Кондак 8

Странно есть и дивно во очию нашею, како молитвою единаго вернаго препростаго Ты, Господи, Царство Православное храниши, и в сожжении старицею осьми кукол видим сожигание и праведнаго Григория, яко богоугодной жертвы верноподданническаго народа Российскаго, и чающе воскресения сего верноподданичества, взываем: Аллилуиа.

Икос 8

Весь бе образ истиннаго сына Отечества, вернаго Царю своему, сие зряще враги Самодержавия, чада диавола, возжелеша тя погубити, твое честное имя клеветою опорочити, сего ради тринадесять внешних тебе подобников изыскаша, от нихже некии непотребства постыдныя от твоего имене учиняша. Темже трудносносимою Христовою скорбию: яко свои своя не познаша, твой, Григорие, тяжкий крест отяжеляша. Господь же славою тя увенча, и вразуми хвалебная пения приносити сицевая:

Радуйся, кроткая овчате, на пажитех евангельских упасшийся; радуйся, воине Христов, на камене веры утвердивыйся.

Радуйся, ниву сердца слову Христову уготовивый; радуйя, слово и волю Христову исполнивый.

Радуйся, классе, на ниве Христове обильно плодствуяй; радуйся, пророческий гласе, над Россией бодрствуяй.

Радуйся, трудниче, в трудный час России явленный; радуйся, светильниче, пред царским Престолом возжженный.

Радуйся, врагов самодержавия язвенное жжение; радуйся, во истине стоящих щит и ограждение.

Радуйся, сокровище духовное, верных богатящее; радуйся, жертво всесожжения, Бога умилостивляющая.

Радуйся, Григорие, пророче и предивный чудотворче.

Кондак 9

Всякое естество ангельское удивися сокровенному подвигу терпения твоего, егда на напраслины и укорения в несодеянном, кротце отвеща: увидимся на Страшнем Суде, Богу же воздая песнь: Аллилуиа.

Икос 9

Ветия многовещанныя яко рыбы безгласныя видим о тебе, человече Божий Григорие, понеже краткими словесы в удивление приводил еси просителей своих, тайну сердца их постигая, неизглаголанная прозревая, наипаче аще чудо исцеления являя. Сего ради и мы поим ти сице:

Радуйся, премудрая простото, премудрая книжная удивляющая; радуйся, умная быстрото, тайная христоборныя зрящая.

Радуйся, словесная острото, еретическия книжнотворцы обличающая; радуйся, невинности глубино, богомерзкую корысть отженяющая.

Радуйся, непоколебимая веро, молитвою до Небес достизающая; радуйся, душевная широто, любовию ближния и дальния обымающая.

Радуйся, смирения богатство и глубино, нашу стропотность и гордыню смиряющая; радуйся, всяческая сердца доброто, двери райския отверзающая.

Радуйся, правдивости высото, на высоту креста возводящая; радуйся, пресветлая красото, благодатию сияющая.

Радуйся, воздержания и терпения долгото, небесную радость дарующая; радуйся, целомудрия полното, дарами благодати богатящая.

Радуйся, Григорие, пророче и предивный чудоторче.

Дата добавления: 2015-07-08