Акафист святым мученикам Гурию, Самону и Авиву

Псалом 26

Господь просвещение мое и Спаситель мой, кого убоюся? Господь Защититель живота моего, от кого устрашуся? Внегда приближатися на мя злобующым, еже снести плоти моя, оскорбляюшии мя, и врази мои, тии изнемогоша и падоша. Аще ополчится на мя полк, не убоится сердце мое, аще востанет на мя брань, на Него аз уповаю. Едино просих от Господа, то взыщу: еже жити ми в дому Господни вся дни живота моего, зрети ми красоту Господню и посещати храм святый Его. Яко скры мя в селении Своем в день зол моих, покры мя в тайне селения Своего, на камень вознесе мя. И ныне се вознесе главу мою, на враги моя: обыдох и пожрох в селении Его жертву хваления и воскликновения, пою и воспою Господеви. Услыши, Господи, глас мой, имже воззвах: помилуй мя и услыши мя. Тебе рече сердце мое, Господа взыщу. Взыска Тебе лице мое, лица Твоего, Господи, взыщу. Не отврати лица Твоего от мене и не уклонися гневом от раба Твоего: помощник мой буди, не отрини мене, и не остави мене, Боже Спасителю мой. Яко отец мой и мати моя остависта мя, Господь же восприят мя. Законоположи ми, Господи, в пути Твоем и настави мя на стезю правую враг моих ради. Не предаждь мене в душы стужающих ми, яко восташа на мя свидетеле неправеднии и солга неправда себе. Верую видети благая Господня на земли живых. Потерпи Господа, мужайся и да крепится сердце твое, и потерпи Господа.

Псалом 50

Помилуй мя, Боже, по велицей милости Твоей, и по множеству щедрот Твоих очисти беззаконие мое. Наипаче омый мя от беззакония моего, и от греха моего очисти мя; яко беззаконие мое аз знаю, и грех мой предо мною есть выну. Тебе Единому согреших и лукавое пред Тобою сотворих, яко да оправдишися во словесех Твоих, и победиши внегда судити Ти. Се бо, в беззакониих зачат есмь, и во гресех роди мя мати моя. Се бо, истину возлюбил еси; безвестная и тайная премудрости Твоея явил ми еси. Окропиши мя иссопом, и очищуся; омыеши мя, и паче снега убелюся. Слуху моему даси радость и веселие; возрадуются кости смиренныя. Отврати лице Твое от грех моих и вся беззакония моя очисти. Сердце чисто созижди во мне, Боже, и дух прав обнови во утробе моей. Не отвержи мене от лица Твоего и Духа Твоего Святаго не отыми от мене. Воздаждь ми радость спасения Твоего и Духом владычним утверди мя. Научу беззаконыя путем Твоим, и нечестивии к Тебе обратятся. Избави мя от кровей, Боже, Боже спасения моего; возрадуется язык мой правде Твоей. Господи, устне мои отверзеши, и уста моя возвестят хвалу Твою. Яко аще бы восхотел еси жертвы, дал бых убо: всесожжения не благоволиши. Жертва Богу дух сокрушен; сердце сокрушенно и смиренно Бог не уничижит. Ублажи, Господи, благоволением Твоим Сиона, и да созиждутся стены Иерусалимския. Тогда благоволиши жертву правды, возношение и всесожегаемая; тогда возложат на oлтарь Твой тельцы.

Псалом 90

Версия текста для печати

Живый в помощи Вышняго, в крове Бога Небеснаго водворится. Речет Господеви: Заступник мой еси и Прибежище мое, Бог мой, и уповаю на Него. Яко Той избавит тя от сети ловчи, и от словесе мятежна, плещма Своима осенит тя, и под криле Его надеешися: оружием обыдет тя истина Его. Не убоишися от страха нощнаго, от стрелы летящия во дни, от вещи во тме преходяшия, от сряща, и беса полуденнаго. Падет от страны твоея тысяща, и тма одесную тебе, к тебе же не приближится, обаче очима твоима смотриши, и воздаяние грешников узриши. Яко Ты, Господи, упование мое, Вышняго положил еси прибежище твое. Не приидет к тебе зло, и рана не приближится телеси твоему, яко Ангелом Своим заповесть о тебе, сохранити тя во всех путех твоих. На руках возмут тя, да не когда преткнеши о камень ногу твою, на аспида и василиска наступиши, и попереши льва и змия. Яко на Мя упова, и избавлю и: покрыю и, яко позна имя Мое. Воззовет ко Мне, и услышу его: с ним есмь в скорби, изму его, и прославлю его, долготою дней исполню его, и явлю ему спасение Мое.

