Чудо в Хонех

В Колоссах Фригийских, близ Иераполя, в храме святого Архистратига Михаила над источником воды чудотворным, от неяже многие исцеления боляшии почерпаху, более неже от купели Силоамской. К той церкви прииде от Иераполя отрок мал, имый десять лет от рождения своего, именем Архипп, от христианских родителей рожден и благочестно воспитан, и нача жити при церкви, пономарское творя служение. И отнележе (с тех пор как) нача жити тамо, работая Богу, не вкуси ничтоже от мирских снедей и питий, ни мяса, ни вина, ниже хлеба ядаше, но точию зелие пустынное, еже собирающи и варящи единою в седмице вкушаше, и то без соли, питие же его бе мала мера воды. И тако даже до старости непременно пребысть, весь соединялся с Богом. Одежда же его бе не многоценна, но точию два вретища: едино убо вретище ношаше на теле, другим же покрываше одр свой, иже бе острым камением постлан; покрываше же вретищем того ради, да от входящих в храмину его не видена будет каменная острота (камни, суживающиеся кверху). Возглавие же его бе вретище мало, наполнено тернием; такова бе постеля блаженного того подвижника. И не имея покоя день и ночь, умерщвляя тело свое, и прилежною Богу собеседуя молитвою, бысть яко Ангел Божий на земли. Не точию же о своем спасении печешеся, но и о многих; неверныя бо обращая к Христу крещаше, еже видяще безбожнии еллини (язычники) подвигошася на зависть, не терпяще зрети преславных чудес, бывающих святою водою, и святого мужа оного, тамо живущего, ненавидяху, на негоже часто нападающе досаждаху, за власы и браду терзающе, и на землю пометающе влачаху, ногами попираху, и различно его мучаще оттуда изгоняху. Крепкий же душею блаженный Архипп вся сия от идолопоклонников терпяще доблественно, и не отступи от храма святого, служа Богу в незлобии сердца своего, и пекийся о спасении душ человеческих.

Единою же собравшеся нечестивии реша к себе: "Аще не засыплем землею воды тоя, и вретищника того аще не убием, то вси бози наши до конца уничижени будут от исцеляющихся тамо". И идоша во множестве, еже засыпати землею чудотворную воду, и неповинного Архиппа убити. Едини убо устремишася к церкви и ко источнику, друзии же потщашася к храмине Божия раба, яко да убиют его, но Господь сохрани раба Своего от тех убийц, внезапу бо омертвеша им руце, и не можаху воздвигнута их на преподобного. Показа же и от воды странное чудо, ибо внегда нечестивии приближишася ко источнику, абие (тотчас) изыде от воды пламень огненный и, устремившися на них, прогна я от себе далече, и тако беззаконнии от источника чудотворного и от преподобного Архиппа отбегоша со студом. Не престаша же хвалящеся погубити источник той и церковь, и служителя церковного.

Быша же тамо две реки, приближающиеся к месту оному святому расстоянием яко трех стадий. Сии обе реки, приразившеся (встретившись) к краю горы великия, совокупишася во едино. Вселукавый же диавол вложи злым человеком в сердца таков совет: да обе реки оныя на чудотворное то место пустят, яко да разорят храм святого Архистратига Михаила, и покрыют водами святый источник, и да потопят преподобного Архиппа. Бе бо место удобно ко устремлению водному тамо, яко с высоты великия реки тыя схождаху долу, а церковь на нижайшем бе месте. И согласившеся нечестивии, приидоша множество бесчисленное, и поидоша к церкви. Близ же алтаря церковного бе камень, имеяй широту и высоту безмерну, глубину же в земли бесконечну, от того убо камене наченше копаша ров глубок и широк даже до горы тоя, под неюже реки совокупишася. Копавше же с великим трудом, и путь, имже бы пустити воды на церковь, уготовльше, преградиша реки тыя, яко до соберется вода многа, и трудишася в том суетном деле своем десять дней. Преподобный Архипп, видя таковое их дело, паде на землю в церкви, моляся Богу со слезами, и призывая в помощь теплого предстателя святого Михаила Архистратига, да сохранит место свое от потопа водного, и глаголаше: "Не отбегну от святого места сего, ниже изыду из церкве, но зде да умру и аз, аще попустит Господь потоплену быти месту сему". Егда же скончашася десять дней, и воды умножишася зело, раскопаша нечестивии еллини то самое место, имже бы устремитися водам во уготованный путь, и пустиша реки на святый храм Ангельский в первый час нощи; сами же, текше, сташа высоко от левой стороны, видети хотяще потопление святого места. И возшумеша воды яко гром, бежаще великим устремлением. Преподобный же Архипп, сый в церкви на молитве, услышавши водное гремение, возопи прилежнее к Богу и к святому Архистратигу Михаилу, милости и помощи прося, да не потоплено будет святое место и да посрамятся нечестивии, да прославится же имя Господне, и да возвеличится Ангельская сила и заступление. Воспе же Давидов псалом: "Воздвигоша реки, Господи, воздвигоша реки гласи своя. Возмут реки сотрения своя, от гласов вод многих. Дивны высоты морския: дивен в высоких Господь... дому Твоему подобает святыня, Господи, в долготу дний (Пс. 92; 3-5). И егда сия блаженный Архипп глаголаше, услыша глас, повелевающ ему из церкве изыти. Изшед же святый из церкве, узре хранителя рода христианского и теплого предстателя святого Архистратига Михаила во образе человечестем, зело пречудна и пресветла, на негоже не могущи зрети, паде от страха на землю. Он же рече к нему: "Дерзай и не бойся, востани и прииди ко мне семо, и узриши Божию силу в водах тех". Востав же, блаженный Архипп приступи со страхом к воеводе Сил Небесных, и ста ошуюю, по повелению его, и виде столп огнен от земли даже до небес. Егда же воды приближишася, воздвиже Архистратиг десницу свою, и знамена крестным знамением лице водное, глаголя: "Станите тамо!" И абие воспятишася воды, яко сбытися глаголу пророческому:...видеша Тя воды, и убояшася (Пс. 76; 17). Сташа реки яко стена каменна, и вознесошася в высоту якоже гора превысока. И обращся Архистратиг к великому оному каменю, иже бе близ алтаря, удари в него жезлом, егоже име в руце своей, начертавая на нем знамение крестное: и абие бысть гром велик, и потрясеся земля, и камень той распадеся на двое, и сотворися в камени пропасть велика. И рече святый Михаил: зде да сотрется всякая противная сила! Сия рекши повеле блаженному Архиппу прейти на десную сторону; ставшу же преподобному на стороне десной, святый Михаил велегласно рече к водам: "Внидите в тесноту сию!" И абие потекоша воды в расселину каменную шумяще, и оттоле всегда сотворися рекам тем путь в той камень. А врази, от левыя страны стоящии и потопление храма святого видети хотящии, от страха окаменеша. Святый же Архистратиг Михаил, тако храм свой и преподобного Архиппа от потопа водного сохранивши целы, взыде на небо. А блаженный Архипп Богу благодарение возсылаше о чудеси том преславном, и величаше заступление хранителя великого. И от того времене уставиша вернии праздновати день он, 6 сентября, в оньже преславное то сотворися Ангельским явлением чудо. Поживе же преподобный Архипп на том месте, прилежнее работая Богу, лета довольна, и с миром преставися к Богу, имый седмьдесят лет от рождения своего; и погребен бысть верными на том же месте святом, еже от сего чудесе наречено бысть ХОНН, си есть: погружение, яко тамо погрязнуша воды в камень.

(Из "Четии Минеи")

Дата добавления: 2015-08-10