Zhuchki.

Xoljamo bashno

Centrizdat

So sy chindlo.

1. Xoljamo bashno

2. Myca Murka

3. Vash kagny

4. Frento jozho

5. Zhuchka

6. Vanuko

Xoljamo bashno

Syr-to Vano

E shtubatyr vygyja

Tyknen kagnorjen

Dro sado udykha.

Pro vasta telel

Ekhja kamja,

Ne kagny pre leste

Godly zadyja.

Xoljamo bashno

Vanjas udykhja.

Dro shero jov les zorales mardja.

Dykhano shero.

Vano zarundja,

Tyknin’ko kagnja

Vastendyr churdyja.

Chavoro vavir-zhe

Adava dykhja.

Jov pre Vanjaste

Godly zadyja:

- Nabut, nabut, Vano

Tuke popyja!

Adjake i trebi

Na trogin kagnja.

Myca Murka

Psirla Murka

Piro sado.

Chjorori rovela

Tango, tango

La Nastjake.

Joj bibja puchela:

- Bibo Manja

Soda myca.

Ne-ka joj merela?

- So tu! – bibo rozsandjape.

Joj tykne lache mycen

Tuke bijanela.

Mek joj chjorori pasjola

Tyknori keren’te.

Palo tjomno vengloro

Tume la thoven’te

Chavore syr poxane

Tekeren tykny gene.

Nastja myca podkhardja

Myca godly godyja.

Narov, myca! Tu lachi

I javesa zoraly.

Pre vavir dyves chave

Syr dro sado prigyne

Panch tykne

Mycen lathne.

Syr-to bibo.

Porta na zaphandja

Xoljamo dzhjukel

Dre shtuba zagyja

Myca Murka,

Syr les udykh’ja

Pro dumo

Dzhjukleske uklistje.

O – dzhjukel straxatyr

E pori zmek’ja

Sygydyr kherestyr

Pre gas uglyja.

Vash kagny

Pre kashta meja

Pestrushka – kagny.

Joj upre gerenca

Chorushka pashly,

Chavorenge tango:

- So zhe tekeres?

- Trebi la pre phus

Sygedyr tezles!

- Ame geravasa

Palo vengloro. –

Kokore dykhasa.

So kerla bashno.

Prigeja bashno,

Kagnja udykh’ja.

Jov sare kagnenge

Godly zadyja.

Prigyne kagnja –

Mulja podykhne.

Dre glosa pal late

Jone zarundle.

Dro parne lyla

Chave la zakerde,

E - dre phuv mulja

Kagnja gerade.

Vasjaske prihajape

Saro tedykhes,

Jov phendja;

Javen’te

Buty

Te keres!

Frento jozho.

Atasja chjave

Dro vesh psirde.

Tele breza

E jozhos lathne.

Prijavne khere,

Jozhoske jashichko kerde.

I dro jashiko pre fenshtra

Jone les thode.

Tixes jozhik

Deves pro bystja

Ne syr temno –

Rat jav’ja –

Jov dro vesh

Te uprastal kam’ja.

Nabut jozhik progeja,

Dre trevika

Syr to popyja,

Odothyr straxatyr

Jozho vygeja,

Dro charo dyjape

Lacho thut latja.

Sygedyr saro spija.

Syr spija,

Odjake pasija,

Dadyves gadjo

Les udykh’ja:

- Sodava? – jakha vypuradja

Sygydyr chaven

Saren khardja.

Chavore gadjeske

Rosphendle,

Kaj jone

Jozhos lyne.

Zhuchki.

Ke bel’vel’ Sanjushka

Khere prigyja,

Duj tyknen zhuchken.

Joj kepe andja.

Dre tykny korobka

Jov len geradja

Telo bov o zhuchken

Sygydyr thodja.

Kazhdo dyves lenge

Jov maro dyja.

Adava saro dado

Udykh’ja i adjake jov sabnasa phendja:

So zhe tu uroko,

Chavo nakerdjan?

Shun me so kerava

Me tyrnen zhuchken

Pre gas vychjurdava.

Sanjushka dadeske

Saro patin’dja

I dades jasvenca

Zorales mang’ja:

- Mek dzhivena dado!

Me so kerava a lynaj avela

Me len vymekava.

Ke bel’vel’, Sanjusha

Pash o bov dykh’ja

Pre peskiro shteto

Zhuchken na lat’ja.

Chavoro straxatyr

Godla zadyja.

Pre vavir syr strona

Vast pro terdyja

Peskire zhuchken jov lat’ja

Celo zima Sanja

Zhuchken geradja

Ne lynaj avja

Jov len vymek’ja.

Дата добавления: 2015-07-11