Слава Отцу и Сыну, и Святому Духу, ныне и присно и во веки веков. Аминь.

Алиллуйя, алиллуйя, алиллуйя, слава Тебе Боже!

Алиллуйя, алиллуйя, алиллуйя, слава Тебе Боже!

Алиллуйя, алиллуйя, алиллуйя, слава Тебе Боже!

Символ веры

Верую во единаго Бога Отца, Вседержителя, Творца небу и земли, видимым же всем и невидимым. И во единаго Господа Иисуса Христа, Сына Божия, Единороднаго, Иже от Отца рожденнаго прежде всех век; Света от Света, Бога истинна от Бога истинна, рожденна, несотворенна, единосущна Отцу, Имже вся быша. Нас ради человек и нашего ради спасения сшедшаго с небес и воплотившагося от Духа Свята и Марии Девы и вочеловечшася. Распятаго же за ны при Понтийстем Пилате, и страдавша, и погребенна. И воскресшаго в третий день по Писанием. И возшедшаго на небеса, и седяща одесную Отца. И паки грядущаго со славою судити живым и мертвым, Егоже Царствию не будет конца. И в Духа Святаго, Господа, Животворящаго, Иже от Отца исходящего, Иже со Отцем и Сыном спокланяема и сславима, глаголавшаго пророки. Во едину Святую, Соборную и Апостольскую Церковь. Исповедую едино крещение во оставление грехов. Чаю воскресения мертвых, и жизни будущаго века. Аминь.

Тропарь,Глас5:
Чудеса святых Твоих мученик стену необоримую нам даровавый, Христе Боже, тех молитвами советы языков разори, яко Един Благ и Человеколюбец. (Дважды)

Слава Отцу и Сыну и Святому Духу.

Кондак,Глас2:
С высоты мудрии благодать приемше, сущим во искушениих предстоите, всехвальнии. Темже отроковицу святии от смерти горькия избависте: вы бо воистинну есте Едесу слава и миру радость.

И ныне и присно и во веки веков. Аминь!

Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти; ускори на молитву и потщися на умоление, предстательствующи присно, Богородице, чтущих Тя.

. Канон святым мученикам Гурию, Самону и Авиву.

Глас 4.

Песнь 1

Ирмос: Моря чермную пучину невлажными стопами древний пешешествовав Израиль, крестообразныма Моисеовыма рукама Амаликову силу в пустыни победил есть.

Припев: Святии мученицы и исповедницы Гурие, Самоне и Авиве, молите Бога о нас.
Троицы единоначалие, святии, Богославяще честно, многоначалия нестоянную мглу удобно разрушисте, востока, многосветлии, якоже звезды возсиявше.

Припев: Святии мученицы и исповедницы Гурие, Самоне и Авиве, молите Бога о нас.
Трие исповедницы, благодатию просвещаеми Начальныя Троицы явственно, лесть многобожную, терпеливно противление являюще, истребиша.

Припев: Слава Отцу и Сыну и Святому Духу.
Вас, убо сыноположив, славнии, любовию Естественный Сын, ныне Ему наследию, даему яве, яко Благоутробен снаследники показа и Царствия сопричастники.
И ныне и присно и во веки веков. Аминь.
Богородичен: Мудрости премудростныя скиния была еси, Всенепорочная, Свой бо храм от Твоих пречистых кровей, Чистая, создати благоволи на спасение душ наших.

