Шуръяла кокньыдик лямпаöн. Гылыд лым вывтi лэбöдö ачыс, оз мудзты. Ыджыд аттьö вöчысьыслы.
Лямпаыс менам эм, но колö тшöтш и лызь. Лызьыд бур ветлыны вöрöд, кор лымйыс ульдыштöма. Улис поводдянад лямпаöн сьöкыд ветлыны. Лымйыс пыдöсас öшйö. А лызь пыдöсад оз öшйы, исковтö гöн кузяыс.
Лямпатö верма ачым лöсавны да стружитны. А лызьтö вöчны сямöй öдвакö тырмас. Сiйöс öд кысöн колö на эжны. Сэтчö ме и дуда. Сетi вöчны орчча сиктын олысь мастер мортлы. Мед оз тэрмась да бура вöчас.
Лямпаыс али лызьыс бурджык? Ас местаас öтиыс и мöдыс колана. (89 кыв)
В.Лодыгин серти
Гöгöрвоöдны текстысь кывъяс: улис (лым сылан, зэран, васöд поводдя), кыс (небзьöдöм ку), дудны (сувтны), лямпа (лыжи), лызь (кöр либö кукань куöн пыдöсöдыс эжöм лямпа).
· 1. Гижны медводдза сёрникузяысь кывтэчасъяссö.
2. Гижны транскрипцияöн тшöтш, лызь кывъяс.
Велöдчан во помын тöдöмлун да кужöмлун донъялöм
Диктантъяс
Вöр.
Коми мулöн вöр–ваыс збыльысь гежöда овлана. Татчöс вöрсö вылö донъялöны мир пасьтала. Татшöмыс пö Европаын важöн нин абу. Коми парма – коми йöзлöн озырлуныс.
Пармаын унджыкыс коз да пожöм. Коръя пуяс пöвстын медся уна быдмö кыдз. Пипуыс этшаджык. Вöрлöн быдман кадыс нюжалöма нин миллион вояс вылö. Тайö каднас вöръясын лоины войвылын бура быдмысь–сöвмысь пемöсъяс да быдмöгъяс.
Вöрын быдмö уна вотöс: пув, чöд, турипув, мырпом, чöдлач, öмидз. Тшак йылысь и сёрнитны нинöм. Мукöд вонас быдмылö сы мында, кöть косаöн ытшкы. Озырлуныс мойдкывйын кодь.
Но парматö колö видзны. Велöдчыны тайöс вöчны колö ичöтдырсянь, медводдзаысь вöрас пырöмсянь. (98 кыв)
«Коми му йылысь быдмысь войтырлы висьтъяс» небöг серти
· Визьнитны 8 сложнöй кыв.
Тулыс.
Водз тулыс. Тшöкыда пӧльыштлӧ мелі лун тӧв. Ясыд шонді лышкыда койӧ югӧръяссӧ. Мыйта ӧні сылӧн мелілуныс, бурлуныс, бырлытӧм вын–эбӧсыс! Ыджыд радлун сійӧ сетӧ йӧзыслы, став ловъяыслы. Тувсовъя зарни шондiыс уджалӧ мудз тӧдтӧг, медым му вылас ставыс бӧр ловзис да вынсяліс.
Заводитіс сывны. Ывлаыс быттьӧ выльысь садьмис, югдіс. Гажаджыка кутісны сьывны посни лэбачьяс. Кöдзыд тӧвнас найö тані олiсны, а öнi вель ёна радлісны локтысь тулыслы.
Вежсис ставыс и вӧрын. Пуяс садьмисны, радöсь. Кыдз пу вылӧ тулысыс ӧшліс мугöм рöма исергаяс. Исергаасисны тшöтш пипуяс, ловпуяс. (83 кыв)
С. Раевский серти
· 1. Аддзыны рад кыввужъя кывъяс, пасйыны кыввужсö, суффиксъяссö.
2. Коймöд сёрникузяысь гижны кывтэчасъяссö.
3. Бöръя нёль сёрникузяысь визьнитны грамматика подувсö (подувпас да юöрпас)
Дата добавления: 2015-10-02; просмотров: 71 | Нарушение авторских прав
| <== предыдущая страница | | | следующая страница ==> |
| Тöдöмлун да кужöмлун донъялан уджъяс | | | Тундраын. |