Счастье понда

Конан саймис ойшöрнас. Вывтырыс сiдз лудiс, что эз позь терпитны, мед не гыжьясьны. Эд куим неделя ни сiя эз пывсьы, да сэтчö жö узьлiс ош моз — паськöмöн-кöмкöтöн.

«Вакрамеш эттшöм олансö! Тырмас! — думайтiс сiя. — Нем, тыдалö, богатсьöтны Дёма увтырсö... Колхозö пыра. Олöны тай кыдзкö йöзыс».

Конан вынсьöтчис пуксьыны, маласис, кыдз синтöм, медбы кутчыны мыйкö бердö, и эз вермы. Сьöлöмыс гудрасис, кезöтiс горшас и орлалiс кынöмсö синваэз петтöдз. Öдва-öдва бергöтчис кыминь да курччöвтiс тырпсö, медбы не ойзыны. Кöр лоис невна долытжык, пондылiс чапкавны коккезсис пимиэз, но и сэтчö садьыс эз тырмы. А люзьва йöрнöсыс лякасис яй бердас и ньылöмнас зубытöдз сёйис быдöс вывтырсö. Сэк сiя эшö öддьöнжык кутчис варскыны лядьбейесö да сiдз и ланьтiс сьöкыт, код онöн: тагсянь кольмöм юрыс сылöн эз на ешты сайкавны öнöдз.

Асъяойнас, кöр китöстiс гор увтын петух, Дёма монь чапкис вывтсис шебрас, дыша лэбтiс юрсö ляпкöса подушка вывсянь и пуксис полать дорö. Минута гöгöр гуддис лякасьöм синнэсö, нюжöтчис размöд да зэлöтiс кыз баличаэсö баличакыйöтöн. Лэдзчыны улö сылöн дышыс петiс. Но картаын вöлi пода: кык мöс. баляэз, порссез, вöввез — мерин да кобыла.

Эшö öтпыр чöскыта паськöтiс öмсö, нюжöтчис бытшöмика, мутшнитiс коскаэзнас да лэдзчис. Пемытiнас вельдыр кошшис спичаэз, но сiдз нiя эз и сюрö ки увтас.

Горчуман вылiсь босьтiс öшöпек, шульыштiс сартас, судзöтiс öгыра шом да пондiс шедтыны би. Сэтчöдз ушкис, что кöсичаэзас пондiс лыйны.

А кöр кузь кока лампаокыс вашöтiс пемытсö, ичмоньыс казялiс пызан вылiсь лякöсь бекöрпань. Ен угöлын свиттялiс ректöм бутыль — четвертница. Ен одзын, бытьтö ыджытлунся верба, сулалiс листтэзтöм табак шать. Джодж шöрас увсьöн-вевсьöн узисö код мужиккез. А паськыт, бус рöма тоша йöзайыс паськöтчöма дорас да корöтö керкутырьяс. Осьта öмсö сылiсь гöгралö повзьöм лудык, кошшö, кытчö бы дзебсисьны би югöрсянь. Дёма бокын узис кузь кока Конан. «Жыв эд Лаврейыс, — думайтö том хозяйка. — Абу родсö öштöма... Только Лаврейыт вöлi бур уджалiсь и некöр поперёг эз горöтчыв. А зоныс пон кодь мöдö лоны и сё комсомолеццес дынö, шуöны, кыссьö бы».

Бöра пондiс базанитны петух, орöтiс ичмоньлiсь думаэсö. Сiя шупыта сюйис горö пес, öзтiс сартас. Руд тшынок, дзик небытик, пашмöм гез, öдззис кыссьыны горöмсянь чуманö. Сэтчö чеччис и Дёмиха, сибöтчис горби одзö. Турунъюр кодь тушасянь лоис дзескыт комас. Ичмонь вешшис бокöжык, но Дёмиха лöгöн дзар керис моньыс вылö, и том хозяйка пондiс котрасьны öтöрö-керкуö юктасян ведраэзöн, чужьясис узиссез коккезö, плескайтiс ны вылö васö.

— Чеччы жö, старик, чеччы, — чувйыштiс Дёмиха жöникыслö бокас. — Вот югдыны пондас, а тэ сё чезнитан. Вунöтiн разь, мый тöн баитiн?

Дёма пуксис джоджас, öдва осьтыштiс люммöм синнэсö, но нiя сэк жö пöднасисö бöр. Чужöмыс вöлi пыктöмкодь, гöрдöтöм лöз нырыс коточикöн öшöтчöм увланьö, бытьтö лöсьöтчö пырны öмас, но оз адззы тшöк уссэс коласiсь осьтасö.

