О в темницах и заточении сущих многих, или о едином

На проскомидии:

Господи, Иисусе Христе, Боже наш, святаго апостола Твоего Петра от уз и темницы без всякого вреда свободивый, прими, смиренно молим Ти ся, жертву сию милостивно во оставлении грехов рабов Твоих (или раба Твоего) имя рек, в темницу всажденных (или всажденнаго), и молитвами того, яко Человеколюбец всесильною Твоею рукою от всякого злаго обстояния избави и на свободу изведи.

По рцем вси:

Петра от уз и темницы изведый, и невредно Церкви Твоей представивый, Христе, и рабом Твоим (или раба Твоего) нами Тебе ныне молящихся (или молящагося), имя рек, яко Милосерд помилуй, и от уз свободи, молим Ти ся Всемилостивый Спасе, услыши и помилуй.

Избавляя нища от сильна, и убога емуже несть помощника, в беде и заточении и узах сущия (или сущаго), имя рек, яко щедр, милостивно свободи, прилежно молим Ти ся, скоро услыши, и яко щедр помилуй.

Иосифа в темнице иногда в Египте заключеннаго преславно свободивый, и ныне нами к Тебе призывающия (или призывающаго) имя рек, от уз и горькия беды избави молим Ти ся, Избавителю Милостивый, услыши и скоро помилуй.

О немощных, обуреваемых от духов нечистых, и стужаемых

На проскомидии:

Господи, Иисусе Христе, Боже наш, вольною Ти страстию и животворною смертию всю силу диаволю упразднивый и державу его разрушивый, род же человеческий от мучительства его свободивый и верныя люди Себе присвоевый, прими жертву сию Тебе о рабе Твоем имя рек мною, недостойным рабом Твоим приносимую, и иждени от него, прилежно молимся, вселукавое действо, и невредимо его от всякого мечтания и насилия демонского всегда соблюди, Ты бо еси Избавитель, врач же и Посетитель душ и телес наших, и Твоя еси слава во веки. Аминь.

По рцем вси:

Еще молимся Господу богу нашему, о еже услышати глас молитвы нашея, и пощадити, и помиловати раба Своего (или рабу Свою), и показати на нем (на ней), великую Свою милость, и отвратити всяк гнев Свой, праведно движимый нань (на ню), и простити ему (ей) всемножество согрешений, и избавити его (ю) от всякого обстояния и озлобления, насилия же и мучительства лукаваго диавола, и прогнати от него (от нея) все лестное сатанинское мечтание, привидение же и страхование, и всю его мучительскую силу обдержащую его (ю), здравие же душевное и телесное скоро подати ему (ей) благостию Твоею, и помиловати его (ю) и нас всех, рцем вси, Господи, услыши и помилуй.

Еще молимся о избавлении и свобождении раба Твоего (или рабы Твоея) имя рек, от насилия и обстояния диавольскаго, и вселукаваго его коварства, молим Ти ся, услыши и помилуй.

Дата добавления: 2015-08-21