Разорение 23-му вопросу и ответу. 3 страница

Видиши ли, богате, где сущее свое повелевает Бог сокровиществовать? А иже чюждая похищая и насилуя, где тои мнится быти? Аще и царь или велможа, всем во Христе Божественый апостол (л. 320 об.)[1162] заповедует, аще царь или боярин, или велможа, или владыка, по Божественному апостолу: Да[1163] аще, братие, или не весте, яко неправедницы и хищницы Царствия Божия не наследят.

Господь[1164] же и мукою претит, глаголя: Убойтеся, рече, имущаго власть по убиении воврещи в дебрь огненую и не просто, но и с клятвою. Ей, глаголю вам, того убойтеся. И инде паки: Связавше ему руце и нозе, вверзите во тму кромешную. И инде паки рече: Злых зле погубит. И паки: И неключимаго раба вверзите во тму кромешную. И инде: Отъидите от Мене, делателие беззакония. И паки: Приведите Ми его семо и иссецыте предо Мною, зане не хотеша, да (л. 321)[1165] бых царь был над ними. И инде: Соберите их и свяжите в снопы, яко сожещи я. И паки: Иже аще кто не пребудет во Мне, извержется вон, яко розга и изсышет, и собирают я, и во огнь влагают, и згарает. И инде: А[1166] иже аще речет юроде, повинен есть геенне огненой. И паки: Аще око твое соблажняет тя, изми е и верзи от себе. И прочее. Уне бо ти есть, да погибнет един от уд твоих, а не все тело твое ввержено будет в геену огненую. И инде паки: Идите от Мене, проклятии, во огнь вечный, уготованный диаволу и аггелом его. Взалках бо ся, и не дасте ми ясти. И прочее.

Сия вся реченная самем Богом и святыми Его апостолы, кто ныне сохраняет? (л. 321 об.)[1167] Кто ли боится, якоже подобает? Того ради к таковым Господь рече: И идут сии в муку вечную. И глаголеши, совопросниче, яко тишаиший государь наш и всещасливой царь вручил Никону, что досматривал всяких судеб церковных. Вручил Никону не царь досматривати судеб церковных, вручила Никону благодать Святаго Духа. Но царь тую уничижи и Святаго Духа благодать обесчести и немощну ту сотвори, яко без царьского указу не может ныне действовати благодать Святаго Духа, якоже пишут растленнии умом архиерее, ныне поставил есмь сего или оного архимандрита или игумена или презвитера и прочих по благодати (л. 322)[1168] Святаго Духа и по указу великого государя. И прочее. Такожде удавленаго или убитаго погребати или молитва во гресе рожденному дати, все по государеву указу, и что сего страшнее.

Господу свидетелствующу: Сего[1169] ради глаголю вам, всяк грех и хула отпустится человека, а яже на дух хула, не отпустится человеку. И иже аще[1170] речет слово на сына человечскаго, отпустится ему, а иже речет на Духа Святаго, не отпустится ему ни в сии век, ни в будущии, но повинен есть вечному суду. Кого имать помиловати таковы, еже Святаго Духа дерзну обезчестети и немощна того сотвори, действие и силу присовокупися тому, и по указу великаго государя. И прочее. Несть ли (л. 322 об.)[1171] выше сего писано, яко мирскими властми избранный извержется и с поставльшим его. Но ничему не внимают. Что более сего свидетелства самому Богу свидетелствующу, яко ни в сем веце, ни в будущем не отпустится таковое согрешение. Но он, государь, ни сего содрогается, еже несть что любо тяжчае сего, яко не имать отпущения ни в сем веце, ни в будущем, но действует аки архиерей великии. и его же хощет, того велит рукополагати. Ох, ох, ох, увы, увы таковаго презорства и страшнаго прещения кто будет поможет от него.

