Ответ, 305.

Обычай есть повсюдной твоему нраву, многажды о едином вопрошати. Якоже о сем 1-го раздела 9 и 10-м и в прочих вопросех доволно истязовал еси нас, и зде в настоящем разделе, паче же в сем вопросе, усильствуеши нас твоим аргументом утеснити. И подобало бы всячески на прешедшия ответы послати тя, в них же толико множайшия доводы ти предложихом, яко святая церковь, во обстоянии еретик и в неимении православнаго священства, может быти и утверждатися, и яко церковь есть собранием вернаго народа. Но твое неудовольствие всюду предлежит, паче же сия вопросы твориши с неблагим намерением, еже познати свет истиннаго благочестия: но на едино стремишася, еже тму заблуждения в ваших иереях, сокрываемую светом, показати, еже есть отнюд невозможно. Понеже свет везде светом именуется и блистает: тма же от всех познавается тмою. Но яко ваша очеса сею страстию еже к новолюбным иереем ослепленна, того ради истинную светлость благочестия зело тяжко есть вам созерцати. Но мы, держащеся христианскаго простодушия, и апостольская повеления храняще, еже быти всякому ответу готовым, сего убо ради и зде паки к повторителному ответствию исходим.

Святый апостол Павел, сосуд избранный, описуя во святей церкви положенныя чины, тако глаголет: "Положи Бог в церкви, первие апостолы. второе пророки, третие учители", и проч. 1 к коринф., зач. 153. Во всех убо сих трех чинех якоже священницы быша, тако и не священницы обретающеся по нужде совершаху. Не священницы быша во апостолех, якоже Номоканон засвидетельствует: "Ибо Господь наш Исус Христос, многим апостолом священьства не имущим, повеле крестити". Потребник, лист 724.

Подобне и Иоанн Зонарь в книзе своей, сие повеление Христово подтверждая, глаголет: "И Бог наш Исус Христос, многим от апостол, не имущим иерейства, повеле крещати". Правило 168.

Сие же повеление Христово и в толковании 49-го правила святых апостол засвидетельствует: "Господь наш Исус Христос, посылая ученики своя на проповедь, рече: научите вся страны, крестяще их во имя Отца и Сына и Святаго Духа. всякому убо правоверному по сему повелению достоит крестити в три составы единаго безначальнаго Бога". Кормчая, лист 13. Сицевое убо Христово повеление делом святии апостоли исполняюще бяху, и несвященнии крещаху. [Деяния, зач. 17 и 20].

Святый апостол Филипп не священник крести Самарию, еще же и каженика на пути.

Святый апостол Анания, еще в дияконех сый, крести Павла апостола, оскудения ради презвитер. [Златоуст, на Деян. свв. апост. зач. 51].

Не точию же мужие, но и жены, во оно время сие повеление Христово исполняху, народы, к вере учаще, крещением просвещаху.

Святая равноапостольная Фекла, ученица святаго апостола Павла, по нужде сама крестися, потом же послана святым апостолом Павлом учити люди, иныя крести. [Минея чет. старописм., сент. 24].

Святая Мариамия, сестра благовестника Филиппа, ходящи со апостолом Филиппом и Варфоломеем, посем в Ликаонию шедше, проповеда слово и многия крести. [Пролог, фев. 17].

Святая мученица Фотиния, беседовавшая со Христом на студенце, ходящи по граду Римскому, многия учаше и крещаше, и в самей темнице сего действия не престаяше. [Пролог, март 20].

И иныя безчисленныя тогда исполняюще Христово повеление, учаху неверныя народы и крещаху.

Не священницы быша во учителех, якоже святый апостол Павел глаголет: "Учитель аще и мирский человек будет, искусен же слову учения, и нравом чист, таковый да учит. будут бо рече вси научени Богом". Кормчая, лист 26 на обор. 2 чин.: правило 15 ап. Павла.

Павлов же ревнитель, святый Златоуст глаголет: "Всегда (рече) неотступне о божественных писаниях поучатися подобает, не иереом токмо, и простым всяко повелено бысть божественная писания ведети и умети о своем уповании отвещавати". Книга О священстве, лист 140.