Песнь 3

Ирмос: Веселится о Тебе Церковь Твоя, Христе, зовущи: Ты моя крепость, Господи, и прибежище, и утверждение.

Припев: Святии мученицы и исповедницы Гурие, Самоне и Авиве, молите Бога о нас.

Тело мукам волею и лютым ранам Христовы предаша исповедницы и угодницы.

Припев: Святии мученицы и исповедницы Гурие, Самоне и Авиве, молите Бога о нас.

Избавится от лютых греховных помысл, святии, вашу память верою совершающим умолите.
Слава Отцу и Сыну и Святому Духу.
На древе терпеливно воздвижени, честнии свидетелие всеблагочестно невредно исповедание соблюдоша.

И ныне и присно и во веки веков. Аминь.

Богородичен: Целений Тя источник в Твою утробу Вшедый показа, Мати Божия, Пречистая, мою убо душу исцели.

Седален, глас 8

Крестом вооружившеся Христовым, в нем мучителей всю крепость мужески низложисте, яко веры поборницы; безбожие все идольское обличисте и Троицу, святии, усердно проповедавше. Тем достойно от Нея венцы победы приясте, яко законно пострадавшие, страстотерпцы всеславнии, молите Христа Бога грехов оставление подати празднующим любовию святую память вашу.
Слава, глас 8

Христу поработавше мученически, поработисте лесть мучительскую, непорабощенну имуще душу и мудрость, ибо Троичною верою уязвившеся, прехвальнии, многобожия славу неславную обличисте. Тем, яко звезды, светло в мире блистанием сияете чудес, блаженнии. Страстотерпцы всехвальнии, молите Христа Бога грехов оставление подати чтущим любовию святую память вашу.
И ныне

Богородичен: Яко Деву и едину в женах, Тя, без семене рождшую Бога плотию, вси ублажаем, роди человечестии: огнь бо вселися в Тя Божества, и яко Младенца доиши Зиждителя и Господа. Тем Ангельский и человеческий род достойно славим пресвятое Рождество Твое и согласно вопием Ти: моли Христа Бога согрешений оставление даровати покланяющимся верою пресвятому Рождеству Твоему.

Крестобогородичен

Агнца, и Пастыря, и Избавителя, Агница, зрящи на Кресте, восклицаше, плачущи, и, горько рыдающи, вопияше: мир убо радуется, приемля Тобою избавление, утроба же Моя горит, зрящи Твое распятие, еже терпиши за милосердие милости, Долготерпеливе Господи, милости бездно и источниче неисчерпаемый, умилосердися и даруй согрешений оставление верою поющим Божественныя страсти Твоя.

Песнь 4

Ирмос: Вознесена Тя видевши Церковь на Кресте, Солнце праведное, ста в чине своем, достойно взывающи: слава силе Твоей, Господи.
Святии мученицы и исповедницы Гурие, Самоне и Авиве, молите Бога о нас.
Троицы равночисленнии венечницы трисиянною свещею ныне совершающия память всесвященную тех озаряют, всем исцеления подающе.
Святии мученицы и исповедницы Гурие, Самоне и Авиве, молите Бога о нас.
С благоговением притецем к светоносней и светозарней, Богомудрии, раце мученик, точит бо врачевания верою зовущим: слава силе Твоей, Господи.

Слава Отцу и Сыну и Святому Духу.

Исповедающе Божественное строение и паче ума таинство, Богословными языки все безбожие мучителей Божественнии и всемудрии исповедницы попраша.

И ныне и присно и во веки веков. Аминь.

Богородичен: Паче ума родила еси, о Дево! и по рождестве явилася еси, девствующи паки. Тем немолчными гласы, радуйся, Тебе, Владычице, верою несомненною вопием.

Песнь 5

Ирмос: Ты, Господи, мой свет, в мир пришел еси, Свет Святый, обращаяй из мрачна неведения верою воспевающия Тя.
Святии мученицы и исповедницы Гурие, Самоне и Авиве, молите Бога о нас.
Светлостию яве подвигов сияюще, посрамиша мучителей свирепый нрав веры поборницы.
Святии мученицы и исповедницы Гурие, Самоне и Авиве, молите Бога о нас.
Во вся явственно вселенныя концы чудеса мученик проповедашася и вся верою утвердиша.