— Мийö ичмоньыскöт ойбыт мырсим, — бöра пондiс видчыны Дёмиха, — восемнадцатьö куралiм, а тэ öтiкö тöдан: жорскыны...

— Вай рассолсö... поткöтö юрöс... Иньыс мыччис сёёвöй бекöр да шуис:

— Уна эн больскы. Туяс юöтны пондас... На, этö ю, — кисьтiс кружкаö самогон и сюйыштiс Дёмалö дрöжитан киэзас.

Дёмаыс не юис, а кисьтiс кружкасис горшас, — кунис синнэсö да чушыкнитiс мороссис русö: х-хы! Сэсся кутчисис лабич бердö, чеччис. Пукалöв-керис, чужйис пими нырнас зоныслö, ыкöстiс:

— Марко, мун доддясь! Вöрöтчы, мыся, вöрöтчы!.. Да и тiйö тожö, — пондiс тойлавны мöддэсö.

* * *

Комсомолеццез рытнас öксисö Ванюш ордö, асланыс секретарь керкуö. Винерик, волькыта сыналöм юрсиа и гöрд йöрнöса, Ванюш вачкисис школьник вылö, кöда эз тöд, мыйсянь пондöтны висьтасьны велöтöм уроксö.

— Вот кывзö, мый гижöма «Том большевикын», — сибдöмкодь, не аслас гора голосöн горöтчис сiя. — «Миян одзын сулалö ыджыт задача: ноябрьын тыртны няньзаптан план. Колö округ пасьта организуйтны гöрд обоззэз, медбы буржыка пантавны Октябрьскöй революциялiсь 12-öй годовщина...» А мийö? Сто пуд эта ыжда деревнялö! Срам!.. Сьöд пöв вылö шедам, рогожа сетасö.

— Тэ только сэтiсь полан? — негорöн юалiс ячейкаись медпöрись и медвына комсомолец. — Нянь колö Краснöй Армиялö, рабочöйезлö, заводдэзö да фабрикаэзö, — сытöг не овны, не строитны... Тшыгйöн унасö он кер. Асьныт тшыгьялiт, тöдат...

Пиля нёджжöвтiс ассис ёрттэсö, бытьтö панталiс нiйö первуись. Ыджыт юра, кузь юрсиа, Пиля вачкисис мужик вылö. Кузь мыгöрыс да нырувтiсь сьöд гöнокыс тöдчöмöн пöрисьтiсö зонкасö. Пилясö быдыс радейтiс сы вежöр мывкыд кузя, сы жагкодь, но чорыт ум понда. Öнi быдöнныс видзчисисö, кыдз шуас сiя. Пиля тöдiс этö и висьталiс:

— Ме шуа сiдз керны: ашын торйöтчам кык торйö и кытшöвтам быд единоличнöй хозяйствосö. Пондöтам Дёмасянь. Сы вылö видзöтö быдöс шорсайыс.

Керкуын шы эз ло. Только часы бöра пондiс чотны, дзик юасьö:

— Сiдз я? Сiдз я?

Этö чотöмсö да курöглiсь öрокöн тарскöтöмсö дзугис горвыв подлöссянь голос:

— Эд кутчисьö, пиканнэз, виръюиссескöт. Бытшкаласö тiянöс ироддэз, кыдз менчим Онтонöс...

Ванюшалöн бабыс сьöкыта ловзисис да содтiс:

— Милицияöс корö да сiдз буди.

Некин эз шыась старухалö паныт, бытьтö эз и кылö. Только быдыслö усис тöдвылас деревня сайись гуна, кытiсь адззисö коммунист Онтон Четинлiсь, Ванюшыс айлiсь, шойсö. Кинлöнкö вила вöлi шодзалöма мужиклiсь мороссö, и öтiк вож шучкöп пырöтöма пым сьöлöмсö.

Ванюш öдва ньылыштiс дульсö, дзик тасасис комок, и бöра не аслас, кыз голосöн горöтчис.

— Кин эта понда, лэбтö киэз!

— Кöдö бабыт висьталiс? — кылiс порог увтсянь сералан голос, и кöдакö пильскис-серöмтчис западня вылын.

Ванюш гöрдöтыштiс и висьталiс горöнжык:

— Кин сы понда, мед трекнитны Дёмаöс? Паныт эз мун некин.

