Вопрос, 307.

И аще не может, то явите, где в писании обретосте, яко аще и нужда каковая найдет, обаче не может священник без епископа церкви освятити.

Ответ на сии вопросы [306 и 307].

Понеже нужда есть тая, еже по крайней нужде, в неимении священства, что устроити во спасение по необходимости. А еже что касается до свободных времен и архиереем подлежащего действия попускати священником, то будет прелазка чрез ограду священнаго писания; ибо церковное возграждение сии причины священнику не подлежащия (но епископу) имеет:

1. Благословение и молитвы епископския, якоже о сем Карфагенскаго собора 84-е правило в толковании тако глаголет: "Елико же молитвенных домов, рекше церквей, без воли и без молитвы епископли создано бысть, в нихже ни мощи святых мученик положени быша, таковии церкви не священи суть; сего ради убо яже на полях и в нивах, или в виноградех созидаемыя церкви, без воли и без молитвы епископли, и без положения мощей святых мученик, аще есть мощно, да раскопаются". Кормчая, л. 152. Такоже и в книзе Иоанна Зинаря, правило 67-е, о обновлении ветхия, или о возграждении новыя церкви, сице повелевает быти: "Что есть праведнейше объявляют, и воставляти обетщания, и падшися церковь, или создати ново другия, сего ради повелеваем, да еже будет церковь ветха разорена, и восхощет кто обновити ю и создати, да не полагает иного ставропикию, но еже от перваго основания, то достоит не поколебляем; аще ли обрящется по свидетельству, яко без благословения великия церкви наместныя тая церковь основалася бе, тогда приидет хотяй создати церковь тую, и да имут благословение от епископа наместнаго, якоже и о новей церкви, тогда положит ставропиг нов, созидает; аще ли кто хощет от основания создати церковь, да приидет ко архиепископу наместному, подобную службу да сотворит ему, да вопрошает епископ, колько может на всяк день освещати церковь тую свещами, яко довольно будет к славословию Божию, или три свещи, или 6, или 8, или 9, или 10, елико по силе ему будет; и опасно видев сей по ответу ктиторову, востанет заутра епископ, и мерит место окрест оградит с платном, или с покровы некаковеми, и возжет свещу окрест внутрь, да разумеет колько место хотят осветити свещами, елико может вжизает ктитор на всяк день; и по освещении свещам только места да назнаменает; и тако крест да вонзет, еже есть ставропиг, и покадив епископ сотворит молитву, и начнет здати хотяй создати ю, буди же ему на благословение и на очищение, во здравие и во спасение души и телу его. Кроме же сицеваго правила никто же инако да не сотворит, понеже несть достойно: самовластная убо изволения многим быша на пагубу, яко безчинная и прекословная и недостойная. Аще ли же сим сам епископ нейдет на сицевое благословение, а он власть имеет послати свои иереи некими благословение, аще хощет. Точию без повеления епископова и без благословения его храм ни каков да не начинается".

2. Яко без мvра жертвенницы не освящаются. Мvро же и жертвенницы от архиерея освящаемы бывают. В книзе Дионисия Ареопагита о церковном священноначалии, в толковании, во гл. 5-й, тако пишет: "Знаменай, яко очистити и совершити мvро несть презвитера, но ниже жертвенник совершити, да принесет на нем, ниже хиротонисати. Сия бо един священноначальник сотворити имать, ихже кроме священник ниже крестит, ниже принесет, но в предсвященных от епископа священнодействуется". Такоже и восточный учитель, святый Симеон архиепископ Селунский глаголет: "Яко епископа токмо мvр и хиротонии, и чрез него во всех действиях епископская подается благодать". И паки той же: "иерей не действует тайны без жертвенника; сие же мvр освещает; мvр же чрез архиерея токмо совершается: и убо кроме архиерея ниже священник, ниже жертвенник, весьма вся сия чрез архиерея суть". Глава 77. И прочее зри о сем того же Симеона Фессалонитскаго, в книзе его, главы 37, 43; и Катихизиса Великаго о тайне 2-й, главу 62, и Малаго Катихизиса, листъ 31.