Паки пишешь, и сие есть, что подарил (л. 323)[1172] его всеми привилеи, которыя, велми почитаючи Константин Великии папу Римскаго Силивестра, вручил ему же, папе. Такожде и Никону на писме подал многия привилеи государь царь. Которыя привилеи, скажи ми? Еда по древнему закону десятину или ино что яже суть по закону или преданию благочестивых царей? Ни. Но что прежде от церкве наследия отъятие и потом и с привилиями изгнание нам самем.

Послушай, совопросниче, яже ты глаголеши о Константине Велицем, какова суть того привилия.

В перый же день по еже прияти ми тайну Божественаго крещения и по исцелении еже от проказы моего (л. 323 об.)[1173] телесе познах не быти иному Богу, развее Отца и Сына и Святаго Духа, его же блаженный папа Силивестр возвещает, Троицу во единицы и единицу в Троице. Вси же бози язычестии, им же изначала веровах, бесове суть, дела рук человеческих, яве показашася.

Видиши ли, совопросниче, яко не единым телом очистися, но сугубо душею и телом. А иже аще мнится, кто тело чисто имети, а душю проказиву, что ползует его внешняя чистота его, душа прокажена сущи. Тем же и Господь к таковым глаголет: Лицемере, измый прежде внешнее сткляницы и блюду, и будет и внутренняя има (л. 324)[1174] чиста. Паки Великаго Константина устав. К сим же, колику власть самый Спаситель наш Господь своему апостолу блаженному Петру подаде на небеси и на земли, явлено и нам, той честный отец наш Силивестр изложи.

Внегда оного верна обретох в вопросех. И рече: Ты еси Петр, камень веры, и на сем камени созижду церковь мою и врата адова не одолеют ей.

Разумейте, силнии, и ушима сердечныма внушите, что благии учитель и владыка своему ученику, совокупив, рек: И дам ти ключи Царствия Небеснаго, и его же, аще свяжаши на земли, будет связан на небесех, и его же разреши на земли, будет разрешен на небесех. Преславно убо се слово, еже на земли (л. 324 об.)[1175] вязати и разрешати, и на небесех связану быти и разрешену.

Видели, совопросниче, како утвержает благочестия утвержение, яко аще, рече, свяжет на земли, будет связан на небеси, а не как ныне, яко им же подобает вязати. Тех самех и вяжут и разрешают, но паки на первое обратимся.

Сия убо блаженному нашему отцу Силиверсту учащу, разумех и благодетелствовах самого блаженнаго Петра совершеннейшее здравие ощущая пришедшее телеси моему. Достойно разсудихом со всеми нашими тысущники и сотники и сигклиты и с велможами и со всеми Римскаго царства величествы (л. 325)[1176] подлежащему людству, ему же блаженный Петр яко викарии, сиречь наместник, является уставлен на земли Сыну Божию.

Сице и нами и нашим царством место преимущее и властелина апостольскаго приимут даное им началство, власть болшая и превысочайшая, неже еже имать наша кротость и царство на земли всеми ведомо. Предразсудихом того апостольскаго властелина и того по нем приемника присных быти нам к Богу отцем и ходатаем.

Видели, совопросниче, завещания святыя оныя царския души, како почте не единаго Силивестра папу, но и по нем приемников, присных, рече, быти нам к Богу отцем и ходатаем. А не якоже (л. 325 об.)[1177] ныне сам, немилосердием своим изгнав, сам, яко хощет, государь не почитает и хулящим не возбраняет и клевещущих приемлет, якоже тебе и прочих подобных тебе окаянных.

Таже паки оная святая и блаженная душа глаголет: И якоже нашу на земли царьскую власть, тако и его священную и святую церковь римскую оставихом чтити со благоговением и священнейшим его седалищем блаженнейшаго апостола Петра паче нежели нашего царства. Наипаче бо земнаго престола преславнее превознести и воздати сему власть и славы достоинство, скорость же и господьствование и силу и честь царскую.

Видиши ли, со(л. 326)вопросниче[1178], блаженныя оныя и святыя царския души уставы завещания, не тако, якоже ты глаголеши, вручил Никону и на писме подал многия привилеи государь царь. Которыя? Сия ли, еже ныне по ево государеву по всему государству грамоты розосланы, что с ково взял я, якоже есть писано выше. А сам забыл о себе разсмотрити праведно по Божественому словеси. Изми первее бервно из очесе твоего. И прочее.