Не священницы быша и во пророцех, якоже Деянии святых апостол в зачале 45 засвидетельствует, четыре дщери святаго Филиппа, единаго от седми диакон, прорицающе бяху.

Аще убо во апостолех не священницы бывше крещаху; аще во учителех не священницы бяху, учаще; аще и во пророцех такожде не священницы прорицаху: убо святая церковь может по нужде быти и содержатися и без священства. Понеже святая церковь в собрании народа вернаго заключается, якоже в нижеследуемых множайших изъявится доводах.

Святый златословесный вселенский учитель в слове О предста царица, о церкви тако глаголет: "Церковь бо (рече) не стены и покров есть, но вера и житие". И паки: "Не стены церковныя, но законы церковныя". Маргарит, слово 10, лист 18.

Преподобный же Никон Черногорский глаголет: "Соборныя бо церкви не стены суть, но правая учения, и предания божественных правил и святых апостол, якоже рече Господь к верховному апостолом: Ты еси Петр, и на сем камени созижду церковь мою, и врата адова не одолеют ей. Веде ли кая есть соборная церкви; сам бо великий Петр первее, но антиохийския многажды разрушени быша от язык; закони же и предания божественных отец, и божественая правила пребывают не разрушена во веки от держащих та". Тактикон, послание 22.

Блаженный Феофилакт, архиепископ Болгарский, на реченная словеса Христова к Петру апостолу, еже на нем церковь создати обеща, тако толкуя глаголет: "Воздает Господь Петрови мзду велию, еже на нем создати церковь свою. понеже исповеда Его Сына Божия Петр: глаголет, яко сие исповедание еже исповеда, основание хощет быти верующым. темже всякому человеку подобает хотящему знати дом веры, сие исповедание полагати основание. аще бо и добродетели зиждем, не имамы же основание право исповедания, раслабленно зиждем. рекше, уже церквь Мою, являет себе Владыку всяческим, Богу бо вся порабощена суть, и врата адова не удолеют ей, сиречь, по временех бывающии гонители, иже прелщением во ад отпущаху христианы. еретицы же суть врата, во ад низводяща: многим бо гонителем, и многим еретиком одоле церковь; есть же и кождо нас церковь, храм Божий бывая. и аще же на исповедании Божии утвердимся, врата адова, сиречь греси не одолеют нам". Благовестник, от Матфея зач. 67, лист 138 на обор.

Творец же книги О вере, то же обещание Христово к Петру протолкуя, тако глаголет: "Ты еси Петр; и на сем камени созижду церковь Мою; сиречь на вере исповедания. еже исповеда, ты еси Христос Сын Бога живаго. и на том исповедании созда Христос церковь свою, еже есть вернии людие во имя Его крестившиися". Глава 7, лист 64 на обор.

Святый Максим Исповедник к хвалящимся единовольным еретиком имети у себе престолы апостольския и чины высокия тако рече: "Христос Господь кафолическою церковию нарече быти правое и спасенное исповедание веры. идеже бо нарицается Христос, ту и соборная церковь сходится". Минея чет., генваря 21.

Другий же Максим Грек, премудрый богослов, явственно показует, како и от чего апостольское величество и область состоится и познавается, яко же глаголет сице: "Не бо (рече) от град и престолов апостольское величество и область состоится, но от догмат правых веры и сожития божественнаго, апостольскими и отеческими учительствы управляемо и есть и познавается". Кирилова, лист 371, слово Максима Грека О святем Дусе.

Вышеименованный же Златоуст к лицу развращающаго народы диявола, что есть церковь, взывая глаголет: "Нечистый (рече) ты и скверный дияволе, стенам не можеше одолети, или церкви надеешися соодолети. еда мниши стенами церковь сущу, но паче народом верных есть церкве. видиши колицеми столпы утвержена, не железы связани, но верою утвержена". Житие Златоустово, лист 116.

