Фыццаг сусæг (интимон) фембæлд

Адæймаджы царды ис ахæм фæзилæнтæ, кæцытæ иунæг уысммæ бындуронæй аивынц адæймагæн йæ дунембарынад, йæ ахастдзинæдтæ алфамбылай уæвæг адæмимæ æмæ ма суанг йæ миниуджытæ дæр. Царды ахæм фæзилæнтæй иу у æмкъайады цæдисы бацыд. Арæх усракуырды, моймæ ацыды фæстæ фыццаг сусæг фембæлд, хъыгагæн, свæййы æппæрццæг фæстиуджытæ хæссæг уысм. Уымæ гæсгæ алы адæймаг дæр æмкъайады цæдисы бацæуыны агъоммæ хъуамæ бæлвырд зона ус æмæ лæджы интимон царды æмæ буарон æввахсдзинады сусæгдзинæдтæ, уæлдайдæр та фыццаг фембæлды рæстæджы. Иры фæсивæдæн æмкъайады интимон ахастдзинæдтæ проблемон никуы уыдысты, фæлæ-иу хатгай царды уæззау уавæртæ æмæ æнахуыргонддзинад дыууæ æрыгон цардæмбалы уырдæм æркодтой. Фылдæр хатт-иу афтæ рауад, кæрæдзимæ фаг æргомзæрдæ кæй нæ уыдысты, уый аххосæй.

Кæддæр, фыдæлты фæткмæ гæсгæ, лæг æмæ усæн сæ фыццаг интимон фембæлды æнæмæнг хъуамæ уыдаид буарон хæстæгдзинад дæр, фæлæ нæ рæстæджы уыцы фæтк нымад у нæбæззоныл. Нæ рæстæджы æрыгон лæг æмæ усы фыццаг интимон æмбæлд арæзт æрцæуы чындзæхсæвы фæстæ 2-аг кæнæ 3-аг æхсæв. Уæдмæ къухылхæцæг æмæ æмдзуарджын саразынц æппæт фадæттæ, цæмæй дыууæ æрыгоны мацы хъыгдарæг уа, уый тыххæй. Куы бахъæуы, уæд æрыгæттæн бамбарын кæнынц, се ’хсæн цы буарон хæстæгдзинад æрцæудзæн, уый, чи æмбæлы, ахæм хъуыддаг кæй у, ома адæмæн æрдзæй лæвæрд кæй у, уый. Фылдæр хатт лæппу дæр æмæ чызг дæр, се ’хсæн цы ахастдзинæдтæ хъуамæ уа, хи куыд дарын хъæуы, уый фæзонынц, æмæ уæд къухылхæцæг æмæ кæнгæ мад лæппуйы исты æфсонæй чындзы уатмæ æрбахонынц, стæй сæ уым дыууæйæ ныууадзынц.

Лæг æмæ ус иу уаты æхсæвиуат куы бакæнынц, уæд уый ууыл дзурæг нæу, æмæ æнæмæнг се ’хсæн буарон хæстæгдзинад уа. Нæ фæлæ фылдæр хатт чызг ахæм хъуыддагмæ цæттæ нæма вæййы, æмæ хъуамæ лæппу æмбара йæ къайы уавæр, фæраза йæхиуыл хæцын, фæстæдæрмæ. Уæдмæ лæппу йæ узæлдæй, йæ уарзон ныхæстæй балхæны йæ къайы зæрдæйы уаг, бацæттæ йæ кæны æмуд æрцæуынмæ.

Чызджы фæндон нæ хынцгæйæ, йæ уавæр ын не ’мбаргæйæ ахæм хъуыддаг бакæнын хъæддагдзинад у.

Ус дæр æмæ лæг дæр кæддæриддæр хъуамæ аудой кæрæдзи монцтæ æмæ æнкъарæнтыл. Дыууæ удæн дæр буарон æввахсдзинад бæллиццаг куынæ уа, уæд æм тырнын дæр нæ хъæуы. Уыцы хъуыддаджы цæстмæ мийæн дæр бынат нæй. Лæг æмæ ус уыцы диссаджы æрдзон æхцондзинадæй хъуамæ кæрæдзийæн сæ узæлд хъарой.

Дата добавления: 2015-12-01