Разорение 23-му вопросу и ответу. 1 страница

Глаголеши, совопросниче, подобает ли архиерею бить и ударить и в сылку сослать, то все чинил Никон, и не могся насытить мирскими людьми (л. 272)[981] и духовным чином всегда. И ты, совопросниче, внимай, что возглаголем ответотворцу.

Глаголеши, ответотворче, не сыскиваю лутчей добродетели, что правда в человеке, что терпение, а хуждшаго зла, что гнев. Авраама похваляем для терпения его, который имел при рожестве сына своего единороднаго, в котором его была вся надежда. Что же конец сему? Се ли, яко вознес на жертву? Зриши ли, яко патриарх Авраам, изшед[982] по словеси Божию от земли своея и от рода своего и от дома отца своего и пришед до места Сихемска, и постави храм свой в Вефиле, и созда требник Господу, и помолися во имя Господа, явлшагося ему. И паки по возвращении (л. 272 об.)[983] от Египта вселися у дуба Мамврииска в Хевроне и созда ту требник Господу. Услышав же Авраам, яко плениша Лота, сыновца его, и собра вся домочадца, 318, и гнаша вслед до Дана. И нападе на ня нощию сам и отроцы его с ним, и порази их, и гони их до Ховала, яже есть ошуюю Дамаска, и возврати вся и коня содомска, и Лота, сына брата своего, возврати. Видели, что сотворил Авраам патриарх по возношении жертвы и по приятии священства за единокровнаго человека, племянника своего Лота? Колико порази сам и отроцы его, якоже глаголется инде, 300 побил и по сем паки священствовал, якоже пишет: Вознес сына своего Исаака на жертву.

(л. 273)[984] И Авраам племянника ради своего мстил. А иже кто за дело Божие отмстит кому по закону, которое то лихо, якоже последи укажем. Ныне, во ответе твоем, сряду возразим, аще и не потребно есть нынешнему закону, но ты безумием своим принудил нас на се.

Паки глаголеши, Моисея почитаем для терпения, которыя показал на пустыни и против люда непослушливаго и неблагодарнаго.

Читал ли ты, ответотворче, Моисейския книги, тако безумно глаголеши? Аще ли же ни, аз ти покажу, колико Моисей в правде некроток, но и зело суров и не милостив. Не видел еси, како египтянина убил и скрыл в песце. Уведа же фараон, искаше (л. 273 об.)[985] его убити, он же, бежав, вселись в земли Мадиамстей, священник убо и Моисей, якоже пишется во псалмех «Моисей и Аарон во иереох его», а не царь или воевода. Почто воева противу Амалика в Рафидине и по избиении сошед з горы, созда Моисей олтарь Господу Богу? Аще ли речеши, яко Иисус воевал. И бысть, рече, егда воздвизаше Моисей руце, одолеваше Израиль, егда же притинаше руце, одолеваше Амалик. И бысть, егда Моисею сниди з горы Синаиския, и егда же приближися к полку, узре телец илики. Возъярився гневом Моисей, поверже с руку своею обе досце и сокруши я под горою. И взем телец, иже сотвориша, (л. 274)[986] сожже во огни и сотре по тонку, и разсыпа и по воде, и напои ею сыны Израилевы. И паки повеле, препоясався мечи сыновом Левииным, побити комуждо брата своего и друга своего и соседа своего. Не ярости ли дело се, яко и досце, данная от Бога, сокрушил?

О Иовове кротости удивляешися, а делы нисколко не уподобляешися, как собака, присно не престая, сваришися, ничим же тебе обидящаго.

Про Павла пишешь, что поносил многия труды и беды, которыя он сам пишет, А инде тот же Павел сам о себе пишет[987]: Гонитель церкви был. Якоже и в Деяниих явлено есть[988], Савл же еще дыша прещением (л. 274 об.)[989] и убииством на ученики Господа. Видиши ли, яко и Павел по правде не кроток был. Палицею ли, рече, прииду к вам или духом кротости. И паки судих таковаго предати сатане, да дух спасется.

