Ответ, 279.

Что убо имамы сотворити мы беднии в сие нас постигшее горькослезное время, о вопросителю! В которое не точию правильнаго брака, еже по чину святыя церкве от правильнаго священника в церкви совершаемаго, но и главнейшия во всех тайнах в действе священства (от него же, яко от корене всем тайнам, летьствовало происходити) нигде же видится, ниже слышится.

Едва ли не прииде сие время, о нем же духопрозрительный Даниил пророк прорече: "(яко тогда) скончается разсыпание руки людей освященных, и уведят сия вся". Даниил, глава 12.

Рцы нам, о истязателю! Где нам ныне явиши? Аще бы узрели, со всею нашею усердностию оно лобызали. И аще бы и в далечайших странах древлевосточное слышали священство, с великим бы восторгом, яко елени на источники водныя потекли. Аще бы и близ индейских и ефиопских пределов, и тамо бы втуне не испытав не оставили.

Но яко ниже вам, ниже нам сего вслух никако привнесеся. Но довольствие вашего желания исполнятся в сих беглых попах, кия и от своих пастырей уже отлучени, и к вам прилепишася, кроме правильной законности: о котором вы, вашем их к себе приобщении, не точию пред нами, но и пред всем светом бываете безгласни.

Слыши убо, како сам Христос и святии апостоли прорицают о последних временех. Господу глаголющу: "Горе непраздным и доящым в тыя дни". Пророком оплакающим жениха и невесту, яже в тогдашнее время, апостолу вопиющу, в Вавилонское разорение: "Глас жениха и невесты не услышится ктому в тебе". И богословцем отцем вещающим о таковых: "Яко имущыя разсядутся". Священный же церковный закон о безчинствующих в браце, и еже от коего совершаему быти, яснейше тако вещает: "Изряднее (рече) да весть иерей, яко супружества между восхищающим и восхищенною, егда сама восхищенная в власти восхитившаго ю пребывает, такожде и потаенныя, и вся прочая супружества, яже не с благословлением церковным и чинным от своего си пастыря, си есть от епископа, или от тоя парохии священника, венчанием при двух или триех поне свидетелей свершаемая, по соборному уставлению, и святых отец учению, не законна, паче же беззаконна и ничтоже суть" Кормчая, глава 51, лист 522.

И Матфей канонист, толкуя на правило Василия Великаго 38-е, объявляет про прежнее и еже нам утверженное сице: "И тогда убо (рече) с пристатием единем брак стояше, в нас же не убо состоятися может кроме священнословия". Состав г, во главе 8.

По сим убо предложенным свидетельствам, потребно суть хотящему сопрящися законне браку взыскати епископа благочестиваго, или от его парахии священника, и блюсти сие должно, чтобы оба были благочестивии и законнорукоположенни. Зане священник от епископа бывает, и от его правим и наставляем, и разрешаем, и его повелением вся тайны строит. К сим же обрести летьствует церковь благочестивую, по благословению православнаго епископа освященную, и от еретик не оскверняемую. И тако венчавшися, и жити возможно по Божию закону, якоже лепо православным христианом. Таковаго убо брака мы не возбраняем. И тако брачившийся согласен будет евангелию и святых апостол и богоносных отец учению.

Аще ли же кто правоверен, и не может обрести ни епископа благочестиваго, ни с ним ни от него благословляемаго священника, к сим же ни жертвенника православнаго, како сей может в сопряжении жены кроме сих дерзати. Не мы убо сия, ими же брак состоится, отъемлем, но закон, епископ, иерей, церковь, в ней же венчание, но Божиими праведными судбами.

