Песнь 9

Ирмос: Всяк земнородный да взыграется, Духом просвещаемь, да торжествует же Безплотных умов естество, почитающее священное торжество Богоматере, и да вопиет: радуйся, Всеблаженная Богородице, Чистая Приснодево.

О, Мати Света, Помощнице нищих,/ Утеха плачущих,/ Исправление падающих,/ Пристанище бездомных,/ Оправдание неправедно гонимых!/ Избави нас от глада и губительства,/ от труса и потопа,/ от иноплеменнаго нахождения/ и брани междоусобныя./ Покрый и защити нас от всякаго зла/ и моли Сына Твоего Царствия Его сподобитися нам.

Призри на нас, Мати Зиждителя нашего,/ и не возгнушайся молебного пения нашего,/ не остави нас безпомощны во искушениих,/ но буди Ходатаицею за ны, во странствии земном сущих,/ да получим прегрешений исправление и грехов безчисленных прощение/ и моли Сына Твоего Царствия Его сподобитися нам.

Слава: К Твоей огнезрачной иконе взирая, молим Тя, Владычице,/ кротким оком Твоим виждь наше смирение, Богородительнице./ Кротостию и незлобием благоукраси нас, помраченных,/ безобразием страстей злобных,/ и сотвори нас причастниками блаженства,/ кротким обетованнаго,/ и моли Сына Твоего Царствия Его сподобитися нам.

И ныне: Достойно есть величати Тя, Богородицу,/ на небеси и на земли присносияющую/, во дни и в нощи помощь Свою роду человеческому ниспосылающую/ и пречистый образ Свой нам, грешным, даровавшую./ Приими, Дево Богоизбранная,/ сия благодарственныя, Тебе возносимыя,/ и моли за ны да пощадит нас Господь в час Страшного Суда Своего. Аминь

Светилен

Святая Дева Мати, Едина Всенепорочная, песнословящия Тя, пред лучезарною иконою Твоею, просвети Светом Сына Твоего, мрак страстей наших отгоняя, Ты бо еси Световидный Облак, приводяший люди к земле обетования, темже Тя, Богородице, непрестанно величаем.

Тропарь Божией Матери ради собора Ея в Миасинской обители, глас 1

Радуйся, обрадованная Богородице Дево/, пристанище и предстательство рода человеческого,/ из Тебе бо воплотися Избавитель мира:/ едина бо еси Мати и Дева,/ присноблагословенная и препрославленная./ Моли Христа Бога мир даровати всей вселенней.

Кондак, глас 4

Светлое днесь Госпожи нашея наста торжество:/ созывает бо Пречистая боголюбивии собори в обитель Миасинскую,/ прославити икону Свою чудную,/ во езере сокрытую и, по мнозех временех, паки нам явившую./ Темже убо и мы, с любовию сию объемлюще, вопием:/ в Православии нерушимом сподоби ны благоугождати Сыну Твоему,/ и спаси нас, Владычице, во времена последняя.

Молитва пред иконою Божией Матери, именуемой „Миасинская”

О, Пресвятая Госпоже, Владычице Богородице! Мати Христа Бога нашего, рода Христианскаго крепкая Заступница и непостыдная Предстательница! Припадаем и покланяемся Тебе пред иконою Твоею святою, юже от лет древних многими чудесы и неисчетными исцеленьми прославити благоизволила еси. Услыши убо и нас, пред иконою Твоею молящихся, и простри Богоноснии руце Твои к Возлюбленному Сыну Твоему и Богу нашему, и якоже древле в обители Миасинстей великие щедроты и милость Твою явила еси, сице и нам, грешным, ныне яви!

Молитву теплую о нас ко Господу сотвори, Веру Православную в сердцах наших твердо утверди, Церковь Апостольскую и Соборную умалению не предаждь, уставы святых отец на веки непоколебимы сохрани и всех, к Тебе притекающих, от рова погибельнаго спаси.

Излей на нас елей милосердия Твоего, мир мирови даруй, Отечество наше от враг видимых и невидимых, предстательством Твоим, защити и сохрани. Ороси любовию изсохшия сердца людския, тернием самолюбия, ненависти, зависти, злобы, вражды и лукавства поросшия. Настави нас на путь всякия добродетели и благостыни, спаси от искушений и падений, в семействах наших мир и любовь утверди, болящия уврачуй, скорбящия утеши, сущим в нужде и гладе буди Помощницей и Питательницей, не имущим крова и пристанища - Светлой Обителью и Сладостной Матерью.

О, Госпоже, Царице Богородице! Не престани молящи, Егоже родила еси, да дарует нам прощение многих согрешений наших, да вси мы, благодарно Тя воспевающи, сподобимся Небеснаго Царствия и тамо со всеми святыми славим пречестное и великолепое имя Отца и Сына и Святаго Духа ныне и присно, и во веки веков. Аминь.

Дата добавления: 2015-09-05