О Давиде глаголеши, которой поносил неблагодарение от сына своего Авесалома и злобу Семееву, которой с камением последовал ему. Кто же Урия уби? Давид. И вси святии себе не отмщали, а по суду всяку неправду мстили, били и убивали, якоже Давид, о нем же свидетелствуют Царства,. Нафану пророку сам ся своим судом осудил на смерть за Уриино убииство и Вирсавиино имство. Достоин, рекл, (л. 275)[990] есть человек он смерти, кто чюжую агницу похищает. Якоже и ныне, которыя держат не сущую свою церковь или не своей епархии, которыя ложное издают писание, якоже ты чрез божественныя заповеди и законы на прелесть пишешь все ложно.

Пишешь, не прикасаитеся помазанному моему и во пророцех моих не лукавствуйте. Помазанники называешь[991] весь священническии чин, ради помазания священства и ради христоподобной благости Христа нашего, учинил еси нас цари и священники, по священной Апокалипсии. Цари[992] тогда бываем, егда владеем страстми телес наших, когда[993] приносим вся чювствия наша. Убо Епикур безумно (л. 275 об.)[994] отрядил, что человек не может терпения поносить и временныя помешки. Наипаче же философ тогда есть, когда терпение понесет и не подобает архиереем такия снасти мучителныя имети. А ино делаючи, услышат Христово прещение: Возврати меч свой в недра своя. Вси бо, которыя приимаются за меч, от меча погибают. Мирскому князю дано препоясатися мечем, а не человеку священному.

К то ти сказывает о мечи, яко мечем имамы? Ни, совопросник, тебе о сем что любо вопрошал? Сам ли ты лжешь или ини тебе рекоша, яко меч имамы и тем отмщаем? Укажи, кому мечем отмстили о чем любо, (л. 276)[995] а яже о церковных невежествах и любо о иных наказаниих по вине имамы законодателя самого Христа Бога нашего. Той нам закон положил.

И[996] приидоша паки во Иерусалим и вшед Иисус в церковь, начат изгонити продающыя и купующыя во церкви и трапезы торжником, и седалища продающих голуби испроверже. И не даяше, да кто мимо несет сосуд сквозе церковь, и учаше, глаголя им: Несть ли писано, яко храм Мой храм молитвы наречется всем языком, Вы же сотвористе его вертеп разбойником.

Т олкование.

Еже изгнати Иисус продающыя, Иоанн повевает, но убо в начале Евангелия: И[997] сотвори бич от вервии. (л. 276 об.)[998] Не просто изгна, но безчестным бичем плетеным бия. Сеи же к концу, достоит бо второе быти сему.

Пещеру же разбоиническу именует церковь за беззаконное удержание от недостойных.

Т олкование.

Толма возненавидев лукавство ваше, яко ни церкви дому моему, глаголю, быти, но дом ваш. Донеле же бо живяше в ней добродетель и любовь, дом мой бе. А понеже осквернисте и торг и пещеру разбойником соделасте, но и столы продающих голуби испровращаются, сиречь архиерей, продающих духовныя дары. Духа образ есть голубь, иже бо злата ради поставляяй, проклят. А иже Кру(л. 277)тицкий[999] митрополит в чюжих епископиях и по указу государя царя и по повелению велмож ставит, коликих клятв достоин, якоже выше сего есть писано: Кто мирскими властми избран, извержется и с поставльшим его. А ныне архиепископов и архимандритов и попов многих сам государь царь избирает, а Крутицкой митрополит ставит. Но паки к первым обратимся.

И же[1000] аще соблазнит единаго от малых сих, верующих в Мя, уне есть ему, да обесится, жернов ослии о выи его, и ввержен будет в море.

Святых апостол правило 27.

Святитель[1001], вернаго или невернаго бив, да извержется.

Т олкование.