Колико от святых церквей и монастырей и святых мест поимал, яже суть оных святых церквей и монастырей и святых мест приставницы святии аггели зрят? Якоже есть писано: Аггели их в ыну видят лице Отца небеснаго. Таже глаголет: И еще же уставаяюще, (л. 326 об.)[1179] законополагаем власть имети на изряднейших четырех престолех, Константинополскаго глаголю и Александрийскаго и Антиохийскаго и Иерусалимскаго. Еще же и на всех, иже по вселенней, Божиих церквах и по временном тои священнеишей и святой Римской церкви сущаго святителя выщшаго быти и властелина над всеми архиереи и священики, иже по всей вселенней, но и вся, о их же достоит попечение имети к Божественней службе и к крепости и утвержению християнския веры, сего судом устроитися. Достойно бо главе началство святаго закона имети, идеже святых законов законоположи Спаситель наш блаженнаго Петра апостолскии устави (л. 327)[1180] послушание имети престол, идеже крестную страсть и сам той претерпе, блаженный, смертную чашу испив, подобник своему владыце быв. И тамо до скончания века и всегда поищут учителя, идеже святое почивает учителево тело, тамо и языцы о имени Христове и исповедания выю свою преклоняют, и идеже сих учитель блаженный апостол Павел о Христе шию свою протяг, мечем во главу усечен бысть, и венцем мученеческим украсися. Тамо преклонения смирении сотворяют и небеснаго царя и Бога и учителя нашего Иисуса Христа да поработаю сану, идеже величеству и гордости земнаго царя поработаша власти, тамо да поработают и небеснаго царя (л. 327 об.)[1181] поработаша властелинам и первым лика апостолскаго Петру и Павлу. Их же ради ведати хощем всем, иже по всей вселенней, языческим людем яко мы внутрь латеринския полаты нашея по крещении храм воздвигохом самому Спасу нашему и Богу и владыце Иисусу Христу от самых основании и с крестилницею, из них же основании 12 кошев земли сам обременився, своими рамены изнесох, равночислены 12-и апостолом. Еже достоит священным сию святую церковь, главу и верх всем по вселеннеи церквам глаголатися и веровати и возвещати и чтити повелеваем, якоже и инеми нашими (л. 328)[1182] царьскими веленми указано положихом. Создахом же и церковь блаженным[1183] Петру и Павлу, первым апостолом, юже сребром и златом достоино облильно и обилно украсихом, идеже и священнейшая телеса их положихом с великою честию. Паки им от илектра, его же ни едина вещей сила есть крепчаиши, сотворихом. Крест же златом чистеишим и бисером драгим украшено сотворен. На коейждо стране обоим ракам положихом, златыми пригвоздивше гвоздми, яже церквам всем по вселенней многими светилы и свещами устроихом содержания ради и крепости и светлости стяжания.

Зри, совопросниче лукавый, что от сих (л. 328 об.)[1184] сотвори государь царь, якоже ты глаголеши, велми почитаючи. Которое почитание, яже от сих ничто же? Но паки слушай.

Земли же и села и винограды и езера и пошлины, сочетавше, дахом церквам. И Божественным повелением и нашим царским положением уставихом, на восточных и на западных, на полунощных же и южных странах, во Июдеи же и во Асии, и во Фракии, и во Елладе, во Африкии же и во Италии и в различныя острову нашего им повеления свобожение возвещая и по всей вселенней, идеже православнии цари и князи и властели под нами обладают нашего свобожения, и волю им утвердивше, дахом владети святителем (л. 329)[1185] и никаковому мирскому сану смети прикоснутися церковным пошлинам. Богом заклинаем и нашим повелением утвержаем непреложно и соблюдено быти даже до скончания века сего.