Слава Отцу и Сыну и Святому Духу.

Якоже земля благая, благодати семена приемши, житием трудолюбно богатство блаженнии содеяша.
И ныне и присно и во веки веков. Аминь.
Богородичен: Един Благий, пучиною благостыни всяческая, Богомати, содержай, Твоими объятии держатися сподоби.

Песнь 6

Ирмос: Пожру Ти, со гласом хваления, Господи, Церковь вопиет Ти, от бесовския крове очищшися, ради милости от ребр Твоих истекшею Кровию.
Святии мученицы и исповедницы Гурие, Самоне и Авиве, молите Бога о нас.
Законно, яко добрии воини, Богомудрии, удержавше вся и ясно веру соблюдше, Божественныя правды приясте венцы.
Святии мученицы и исповедницы Гурие, Самоне и Авиве, молите Бога о нас.
Прежде убо Аввакум высоце возвышается Владычним повелением, чрез вас же отроковица мучима, Богоглаголивии, к воспитавшей возвратися.

Сияет рака мученик чудесы и реки источает исцелений всем, приходящим верою и тех терпению дивящимся.

Слава Отцу и Сыну и Святому Духу.
И ныне и присно и во веки веков. Аминь.
Богородичен: Тя едину посреде терния обрет, яко чистейший крин и во удолиих цвет, о Богомати, Жених умный в Тя вселися.
Кондак, глас 2

С высоты, мудрии, благодать приемше, сущим во искушениих предстоите, всехвальнии. Темже отроковицу, святии, от смерти горькия избависте, вы бо воистину есте Едесу слава и миру радость.
Икос

Вражия мя работы избави, Иисусе Жизнодавче, Твоих страдалец мольбами умоляемь, яко да непорабощенну стяжав от страстей душу мою и тело, восхвалю тех скорейшую помощь, якоже во гробе затвореная мужа лукавствием, и сию скоро предваривше, от смерти избавиша, зовущу: Едесу слава и миру радость.

Акафист святым мученикам Гурию, Самону и Авиву

Кондак 1

Избраннии чудотворцы Христовы и святыя веры исповедницы, Гурие, Самоне и Авиве добронравнии, память вашу чтущи песньми похвальными, воспеваем яко христиан заступников, страждущих покровителей. Вы же, имуще дерзновение ко Господу, от всяких бед и напастей свободите нас, верою и любовию зовущих: Радуйтеся, Гурие, Самоне и Авиве, страстотерпцы Христовы и обидимых покровителие!

Икос 1

Ангелы во плоти Тройце Святей равночисленнии, любовию к Богу горяще идолы попрасте, веру Христову укреписте, Троицу Святую прослависте, темже убо похваляюще подвиги ваша, глаголем вам сице: Радуйтеся, светильники благочестия. Радуйтеся, обличители нечестия. Радуйтеся, утверждения веры Христовой. Радуйтеся, столпы Церкви Божия. Радуйтеся, верных надеждо и заступление. Радуйтеся, неверных страх и посрамление. Радуйтеся, Гурие, Самоне и Авиве, страстотерпцы Христовы и обидимых покровителие!

Кондак 2

Видя нечестие людей града Эдеса, святии Гурий и Самон в пустыню удалишися, бегая князя мира сего и соблазнов и усердно служаще Богу, день и ночь воспеваху: Аллилуиа.

Икос 2

Разум премудр имея, святии мученицы, выну трудишася во славу Божию, языческое нечестие обличая, ищущия истины на путь правый наставляя и мнози неверныя к Богу Истинному привлекоша, сего ради глаголем вам сице: Радуйтеся, насадители истиннаго богопочитания. Радуйтеся, искоренители демонскаго служения. Радуйтеся, тьмы нечестия обличители. Радуйтеся, идольския прелести низложители. Радуйтеся, исповедницы Христовы изряднии. Радуйтеся, cвeтилa веры православней. Радуйтеся, Гурие, Самоне и Авиве, страстотерпцы Христовы и обидимых покровителие!