(л. 277 об.)[1002] Епископ или презвитер или диакон, аще биет досадившаго ему вернаго или невернаго, и того ради боязнь влагая другим, да и тии подобно тому не согрешают, к тому таковии яко противно творят, евангельскому закону, повелевающему «аще тя кто ударит за ланиту, обрати ему и другую», да извержется. Понеже от гордости и неудержания ярости нанесе рану на искреняго. Аще же кто, целомудрен смысл имый, беззаконно нечто творящаго в церкви святей или во святых местех биет, таковый не извержется. Понеже и Господь наш Иисус Христос продающыя и купующыя в законней церкви, сотворив бич от вервии (л. 278)[1003] и бия, таковы оттуду изгна. Церковнии бо хранители отместницы нарицаются, яко от Отец превыше поставлени суть таковы казнити.

Видели, что накончает святое правило, аще и во святей церкви или во святых местех биет, не извержется. И прочее.

А еже бывшу ми на Москве, якоже совопросник глаголет, подобает ли архиерею бити и ударити и в сылку сослать, то все делал Никон, и на то есть правила святых отец и законы царския, которыя церковь святая приемлет за едино со апостольскими и отеческими правилами, якоже в предисловии книги Кормчия к концу является писано.

Паче[1004] же иже во блаженней памяти от Устиниана царя (л. 278 об.)[1005] со свитком Божественных новых заповедей, еже не токмо правоверных наших отец правилом последуют, но и от царския крепости господьство даруют с приложением законным же и богоугодным. Полезное всему человеческому созданию богоподобно смотряюще, в них же есть повелено местником быти[1006] архиереов.

Собора Карфагенского правило 76.

Да не сутужают епископу да будут местницы.

Толкование.

Убозии от силнейших озлобления и обиды подъимаху и того ради приходяще к епископом, стяжаху им и молящеся помощи им. Епископи же овогда помогающе, овогда же не возмогающе. Сице изволиша отцы (л. 279)[1007] собора сего просити у царя, да с промышлением епископов изберет и поставит местников. Местницы же, казнители суть церковнии, да противятся насилию и мучителству богатых и отмщают убогия от насилия их. И епископи того ради не стужаеми пребывают.

Того же собора правило 97.

От[1008] царя да испросится соглаголник, рекше помощник заступлению о церковных главизнах, иже хитрость имеют, отмщати вещи церковныя и яко святители о приключающихся удобно возвещати могут.

Толкование.

И паки изволися отцем собора сего, якоже в 75-м правиле, угодно бысть просити от царя, яко да вдаст им власть поставляти местники (л. 279 об.)[1009] в церкви, еже суть казнители и судии, то самое служение и хитрость имущих церковныя вещи отмщати. Яко да противятся святители прилучающимся, коль краты аще нужда будет, и удобь зело могут в судища входити и церкви о таковых возвещати и оттуду помощи приимати.

Собора Перваго и Втораго в церкви святых апостол правило 9.

Аще святители или верныя согрещшыя или неверныя, преобидевше, биют или своею рукою или повелевше кому, да извергнутся. Подобает бо учением и наказанием и церковными запрещении безчинныя наказовати, а не ранами или язвами. Аще же не послушают властелскою (л. 280)[1010] рукою, да накажутся мстити.

Видели, ответотворче, управление святых богоносных отец, тако и у нас бысть с царьским советом, местницы на то, кому доведется какое наказание, а аже в церкви смиряли мы овогда, а иногда рукою по малу, того не отрицаемся и ныне творити врагом и безстрашным людем по образу Христову и по правилу святых апостол и святых отец.

