Сибыд лэбач — варов чиж

http://fb.ru/misc/i/gallery/13151/155106.jpg

http://wiki.spinus.info/images/6/60/Redpoll_nest.jpg

http://www.oxota-ru.ru/load/Image/3(84).gif

— Чижъясыд олöны быдлаын, медсясö Эжва, Мезень да Печора юясдорса вöръясын, но Печора-Илыч заповедник войвывланьö оз нин овмöдчыны, — ньöжйöник висьталö Кесар пöль.

— Найö радейтöны лыска вöръяс, козъяинъяс. Бöрйöны сук лапъяса коз пу да сэтчö, мусяньыс дас метра вылнаö, и кыöны турун сiясысь да вöсни вужъясысь пелькиник мича поз. Пытшкöссö зэв небыда вольсалöны лэбач да пемöс гöнöн, а ортсысяньыс кужöмöн тупкалöны-кыöны нитшкöн, коз пу ройöн. Та вöсна найö синмад оз шыбитчыны.

Вайö сiйö вит-квайт еджгов кольк, сьöдгöрд чутъяса да сэтшöм жö визьторъяса. Пöжсьö эньыс, а вердöны пиянсö кыкнанныс. Сёйöны найö пулысь да турунлысь быдсяма кöйдыссö. Чижъясыд — посни лэбачьяс. Айясыс вижоввеж рöмаöсь, юр вылыс сьöд, быттьö шапкаа, ныр улас ичöтик сьöд “тош”. Эньясыс вежоврудöсь, найö абу “шапкааöсь”. Бöж йыв бордъясыс абу öткузьтаöсь, быттьö серöдлöма-вундалöма кузя-дженьыда.

Чижыд — зэв сибыд, морт дiнö öдйö велалысь лэбач. Садöкö йöртöм чиж мöд-коймöд луннас нин босьтö кисьыд сёян, шедöдчö босьтны киö. Найö öдйö велалöны и садöк дiнас. Жбыракылöны, пырöны-петöны ньöти повтöг. Ай чижыс во чöж сьылö, оз гажтöмтчы. Кывзан да быттьö шуалö:”тиви-тиви-тиви-чжээ”. Помас гöлöссö лэдзыштö, шыыс матыстчö “чиж ” кывлань.

— Коркö томджык дырйи видзлiм ми öтик чижöс,— нюмъялöмпырысь казьтыштiс Кесар пöль. — Ёна гажöдiс миянöс, пыр сьылiс. Мелi вöлi. Чуньтö нюжöдан да пыр и пуксьö, весиг сьывны пондылö. Во куим олiс ми ордын.

— Кытчö нö сэсся сiйö лои, кань сёйис? — юалiс Сима.

— Эз. Карö öти артист нуис. Пиöй пö висьö, оз ветлöдлы. Вот сылы.

— А садöктöгыс?

— Садöксö бöр вайис. Тайö пö тiян реликвия. Чуймöдана пö вöчöма. Мый сэнi чуймöданаыс: плетукаöс моз кылi. Дерт, позис на пелькджыка вöчны, да кадыс тай пыр тэрмöдлö.

Сима тöдö: Кесар пöльлöн вöчöм садöкыс öшалö чардак стенын. Дзик чача кодь. Кыöма вöсни бадь ньöръясысь, кокни, шыльыд. Пыранiныс — гöгрöс, кык кулак тöрмöн розь, öдзöса и быдöн. А розь улысладорас тувтор вöчыштöма, лэбачыслы пуксьывны пыриг-петiгас, кыдзи ябыр позъясö вöчлöны. Сима видзöдлiс “реликвия” кывсö словарысь да öти кывйö воöдчис артистыскöд: тан, дерт, чижыдлы ёна бурджыка овсис кöрт садöкад дорысь. (310 кыв)

З.Прошева серти

Дата добавления: 2015-10-02