Вразумитель крадущих

Преподобный отец наш Григорий, чудотворец Печерский, прия иноческий образ от преподобного Феодосия и научен бе от него нестяжанию, чистоте, смирению с послушанием и прочим добродетелем, молитве же наипаче прилежаще. Ненавидяй убо добра диавол наусти злыя человеки, да окрадут его, не имущего ничесоже, кроме книг к молитве и чтению. Во едину убо нощь приидоша татие к келлии Григория, и утаившеся стрежаху (сторожили), дондеже изыдет старец на утреню в церковь, да тогда, вшедше, возмут вся его. Блаженный же ощути приход их: не спаше бо по вся нощи, но посреде келлии стоя, моляшеся Богу безпрестанно. Тогда помолися и о них, глаголя: "Боже, даждь сон рабом Твоим, иже утрудишася всуе, врагу угождающе". И услышан бысть от Бога, ибо спаша татие пять дней и пять нощей, дондеже блаженный при многих братиях возбуди их, глаголя: "Доколе стрежете всуе, окрасти мя хотяще? Отъидите уже в домы своя". Они же, воставше, не можаху идти, зане не ядоша толикое время. Блаженный же постави брашно (пищу) и, напитав, отпусти их. И, сие уведав, властелин града повеле мучити их. Печален же быв Григорий, яко его ради предани быша на мучение, шед к властелину, дарова ему некия книги своя, и татей свободи: иныя же книги продаде, и раздаде цену убогим, сице рек: "Да не како еще в беду впадет кто, хотя окрасти мя, ибо и Господь рече: Продадите имения ваша и дадите милостыню. Сотворите себе влагалища неветшающа, сокровище неоскудеемо на небесех, идеже тать не приближается, ни моль растлевает (Лк. 12; 33). Татие же тии, чудесе ради бывшаго на них, ктому не возвратишася на первая дела своя, но с покаянием пришедше в той же Печерский монастырь, вдашася на работу братии. Но враг не остави злого начинания своего: еще бо имеяше сей блаженный Григорий вертоград (сад, огород) мал. в немже зелие сеяше, и древеса плодовитая насаждаше. В ино убо время, наустившу (склоненные) тому же врагу, приидоша другии татие. и влезше в вертоград той, наполниша влагалища своя овощием: егда же взяша времена на ся, и хотяху отъити, и се не возмогоша, но стояху два дни и две нощи неподвижими, угнетаеми бремены. Таже начата вопити: "Отче святый Григорие, пусти ны, покаемся уже о гресе своем, и ктому не сотворим сицевыя веши". Слышавше же черноризцы приидоша, и яша (взяв) их, но не могоша свести от места того. Тогда вопросиша их: "Когда семо (сюда) приидосте?" Татие же отвещаша: "Два дни и две нощи стоим зде". Глаголаша им черноризцы: "Мы всегда семо ходяще, не видехом вас стоящих". Татие же реша: "И мы, аше бы вас видели ходящих, просили бы у вас со слезами ходатайства к старцу", и се, уже изнемогше, начахом вопити: "Просим убо, молите чудотворца святого, да пустит нас". Пришед же Григорий, глагола им: "Понеже праздни пребысте весь живот ваш, крадуще чуждыя труды, а сами не хотяще труждатися: отныне стойте ту праздни прочая лета до кончины живота вашего". Они же со слезами моляху старца, да пустит их, обещающеся ктому не сотворити такового согрешения. Старец же умилися о них, и рече: "Аще хощете руками вашими делати, и от труда вашего иных питати, пущу вас". Татие же с клятвою реша: "Никакоже преслушаем тебе". И глагола им Григорий: "Благословен Бог, укрепляяй вас! Отселе будете работати на святую братию, и от вашего труда на потребу их приносити". И тако отпусти их. Татие же за дело зло в вертограде том малом добре делаша работающе во оградех всего Печерского монастыря до скончания живота своего. Покусися и третицею (в третий раз) прелестный искуситель чрез татей такоже приступити к блаженному образом прелести сицевыя: приидоша иногда к Григорию трие нецыи, не отай (не втайне) аки татие, но в лице, аки помощи требующии, хотяще искусити его: и два от них молиша святого, ложно на третияго глаголюще: "Отче, сей друг наш осужден есть на смерть, молим тя, потщися избавити его, даждь ему что, да искупит себе от смерти". Блаженный же, провидя духом, яко солганное ими сбудется самою истиною, прослезися жалостно, и рече: "Люте человеку сему, яко приспе день погибели его". Они же рекоша: "Ты, отче, аще даси что, то он не умрет". Сие же глаголаху, хотяще от него взяти что и разделити между собою. Чудотворец же, прозорлив сый, рече: "Аще и аз дам, то сей умрет. Обаче вопрошаю вас: коею смертию осужден есть?" Они же отвещаша: "На древе повешен имать быти". И глагола им прозорливец: "Добре судисте: заутра бо сбудется то". Сия рек, сниде в пещеру, идеже храняся от видения и слышания суеты земныя обычай имеяше молитвы творити, и оттуду изнес и оставшыяся книги, даде им сия, глаголя: "Возмите сия, и аще не угодно будет вам, возвратите ми". Они же, вземше книги, изыдоша и начаша посмеватися, глаголюще: "Продадим то и разделим еже возмем". Еще же и древеса плодовита видяще у святого, реша к себе: "Приидем в сию нощь, и плоды сия сберем". Наставшей же нощи татие онии трие приидоша. Григорий же тогда моляшеся в пещере. Они же заградиша отвне двери пещеры, идеже бе старец. И един от них, иже обешен (повешенным) быти наречеся, взлез на древо, нача восторгати яблоки: и се ветвь, еяже держашеся, отломися. Он же падеся, а стрегущии, оба устрашившеся, отбегоша; тогда падый, егда лете, другою ветвию похищен бысть и, не имея помощи, удавися. Григорий же, затворен сый, не можаше быти с братиею на утрени в церкви. Братия, убо изшедше из церкве, идоша видети вину небытия, необычного святому мужу тому: и се, видеша на древе человека висяща мертва, и ужасошася; поискавше же Григория, обретоша его в пещере затворена. Он же, изшед, повеле сняти висящего. Таже узре и другов его, со иными пришедших и назирающих мертвеца, и глаголя к ним: "Зрите, како окаянная ваша ложь в правду прииде: Бог поругаем не бывает (Гал. 6; 7). Аще бы мене не затворили, аз, пришед, помогл бы ему, дабы не умерл; но понеже враг вас научи хранити суетная и ложь, темже и милость свою оставили есте. Видевше же ругатели тии сбытие словес блаженного, падоша к ногам его, просяще прощения. Григорий же осуди их в работу Печерскому монастырю, да оттоле труждающеся, от пота лица своего снедят хлеб свой, и довольни будут напитати и прочиих от трудов своих. И тако и тии скончаша живот свой, работающе в Печерском монастыре с чады своими рабом Пресвятыя Богородицы и учеником преподобных отец наших Антония и Феодосия.

(Из Патерика Печерского)

Дата добавления: 2015-08-10