Зри, совопросниче, где есть царьское жалование, привилеи подобны сим, якоже ты глаголеши, велми почитаючи Константин Великии папу Римскаго Силивестра, вручил ему же, папе, такоже и Никону на писме подал многия привилеи государь царь. Которыя? Разсмотри противо сим, то есть царя Константина.

Видиши ли, како царь Константин Великии, дав, и утвердил даже до скончания века сего. Государь же царь, аще что и дал, и того сам не соблюл, и бывших всех, (л. 329 об.)[1186] и отца своего и свои привилеи везде ни во что обратил. Паки же к сущим царя Константиновым заповедем приидем.

Се же явлено убо, яко руками блаженнейшаго отца нашего Силивестра святителя и того по нем приемником, сия вся удержана будет. Да возвеселится ныне с нами весь народ и вси, яже по вселенней языки и роды. Глаголем и молим, яко да с нами Спасителю нашему и Богу и Господу Иисусу Христу безчисленныя исповемы благодати. Яко той есть Бог на небеси горе и на земли доле, иже нас святыми апостолы посети и святую таину крещения и телеси здравие достойно сотвори прияти. О них же и подаем тем святым апостолом (л. 330)[1187] и владыкам нашим, блаженнейшим Петру и Павлу и с ними Силивестру, нашему отцу, и всем отцем, поднебесныя Отцу, краинему святителю, и соборнаму града Римскаго папе и всем его, иже по нем приемником святителем, даже до скончания мира, на престоле блаженнаго Петра седящим. Первое, убо в латеринстей полате царьства нашего, яже всех, иже по всей вселенней, полате препочитается и преимеет и славится, якоже диадима, еже есть венец главы нашея, подобне же и фригион, еже есть покрывало, еже митрою нарицают, и не токмо той, но и епомион, еже есть препоясание, еже обычно есть царьской мышце облагатися, рекше омофор, (л. 330 об.)[1188] и еще же и багряная одежда и червленая риза и вся царьская одеяния, но и царьскаго председания достоинство и царьских коней утварение, и царския скипетры, и вся знамения, еще же и колесницы и различныя царьския утвари, и вся, еже в происхождение их, царьскаго верха, славы и силы.

