Молитвы Господу Богу

Сла́ва въ вы́шнихъ Бо́гу, и на земли́ ми́ръ, въ человѣ́цѣхъ Благоволе́нiе. Хва́лимъ Тя́, Благослови́мъ Тя́, кла́няемъ Ти́ ся, славосло́вимъ Тя́, Благодари́мъ Тя́ вели́кiя ра́ди Сла́вы Твоея́. Го́споди Ца́рю́ Небе́сный, Бо́же О́тче Вседержи́телю, Го́споди Сы́не Единоро́дный, Iису́се Хрiсте́, и Свя́ты́й Ду́ше; Го́споди Бо́же, Агнче Бо́жiй, Сы́не Оте́чь, взе́мляй грѣ́хъ мíра, поми́луй на́съ; взе́мляй грѣхи́ мíра, прiими́ моли́тву на́шу; сѣдя́й одесну́ю Отца́, поми́луй на́съ. я́ко Ты́ еси́ Еди́нъ Свя́тъ, Ты́ еси́ Еди́нъ Госпо́дъ, Iису́съ Хрiсто́съ, въ Сла́ву Бо́га Отца́, Ами́нь.

На вся́ку но́щь Благословлю́ Тя́, и восхвалю́ Имя Твое́ во вѣ́ки, и въ вѣ́къ вѣ́ка. Го́споди, прибѣ́жище бы́лъ еси́ на́мъ въ ро́дъ и ро́дъ. а́зъ рѣ́хъ; Го́споди, поми́луй мя́, исцѣли́ ду́шу мою́, я́ко согрѣши́хъ Тебѣ́. Го́споди, къ Тебѣ́ прибѣго́хъ, научи́ мя твори́ти Во́лю Твою́, я́ко Ты́ еси́ Бо́гъ мо́й; я́ко у Тебе́ исто́чникъ Живота́, во Свѣ́тѣ Твое́мъ у́зримъ Свѣ́тъ. Проба́ви Ми́лость Твою́ вѣ́дущимъ Тя́.

Сподо́би Го́споди въ но́щь сiю́ безъ грѣха́ сохрани́тися на́мъ. Благослове́нъ еси́ Го́споди, Бо́же оте́цъ на́шихъ, и хва́льно, и просла́влено Имя Твое́ во вѣ́ки, Ами́нь.

Бу́ди Го́споди, Ми́лость Твоя́ на на́съ, я́коже упова́хомъ на Тя́. Благослове́нъ еси́ Го́споди, научи́ мя́ оправда́нiемъ Твои́мъ. Благослове́нъ еси́ Влады́ко, вразуми́ мя́ оправда́нiемъ Твои́мъ. Благослове́нъ еси́ Свя́ты́й, просвѣти́ мя оправда́нiи Твои́ми. Го́споди, ми́лость Твоя́ во вѣ́къ, дѣ́лъ руку́ Твое́ю не пре́зри. Тебѣ́ подоба́етъ хвала́, Тебѣ́ подоба́етъ пѣ́нiе, Тебѣ́ Сла́ва подоба́етъ, Отцу́, и Сы́ну, и Свя́то́му Ду́ху , ны́нѣ и при́сно и во вѣ́ки вѣко́въ. Ами́нь.

И́же на вся́кое вре́мя и на вся́кiй ча́съ, на Небе́си́ и на земли́ Покланя́емый и Сла́вимый Хрiсте́ Бо́же, Долготерпѣли́ве, Многоми́лостиве, Многоблагоутро́бне, Иже пра́ведныя любя́й и грѣ́шныя ми́луяй, Иже вся́ зовы́й ко Спа́се́нiю обѣща́нiя ра́ди бу́дущихъ Бла́гъ. Са́мъ Го́споди, прiими́ и на́ша въ ча́съ се́й моли́твы, и испра́ви живо́тъ на́шъ къ За́повѣдемъ Твои́мъ; ду́ши на́ша освяти́, тѣлеса́ очи́сти, помышле́нiя испра́ви, мы́сли очи́сти, и изба́ви на́съ от вся́кiя ско́рби, зо́лъ и болѣ́зней; огради́ на́съ Свя́ты́ми Твои́ми Ангелы, да ополче́нiемъ и́хъ соблюда́еми и наставля́еми, дости́гнемъ въ соедине́нiе Вѣ́ры, и въ Ра́зумъ непристу́пныя Твоея́ Сла́вы; я́ко Благослове́нъ еси́ во вѣ́ки вѣко́въ, Ами́нь.

Топари покаянные*

Поми́луй на́съ, Го́споди, поми́луй на́съ; вся́каго бо отвѣ́та недоумѣ́юще, сію́ Ти́ моли́тву, я́ко Влады́цѣ, грѣ́шніи прино́симъ: моли́твъ ра́ди Пречи́стыя Твоея́ Ма́тери, Царя́ искупи́теля Нiкола́я и всѣ́хъ Святы́хъ, поми́луй на́съ.

Сла́ва Отцу́, и Сы́ну, и Свято́му Ду́ху.

Го́споди, поми́луй на́съ, на Тя́ бо упова́хомъ; не прогнѣ́вайся на ны́ зѣло́ (очень), ниже́ помяни́ беззако́ній на́­шихъ, но при́зри и ны́нѣ, я́ко Благоут­ро́бенъ, и изба́ви ны́ отъ вра́гъ на́шихъ; Ты́ бо еси́ Бо́гъ на́шъ, и мы́ лю́діе Твои́, вси́ дѣла́ Руку́ Твое́ю, и Имя Твое́ призыва́емъ, сего́ ра́ди моли́твъ Пречи́стыя Твоея́ Ма́тери, Царя́ искупи́теля Нiкола́я и всѣ́хъ Святы́хъ, поми́луй на́съ.

И ны́нѣ, и при́сно, и во вѣ́ки вѣко́въ. Ами́нь.

Милосе́рдія две́ри отве́рзи на́мъ, Благослове́нная Богоро́дице, надѣ́ю­щіися на Тя́ да не поги́бнемъ, но да изба́вимся Тобо́ю отъ бѣ́дъ; Ты́ бо еси́ спасе́ніе ро́да Хрістіа́нскаго.

Дата добавления: 2015-07-12