А еже о безбрачно живущих любопытствуеши, како сии могут житие препровождати; и о падающих (за невозможность) в страсти блудныя, како наказанию повинни окажутся; и кто тому их падению виновен? Противу сему сице ответствуем: Мы убо таковых насилнически не одерживаем, но совещательне предлагаем чистое и гладкое житие тещи, за всекрайную нужность (якоже и выше рехом) ныне наступившаго времени: в немже не зрится правильнаго священства; в немже не видится видимыя церкви, православными содержимыя; в немже зримся, яко от волк, еретиками всюду обстоимы.

Что убо ныне мы последнии можем сотворити, таковыми се последними окружаеми нуждами; аще не некое предлагати верным от сего имети опасение. Не досаждение кое предлагающе сей священней брачной тайне, не буди сего: но опасность от противообретения, чтобы не вступить за неудержимость в неосвященное.

Быша бо таковии и древле, в первенствующая времена святыя церкве, когда аще и в гонительная, но во иметельная негде священство, советующе паче безбрачно жити.

Такова бяше святая София мученица с треми дщерьми своими: о чем в житии святых мучениц Веры и Любве и Надежды, в Минеях старописменных повествуется [сен. 17].

Таковии быша в Риме святии мученицы Хрисанф и Дария, в гонительное время поучающе безбрачному более житию: якоже в Минеи киевопечатной, в страдании их повествуется [март 19].

Сицева бяше святая преподобномученица Евгения, в таковое же время прилучившаяся быти, и тому же поучающая [дек. 21].

Таковии и инии безчисленнии в гонительная времена, поучающе бяху. Еда они погрешиша; еда мучения своя помрачиша; еда путь к небесному царствию себе затвориша? отъиди.

Аще бы были противни Богу и святей церкви, не бы в полце святых причтени были, не бы после своея всекрасныя смерти всеславне прославлени быша.

Сице и мы, поучающии, по нынешнему горкослезному времени, спасенным и чистым житием тещи, несмы противны сущей Божией правде, несмы несослагательни апостольским повелением, повелеваюшим: "В неже время достигшым, тоже мудрствовати, и тем правилом жительствовати". Якоже церковный кречет и языком учитель в своем послании к филипписеом, во главе 3-й, пишет [зач. 245].

Желающии же у нас неуемно сего похотнаго наслаждения, оставляются на своем произволе. А о себе что им определити, кроме церковнаго гласа, смелости не имеем. Понеже, по приказанию святых, на словеса и действа на наша имети летьствует от священных писаний свидетельства. Якоже оный богоносный муж Феодор Студит глаголет [книга Никона Черног. слово 18]: "Вся елика твориши или глаголеши, имей свидетельство от святых писаний".

Темже и мы недоумеем предел желающим брачнаго совокупления (кроме богопреданнаго священства) издати. Аще пошлем их к новодействуемому священству; трепещем на се правильных запрещений и ужасных анафем за приятие новшеств. Аще, кроме священства, попустимся единым родительским, или простолюдина некоего удовлитися благословением; то не имеем на се правильных повелений, но и еще и запрещение обретаем [Кормчая, глава 51]. Аще сию тайну брака вменим за нужную, по нужному времени; но из нужных оная изъемлется.

И по всем сим предложениям, что можем о действе сея тайны рещи определительная, когда не зрим видимых рукотворных православных церквей, где оная действовати подобствуется, когда из нужных оная учителями изключается. Убо хотяй неошибно ныне спасение получити, ключимейше есть терпетельный восприяти на ся образ, и тещи нужно нужными стязями по сему нужно протязаемому времени. Желающему здравый разум имети, довольно сего по сему времени на отвещание: ищущему же пространства, да ищет той и в действиях пространнаго действителя, то есть епископа, который во всех действиях есть якоже солнце, озаряющее прочия планеты. Тако и оный всем есть воздательный в благодати и совершительный орган: без негоже все пространныя чины могут угаснуть. О чем желаяй известно ведати, да чтет книгу Симеона Фессалонитскаго, глава 76 и 77, и его вопросоответы, или сих ответов 168 и 173, и прочия ответы.

Дата добавления: 2015-07-12