Сице честнеишим же мужем, клириком в различных чинех той священней святей Римской церкви работающих, оноя же высоты усвоение и силы преизящество имети уставляем, еже и великии наш сигклит славою зрится украшен, сиречь патрикеем, бывати им и ипатом. К сим же и инеми царьскими саны в проповедаемых (л. 331)[1189] украшатися им, якоже царьскому воинству. Сице и клиросу святыя Римския церкве украшатися и чествоватися уставляем. И якоже царьская власть различными саны кудикулариискими и остирьяскими и скудиторскими украшается, тако и святой римской церкви украшатися. Но и пространнеише святительское благоукрашение священным и Божественым повелением и нашим царьским повелением сияти и чествоватися уставляем. И тех клирик тоя святыя церкве, кони прокровени одеянии, белейшаго зрака украшатись повелеваем и сиятися мимоездящих обувенми, сиречь белейшими обеянии по ногам имущих, (л. 331 об.)[1190] якоже сими и наш сигклит одевается. Да якоже небесная, такожде подобает и земная украшати в славу Божию. Прежде же всех волю даем тому святейшему отцу нашему Силивестру, иже града нашего Рима святителю папе и всем, иж по нем приемником, хотящим быти на приходящия веки блаженнейшим святителем ради чести и славы Господа нашего Иисуса Христа в велицей сей соборней и апостольстей власти. Аще кто от великаго нашего царствия велмож восхощет ко благоговейным клириком причетатися, никому же, иже к сему призываему за гордость, отрицатися чина, узаконополагаем же и се всякия чести достоино отцу на(л. 332)шему[1191] Силивестру, крайнему святителю, и всем его, иже по нем приемником, святителем препоясанием и венцем, иже от главы нашея подахом ему, златом чистейшим и каменми многоценными и драгим бисером составленый. Должен есть одеватися и на главе носити на славу Божию и на честь блаженнаго Петра, понеже той блаженный папа на венце главнаго пострижения знамение сотвори, его же ради чести блаженнаго Петра имеет. Не восхоте же ль злата носити венец, мы же венец вместо сего, лицем белейшим светлое Воскресение Господне назнаменавше, на священнейшую его главу своими руками положихом и брозды (л. 332 об.)[1192] коня его своима рукама держаще, чести ради блаженнаго Петра, конюшеским саном ему себе дахом. Повелеваем же того чина и обычая всем, иже по нем святителем, всегда творити в поездех своих по подобию царства нашего. Тем же ради сего постриженаго знамения верховнаго святительския главы, да не мнит кто сие пострижение худо быти и безчестно. Но и паче земнаго царства саном и славою и честию и силою ея украшати подобает. Се же и полата наша, якоже преди речеся, но и Рим град весь и вся Италия и западныя страны и пределы и места и грады и земли. Сему же множицею предреченному блаженнейшему (л. 333)[1193] отцу нашему Силивестру соборному папе предаем и отступаемся ему и всем, иже по нем бываемым святителем, и по всей вселенней, идеже православная наша вера обдержит, и владение и суд держати им Божественым нашим и делным сим законоположением повелеваем пребывати наместнику святей Римской церкви. И подлежащее и пребывающее отдаваем ей, отнюду же судихом нашему царьству и его славе на восточныя страны преселитися вместо Византии, краснейшее место о нашем имени град создавше, тамо царство наше утвердим, идеже бо святительская власть и христианскаго благочестия глава небесным царем уставлена бысть, (л. 333 об.)[1194] недостоино есть тамо власть имети земному царю. Сия убо вся яже священным нашим сим писанием и инеми Божествеными суды повелена же и укреплена, даже до скончания мира, яже по всей вселенней. Данныя же святителем церковныя пошлины неприкосновенна и непоколеблема пребывати уставляем в наших летех и по нас в приходящыя лета и роды. Заповедаем православным царем и князем и всем людем, яже по всей вселенней, даже и до скончания мира. Отнюду же пред живым Богом, иже повелевшем нам царствовати, и Страшнаго Его суда предзасвидетелствуем, священым и Божественным повелением (л. 334)[1195] и царским сим нашим уставлением, всем нашим по нас преемником царем и всем силным и всем тысящником и всем сотником и всем велможам римским, всему пространнейшему сигклиту полаты нашего царства, и всем, иже по всей вселенней людем и иже ныне сущим в сих летех и потом по вся лета впреди бывающим, и нашему царству подлежащих. Ни единому же сих мощно буди по некоторому образу, яже нами и царским нашим законоположением свяшеннейшей святей римской церкви и всем, иже по нею, святителем, по всей вселенней бываемая данная порушити или пречинити или которым образом досадити. (л. 334 об.)[1196] Аще ли же кто силою или недоверием или гордостию преобидник будет о сих, вечными да объят будет осуждении и онех да подпадет томлением и обрящет тогда себе сопротивных святых божиих и началных апостолов Петра и Павла и в настоящем убо житии и в будущем и да в преисподнем аде мучим будет и да исчезнет со диаволом и со всеми нечестивыми. Сего же нашего царьскаго повеления писание своими руками укрепивше, честному телеси началнаго апостолом блаженнаго Петра своими руками в раку положихом, сим Божию апостолу обращахомся, непорушима нами сия вся соблюдати и нами и по нас (л. 335)[1197] приемники царьскими, зде и по всей вселенней православным царем же и князем и велможам владалным, соблюдаема Божествеными заповедьми и нашими уставы укрепихом. И блаженному отцу нашему Силивестру, соборному папе, и его ради всем его приемником святителем, Господа нашего Иисуса Христа благонравно поведавше вечно и благополучно сих воздаяние предавше. Такожде инем четырем патриаршеским престолом, коемуждо пределу честных ради апостол и ученик Христовых, Византийскому, его же во свое имя преименовахом Андрея ради апостола, яко много потрудившася к богоразумию тех привести и церкви водрузити православных, (л. 335 об.)[1198] такожде и Александрскому, Маркову преемнику, и Антиохиискому, Лукину настолнику, и Иерусалимскому, Ияковля брата Господня, коемуждо во своем пределе подобающую честь подаем и наши по нас преемницы до века, такоже и всем церквам Христовым, митрополиям, архиепископиям и епископиям и иже по них настолником их, честь сами даем и наши по нас преемницы и велицыи сатрапы, яко служителем Божиим, преемником Христовым апостолом, сице творите и соблюдаите, яко да не предреченной тягости подпадете и славы Божия лишени будете, но держите предание, якоже приясте. Бога (л. 336)[1199] боитеся и священную его церковь и настоятели ея чтите, да милость Божию получите и в сем веце и в будущем и сынове света будете.