Баитiсö эшö öтi-мöдi йылiсь, а кöр пондiсö рознитчыны, Ванюш шуис:

— А Конан бöра эз пырав. Тыдалö, сюрис Дёмаыс налькö. Жаль.

— Натьтö, öбида кутiс, мыля эг примитö.

— Дугдас юны да кыйсьыны кулаччоыскöт, баняэзöт оз понды шляйтчыны — примитам. А öнi огö. Öнi колö нывкаэсö готовитны — велöтны, — отвечайтiс Ванюш.

— Но, мунам ни, — порог дорсянь корис Пиля. — Бабыслöн, натьтö, оныс петö.

— Петiс перво, а öнi, видзöт, палялiс, — шавгис пöрись баб. — Пырис то-тай юрам быдкодь думаыс... Ох тiйö, пиканнэз, немись оз полö! И хозяйкаö то сэтшöм жö...

— А кытöн инö сiя? — Пиля сувтчис, полать увтас юрсö мышкыртöмöн.

— Кытшöмкö ликбез тай адззöмась. Бытьтö гортын нем керны. Ох, сорласис быдöс öнi, хо-хо-хох... — ружтiс гор вылас старухаыс.

— Но, узь ни, баба. А тэ кольлав, Иван, а то онтö гусяламö.

Ванюш чинтыштiс бисö, кышыштiс пельпоннэс вылас дублёнкасö да петiс зонкаэс сьöрö.

Лог саяс кинкö поткöтiс пес. Вöв карта дын фонарьöн киас ветлöтiс конюх да мыйкö видчис. Тыдалiсö сылöн только шоныт чушниэз да ноёвöй нямöттэз. Деревня понас, ыб ворота дорын, кынмöм öшын пыр дзуз видзис шыр биок. «Сё эд велöтчöны, — думайтiс Ванюшыс. — Ковсяс и меным одзлань велöтчыны. Учительницаыс мöдö отсавны»,

Ванюш сулалiс завор одзас. Небытик лымок чочкомтiс сылiсь куш юрсö, чукöртчис ворот гöгöрас, сылiс чужöм йылас.

«Бытшкаласö ироддэс, — усисö тöдвылас бабыслöн кыввес. — А поди сьöвзьыны и кулаччоыс вылö, и велöтчöмыс вылö да мунны куреньö? Сэтчин öтiкö пондан тöдны — керасьны. А татöн мый? Олам тшыг не пöт, деньга абу. И крышаыс вон быдöс сiсь. Павкöт — ниль мунас. Мöдiс тятьö лöсьöтны, да эз ешты...»

И кыдз вöтын, син одзас лоис айыслöн чужöмыс, сылöн шуч пырöтан синнэс, кöднаын мылякö унажыксö тöдчис печаль. Стыд лоис Ванюшлö аслас думаэзсянь.

«Тьфу! Сякöй срамыс юрö пырö», — чурс сьöвзис лымас и пондiс ниртны пым долоньнас сайкалöм кымöссö.

«...Голова-а старика-а покатилась на...» — кылiс кытöнкö пемытiнас коддэзлöн ванзöм и орис джын кыв вылас. Кинкö, тыдалö, осьтлiс керку ыбöс и сэк жö бöр пöдналiс.

«Бöра Дёма пируйтö, няньсö ылöтö, — вежöртiс Ванюш. — Тэрмасьö сэрпöсь морт. Чöв, зэлöтам, дугдан сьывнытö!»

* * *

Эта асылö Ванюш чеччис одз.

— Мыйöн тэнö и верд, зонка, — тöждiсьöмöн шуис мамыс. — Похлёбкаыс эз на пусьы... Может, картошка вая?

— Петкöт сола тшак. Важынкодь ни эг сёйлö. Да асьныт пуксьö öтлаö. А то тэ, мам, бöра котöртан тшыгйöн.

— Сёй, кага, сёй. Стряпкаыс эд парнас пöт, — горöтчис бабыс, гынмöм вурун летiкö. — Ме вот печкышта кöть чöрс джын, очасö тырта да вöлись и акляла, мый ен сетас. А тэ, Олёксана, эн ни мошкоритчы, пуксьы.

Мамыс петкöтiс джоджулiсь кадушка, би весьтас бöрйис рыжиккез да гöстшаккез, вайис пызан вылас. Ванюш пöвсалiс пым картошка, крöшитiс тшакас; сэтчö жö шырис лук, вöлись пуксис джек вылö. Олёксана панытмоз зоныслö лöсьöтчис лабич дорас.

— Мый пондамö сёйнытö, Ванюш... — норасис мамыс. — Пизьыс кык квашня вылö колис, а изаныс пö тыр.

