|
Читайте также: |
Вóини же éмше Иисýса ведóша къ каiáфе архiерéови, идéже кни́жницы и стáрцы собрáшася.
Пéтръ же идя́ше по нéмъ издалéча до дворá архiерéова: и вшéдъ внýтрь, седя́ше со слугáми, ви́дети кончи́ну.
Архiерéе же и стáрцы и сóнмъ вéсь искáху лжесвидéтелства на Иисýса, я́ко да убiю́тъ егó, и не обретáху: и мнóгимъ лжесвидéтелемъ пристýпльшымъ, не обретóша. Пóслежде же приступи́вша двá лжесвидéтеля, рéста: сéй речé: могý разори́ти цéрковь Бóжiю и треми́ дéнми создáти ю́.
И востáвъ архiерéй речé емý: ничесóже ли отвещавáеши, чтó сíи на тя́ свидéтелствуютъ?
Иисýсъ же молчáше. И отвещáвъ архiерéй речé емý: заклинáю тя́ Бóгомъ живы́мъ, да речéши нáмъ, áще ты́ еси́ Христóсъ, Сы́нъ Бóжiй?
Глагóла емý Иисýсъ: ты́ рéклъ еси́: обáче глагóлю вáмъ: отсéле ýзрите Сы́на человéческаго седя́ща одеснýю си́лы и грядýща на о́блацехъ небéсныхъ.
Тогдá архiерéй растерзá ри́зы своя́, глагóля, я́ко хулý глагóла: чтó ещé трéбуемъ свидéтелей? сé, ны́не слы́шасте хулý егó: чтó вáмъ мни́тся? Они́ же отвещáвше рéша: пови́ненъ éсть смéрти.
Тогдá заплевáша лицé егó и пáкости емý дéяху и по лани́тома бiя́ху егó: óвiи же за лани́ту удáриша заушáху егó, глагóлюще: прорцы́ нáмъ, Христé, ктó éсть ударéй тя́?
Пéтръ же внé седя́ше во дворé. И приступи́ къ немý еди́на рабы́ня, глагóлющи: и ты́ бы́лъ еси́ со Иисýсомъ Галилéйскимъ.
О́нъ же отвéржеся предъ всéми, глагóля: не вéмъ, чтó глагóлеши.
Изшéдшу же емý ко вратóмъ, узрé егó другáя, и глагóла сýщымъ тáмо: и сéй бé со Иисýсомъ назорéомъ.
И пáки отвéржеся съ кля́твою, я́ко не знáю человéка.
Помáле же приступи́вше стоя́щiи, рéша петрóви: вои́стинну и ты́ от ни́хъ еси́, и́бо бесéда твоя́ я́ве тя́ твори́тъ.
Тогдá начáтъ роти́тися и кля́тися, я́ко не знáю человéка. И áбiе пéтель возгласи́.
И помянý пéтръ глагóлъ Иисýсовъ, речéнный емý, я́ко прéжде дáже пéтель не возгласи́тъ, трикрáты отвéржешися менé. И изшéдъ вóнъ плáкася гóрько.
Дата добавления: 2015-07-20; просмотров: 62 | Нарушение авторских прав
| <== предыдущая страница | | | следующая страница ==> |
| Евангелие 2 | | | Евангелие 4 |