Кондак 3

Силою свыше осененнии святии мученицы, гонителей святой веры неустрашишася, веления нечестиваго Антониана небрегоша и веру Христову велегласно прославиша, темже и в темницу ввержени пояху Богу: Аллилуиа.

Икос 3

Имея веру во Христа адаманта твердейшую и силою тоя вооружившиися, мужественно претерпели есте, святии мученицы, темничные узы и самую смерть, сего ради похваляюще таковое мужество, ублажаем вас сице: Радуйтеся, истинныя веры исповедницы. Радуйтеся, Царствия Божия наследницы. Радуйтеся, мучеников похвало. Радуйтеся, страстотерпцев славо.Радуйтеся, святыя Церкви утверждение. Радуйтеся, всего рода христианскаго украшения. Радуйтеся, Гурие, Самоне и Авиве, страстотерпцы Христовы и обидимых покровителие!

Кондак 4

Бурею помышлений сумнительных одержимый, нечестивый царь Ликиний воздвиже жестокое гонение на христианы, ты же, страстотерпче Авиве, того не убояся, с твердою верою взывал еси Христу Богу: Аллилуиа.

Икос 4

Слышав царь Ликиний твои подвиги, досточудный Авиве, и твое твердое веры исповедание, разъярися на тя злобою, повеле предати тя смерти лютей яко противника царева, ты же, уведев о сем, добровольно потекл еси на мучение, и с радостию претерпел еси огненное сожжение, сего ради дивящеся великому мужеству твоему, величаем тя сице: Радуйся, поборниче веры во Христа неустрашимый. Радуйся, воине Христов непобедимый. Радуйся, повешанный на древе за Pacпpoстepшагo руце Свои на древе крестнем. Радуйся, строганный когтьми железными. Радуйся, утешение подаваяй скорбящим. Радуйся, скорый помощниче всем за истину терпящим. Радуйтеся, Гурие, Самоне и Авиве, страстотерпцы Христовы и обидимых покровителие!

Кондак 5

Боготечным звездам на тверди небесней подобнии были есте, святии мученицы, лучами жития своею тьму языческаго нечестия просвещающии и многих на путь истинны наставляющии. Темже благоговейно чтуще память вашу, благодарно поем Богу: Аллилуиа.

Икос 5

Видеша людие града Эдеса многие чудеса, бываемыя от раки святых мучеников Гурия, Самона и Авива, зело радовахуся и Господа всем сердцем прославляху, мы же чтуще святую память вашу, святии мученицы, умильно взываем: Радуйтеся, неправедно гонимых заступницы. Радуйтеся, верных рабов Христовых друзи. Радуйтеся, сущих во узах и темницах хранителие. Радуйтеся, гонителей и обидящих вразумители. Радуйтеся, плачущих утешители. Радуйтеся, от наглыя и лютыя смерти избавители. Радуйтеся, Гурие, Самоне и Авиве, страстотерпцы Христовы и обидимых покровителие!

Кондак 6

С высоты мудрии благодать приемше, за сущих во искуплении предстоите, всехвальнии, темже отроковицу, святии, от смерти горькия избависте. Вы бо воистинну есте граду Эдесу слава и миру радость, сего ради воспеваем ко Господу: Аллилуиа

Икос 6

Вражия работы избави нас, Иисусе Жизнодавце, Твоих страдалец мольбами умоляем, яко да не порабощенну стяжав от страстей душу и тело, восхваляем тех скорейшую помощь, якоже во гробе затворенную мужем и сию скоро предваривше от смерти избавиша, темже взываем вам сице: Радуйтеся, невинную жену от лютыя смерти спасшии. Радуйтеся, дивным спасением ея зверства мучителя победившии. Радуйтеся, злаго мужа жестокое деяние обличившии. Радуйтеся, и того веровати в силу Бога христианскаго научившии. Радуйтеся, податели милости тоя требующим. Радуйтеся, стражи неусыпнии почитающих память вашу. Радуйтеся, Гурие, Самоне и Авиве, страстотерпцы Христовы и обидимых покровителие!