Не погрешит истины и ныне, аще кто, взем бич, изгонит из церкви соборной прелюбы творящих и прочая беззакония, яже выше сих много явлено. Глаголя, дом Божии домом молитвы наречется, вы же властию мира сего сотвористе вертеп разбойником. (л. 280 об.)[1011] А яже о царских заповедех кто хощет потребное ко исправлению и к наказанию церковному, в них да смотрит. Но едину от тех главизну вчиним, како православнии царие священство предпочитали паче царства, а не как ныне, еже в лицо нам говорят, понося. Царь де един велик, а вас де много, не тот де патриарх, ино иной, чернцов де много у государя. А чернцы Божии раби и богомольцы царьския, а не раби, еже ныне прихиереи и монастыри принуждены царским величеством во все злое мирское дело и тягло и воинствовать, яко и простым человеком. Ох, увы, яко обогатихомся во злых. Обаче, аще что по нужи (л. 281)[1012] и деется, несть на ползу, якоже свидетелствует свитка новых заповедей царя Иустиниана главизна 1-я, сице глаголюща: Великая[1013] паче инех иже в человецех есть дара Божия. От вышняго дарована человеколюбия Божия, священничество же и царство, ово убо Божественным служа, се же человеческими владея и пекиися. От единаго же и тогожде начала обоя происходят, человеческое украшающе житие. Якоже ничто же тако бывает поспешнее царству сего ради, якоже святительская честь, о обоих самех тех присно Богови молятся. Аще бо они непорочни будут во всем и к Богу имут дерзновение и праведной подобно украшати начнут (л. 281 об.)[1014] преданыя им грады и сущая под ними, будет согласие некое благо все, еже добро человечестеи даруя жизни. Сему быти веруем, аще священных правил блюдение сохранится. Их же праведно похваляемии и покланяемии самовидцы Божию слову предаша апостоли и святии отцы сохраниша и заповедаша.

Видели царьское правыя души произношение непорочных святых догмат лобзание и священства предпочитание и веры несуменныя глагол, все, еже рече, добро человечестеи даруя жизни, сему быти веруем. И прочая.

Паки глаголеши, толкуя о одежди архиереиской, не видиши ли все облачение архиерейское, что есть кротость (л. 282)[1015] одежды и правды. Стиахрь образует аггелскую чистоту и свет[1016] архиерейскаго жития. Тако Господу глаголющу: Аз[1017] есмь свет миру, ходяй по Мне, не имать ходити во тме.

Почто слыша про свет, во тму беззакония отходиши? Христу глаголющу: Не имать ходити во тме. И паки Госопду глаголющу: Вы есте свет миру.

Покажи нам собою свет, понеже и ты архиерейскою одеян одеждою, аще и недостоине носишь ю, по неправде твоей явно в писме твоем.

Послушай возлюбленнаго ученика Христова Иоанна Богослова, что есть свет, и навыкни. И[1018] си есть обетование, еже слышахом от Него и повелеваем вам, яко Бог свет есть и тмы (л. 282 об.)[1019] в нем несть ни единоя. Аще речем, яко причастие имамы с ним и во тме ходим, лжем и не творим истины. Аще ли же во свете ходим, яко сам есть во свете, причастие имамы друг ко другу и кровь Иисуса Христа сына Его очистит нас от всякого греха. Аще свет, иже в тебе тма, колми паче тма. Которое ты причастие имееши ко другом по писанию своему, покажи ми.

Е питрахиль, низшедшая свыше, совершенная благодать Всесвятаго Духа. Писано есть: И[1020] се Аз послю обетование Отца Моего на вы. И инде: И дунув, глаголя, приимите Дух святый, им же отпустите грехи, отпустятся, и им же держите, держатся. (л. 283)[1021] И паки: Но[1022] приимите силу нашедшу Святому Духу на вы. И паки: И бысть внезапу с небесе шум, яко носиму дыханию бурну, и исполни весь дом, идеже бяху седяще. И явищшася им разделени языцы яко огненнии. Седе же на едином когождо их и исполнишася вси Духа Свята. И инде: И[1023] Аз вам глаголю, просите и дастся вам. И по мале. Аще убо вы зли суще умеете даяния блага даяти чадом вашим, колми паче отец, иже с небесе даст Дух Свят просящим у него. Но по заповеди Божией повелено от плод коегождо познавати, аще от Бога есть, от плод их познаете их, рече.

Плод[1024] бо духовный есть во всякой благостыни и правде и истине, искушающе, (л. 283 об.)[1025] что есть благоугодно Богови. И паки: Плод[1026] духовный есть любы, радость, мир, долготерпение, благость, милосердие, вера, кротость, воздержание. И по мале. Аще живем Духом, Духом и да ходим. Не бываим тщеславни, друг друга раздражающе, друг друга завидяще.

Ты же которыя от сих плоды в себе носиши? Не все ли противныя, по писанному: Или сотвориши древо добро, и плод его добр, или сотворши древо зло, и плод его зол. Тако и твое дело явлено есть, от дел и глагол уст твоих. Святый Бог да возмерит в День Судный противу твоих беззаконных смыслов.

