Ответ, 320.

Вправду убо рехом в варившем ответе, яко вам не случися прочести сих десяти посланиев богомудраго патриарха Мелетия, понеже не веси к кому они писаны суть.

Еда убо не веси сего, яко в Белороссии, в Киеве и в прочих градех, паствующий благочестивым тамо народом, митрополит Михаил с пятию прочими епископы, отступиша от послушания православныя тогда восточныя церкве, и к римскому костелу приклонишася, и на всей воли папы римскаго быти заручную граммоту дали. О чем творец книги О вере в 23 и 24-й главах пространнейше о сем описует.

Убо святейший Мелетий патриарх к тем и писаше, иже в след своих богоотступных пастырей ити не восхотеша, и всякую нужду, скорбь, тесноту, узы, гонение и мучение терпети изволиша. Сих убо сущих ревнителей благочестия (аще и не священных) похваляя и ублажая тех ревность, тако глаголет: "Мужие (рече) российстии, благочестия воспитание, православия заступницы, иже произволением уже и мученицы, и к державе царства сопротивистеся о благочестии подвизаеми. не убо на иже от Бога данныя власти высящеся, но Божию любовь всех иных предпочитающе, и еже истинныя веры усердие являюще, вторая подати терпяще всех весма никомуже. вас странне иже в вас дние и посему точию не лукави, зрятся не вседомовни мученицы, но всенародни. в вас преславне свет бываем тма, свет тма обличи. ибо учинени бывше владычествовати вами пастырие, волцы суще. и отступивше добраго стада, Христова, не токмо расточити вас, или убити, или погубити возмогоша, но и в большую ревность совоздвигоша. вы бо восприясте пастырьскую ревность, и злых пастырей отлучистеся иже истины отступивших, и благочестия ради человеческия славы позыбляти убо начавших, не возмогших же Божиею благодатию. О овчата христоименитая, и воистину Христовы и от Христа научившиися, чужих не слушати гласа, ниже последовати чуждим. О ангели земнии подражающе небесных, и се пострадавше небесным, еже не испасти с десницею. чудо велие како отврати вас Божия благодать от епископов ваших. Ох прелести нынешний возлюбивших век, и обратившихся вспять, и благочестия и православия отступльших". и прочая. Послание 5-е [Кирилова книга].

К сим же подобне белорусцем и к благочестивому князю Василию Острожскому афонстии отцы в 10-м послании, под именем сего же Мелетия патриарха, пишуще тако глаголют: "Дойде к нам глас плачевный, и толико скорбный, яко истинным боголюбцем и братолюбцем по Христову словеси, братскаго падения паче своея души предпочитающе оплаковати, и о смерти отступления от веры и благочестия умерших верных неверием, миролюбием, и покорением князю тмы века сего, скорбети и болезновати душею и телом приходит еже у вас ныне слышатися сбысться. яко от сих тма, мрак, прелесть, и соблазн возниче, якоже от адовых сокровищ мраковидный дух разум их омрачив, и на церковь чистую их усты дунув. (И ниже): Сего ради толико вам мало обнажим отступников благочестия, да ся ими не прельщаете, яко пастыри отступиша или заблудиша яко и нам не мощно ся без них сохранити. но несть тако несть, мощно бо быти без них, занеже Бог их из церкве изгнал, и обезчестил, понеже недостойне тыя престолы содержат, и то имя на себе носят, и не мни яко слава им се, но бесчестие, и вечное отпадение Христа и святых Его". и проч.

Ко оным же белорусцем, вкупе и к князю Василию Острожскому, тоя же святыя горы Афона, некто приснопомнимый муж и духовный инок, именем Иоанн, сия восписоваше глаголя: "Ибо вам о очищении церкви нашей православной речь зачалася, и далее то чинити будем, на священническии степень по правилом святых отец да восходят, а не по своих волях похоти плотьской, ради имения и богатьства сан восхищают. и всякаго таковаго, иже сам наскакует, не приимуйте, и от короля даннаго без вашего избрания изжените и проклените: не в папежа бо вы крестилися и в королеву власть, да вам дает волки, злодеи, разбойники и антихристовы таинники. лучше бо вам без владык и без попов, от диавола поставленных, до церкви ходити, и православие хранити, нежели со владыками и попами, не от Бога званными, у церкви быти, и тою ругатися, и православие попирати. не попы нас спасают, или владыки, или митрополиты: но веры таинство нашей православной, и сохранение заповедей Божиих, то нас спасти хощет". Книга Захария Копыстенскаго.

Сие святейшаго патриарха Мелетия и святых отец афонских разсуждение, еже лучше без епископов и попов быти, нежели епископами или попами, не благочестно рукоположенными, или отступниками, или еретиками, водитися, или наставлятися, подтверждают и прочии вселенстии учители. О чем святый Златоуст, в толковании ко евреем, в 34-й беседе, тако глаголет: "Лучше бо есть ни от единаго же водиму быти, нежели от злаго водиму быти". И паки ниже: "Что убо, рече, егда зол будет, не повинемся ли; зол, како глаголеши; аще убо веры ради, бегай его и отрицайся, не точию аще человек бы был, но аще и ангел с небеси сшедый: аще же ли житиа ради, не испытуй". Беседы апостол., лист 3113.

Подобне же сему вселенскому учителю, подтверждает разумение святейшаго Мелетия и афонских отец, и другий такожде вселенский учитель, великий Афанасий, сице благоумствует: "Шествующеи непрелестныи путь. око убо да извержем, не чувственное, но умное. сиречь аще епископ, или презвитер сущеи очи церковныя неподобне живут, и съблазняют люди, подобает изврещи их, уне есть им без их събиратися в храм молитвенный. неже с ними въврещися якоже со Анною и Каиафою в гееенну огнену". Книга Никона Черныя горы, слово 7. И иная сему подобная многшая писати оставляем, яже отчасти в 10-м и 305-м ответех изъявихом.

Сице убо святейший Мелетий, патриарх Александрийский, и афонстии отцы писаша в сих посланиях, яже в 5-м и 10-м, паче к тем белорусцем, иже отступиша от злых епископов или иереов, похваляюще их о твердом стоянии в благочестии, и не низшествии их за своими отступными пастырьми, архиереями и иереями: и утверждающе их пребывати непоколебимо в православней вере восточнаго исповедания, и подтверждающе тако: яко мощно есть, или лучше, без епископов и попов быти, нежели с епископами и попами, не от Бога поставленными, у церкви быти и тою ругатися, понеже глаголюще: яко сам Бог их из церкви изгнал и обесчестил.

Тем же от вышепредложенных явствуется, яко несть никоего православию повреждения, еже от отступников благочестия, аще бы и епископи были, отлучатися, но паче благочестию есть соблюдение, и вечная честь и слава таковым приписуется, и верная и церковная чада таковии познаваются быти: и без таковых убо могут и миряне, благочестие соблюдающе, спасение получити. Верно есть слово сие, и всякому приятию достойно. Апостол, зач. 280.

Дата добавления: 2015-07-12