Кондак 7

Хотяй Человеколюбец Господь явити милость Свою людям Своим, сохрани телеса ваши нетленны, чудеса точащии, от них же вси вернии токи исцелений получают, зовуще Богу: Аллилуиа.

Икос 7

Новых заступников и дивных чудотворцев ведуще, людие из града Эдеса святой храм в память вашу создаша, в нем же и мощи ваша положиша, да вси страждущии помощь в них почерпают, мы же такожде тверду надежду на вас имуще, взываем вам сице: Радуйтеся, душевных и телесных недугов наших целители. Радуйтеся, бесов о имени Господни изгонители. Радуйтеся, Евангельския истины «благодати" благовестители. Радуйтеся, Божественныя благодати носители. Радуйтеся, скорби многи за имя Господне приявшии. Радуйтеся, дивно во святых Его просиявшии. Радуйтеся, Гурие, Самоне и Авиве, страстотерпцы Христовы и обидимых покровителие!

Кондак 8

Странно и страшно неверным слышати, каковы дивные дела от святых мощей ваших совершаются: недузи врачуются, страсти исцеляются, мы же, тверду надежду на нас имуще, Богу о вас тако благодеющему с верою взываем: Аллилуиа.

Икос 8

Всеми добродетельми исполненнии, за нихже и славою Божиею почтении, внимайте, святии мученицы, молитвам верных, чтущих святую память вашу, от нихже слышисте сицевая: Радуйтеся, нищии духом, яко ваше есть Царствие Небесное. Радуйтеся, плачущии, яко утешистеся. Радуйтеся, кротции, яко наследовасте землю. Радуйтеся, алкавшии и жаждавшии правды, яко насытишася. Радуйтеся, милостивии, яко стяжали есте помилование. Радуйтеся, чистии сердцем, яко уже Бога узресте. Радуйтеся, Гурие, Самоне и Авиве, страстотерпцы Христовы и обидимых покровителие!

Кондак 9

Всякия напасти, находящия на град Эдес, разоряли есте, святии мученицы, темже и ныне не оставите нас смиренных и грешных, но вся люди страны нашия в православии и единомыслии утвердите, да вси едиными усты и единым сердцем воскликнем прославившему вас Господу: Аллилуиа.

Икос 9

Витии многовещаннии, яко рыбы безгласнии зрим о вас, святии мученицы: недоумеют бо, како в пустыни духом витали есте и посреде человек неусыпными подвиги подвизастеся. Мы же радующися, яко таковы имамы учители и молитвенники, прославляем вас, глаголюще: Радуйтеся, кимвалы Слова Божия. Радуйтеся, теплии о нас пред Богом ходатаи. Радуйтеся, иудеев и еллинов просветители. Радуйтеся, тридневнаго Божества благовестители. Радуйтеся, кротости и воздержания учители. Радуйтеся, лжи и татьбы обличителие. Радуйтеся, Гурие, Самоне и Авиве, страстотерпцы Христовы и обидимых покровителие!

Кондак 10

Спасти хотя люди града Эдеса от мысленнаго волка, твердо увещали есте тех стояти во истинней вере ниже козней вражиих устрашатися, но и в скорбех и напастех за вас благодарити Бога, поюще Ему: Аллилуиа.

Икос 10

Стена тверда и надежнее прибежище есте, святии мученицы, всем к вам прибегающим и скорыя помощи требующим, сего ради во умилении сердца нашего взываем: Радуйтеся, всех скорбящих радование. Радуйтеся, всех угнетенных и порабощенных прибежище и освобождение. Радуйтеся, вдов и сирот заступление. Радуйтеся, от ересей и расколов ограждение. Радуйтеся, яко вси нечестивии житию вашему удивляются. Радуйтеся, яко вси благочестивии о имени вашем веселятся. Радуйтеся, Гурие, Самоне и Авиве, страстотерпцы Христовы и обидимых покровителие!