О баче же (л. 284)[1027] от отец[1028], епатрахиль есть по единому повести образу, уже им же связавше злодеи владыку Христа и распяша, по образному же видению есть препоясание царьское и аггельское знамение.

П оручи, глаголеши, прообразуют ужи, что были связаны руки Христовы. Аще и не правословил еси в сих, якоже последи скажем, обаче есть связание рук ужи знаменуют, почто тех не велел еси связати, дабы не действовали по неправде смысла твоего? Или паче поминая владыку своего связана тебе ради, почто не постыделся теми связати бремя тяжко и неудобь носимо на брата своего? Сам же единым перстом не хощеши двигнути. Послушай Христова (л. 284 об.)[1029] наказания: Аще соблажняет тя рука твоя, отсецы ю. Лутче ти, беднику, внити в Царство Небесное, неже обе руце имуще, ввержену быти в геену обгеную, идеже червь их не умирает и огнь не угасает.

П о Писанию святому: Нарукавницы[1030] ко благочестию и сопрятанию точию умышлены быша. По иному же образу нарукавницы яже знаменуют вседетелное Божие, яко вся дела создания той сотвори. Сие глаголет и молитва: Десница Твоя, Господи, прославися в крепости и руце Твои сотвористе мя. По другому же образу нарукавницы являют силу, еже Христос победи враги своя.

П ояс, глаголешь, (л. 285)[1031] связание Христово. Как в первых солгал, так и в сем ничто же истинствуеши. П о Писанию же пояс являет благолепие, им же Христос, царствовав, препоясался благолепною и красною силою Божества.

Инде же глаголет: Пояс иже знаменует силу, данную в чресла Его, сиречь в среду Его, целомудрия ради и чистоты да будет связан девством и чистотою. Тем же и глаголет псалма приличное: Благословен Бог, препоясуй мя силою и положи непорочен путь мой, си есть живот мой непорочен, сиречь честный и добродетелный.

Ч то же ты, слышаи и глаголяи, препоясуися, ниже якоже сам глаголеши, (л. 285 об.)[1032] яко связан пребываешь. Связанный не к тому деяти, что может, но едино да свободу получит[1033]. Ты же сам связан, по писанному, многими путы железными нерешимыми, по правилом святых апостол и святых отец, и о себе не судиши праведно, лицемере, но нас, труждающихся в слове Божии, наскачеши, ничто же тебе зла сотворшу, якоже и ко всем.

Ч то же все не по ряду писал еси о священных одеждах архиереиских и сие скудно зело, как сам малоумен, так и святыя таинства описал безумно. Не менше есть знамение епигонатии, еже повешается о поясе. Глаголет же ся, яко се являет (л. 286)[1034] победу смерти и воскресение Спаса Христа, иже имать образ и вид меча. На нем же воображается распятия или воскресения образ, якоже и молитва сие являет: Препояши оружие твое по бедре тсвой силне. Ко Христу обращся, пророк глаголет: О[1035], силне препоящи оружие твое по бедре твоей, сие есть меч твой на бедре твоей, и борися с мучителем. Оружия же Христова не суть мечи и копия, но сила мучителная, юже употребляше на враги. Силна нарече его за Божество, еже соединися со Христом, красотою твоею и добротою твоею, красотою души и добротою добродетелей. Красоту и доброту, глаголет, за безгрешное и на ляцы испей и царствуй (л. 286 об.)[1036] истины ради и кротости и правды, и распространи оружия твоя и стремление твое, и да будут спешна дела твоя, и царствуй, помогая немощным и безсильным. Сие глаголем и в молитвах: Да приидет Царствие Твое. Сия вся делаи и побеждай. Глаголет сам Господь: Аз[1037] есмь и путь и истина и живот. Сице бо лепо нам исполнити всяку правду или сотворити оноя, яже выше рекохом, да сееши на земли истину и кротость и правду вместо лжи и суровства и неправды, Где же твоя правда, называеши палицу победою? Глаголеши, яко палица смертную победу. Какая палица? Есть у нас палица, глаголется, которою дебелыя (л. 287)[1038] дрова разбивают. Может же таковою палицею и дебелость непреподобнаго ума твоего разбити кто? И паки палица есть, аще кто хощет сырость сластолюбия от кого отгнати, склинивая и бия Божественною палицею и изгнетает. Аще ли о жезле архиерейском пишешь, послушай Писания. Жезл, убо его же держит архиерей, являет власть архиерейскую к людем, якоже Моисей и Аарон жезлы чюдотворяше во Египте и в мори и в камени.

