Влады́чице, приими́ моли́твы рабо́в Твои́х / и изба́ви нас от вся́кия ну́жды и печа́ли.

Диакон: «Помилуй нас Боже, по велицей милости твоей, молим Ти ся, услыши и помилуй».

Хор: «Господи помилуй», трижды.

Диакон: «Еще молимся о великом господине и отце нашем святейшем патриархе Кирилле, и о господине (нашем) Высокопреосвященнейшем митрополите Лонгине, и о господине нашем Преосвященнейшем епископе Пахомии и всей во Христе братии нашей».

Хор: «Господи помилуй», трижды.

Диакон: «Еще молимся о богохранимой стране нашей, властех и воинстве ея, да тихое и безмолвное житие поживем во всяком благочестии и чистоте».

Хор: «Господи помилуй», трижды.

Диакон: «Еще молимся о милости, жизни, мире, здравии, спасении, посещении, прощении и оставлении грехов рабов Божиих, игумена Пахомия с братиею святаго храма сего, … (здесь прочитывается несколько записок, во время чтения которых, хор поет протяжно «Господи помилуй»), и всех здепредстоящих и молящихся».

Хор: «Господи помилуй», трижды.

Диакон: «Еще молимся, о еже сохранитися граду сему, и всякому граду и стране от глада, губительства, труса, потопа, огня, меча, нашествия иноплеменников, и междуусобныя брани, о еже милостиву и благоуветливу быти благому и человеколюбивому Богу нашему, отвратити всякий гнев на ны движимый, и избавити ны от належащего и праведного Своего прещения, и помиловати ны».

Хор: «Господи помилуй», трижды.

Священник: «Услыши ны, Боже Спасителю наш, упование всех концев земли, и сущих в мори далече, и милостив, милостив буди, Владыко, о гресех наших, и помилуй ны. Милостив бо и человеколюбец Бог еси, и Тебе славу воссылаем, Отцу, и Сыну, и Святому Духу, ныне и присно, и во веки веков».

Хор: «Аминь».

Диакон: «Господу помолимся».

Хор: «Господи помилуй».

Священник: «Владыко Господи Иисусе Христе Боже наш, Иже неизреченнаго ради Твоего человеколюбия, на конец веков во плоть оболкийся от Приснодевы Марии! Славим от нас Твое спасительное промышление раби Твои, Владыко, песно­словим Тя, яко Тебе ради Отца познахом, благословим Тя, Егоже ради и Дух Святыйв мир прииде. Покланяемся Твоей по плоти Пречистей Матери, тако­вей страшней тайне послужившей. Восхваляем Твоя ангельская ликостояния, яко воспеватели и служители Твоего величествия. Ублажаем Предтечу Ио­анна, Тебе крестившаго, Господи. Почитаем провозвестившыя Тя пророки. Прославляем Апостолы Твоя святыя. Торжествуем же и мученики, священ­ники же Твоя славим, и покланяемся преподобным Твоим, и вся Твоя пра­ведники пестунствуем. Таковаго и толикаго многаго и неизреченнаго лика Бо­жественнаго в молитву приводим Тебе, Всещедрому Богу раби Твои. И сего ради просим нашым согрешением прощения, еже даруй нам всех Твоих ради святых, изряднее же святых Твоих щедрот, яко благословен еси во веки».

Хор: «Аминь».

Диакон: «Ко Пресвятей Владычице нашей Богородице, и Приснодеве Марии помолимся».

Хор: «Пресвятая Богородице, спаси нас».

Священник с народом поет:

«Царице моя преблагая, надеждо моя Богородице, приятелище сирых и странных предстательнице, скорбящих радосте, обидимых покровительнице.! Зриши мою беду, зриши мою скорбь, помози ми яко не мощну, окорми мя яко странна. Обиду мою веси, разреши ту яко волиши: яко не имам иныя помощи разве Тебе, ни иныя предстательницы, ни благия утешительницы, токмо Тебе, о Богомати, яко сохраниши мя и покрыеши во веки веков. Аминь. Пресвятая Богородице, просвети нас светом Сына Твоего. Аллилуийя, аллилуийя, аллилуийя».

Диакон:«Ко всем святым помолимся».

Хор:«Вси святии, молите Бога о нас».

Священник: «О преблажении угодницы Божии, вси святии, Престолу Пресвятыя Троицы предстоящии и неизреченнаго блаженства наслаждающиися! Милостивно призрите на нас, меньших братий ваших, приносящих вам сие хвалебное пе­ние и ходатайством вашим просящих милости и отпущения грехов у Пребла­гаго Господа. Вемы бо, воистину вемы, яко вся, елика восхощете, испросити у Него можете. Темже убо смиренно молим вас: молите Милостивого Вла­дыку, да подаст нам дух вашея ревности ко хранению святых Его заповедей, яко да текше по стопам вашим, возможем земное поприще в добродетель­нем житии без порока прейти, и в покаянии достигнути преславных селений райских, и тамо купно с вами прославляти Отца и Сына и Святаго Духа, во веки веков».

Хор: «Аминь».

Диакон: «Премудрость».

Священник: «Пресвятая Богородице, спаси нас».

Хор: «Честнейшую Херувим, и славнейшую без сравнения Серафим, без истления Бога Слова рождшую, сущую Богородицу, Тя величаем».

Священник: «Слава Тебе, Христе Боже, упование наше, слава Тебе».

Хор: «Слава Отцу, и Сыну, и Святому Духу, и ныне и присно, и во веки веков. Аминь. Господи помилуй (трижды), Преосвященнейший Владыко, благослови».

Отпуст:

Священник: «Христос истинный Бог наш, молитвами Пречистыя Своея Матери, святых славных и всехвальных апостолов, святых славных и добропобедных мучеников, преподобных и богоносных отец наших, …(здесь поминаются святые, имже служился молебен), и всех святых, помилует и спасет нас, яко благ и человеколюбец».

Хор: «Господи помилуй», (трижды).

Дата добавления: 2015-11-30