Молитва о упокоении скончавшихся после тяжкой и продолжительной болезни

Господи, Господи! Праведен еси ты, и Суд Твой праведен: Ты, в предвечной Своей Премудрости, положил еси предел жизни нашея, егоже никтоже прейдет. Премудры Твои законы, неизследимы путие Твои! Ты повелевавши Ангелу смерти изъяти от тела душу у младенца и старца, у мужа и юноши, у здраваго и больного по несказанным и недоведомым нам судьбам Своим; но веруем, яко на сие есть Твоя Святая воля, зане, по суду правды Твоея, Ты, Преблагий Господи, яко премудрый, всемогущий и всеведущий Врач душ и телес наших, болезни и недуги, беды и злоключения посылавши человеку, яко врачевство духовное. Ты поражавши его и исцелявши, умерщвлявши в нем мертвенное и оживотворявши безсмертное и, яко чадолюбивый Отец, наказуеши, егоже любиши, биеши всякаго сына, егоже приемлеши: молим Тя, Человеколюбче Господи, приими преставльшагося к Тебе раба Твоего (имя), егоже взыскал еси человеколюбием Своим, наказавый тяжкою болезнию телесною, во еже спасти душу от болезни смертныя; и аще вся сия приял есть от Тебе со смиренномудрием, терпением и любовию к Тебе, яко вседетельному Врачу душ и телес наших, яви убо ему днесь богатую милость Свою, яко претерпевшему вся сия грехов своих ради. Вмени ему, Господи, сию привременную тяжкую болезнь в некое наказание за прегрешения, содеянныя в сей юдоли плача, и исцели душу его от недугов греховных. Помилуй, Господи, помилуй взысканнаго Тобою, и, наказанного временно, молю Тя, не накажи лишением вечных Твоих небесных благ, но сподоби его наслаждатися ими во Царствии твоем. Аще же усопший раб Твой, не разсуждая в себе, чесо ради бысть сие прикосновение целительныя и промыслительныя десницы Твоея, стропотно что рече в себе, или, по неразумию своему, возропта в сердце своем, яко бремя сие возмни себе неудобоносимым, или, по немощи естества своего, стужаше долгою болезнию и огорчися злоключением, молим Тя, Долготерпеливе и Многомилостиве Господи, прости ему сия согрешения по безпредельной Своей милости и безприкладному Своему милосердию к нам, грешным и недостойным рабам Своим, прости ради любви Своей к роду человеческому; аще ли же беззакония его превзыдоша главу его, болезнь же и недуги не подвигоша его к полному и искреннему покаянию, умоляем тя, Начальниче жизни нашея, умоляем Твоими искупительными заслугами, помилуй и спаси, Спасе, раба Твоего от вечныя смерти. Господи Боже, Спасителю наш! Ты, по вере в Тя, даровал еси прощение и отпущение грехов, даровав помилование и исцеление разслабленному, егда рекл еси: «Отпущаются Тебе греси твои»; с сею же верою и упованием на Твою благость прибегаем к Твоему, о Иисусе Прещедрый, неизреченному милосердию и во умилении сердца нашего молим Тя, Господи: рцы убо и днесь тако слово помилования, слово отпущения грехов усопшему приснопоминаемому нами рабу Твоему (имя), да исцелеет духовне, и да вселится в месте светле, в месте покойне, идеже несть болезнь, ни печаль, ни воздыхание, и да пременятся тамо болезни и недуги его, слезы страданий и скорбей в источник радости о Дусе Святе. Аминь.

Дата добавления: 2015-11-30