Т ако и ныне жезл правды чюдотворит в сердцах злобы египецкия содержащих истину в неправде. Аще кто яко змия лютостию потребится от жезла правды, аще кто яко вода, (л. 287 об.)[1039] напоеваяй лестных напоении, ссядется яко кровь на возгнушение пиющим. Аще ли кто, яко фараон жестокосердный, накажется жабами и скнипы и прочими язвы, дондеже потонет, яко олово в воде, зелне в море тмя вечныя, идеже червь их не умирает и огнь не угасает.

Паки жезл являет власть Святаго Духа и укрепителное людей и паствителное, и еже наставити мощи и наказати непокоривыя. Слыши, что глаголет, являет господство, еже дает архиерею Святый Дух и хранителное людей, еже пасти и питати духовно словесныя овцы и еже наказовати непокоривыя и жестосердыя, и собирает (л. 288)[1040] оныя, елицы суть далече от чина добраго христианскаго. Сего ради имати две главы на верху главы, яже нарицают рукоятия. Да изгонит зверовидная еретики, да не вредят православныя люди. Еще же являет и крест Христов, им же побеждаем и стоим известни и утвержени, и основани в вере, и воинствуем, и влечемся ко Христу, умерщвляюще страсти, изгоняем враги и есмы хранимы от всякого искушения. Доволно ти есть о палице, еже ты глаголеши? Не будет виновен греху, кто взяв палку и отгнал бы тя аки волка или яко пса беснующагося и угрызающего неопасныя человеки.

С акос или палиставриа, (л. 288 об.)[1041] еже ради страсти и распятия правдуя истинною образует, глаголеши.

Богоноснии[1042] же отцы знаменуют сакос или фелонь святительскаго устроения знамение чистыя и простыя и от страстей свободныя души. Полиставрии, сиречь многокрестныи, яже знаменует червлену ризу, в ню же облекоша Христа жиды, по збытию пророческих глагол: Совлекоша с него ризы его и облекоша и в ризу червлену. Якоже и инде пишет: Кто сей приходяй от Едома? Едом толкуется земный или избранныи или червленый. Таже глаголет червленость риз его: от винограда Восора. Чего ради суть ризы твоя червлены, яко от прания грозди. Являет одежду (л. 289)[1043] Христову, сиречь плоть, яко омочися кровию на кресте. И паки, яко носи червлену ризу Христос, в страсти грядыи на крест, сею одеждою показуют архиерее, коего архиерея слузи и поборницы, яко верховный апостол Павел глаголет: Имуще[1044] убо архиерея велика, прошедшаго небеса Иисуса, Сына Божия, да держимся исповедания. И паки: Бог[1045] же мира возведыи из мертвых пастыря овцам велика кровию завета вечнаго Господа нашего Иисуса Христа, да совершит вы во всяком деле блазе сотворити волю Его, творяй в вас благоугодное пред ним Иисус Христом.

Т ы же како держиши исповедание Его, то есть Евангелие: Мир Мой даю вам, мир Мой оставляю вам. (л. 289 об.)[1046] И паки: Идеже внидите во град или в дом, глаголите, мир дому сему. Ты же которыи мир принес, яже повсюду свидетелствуют писания твоя вся, яже полна неправды и беззакония? По сему вас и познают, глаголет Христос, яко Мои ученицы есте, аще любовь имате между собою. Ты же которую любовь пришед показал, развее свара и ненависти, якоже диавол? Ибо всяк ненавидяи брата своего, человекоубиица. И прочее. Вы отца вашего диавола есте и похоти отца вашего творите. И паки: Несте от овец Моих, овца Моя гласа Моего слушает.

