Уставная грамота великого князя Ивана Васильевича крестьянам дворцового села Андреевского Звенигородского уезда (1544 г., апреля 20)

Се яз, князь великий Иван Васильевичь всеа Русии, пожаловал есми в Звенигородском уезде своего дворцового села Ондреевского крестьян, селчан и деревенщи­ков, пашенных и оброчных, старосту Мокейка Алексеева сына и всех крестьян. Что мне били челом, а сказывают, что у них была грамота жалованная несудимая князя Юрья Ивановича, и та де у них грамота жалованная сго­рела: и мне бы их пожаловати, дати им своя грамота жа­лованная несудимая. И яз, князь великий Иван Васильевичь всеа Русии, тех своих дворцового села Ондреевско­го крестьян, селчан и деревеныциков, пожаловал, дал им свою грамоту жалованную несудимую: наместницы на­ши звенигородские и волостели и их тиуни тех моих крестьян села Ондреевского, селчан и деревенщиков па­шенных и оброчных, не судят ни в чем, опричь душегуб­ства и разбоя и татбы с поличным, и кормов своих у них не емлют и не всылают к ним ни по что, а праветчики и доводчики на поруку их не дают, и поборов своих не берут и не въезжают к ним ни по что. А кто у них в том моем великого князя селе мой поселской ни будет, и он у них ходит о всем по тому, как в сей грамоте: дают ему корм в год на три праздники, на рожество христо­во с выти две денги, да на велик день с выти по две денги ж; на петров день с выти по две денги ж; а кому будет тем крестьяном перед поселским суд в рубле, или болши или менши рубля, и в колке нибуди, а досудит до вино­ватого, и ему имати на виноватом с рубля по два алты­на, а будет дело выше рубля или ниже, или в колке ни­будь, и ему пошлины имати по тому же по розщету; а ко­му случится поле в рубле и в колке нибуди, а похотят у поля помиритися, и ему у поля с рубля гривна, а до­водчику его шесть денег, а будет дело выше рубля или ниже, и ему пошлина своя имати по тому ж по росчету; а доводчику его хоженое в селе денга, а поедет из села в деревню, и ему имати езду на две версты денга, а на правду вдвое; а без старосты ему и без лутчих людей су­да не судити; а списки ему посылати к Москве, к докла­ду, с двемя или с тремя списки, а с одным ему списком к докладу не посылати; а у которого селчанина или у де­ревенщика лучится пир или братчина, и ему на пир и на братчину незвану пити не ходити, а кто его позовет в пир или братчину, и ему пив туто не ночевати; а кто женит сына или дочерь замужь отдаст в селе и в деревнях, в од­ном приказе, и ему имати за новоженское убрус[7] по три денги, а кто женит сына или дочерь даст замуж из села в село, в иной приказ, и ему имати за выводную куницу по два алтына; а кто у кого межу переорет[8], или луг перекосит, и ему имати за боран[9] алтын, с обе стороны по три денги. А митрополичью десятиннику имати на них от знамени[10] с холостца алтын, а со вдовца два алтына. Також есми тех своих дворцовых крестьян пожаловал: ве­лел у них ездити, от них и по них своим дворцовым неделщикам Дмитровского дворца, а велел есми чинити им один срок в году, зиме, крещенье христово; и иным есми площадным неделщикам и дворцовым, опричь Дмитров­ского дворца неделщиком, к ним ездити не велел и сро­ков на них не наметывают, и кто на них срок накинет не по их сроку, или кто на них бессудную[11] возметь, и та безсудная не в безсудную. Такоже есми тех крестьян по­жаловал: гонцы наши по дорогам, и ямщики звенигородцкие, и иных ямов ямщики и дворники, и подвод и про­водников у них на ям не емлют, опричь ратных вестей. Такожь есми тех своих крестьян пожаловал: наши воево­ды, князи и дети боярские, и всякие силные ездоки у них в селе и в деревнях пашенных и в оброчных не ставятся, и подвод и проводников и кормов своих и конских у них не емлют; а кто у них станет, и они кормов своих и кон­ских купят по цене, как им продадут. А на лоси, и на медведи, и на лисьи поля, к ловчему нашему не ходить. А скоморохом у них в том селе и в деревнях силно не играти, а попрошатаем, конюхом и псарем, и иным попрошатаем по тому селу и деревням потому же силно не ездити, ни просити ничего; а кто учнет по моему селу и по деревням того села силно скоморохи играти и попрошатые конюхи и псари и кто нибуди, и яз тех людей ве­лел поселскому того села давати на поруку да ставити перед своим дворецким дмитровским, у кого будет Дмит­ров в приказе. А кто продаст селской или деревенской человек или купит лошадь, или корову, и они дадут в городе явку, с лошади с купца пятна по три денги, а с продавца тамги с рубля по две денги, а с коровы рогово­го по полуторе денге; а поселскому с того не дают ни­чего. А поедут те мои великого князя крестьяне, селчане и деревеньщики, в Звенигород о какове деле нибудь, а без товару, или к Москве с моими великого князя оброки или о жалобе, или назад с Москвы к себе без товару ж, и наместницы наши звенигородцкие и иных городов, и волостели и их тиуни и пошлинники, на тех моих крестьянех, на селчанех и на деревеньщиках, мыта и явки и перевозу и мостовщины и иных никоторых пошлин не емлют; или пойдут к Москве с своим хлебом на прода­жу, и мытчики у них звенигородские мыта и иные никоторые пошлины с того хлеба не емлют же. А коли при­шлю к ним своего великого князя хлеба молотити подья­чего или сытника, или хлебника муки крупичатые делати, или конюха сена косити, и тех посылщиков кормити крестьяном тем, что сами едят. А явят сю грамоту на­местником звенигородским и их пошлинником, и они с нее явки не дают ничего. Дана грамота лета 7052 апреля в 20 день.

Подпись на грамоте: «Князь великий Иван Васильевичь всеа Русии». На сставех подпись: «Приказал околничей и дворецкой дмитровской Василей Дмитреевичь Шеин». Печать красная.

Материалы по истории СССР для семинарских и практических занятий. –

М.: Высшая школа,1987. – Вып.2. – С.177-180. - №20

Дата добавления: 2015-08-03