Царское подписание сице.

Божество вас да соблюдет во многая лета святеишии блаженнейшии отцы. Дадеся в мире в день третии каланд априлиевых. Владыки нашего Флавия Константина Августа. Галаканом мужем честнейшим ипат славнейших.

Видели, совопросниче, великаго царя Константина веру и деяние и утвержение, како при себе и по себе и навеки до скончания века утвердил и заклял страшным прещением, кто не сохранит заповеди его, глаголя: (л. 336 об.)[1200] Аще ли же кто силою, рече, или неверием или гордостию преобидник будет, вечными объят будет осуждении и онех да подпадет томлением, и обрящет тогда сопротивных святых Божиих и началных апостолов Петра и Павла и в настоящем убо житии и в будущем, и да в преисподнем аде мучим да будет, и да исчезнет со диаволом и со всеми нечестивыми. Такожде и Устиниана, царя великого, законы даныя церкви на утвержение, во всем последуя святых апостол и святых отец правилом, 87-го правила, еже не вместно скупости ради времене вписати, сам на месте их (л. 337)[1201] прочти во святых правилех. Такожде и прочия греческия цари благочестивыя.

Таков же и равноапостольный великий князь Владимир крестився и созда церковь соборную Пресвятыя Богородицы Десятинную. И дах ей десятину со всего своего княжения от всякого суда десятое и с торгу десятую неделю во всех градех, и на всякое лето десятое от всякого стада, и от всякого живота на всякое лето десятое Господу Богу и Спасу нашему Иисусу Христу и Пречистей Его Матере Пресвятей Богородице и отцу своему митрополиту. Такожде и епископом по всей земли Русской, во всех княжениях в соборную церковь епископом устроил по греческим номоканоном. И паки разсмотрив греческия номо(л. 337 об.)каноны[1202], обрете в них написано, яко не подобает церковных судов мирским князем судити, ни бояром, ни тиуном их, и той такожде сотвори. Седе со отцем своим Леоном, митрополитом же всеа Руси, и со всеми детми и со всеми князи своими, и с боляры и дал те все суды по греческим законом святей Божии церкви Пресвятыя Богородицы и отцем митрополитом всеа Русии и всем епископом по всей Русской земли в род и в род до века, глаголя: Завещаю и заклинаю Богом и Пречистою Богородицею все, еже соблюдати сия неподвижно, и никако же вступатися во святительския суды и во власти их и в люди их ни детем (л. 338)[1203] моим, ни внучатом, ни правнучатом, ни всему роду моему в род и в род до века. А бояром нашим и тиуном нашим и всем судиам нашим и иже по нас в род и в род до века никако же судов святительских церковных не судити и наших мирских судов без судей митрополичьих не судити десятого ради дохода. Богом заклинаем и Пречистою Богородицею соблюдати сия неподвижно даже до скончания мира. Аще же кто преобидит сии устав, таковым грех и непрощеным быти от Господа Бога, аще не покаются. И своим убо судиам и тиуном приказываю и засвидетелствую пред Христом (л. 338 об.)[1204] Богом и пред всеми святыми Его и пред всем народом, священных доходов и пошлин и управ, судов церковных не обидети и с судов градских давати 9 частей князю, а десятую часть святей церкви, отцу нашему святителю. Такожде и всем святителем по всей Русстей земли, где суть священнии епископстии престоли. А се люди церковнии по Божественным правилом предани патриарху или митрополиту или епископу, в коем аще предел будет. Епископи, архимандрити и игумены, игумении, попы, диакони, попадьи и диаконицы и дети их, и иже суть в клиросех, иноки и инокини, понамари, проскурницы, стражи священнии (л. 339)[1205] церковнии, местницы, прощеницы, бабы, вдовицы, задушнии человецы, прикладницы, станницы, нищии, монастыри и бани их и врачи их, болницы и врачи их, пустынницы, странноприемницы, и кто святая одеяния иноческая свержет, те вси по древнему уставу святых апостол и святых отец и благочестивых православных царей святым церквам даны, патриарху или митрополиту или епископу, в коемждо аще пределе будет, да ведает их той и управу дает и разсуждает, аще что будет промеж ими или которание, или безчиние, или нестроение, или суды, или обиды, или насилие, или церквам и закону христианскому что (л. 339 об.)[1206] неподобно содевается, или лихоимством имение преставлшаго восхитится, душа вышши и болши всего есть, или мерила неправедна и весы и спуды, или задница, аще ли иному человеку будет с ними суд или обида которая, то общии суд и пересуд наполы.