И паки вышепомяненный Феофилакт, что есть церковь, глаголет: "Церковь именуете (рече), идеже множество верных, яко пищу заповеди приемлюще спасаются". Благовестник, от Луки зач. 45, лист 87.

В Великом же Катихисисе вопросоответствует сице: "Что есть церковь Божия. Церковь Божия есть (глаголет) собрание верных Божиих, иже непоколебимую держат едину православную веру, и в любви пребывают, облобызают же учение евангельское непоколебимо". Глава 7.

Сице и во Псалтыри толковой пишет: "Церковь глаголется, и еже по домох собрание благочестивых. сего ради и Павел глаголет: целуйте Прискилу и Акилу, и яже в дому их собрание церковь". Токование Исихиево на псалом 67.

Речеши ли везде и в домех присутьствовати освященным? Но зело безчисленнии домы, в нихже собирахуся вернии, быша и кроме священных: но от апостола тая собрания церковию нарицахуся. Или возглаголеши, точию где священнии обретаются, тамо и церковь суть? якоже ты в вопросе своем изглаголал еси.

Противу сих отвещаем:

1-е: Божественный Златоуст, истолкователь священных апостольских посланий, в 34 беседе ко евреом, разсуждая словеса сия: еже повинуйтеся наставником вашим и покаряйтеся, тако глаголет: "Злое убо есть везде безначалие, и многих бед вина, и начало бесчиния и слияния: наипаче же в церкви толико не твердое есть, елико и начала вящшее и высочайшее. Якоже бо аще лика верховнаго отъимеши, не будет лик по песни и по чину, и аще от полка воинству воеводу отставиши, не ктому правление и чином яже ополчения будут, и от корабля кормчию аще отъимеши, погрузиши корабль: тако и от стада пастыря аще отставиши, вся развратил еси и погубил". Сия убо Златоуст изрекл о начальницех, благочестивых сущих и освященных. Что же по сих речет о злочестивых и вредящих, аще они и высокия имеют чины; услышим: "Егда (рече) началник будет зол. вем и аз, яко не мало сие злое, но и безначалия мноо злейшее: лучше бо есть ни от единаго же водиму быти, нежели от злаго водиму быти. той бо многажды убо спасеся, многажды же и беду подъят: сей же всячески беду приимет, в яму ведом сый. Како убо Павел глаголет: Повинуйтеся наставником вашым, и покаряйтеся; Что убо, рече, егда зол будет, не повинемся ли; зол, как глаголеши; аще убо веры ради, бегай его и отрицайся, не точию аще человек бы был, но аще и ангел с небеси сшедый: аще же ли жития ради, не испытуй". До зде Златоуст [Беседы, киевопечат. лист 3113].

Сие божественнаго Златоустаго разсуждение подтверждается и другими церковными учители. О чем святый Афанасий Великий, архиепископ Александрийский, еже пиша о собрании церковнем, сице глаголет: "Шествующей непрелестный живоносный путь. Око убо да извержем, не чувственное, но умное. Сиречь, аще епископ, или презвитер сущей очи церковныя неподобне живут, и съблазняют люди, подобает изврещи их, уне есть им без их сбиратися в храм молитвенный. Неже с ними вврещися якоже со Анною и Каиафою в геенну огненну. Подобне и рука еже есть диякон, аще недостойне что творит, да отлучится жертвенника. Нога же есть слуга, зле течет в лжу к приятию, имений по Гиезеи. Подобает и сего от служения тужда творити, яко люта и несмысленна человека, да церковь собираема без соблазна хранится". До зде Афанасий [книга Никона Черног., слово 7].

