Дом нерукотворенный

Царь индийский Гундафор, хотя себе царские палаты премудре устроити, посла купца своего Авана в Палестинскую страну, да поищет тамо искусного архи-тектона, иже бы умел здати премудре, и возмогл бы построите палаты таковым образом, каковым суть палаты Кесарей римских. С тем убо Аваном повелел Господь апостолу Своему Фоме идти во Индийския страны. Ищуще же Авану премудрого зодчия в Кесарии, Фома сретеся с ним, и искусна себе в том деле поведа. Поем же его Аван, вниде в корабль и яшася пути, пловуще с добрым ветром. Достигше же ко индийскому царю Гундафору, внидоша пред него и рече Аван: "Се, господи царю, приведох ти от Палестины зодчия премудра, да устроит палаты, угодны царству твоему". Царь же, видев Фому, возрадовася, и показав ему место, на нем же палаты хотяще имети, и размерив, каково имеяше быти основание, даде ему много злата на созидание, сам же отъиде во ину страну. Фома же, прием злато, раздаваше е требующим, убогим и нищим, сам же, труждаяся в проповеди Евангелия, многих к Христовой вере обрати и крести. По дву же летех посла царь ко Апостолу, уведати хотя, скоро ли зиждущияся палаты совершатся. Апостол же возвести, яко покров точию потребен. И радостен бысть царь, мняше бо, яко поистине зиждет ему на земли Фома палаты, и посла еще множество злата, повелевая, да красный зданию покров совершит вскоре. Он же, паки злато прием, и на небо очи и руце возвел, рече: "Благодарю Тя, Господи Человеколюбче, яко различными образы спасение человеком устрояеши". И паки данное злато просящим раздав, прилежаще проповеди Божия Слова.

Времени же некоему мимошедшу, уведа царь, яко ниже начася созидатися повеленное дело, и злато его убогим все раздано, и зиждай не о здании печется, но ходя по градом и весем, нового некоего Бога проповедет и чудеса дивна творит. Разгневався убо царь вельми, посла слуги яти Апостола и, приведена пред себе, вопрошаше: "Создал ли еси палаты?". Он же рече: "Создах зело добре и красне". И рече царь: "Идем убо, да видим здание твое". Отвеща Апостол: "Не можеши в житии сем видети палат тех, но егда от жития сего отъидеши, тогда узриши и, всельшися в них с радостию, жити имаши тамо во веки". Царь же мнев, яко ругается ему, опечалися зело и повел в темницу воврещи его вкупе с приведшим купцом Аваном, дондеже лютою смертию казнит их: мысляше бо кожу с них содрати и огнем их сожещи. Седящим же им в темнице, Аван укоряше Апостола: "Ты и мене, и царя прельстил еси, поведая, яко зодчий премудр еси, ныне же и злато царево, и мой живот погубил еси. Се бо тебе ради стражду и зле умрети имам, — лют бо есть царь, и обоих нас убиет". Апостол же, утешая его, глаголяще: "Не бойся, не умрем ныне, но будем живи и свободни, и почтени быти имамы от царя палат ради, яже создах ему в горнем Царствии". В ту же ночь царев брат впаде в недуг и посла к царю, глаголя: "И аз опечалихся, нашедшия ради тебе печали, и от печали тоя прииде ми недуг, и се, ныне умираю". И умре абие.

Царь же, забыв первую печаль, о другой скорбяще и неутешно о смерти брата своего рыдаше. Умершего же душу поем Ангел Божий, вознесе во обители небесныя и, обходящи тамо селение, показоваше ей многия предивныя, красные и светлые палаты. Бе же едина паче иных краснейша и светлейша, ея же красоты несть можно изреши. И вопроси Ангел душу: "В коей из всех тех палате изволяеши жити?" — Душа же, смотрящи на краснейшую ону палату, рече: "Аще бы мне в едином угле палаты сея пребывати было дано, ничтоже более требовали бы". Рече же Ангел: "Не можеши в сей палате жити, брата бо твоего есть, юже странный оный Фома данным ему златом созда". И рече душа: "Молюся тебе, Господи, пусти мя к брату, и аз искуплю от него палату сию, не весть бо он красоты ее. Искупивши же, паки возвращуся семо". Тогда Ангел возврати душу в тело, и абие умерый оживе, и, аки от сна воспрянув, предстоящих о брате вопрошаше и моляще, да приидет к нему царь — брат его. Слышав же царь, яко оживе брат, возрадовася зело и притече к нему. Видящи же его жива, ужасен радовашеся. Воскреснувый же нача к нему глаголати: "Вем несумненно, царю, яко любиши мя, брата своего, и плакал еси о мне. И аще бы мя мощно было искупити от смерти, дал бы еси и до полцарствия своего". И рече царь: "Ей, поистинне тако есть, и несть инако". Рече же брат: "Аще тако любиши мя, прошу у тебе единого дара, да не отречеши ми". И рече царь: "Вся, яже под рукою моею в державе моей, любимому тебе брату моему дарую". И клятвою утверди царь слово свое. Тогда рече воскреснувый брат: "Даждь ми палату твою, юже имаши на небесех, и все мое богатство за оную возми себе". Царь же, слышав сие, усумнеся и, яко безгласен, молчаше. Посем рече "Откуду мне есть на небесех палата?". И рече брат: "Воистину, такова палата есть, каковая ты не знаеши, ниже видел еси когда в поднебесней, созда же ю тебе Фома, коего в темнице держиши. Аз видех ю и дивихся неизреченной доброте ея, и хотех бы во едином углу тамо жити, но не дано бысть мне. Рече бо водяй мя Ангел, яко не мощно мне в ней жити, брата бо моего есть палата сия, юже странный оный Фома созда. Молих же Ангела, да мя отпустит к тебе, брату моему, дабы искупил у тебе палату ону, ибо аще любиши мя, даждь ми ю, а себе возьми вся моя имения".

Тогда царь о двух возвеселися: о воскресении братнем и о палате, на небесех ему созданней. И рече воскресшему брату: «Возлюбленный брате, кляхся тебе не возбранити ничтоже от тех, яже суть на земли под державою моей, а яже на небеси палата — тоя не обещах ти. Но аще хощеши, имамы у себе такового зодчаго, той убо и тебе да созиждет". И сия рекши, царь посла абие в темницу извести Фому святого с Аваном купцом, приведшим его. И тек в сретение Апостолу, паде на нозе ему, прощения прося, яко в неведении согреши. Апостол же, благодарив Бога, нача обоих братов учити вере в Господа нашего Иисуса Христа. Они же умиляющиеся, приемляху любезно словеса его, и вскоре крести их и всему христианскому житию научи. И создаша себе оба брата милостынями многими вечные обители на небесех. Апостол же, некое время с ними пребыв и в вере их добре утвердив, отъиде в окрестные грады и веси, неся спасение душам человеческим.

(Рассказ из жития святого апостола Фомы)

Дата добавления: 2015-08-10