Сия и убоися, аще кто преступит правила, якоже есмь управил по святых апостол и по святых отец и по первых православных благочестивых царей управлению. А кто имет поругати и преступати сия правила, или дети мои, или внуцы мои, или правнуцы, или по тех князи и бояре, или в которых городех наместницы, или судьи, или тиуны, аще (л. 340)[1207] имут поругати и обидети те священныя суды и управы и доходы и пошлины церковныя святителския или отъимати, да будут прокляти в сии век и в будущии и от святых апостол и от седми соборов святых отец вселенских.

Глаголет бо во Евангелии своем Господь к таковым: Отъидите от Мене, проклятии, во огнь вечный, уготованный диаволу и аггелом его.

О мерилех и о весех, и о спудех, и о ставилах.

Сие убо искони поручено Господем Богом святителем и епископиям их, градския и торговыя и везде всякия мерила и спуды и весы и ставила от Господа Бога тако изначала уставлено есть и непоколеблемо никогда же быти даже (л. 340)[1208] и до скончания мира. И святителю блюсти без пакости всего того подобает, за все бо за то воздати ему слово в день великаго суда Христова, якоже и о душах человеческих.

А се о десятинах.

От всякого княжа суда десятая векша, и ис торгу десятая неделя и от дани, и от веры, и из всего схода, и прибытка, и от лова княжа, и от всякого стада, и от всякого жита десятое в соборную церковь епископу. Царь или князь в девятих частех, а церковь соборная в десятой части. Глаголет бо апостол: Основания же иного никто же может положити, паче лежащаго сего от начала век положеннаго от Господа Бога и святых его. И да вси со(л. 341)граждают[1209] на сем основании. Аще кто разсыплет храм Божии, разсыплет того Христос Бог, церкви бо Божия свята есть и утвержена Господем Богом в век века. Аще кто обезчестит и разорит святыи сей устав апостольскии и отеческии, гнев Божии на себе привлечет и гнев не прошен, и проклятие в сии век и в будущии, якоже во Евангелии писано есть, яко с проклятием таковии отсылаются от Господа Бога во огнь вечный, уготованный диаволу и аггелом его.

Аще кто поругает и изобидит священныя доходы и пошлины и управы и суды церковныя святителския, четверицею да воздаст и страшен ответ воздаст на Страшнем Суде (л. 341 об.)[1210] Христове, идеже никто же никому же поможет, развее истинныя веры православныя и добрых дел. Аще кто завещание мое сие и уставление мое порушает, или сынове мои, или внуци мои, или от бояр или кто от властелей, или от тиунов и от прочих кто ни буди, аще порушает мой ряд, или вступятся в суды священныя святительския или в доходы и пошлины, что есми дал митрополиту, своему отцу и епископом во всех княжениих по святых апостол и святых отец и по первым православных благочестивых царей управлению, да приимет от Христа Бога и от достоине держащаго державу Русскую. Аще же вся сия преобидит (л. 342)[1211] кто и имет вступатися и отнимати, и судити, преслушав спасеныя заповеди Божия и апостольския и отеческия и православных и благочестивых первых царей, и неключимых нас завещание священныя церковныя управы и суды и доходы и пошлины, той да станет со мною пред Христом Богом на нелицемернем и грознем и страшнем суде, и да не будет на нем милости Божия в сем веце и в будущем, и да будет проклят.