Подобне же согласуяся сим учителем церковным, некто приснопоминаемый муж и духовный инок Святыя горы, именем Иоанн, в послании ко князю Василию Острожскому пиша, сице глаголет: "Ибо вам о очищении церкви нашей православной речь зачалася. и далее то чинити будем, на священническии степень по правилом святых отец да восходят, а не по своих волях похоти плотьской, ради имения и богатьства сан восхищают. и всякаго таковаго, иже сам наскакует, не приимуйте, и от короля даннаго без вашего избрания изжените и проклените: то не в папежа бо вы крестилися и в королеву власть, да вам дает волки, злодеи, разбойники и антихристовы таинники. лучше бо вам без владык и без попов, от диявола поставленных, до церкви ходити, и православие хранити, нежели со владыками и попами, не от Бога званными, у церкви быти, и тою ругатися, и православие попирати. не попы нас спасают, или владыки, или митрополиты: но веры таинство нашей православной, и сохранение заповедей Божиих, то нас спасти хощет". До зде ис послания.

Прочее же, в дополнение сего отвещания, чти в 10-м ответе предложенная свидетельства. Мы же за краткость многая и паки таяжде писати оставляем.

Отвещаем, 2-е: Аще убо, якоже выше предложихом, церковь есть в народе верном, и не стены и покров, но вера и житие, и кроме (аще не обрящутся правовернии) освященных может и в неосвященных и правоверных паче пребывати, нежели во вредящими благочестие, аще и с высокими чинами. Убо правовернии и древле безчисленнии обретающеся бяху в нужду по случаю, кроме священников, кроме видимых церквей, кроме пространных тайнодейств, обаче в них святая церковь всячески не не бяше: тако с Феклою равноапостольною в страдании и в пустыни; cице с Галактионом и Епистимиею, в мире и в пустыни и в страдании; сице со инеми многими святыми, в писании поведаемыми; тако с Павлом Фивейским, от гонения скрывшимся в пустыни, его же душу виде Антоний Великий, на небо со многою славою возносиму. [в Мин. мучен. чет., генв. 15].

Тако в прообразовательном новому в ветхом законе выну вера и церковь со святыми и в нужных случаех бе [Быт., 39. Ион., гл. 2. Паралип., гл. 34. Дан., гл. 3 и гл. 14]. Сице со Ионою во чреве китове, с Манасиею в воле медяне, с пленеными израильтяны в Вавилоне, кроме жертв, кроме видимых церквей. Тако с Даниилом в рове, и с треми отроки в пещи, иже тако с верою (по гласу Спасителеву: идеже два или трие собраннии во имя Его, в таковой церкви Он пребывает) к Богу вопиющими: "Яко Владыко умалихомся паче всех язык, и есмы смирени по всей земли днесь, грех ради наших. и несть во время се, князя ни пророка и вожда, ни всесожжения, ни жертвы, ни приношения, ни кадила, ни места, еже пожрети пред собою, и обрести милость. но душею сокрушенною, и духом смиренном да прияти будем". И ниже: "яко несть студа уповающитм на Тя".

Что же и Антоний, римское воспитание, не бяше ли церковию, егда един к единому, на едином камени правоверною верою службу молитвенную приношаше; его же нрава препростием, его же благочестия содержанием, обличи Бог хитросплетенныя языки: его же простолюдинством взусти архиерейския чины, покровенныя тмою нечестия, и повеле самому слабейшему водному естеству подстлатися под жестокое каменное тяжелое существо, и предаде яко пребезценное сокровище благочестием блистающему граду.

Еда бо и во иных пребезчисленных Христовых страдальцех и христианех, без священства многажды пребывающих в миру и пустынных жителях, не бяше Христовы церкви; кия быша не священнии суще, и без священников от вселенныя удальшеся, в пустом месте живуще, якоже о них преподобный Ефрем Сирин возглашая глаголет: "Не закон разоряют, не приемлюще священство держати". И паки: "церкви имут языки своя, имиже совершают молитвы своя прилежныя". Паки: "сами суть священницы себе". В книзе Ефремове, слово 111.

Темже ясно от предложенных показася, яко церковь и вера святая, не к чинам высоким, ни к местам, стенам пречюдным огражденным, но к произволению благому привязана, и к правым законом церковным припряжена, и в души словесной нетрудно вмещаема, по речению сосуда избраннаго: "Вы есте церкви Бога жива, якоже рече Бог, яко вселюся в них и похожу". 2 кор., глава 6, зач. 182.

Дата добавления: 2015-07-12