3. В церкви полагается при освящении церквей антимис; сей же бывает освящен чрез архиерея, якоже о сем в Потребнице велицем, в чине освящения церкви, сице поведает: "Указ о антимисе. Антимис есть плат, на четыре углы, а в нем вшиты мощи святых мученик, освящает их святитель со всем собором", и прочая, лист 19. Святейший же Иоанн Китрошский о антимисех, во главе 1-й, пишет сице: "Антимиси освятильныя причастившеся силы, юже тем дарует освящение воздвиженных внове церквей, и еже над сими молитв треба, еще же и седмодневное в тамошнем жертвеннице лежащим священнодейство, не возбранительне преподавается, идеже аще потреба будет таковых, и не описуются, в ней же освятишася енории, якоже и божественное мvро, и ина святая: и приводит же сих именование, о еже по тайнех антимиса, на трапезах полагаются, ихже освящение церковное освяти. А на антимисе пиши сице: жертвенник святаго, имя рек, священнодействовавшься от он-сицы патриарха, имя рек, месяца коего, и в лето кое". Кормчая, глава 59, лист 598 обор. Преподобный же Никон Черногорский, в послании 29, о антимисех и божественней службе сице пишет: "Яко же имут божественная правила. Но убо прочти антимисия, и тамо обрящеши како пишут: и ова убо сице; яко одикон, рекше путное, пишет: точию еже где освятися; како дан бысть не пишет. И внимай со опаством речь одикона сего. Обаче ту во святем Симеоне в книгах кир Феодора патриарха, есть книга велика Вабмакерна, имущи главизны различны, тамо убо и се пишет, являя глаголет: яко службы бывающая просто, в местех, и в горах, и всюду без молитвенных домов, арианское предание, и тии се вообразиша". И зде убо о сем могии с Богом да счетает неблазнено в славу Божию. Обаче обдержительне друзии антимисие пишут, яко олтарь во имя сего святаго егоже яве яко есть имя. И прочти паки ин антимис, и тамо обрящеши како подписует, и еже в кую церковь дан бысть и повелен и освящен. И не пишет всюду, но и на имя в церковь идеже возложен бысть. Сей согласует божественным правилом во искомое. Обаче убо и се паки якоже есть благоугодно Богови другий да разумеет: аз бо невежда сый вяще от себе не смею разумети, разве якоже божественная правила повелевают. И первее убо шестый собор в 31-м правиле не повелевает просто или инако в молитвенных домовох бывати службам, глаголет сице: "Яко иже в молитвенных домех внутрь храмин сущих служащия причетники, по совету се творити местнаго епископа повелеваем: тем же аще который причетник сице не сохранит, да извержется". И зде убо тако.

"Паки же иже в Константине граде собор во святых апостолех в 12-м правиле, како не от себе правило сложи, да имать кто сопротив глаголати на святый шестый собор, приводит, и с ним утверждает паче, а не возражает. Но глаголет потонку вину, и отсецает еже не бывати ныне". До зде Никон Черногорский.

Подобне и в Номоканоне афонстии отцы без антимиса во особне месте литоргисати ниже по нужде мощное быти извествуют, идеже сице вопросоответствующе пишут: "Вопрос. Без антимиса, за скудость, мощно ли священнодействовати? Ответ. Отнюд не священнодействовати, ниже с триморфом, ибо вина сатаниньска есть, еже не взимати икону в пусто место". Потребник Большой, л. 726. В том же Потребнице, в чине о поколебавшейся святей трапезе, сице пишет: "Аще ли невозможно починити столбцов не снимая сорочки со антимисом со престола, сняти, и починив столбцы, и дска, и прочая обетшавшая, и уготовив вся, святити церковь священием всем, якоже и новая церковь; сорочка же, и вервь, и индития, аще тверда, и прежде бывшая на престол возложити; а антимис прежде бывший в столбец положити, под престольную доску, а на сорочку возложити новый антимис". Глава 3, л. 42 на обор.

Тем же по вышепредложенным винам явствуется, яко священник не может храм воздвигнути и освятити, понеже от святых правил показахом, яко аще без благословения и молитв епископских кий храм воздвигнется, то сей раскопан бывает, яко аще и иереи при воздвижении онаго бывают, но с епископским повелением. Убо священник и не может самовольно храм воздвигнути. Понеже без мvра жертвенницы и олтари не освящаются, мvро же от епископа бывает: убо священник и не может церковь освятити. Понеже без антимиса престол не свящается, антимис же всячески от епископа освящаем бывает: убо священник и не может церковь освятити. Понеже без антимиса в особне месте ниже по нужде повелевает служити, и яко тако служай божественную литургию, сей арианствует.

Понеже антимис освящается именно, которая церковь созидается во имя святаго, и яко таковый антимис непотребен есть во ину церковь. Понеже аще трапеза поколебается, и за невозможное покажется, еже не снимав антимиса, починить оную. Убо сей антимис не точию во ину церковь, но и в тую же неключим обретается, и церковь снова освящати повелевается. Понеже аще и бываху прежде некия обычаи, еже просте тако служити: обаче преподобный Никон извествует, яко отныне сему не бывати.

Ныне убо повращаем слово наше на безчинное и самовольное от ваших иереев церквам священие, паче же реку сквернение, сих ради:

1-е. Яко безчисленных ради ересей, и обливательнаго ради крещения и сообщения с ним, и еже оное имеющими самех многих нынешних архиереев: сих ради ваши иереи не точию хиротонию, но ниже крещение истинное имеюще обретаются, якоже о сем довольнейше в 21-м и прочих ответех рехом. Убо не точию от освященных, но и еще непросвещенных сущих крещением, како может от них церковь освятитися.

2-е. Яко не имеют ваши иереи на себе благословения не точию от православных епископов, но ниже от своих злочестивых архипастырей: убо како могут освятити церковь?

3-е. Не имеют ваши иереи мvра от православнаго епископа освященнаго: убо како могут без мvра освятити церковь?

4. Не имеют ваши иереи антимиса, именно освященнаго от епископа в созидаемую от вас церковь: убо како могут освятити церковь?

5-е. Ваши иереи составляют от себя мvро и тем освящают свои церкви: убо не точию сии не освящени,
но и осквернени.

6-е. Ваши иереи антимисы или сами освящают, или от еретик заемлют, или еретиками надъслужимой полагают, или из иной в свою церковь преносят: убо сих ради ваши церкви не суть священни.

Тем же приводити вам по нужде прежде бывшия случаи, последи же запрещенныя, не годствует, и не сообразно есть, яже сии тобою в грядущем вопросе предлагаются.

Дата добавления: 2015-07-12