И таковая с молитвою завещания трудолюбезно от святых писании снискав и завет сугубо доволен написа, и клятвами страшными утвердив, и таковое писание в той велицей церкви (л. 341 об.)[1212] Богоматере на утвержение благочестия, еже и доныне благодатию Христовою многоразличныя даяния, Богу даная, свидетелствуют, благословенный плод сего святаго Владимира, иже суть наследницы богохранимыя державы его, Божественне ревнующе по истинном благочестии, якоже прияша отеческая правоверная вера законоположения. И сия вся не токмо непоколебаемо держаще исправляху, наипаче же того много сугубно и приложиша, созидающе многия церкви и епископы устрояху, и честныя монастыри воздвигаху, и нещадно даяху вечное наследие, грады и погосты, села и винограды. земли и борти, езера и реки, и ве(л. 343)ликия[1213] власти со всеми прибытки. К сим же и десятое изо всего царствия и княжения.

Такоже[1214] и христолюбивыя их царицы и благоверныя княгини усердно вдаваху свою лепотную утварь и всякую нарочитую кузнь и светлыя ризы, злато же и камение драгое и великии жемчюг, и святыя иконы, и евангелия, и царьскими сосуды святыя престолы украсивше, обогатили паче тех, от кого сия прияли суть, внимающе писанию апостольских правил. Якоже церковное богатство нищих есть богатство, еже сим издовляти весь освященный чин и вся причетники церковныя, и возраста ради и сирот, и в старость пришедшим, и в немощи (л. 343 об.)[1215] и в недуги впадшим, нищим в прекормление и много убо чади, и странным в прилежание, и убогим сиротам в промышление, вдовицам же пособие, девицам потребы, обидимым заступление, пленным искупление, во гладе прекормление, в худобу умирающим покровы и гробы и погребание, церквам пустым и монастырем подъятие, живым прибежище и утешение, а мертвым память.

Сих ради потреб церковных людие даваху имения своя, о таковых потребах блаженныи Владимир велик подвиг показа и вечное блаженство получи.

Что же ли, совопро(л. 344)сниче[1216], государь царь подобно сим сотвори? Но все сопротивно священному Христову Евангелию и святых апостол и святых отец и благочестивых царей и великих князей преданием и утвержениям, якоже выше много множество писано есть. Архиереиство ли почте, якоже Господь заповеда: Слушаяй вас, Мене слушает? То таково государь царь не почел, но и обесчестил тако, что невозможно и писати, безчестнее и поганых царей обезчестил.

Глаголет государь царь, якоже всенародное слово слышится во всем мире, что бутто он нас избрал на архиерейство. Едина весть Святая троица, Отец и Сын и Святый Дух, яко не искал, ни хотел, и иже имать судити Господь, (л. 344 об.)[1217] тогда познано будет. А я, аще бы ведал таковое его государево немилосердие, не бы помыслил, якоже весть Господь и всенародное множество, как молил сам государь. Ныне же от всенароднова множества общии глас слышится, кто де он был, толко де бы не яз ево избрал? Говорили и на Христа моего: Кто сей есть? Инии глаголаху: Не сей ли есть Тектонов сын? И инии же глаголаху: Откуду сему сия и что премудрость даная ему, и силы таковы рукама его бывают, не сей ли есть Тектон, сын Мариин, брат же Иякову и Иосии и Июде и Симону, и не сестры ли его зде суть в нас. И блажняхуся о нем.

Дата добавления: 2015-08-02