имя рек, и тернием ненависти, самолюбия же и неисчестных беззаконий лютее оледеневшую, и каплю благодати Пресвятаго Твоего Духа испустив, богатно ороси ю, во еже плодоносити, и возрастити от горящия к Тебе любве, всех добродетелей корень страх Твой, и о искреннего спасении нелестное попечение, всех же страстей, и многообразных лукавств, и лицемерия искоренение, прилежно, яко всех Благодателя молим, скоро услыши и человеколюбно помилуй.

Заповедь новую Твоим учеником, еже любите друг друга, давый, владыко, обнови сию благодатию Пресвятаго Твоего Духа действительно в душах и сердцах наших (или рабов Твоих) имя рек, да николиже о своих сих, но всегда о Твоем благоугодии и искреннем спасении и пользе, попечение творити потщимся, молим Ти ся, Благодателю Милостивый, услыши и милостивно помилуй.

Первую и большую заповедь давый, еже любити Тебе, Бога и Творца нашего, от всея души, от всея мысли и крепости нашея, и вторую, подобную ей, еже любити ближняго, яко самих себе, и в сию двою всему закону и пророки вместити научивый, делом исполняти сия, всех нас благодатию Пресвятаго Твоего Духа убеди, да Тебе, Спасу нашему, и ближнему, ко спасению угождающе, обещанная Твоя получим благая, яко Владыце и Спасу нашему прилежно припадающее молимся, скоро услыши, и милостивно помилуй.

Да совершенны в любве Твоей, Боже наш, будем, ко ближнему нелицемерную имети любовь, принуди нас (или рабов Твоих) имя рек, Твоего Духа благодатию Владыко, к Тебе бо любовь имети желающих, брата же своего ненавидяй ложь есть, и во тьме ходят. Тем же, Милостивее, в любви Твоей и братней распали души и сердца наша, молим Ти ся, яко милостив, скоро услыши и, яко щедр, помилуй.

Сице в нас Твою любовь силою благодати Пресвятаго Твоего Духа всели, Всещедрый Господи, еже не точию братию и други, но и врагов наших по Твоему Божественному повелению истинно любити, и ненавидящим нас благотворити, и о спасении их искренно тщатися, молим Ти ся, благости Источниче, и человеколюбия пучино, скоро услыши и яко благосерд помилуй.

Дата добавления: 2015-08-21