П аки глаголешь: Омофор, что на рамо заблудшее (л. 290)[1047] овча восприим, понесе. Омофории[1048] же конечный налагает архиерей, ему же подобает соделану быти от руна, четырее кресты имуща, сугубая одежда благодати. Назнаменует же и слову от страстей умерщвение, аггельский виде навершая и свет быти и во свете жити. Просветительно имея навыкновение и силу, просвещатися и просвещати. Или паки омофор по иному смышлению заблудшее овча знаменует, еже прииде на рамо, взем пастырь добрый, очистив и просветив, и освятив, и отцеви крестом жертву принес. И еже от всех умерщвение и славу тому даровав и едино с ним непреложно быв. Кресты же (л. 290 об.)[1049] знаменуют, зане Христос ношаше на раме своей крест свой. Еще же и архиерее хотят жити, якоже бе житие Христово, взимают крест его на рамена своя, еже есть злострадание, зане крест есть скрижаль злострадания.

Т ы же почто не взял еси креста своего, но и носящих крест Христов хулишь? Господу свидетелствующу: Иже не возмет креста своего и вслед Мене не[1050] грядет, несть Мене достоин, враги креста Христова, им же кончина погибель, им же Бог чрево. И паки: Слово[1051] крестное погибающим убо юродство есть, нам же спасаемым сила Божия есть. Зане писано есть: Погублю премудрость премудрых и разума разумных (л. 291)[1052] отвергуся.

П анагия, глаголеши, Бога слова воплощение. Не приходит Господь, ниже воплощается в сердцы злобы. Аще[1053] кто любит Мя и слово Мое соблюдет, и Отец Мой возлюбит его и к нему приидеве и обитель в нем сотвориве. И паки: Якоже заповеда Мне Отец, тако творю. Востаните, идем отсюду, откуду, от презорников святых Его заповедей. И паки, Якоже[1054] розга не может плода сотворити о себе, аще не будет на лозе, тако и вы, аще во Мне не пребудете. Аз есмь лоза, вы же рождие. И иже будет во Мне, и Аз в нем, той сотворит плод мног, яко без Мене не можете (л. 291 об.)[1055] творити ничесо же. Аще кто во Мне не пребудет, извержется вон, якоже розга, и изсышет, и собирают ю, и во огнь влагают, и згарает.

М итра есть, глаголешь, царьское священство. Но мы уже выше сих[1056] написали, яко священство боле есть царства. Почто предваряеши царством? Увеждь в вышеписанных, яко и царие предпочтоша священство паче царства. Почто низводиши священство, горе седящее на небеси? Не[1057] поминаеши ли хотящих обезчестити священство Дафана и Авирона, что случися тем. И паки Саул и Озия паче достояния своего поискавше, и еже имевше погубиша, но мы не едино, (л. 292)[1058] но три достоинства с преиметельством имамы ныне, ибо Царствие имамы восприяти и священницы бываем, приносяще жертву телеса наша. Представите[1059] убо уды ваша жертву живу, благу и угожну Господеви, рече. И с сими и пророцы поставляемся, яже око не виде и ухо не слыша, сия откровена суть нам. И[1060] инако же и царие бываем, аще восхощем обладати безместными помышленми, яко бо сицевый царствует и наипаче, нежели иже диадимою обложеный. Уже сие сотворю ти явленно. Многи имать воинства он, но имы паче сих множайшая имамы помышления. Несть бо счести неисчетное мыслей мно(л. 292 об.)жество[1061], еже в нас. Не множество же токмо есть видети, но и многия во множестве сем помыслов, и воеводы, и чиноначалники, и десятоначалники, и стрелцы, и пращаре. Что ли другое творит царя, ризы ли? Но мы лутчею и добрейшею обложени есмы одеждою, юже ни тля снедает, ниже время изнуряет. И венец имамы различный, иже славы, иже щедрот Божиих. Благослови[1062], душе моя, Господа, венчающаго тя милостию и щедротами. И иже словы: Славою[1063] и честию венчал еси его. И благоволения, яко оружием благоволения венчал еси нас. И иже благодати, венец бо благодати (л. 293)[1064] приимеши о твоей главе.