Кондак 11

Пение благодарственное приносите ко Господу и о нас, теплии заступницы наши, молим вас присно не отступати от нас, грех наших ради, но милосердие от Господа всем испросите, вопиющим Ему: Аллилуиа.

Икос 11

Светозарную троицу святых мучеников восхваляюще, вернии, устранимся распрей и раздоров в жизни сей, убежим несогласий и разделений в Православней вере и храняще единение духа в союзе мира, из глубины души воскликнем тако: Радуйтеся, громогласныя трубы Евангельскаго благовестия. Радуйтеся, сладкозвучныя гусли проповеди спасения. Радуйтеся, крепции правды рачителие. Радуйтеся, непоколебимии неправды истребители. Радуйтеся, благочестивым семействам мира и блага податели. Радуйтеся, жестоким и неверным супругом строгие наказатели. Радуйтеся, Гурие, Самоне и Авиве, страстотерпцы Христовы и обидимых покровителие!

Кондак 12

Благодать, данную вам от Бога, ведуще, память вашу празднуем, святые мученицы, с усердным молением к вашему честному образу притекающе, вашею твердою помощию, яко необоримою стеною ограждаемся, сего ради восхваляем вас, страстотерпцы Христовы, и усердно зовем Богу: Аллилуиа.

Икос 12

Поюще ваше дивное житие и мученическую кончину, молим вас, страстотерпцы Христовы Гурие, Самоне и Авиве, будете нам во всем благие помощницы, благословите нас миром и любовию, подайте нам твердую веру, чистоту жизни и страх Божий, да вси душевный покой имуще, в радости воскликнем: Радуйтеся, яко имена ваша и между неверными прославляются. Радуйтеся, покой и отрадо скорбящим, Радуйтеся, страх и удивление обидящим. Радуйтеся, невинную жену от лютыя смерти спасшии. Радуйтеся, злаго мужа ея достойно покаравшии. Радуйтеся, Гурие, Самоне и Авиве, страстотерпцы Христовы и обидимых покровителие!

Кондак 13

О святии страстотерпцы Христовы Гурие, Самоне и Авиве, приимите сие наше хвалебное пение и, услышав усердно желание наше, избавите нас теплым своим к Богу предстательством, от всякаго зла, от вражды и несогласий и всяких лютых бед и болезней, да с любовию вас чтуще, выну зовем Богу: Аллилуиа, Аллилуиа, Аллилуиа.

Икос 1

Ангелы во плоти Тройце Святей равночисленнии, любовию к Богу горяще идолы попрасте, веру Христову укреписте, Троицу Святую прослависте, темже убо похваляюще подвиги ваша, глаголем вам сице: Радуйтеся, светильники благочестия. Радуйтеся, обличители нечестия. Радуйтеся, утверждения веры Христовой. Радуйтеся, столпы Церкви Божия. Радуйтеся, верных надеждо и заступление. Радуйтеся, неверных страх и посрамление. Радуйтеся, Гурие, Самоне и Авиве, страстотерпцы Христовы и обидимых покровителие!

Кондак 1

Избраннии чудотворцы Христовы и святыя веры исповедницы, Гурие, Самоне и Авиве добронравнии, память вашу чтущи песньми похвальными, воспеваем яко христиан заступников, страждущих покровителей. Вы же, имуще дерзновение ко Господу, от всяких бед и напастей свободите нас, верою и любовию зовущих: Радуйтеся, Гурие, Самоне и Авиве, страстотерпцы Христовы и обидимых покровителие!

Песнь 7

Ирмос: В пещи Авраамстии отроцы персидстей любовию благочестия паче, нежели пламенем, опаляеми, взываху: благословен еси в храме славы Твоея, Господи.
Святии мученицы и исповедницы Гурие, Самоне и Авиве, молите Бога о нас.
Авраамския в пещи дети избавивый, Сый и странную отроковицу лютаго обстояния спасе ходатайством ныне святых угодник, яко Благоутробен.
Святии мученицы и исповедницы Гурие, Самоне и Авиве, молите Бога о нас.
Суровейшаго безчеловечия муку давый, всех зол абие истязан убийца злоименитый судом праведным Твоим, Слове Божий, мудросте и сила.

