Троицкий извод

Список третьей четверти XVI в. в приложении к Новгородской I летописи (ГБЛ, МДА, IV 54).

1. Се аз, князь великий Гаврил, нареченыи Всеволод, самодръжець Мьстиславичь, внук Володимир, владычествующю ми всею Рускою землею и всею областью Новгороцкою, божиим благоволением поставил есми церков святыи великыи Иван на Петрятине дворище и устроил есми ю иконами многоценнами, и еуангелием многоценным, и всеми книгами ис-полнь, устроил есми попы и дьяконы в зборнои виликои церкви.

2. И даю святому великому Ивану от своего великоимения на строение церкви и в векы вес вощаной, а в Торжку пуд вощаной: половина святому Спасу, а половина святому великому Ивану на Петрятино дворище.

3. А оброка попом, и дьякону, и дьяку, и сторожам из весу вощаного: имати попом по осми гривен серебра, а дьякону четыре гривн серебра, а дьяку три гривны серебра, а сторожам три гривны серебра. А имати им той оброк и в векы на всякий год по моему данью великого князя Всеволода.

4. А попом пети у святого Ивана вселенная, у святого Захарьи на полатех пети по неделям и в векы. А дьякону пети у святого Ивана субота да неделя ис того оброка и в век.

5. И яз, князь великий Всеволод, поставил есми святому Ивану три старосты, от житьих людей и от черных тысяцкого, а от купцев два старосты, управливати им всякие дела иванская, и торговая, и гостинная, и суд торговой.

6. А Мирославу посаднику в то не вступатца и иным посадником в ываньское ни в что же, ни боярам новгороцкым.

7. А хто хочет в купечство вложится в ыванское, даст купьцем пошлым вкладу пятьдесят гривен серебра, а тысяцкому сукно ипьское, ино купцам положить в святыи Иван полътретьяцать гривен серебра. А не вложится хто в купечество, не даст пятьдесят гривен серебра, ино то не пошлый купець. А пошлым купцем ити им отчиною и вкладом.

8. А весити им в притворе святого Ивана, где дано, ту его и дръжати.

9. А весити старостам иваньским, двема купцем пошьлым добрым людем. А не пошлым купцем старощениа не дръжати, ни весу им не весити иваньского.

10. А у гостя им имати: у низовьскаго от дву беркоеска вощаных пол гривне серебра да гривенка перцю, у полоцкого и у смоленьского по две гривны кун от берковъска вощаного, у новоторжанина полторы гривны от берковъска вощаного, у новогородца шесть мордок от беркоеска вощаного.

11. А куны им класти святого великого Ивана в дом, что вывесят по правому слову.

12. А новгородцю не весити ни на которого гостя.

13. А по моем животе, великого князя Всеволода, стояти за дом святого великого Ивана брату моему великому князю всея Русии, и владыце новгороцкому, и старостам купецьким, и купцам, и за вся церковникы святого Ивана.

14. А взять князю великому из весу вощаного полтретьяцать гривен серебра через год.

15. А праздник рожество святого великого Ивана почесть створити и празновати старостам купецким и купцам. А имати старостам купецким и купъцем из весу из вощаного на полътретьяцать гривен серебра на всякыи праздник святого Ивана и в век. А старостам купецким святого великого Ивана ставити на праздник святого Ивана семьдесят свечь, и темъян, и ладан. А пети в празьдник владыце, а старостам купецким и купцам дати владыце гривна серебра да сукно ипьское, а на завтрее пети анхимандриту святого Егоргиа, а взять ему пол гривне серебра, а на третей день пети игумену святей Богородици из Онътонова манастыря; взять ему пол гривне серебра.

15а. И яз, князь великий Всеволод, дал есми пошлины попом святого великого Ивана Петрятино дворище с купець в Руси на память князем великым дедом моим и прадедом има-ти с купець таи старина и в векы с тверского гостя, и с новгородского, и з бежицкого, и з деревьского, и с всего Помостья.

16. А буевище Петрятино дворище от прежних дверей святого великого Ивана до погреба, от погреба до Концаньского мосту. А того буевища имати куны старостам иваньским и старостам побереским. А класти куны в дом святого великого Ивана.

17. А попов святого великого Ивана, и дьякона, и дьяка, и сторожов призирати старостам иваньским, и купцам, и старостам побереским, и побережаном.

18. А в дому святого Ивана не дръжати никому ничего же, разве свечи и темъяна.

19. А городу, ни владьще, ни боярам весу не отимати у святого великого Ивана, ни продавати моего данья, великого князя Всеволода.

20. А хто почнет вес отимати, или продавати, или дом оби-дити святого великого Ивана и святого Захарьи, на того Спас, и пречистая, и святыи великыи Иван, будет им тма, и съблазнь, и казнь божия.

Дата добавления: 2015-08-03