Видел ли еси многоплетеную и благообразнейшую митру, но обаче свыше тая, опсанее да истяжем о царьстем. Царя[1065] ли речеши, но ниже он безпечалное живет житие, но многих скорбей и попечении исполненое, не бо на диадиму да взираеши, но на вдаяние и попечение, им же ему венец мятеж раздает. Ниже на багряницу гляди, но на душю, паче оноя багряницы[1066] чернеющуюся. Не тако венец вяжет главу, якоже душю попечение. Ниже на оруженосцов множество да взираеши, но на печали множества. Ниже бо простую храмину обрести, толиких исполненую (л. 293 об.)[1067] попечении еликих царьския, смерти на всяк день ожидающии утех самых, и прежде трапезы кровь зрится проливаема. И прежде пития вместо пития крови наполняется и присно есть исполнен помост царскии кровми.

Н о Царство Небесное не таково, но поеже прияти его, мир, живот, радость, веселие. А яже в царствии земном, коликих зол исполнено есть, коликия многажды басни от сих сложены быша, всяческая, негли яже на игралищи сетования, от царей начинаются и басни, множайшая яже суть в баснях от бывших образуются.

Аще хощеши и от Писания, речем. Саул первый царствова, (л. 294)[1068] но веси, како и сей погибе, безчисленых зол искусився. Кто праведнее Давида и той, греха не избыв, многи напасти пострадав, скончался. Кто ли мудрее Соломона, и сей во гресе умер. Тако и Авия, тако Иезекии, тако Иосия, тако и прочии царие. Но мы печалуемся не о сих, о них же царие, но о сицевых, о них же приобретение имамы велия, якоже пишет апостол: Печаль бо по Бозе, покаяние нераскаянное во спасение соделовает, но ниже царие развее молитв священнических[1069] где любо подебу показаша.

М ы же плодоприяти нечто велие благо и зело веруем, яко вся исправим, аще восхотим вси единодушно руце прострети к Богу (л. 294 об.)[1070] о всех наших сетованных.

Т акова[1071] ополчаемся на враги молитвами и молбами, аще бо с вооружеными ополчахуся древнии, колми паче ныне подобает. Т ако[1072] Авраам победи Холодогомора с прочими четырми цари. Т ако[1073] Моисей фараона потопи со всем воинством его. Тако победи Амалика в Рафиде со всем воинством его. Тако[1074] Ханаана победи. Тако Сиона царя аммореиска победи. Тако Иога царя васанска и вся царствия Ханаанска победи. Т ако[1075] Иисус Наввин Ерихон взят. Т ако Гаи взят и цари поби 31 и вся землю взят Иисус, якоже заповеда Господь (л. 295)[1076] Моисею, и даде ю в причастие Израилю. Т ако[1077] Июда Ханаана и Ферезея поби. Т ако Гедеон с трема сты 120000 поби и князи Орива и Зива, и Зевея, и Салмона цари Мадиамли и прочии судии, Варак, Самсон, Иеффаи и Самоил вси молитвою и верою победига царствия. Содеявше правду, получина обетование.

Т ако и Саул, донележе не согрешив во всесожжениих и жертвах, и священства сана не восхити. Т ако и Давид победи враги своя. Т ако и Соломон, Иезекия и Иозия, донележе в своих уставох пребывал и священства не преобидел. Т ако и Константин царь великии и[1078] (л. 295 об.)[1079] первыи христианскии Максентия победи и прочия враги своя.

Тако и вси православнии царие, аще идеже оружии требоваху и ополчения и рати, оружие оставлше, на молитву прибегаху.

Н о ниже[1080] все молитвам святых оставльшем нам праздном быти подобает и к злобе ничесо же притекати и ничесо же в добродетель приводящих держатися, ниже паки делающим благая презирати пособие оно. Много бо может молитва бываемая от нас, но егда и мы делаим благая.

Дата добавления: 2015-08-02