Слава Отцу и Сыну и Святому Духу.

Укрепляема к вам надеждею, славнии, отроковица, заключенная во гробе с мертвыми, чаяния не погреши, зовущи: благословен еси, Господи Боже отец наших.
И ныне и присно и во веки веков. Аминь.
Богородичен: Яко новосмешеное и светозарное пущая зерцало, Зарю Божественнаго, Дево, сияния, приложившуюся Тебе, вместила еси. Благословена Ты в женах, Всенепорочная Владычице.

Песнь 8

Ирмос: Руце распростер Даниил, львов зияния в рове затче; огненную же силу угасиша, добродетелию препоясавшеся, благочестия рачители, отроцы, взывающе: благословите вся дела Господня Господа.
Святии мученицы и исповедницы Гурие, Самоне и Авиве, молите Бога о нас.
Всемирный днесь нам наста праздник мученик Христовых, озаряющ благодатию чудес приходящия верою и радостию духовною и любовию зовущия: благословите вся дела Господня Господа.
Святии мученицы и исповедницы Гурие, Самоне и Авиве, молите Бога о нас.
Удобно исповедницы Твоего Божества все упраздниша безбожие, Владыко, мучителей не убоявшеся прещений злоумных, верою укрепляеми, взывающе: благословите вся дела Господня Господа.

Слава Отцу и Сыну и Святому Духу.

Всемудрии исповедницы, предстояще Божественному повелению, врагов полки побеждающи, мечем закалаеми, победу преславно яве и пресиящу показаша, падающе бо, противныя победиша.
И ныне и присно и во веки веков. Аминь.
Богородичен: Естествы видимаго двема, Христа родила еси, едину носяща яве Ипостась сложну Божества и человечества, стекшуся естественному истинно по соединению: тем Тя благословим, Марие Богоневестная.

Песнь 9

Ирмос: Камень нерукосечный от несекомыя горы, Тебе, Дево, краеугольный отсечеся, Христос, совокупивый разстоящаяся естества, Тем, веселящеся, Тя, Богородице, величаем.
Святии мученицы и исповедницы Гурие, Самоне и Авиве, молите Бога о нас.
Словесем последующе Божественным и Богодухновенным Христовым, исповедницы Богосветлии, крест на рамена, радующеся, взясте, жизноносным стопам последующе, достославнии.
Святии мученицы и исповедницы Гурие, Самоне и Авиве, молите Бога о нас.
Всему свету Троицы с веселием доблии исповедницы вмещшеся, подвигов чести воспринимают, Безплотных чинов сподобльшеся соводворения.
Святии мученицы и исповедницы Гурие, Самоне и Авиве, молите Бога о нас.
Ныне не в зерцале зрите блаженных надежды, исповедницы Спасовы; истины же паче, всемудрии, доброту зрите, венценосцы всечестнии.

Слава Отцу и Сыну и Святому Духу.

Яко Пребожественныя Троицы яве равночисленнии явльшеся исповедницы, Богоглаголивии, Тоя зарями просвещаетеся, яко Тоя ради пострадавше, Жизни нетленныя ныне улучиша.
И ныне и присно и во веки веков. Аминь.
Богородичен: Плотию приити восхотев, украсивый вся, Слово в Тя вселися, Едину святейшу всех обрет, и Богородицу воистину яви, Мати Дево.
Светилен

Иже от гроба отроковицу избавльше древле, Гурие, и Самоне, и Авиве, мученицы Христовы, предварите, яко от гроба прегрешений ны избавляюще.

Тропарь,Глас5:
Чудеса святых Твоих мученик стену необоримую нам даровавый, Христе Боже, тех молитвами советы языков разори, яко Един Благ и Человеколюбец.

Святии мученицы и исповедницы Гурие, Самоне и Авиве, молите Бога о нас.

Дата добавления: 2015-11-04