— Изам кöркö. Пизьтöг ог енöвтчö. Вот только кыскам няньсö и ветла, — баитiс Ванюш, лук кышсö дзимлялiкö. — Мыля нö челядьыс öнöдз эз локтö?

Ванюш видзöтыштiс öшынö и пондiс пасьтасьны.

— Сулав, кага, эшö горным пöднавтöм, — тэрмасьöмöн гöбечö кайтöн баитiс бабыс.

— Тэ сё важмоз, — серöмтчис Ванюш. — Мыйлö сiйö... трубасö? — Но петнытö эз тэрмась, мед не öбидитны пöрись мортöс.

— Кыдз мыйлö, кага? Не назём кыскавны мунан. Но, пуктi ни öтсö... Да бытшöмика сэтчин, берегит асьтö. Адззан, кыдз айтö... — и старуха сайöвтiс чужöмсö запоннас. А кöр Ванюш кутчис ыбöс вуг бердö, бабыс тэрмасьöмöн кресталiс косьмöм кинас внучекыслiсь спинасö да мыйкö вашкис ас пондас.

Ванюш, зыртчöм дублёнöй пася да кöчовöй шапкаа, кокнита петiс заворись. Виль нинкöммез увтын гажöна дзуркöтiс лымок. Вынсялöм морозыс сiдз и кутчисис ляпкöса ныр бердас, сайкöтiс джендöсовöй вешьян увтiсь пидзöссэсö. Тöлiсь, дзик фарфоровöй куд пыдöс, öшалiс деревня весьтын. Лёк морозыс бытьтö дорöма сiйö эта местаö и оз лэдз пышшыны югдан асывсянь. Мунiс Ванюш туйтöм улица шöрöт и думайтiс пондöтчан лун йылiсь, думайтiс аслас сьöкыт, но долыт удж йылiсь. Вдруг сiя кылiс чирзöм и сувтчис. Лог сайсянь мый вын котöртiс Миша Старцев, а сы сьöрö киас черöн вöтчис айыс. Ванюш паймыштiс, кежис бокö, но сэк жö кватитiс оглобля тор и öмтырьяс горöтiс:

— Сувтчы, Петра!

Миша ышки-пойки, топ повзьöм кöч, шыркнитiс бокöттяс, а Петра падмыштiс, сувтчис.

— А, лешман! Эшö тэ орöсь горбтö лэбталан?! — рякöстiс Петраыс и кежис Ванюшлань. «Кералас!» — думыш-керис Ванюшыс и ыпкис сьöд шапка кузяс. Но тэрмасикас инмис не юрас, а киас. Петра уськöтiс черсö. Ванюш мöдiс эшö лэбтыны оглобля торсö, но Петра кутiс сiйö да сiдз летöвтiс асланяс, что Ванюшыс сунки-панки татшкисис сы кынöмö юрнас и пöрöтiс сiйö кок йывсис. Петра кокнита петiс зонка увтiсь, ашкасис сы вылö да мöртiс кöрт кодь чорыт чуннесö Ванюшыс голяö. Но сэтчö кинкö пиньöвтiс Петралiсь кисö бöрас, и Ванюш горша кватитiс, дзик курччöвтiс, кöдзыт русö. Пиля зэгöтiс моросöттяс Старцевöс, кинкö горöтлiс да макайтiс киэзнас, кинкö сералiс, дзик анькытш тарскöтiс пöв кузя, кинкö жексiс простудитöм голосöн:

— Доддялö, вöв доддялö! Кыскам этö врагсö милицияö! Петра пондылiс мездöтчыны, мöдiс, тыдалö, пышшыны, но сiйö нырыштiсö, дзик порсьöс, лымас. Мыдзис мужикыс, бырис сылöн садьыс, кикокыс сырлёль лоис.

— Ась чеччö... Нуöтö сiйö дворас, — гусьöнмоз тшöктiс Ванюш. Кавтык гöгöрыс вöлi зубыт, топ потöм гадь, горшас бытшкасис ровно зуси, а чужöм вылас виртор эз вöв.

Керкуокын, кытчö пыртiсö Петрасö, вöлi жар. Дьöгöдь дук сорласьöма вöв ньылöмкöт. Петраöс пуксьöтiсö печка бокись джек вылö. Пиннес сылöн чакöтiсö то перытжыка, то жагöнжыка, бытьтö йöктiсö гармоння сьöртi.

Пиля тякнитiс черсö песö, тальччис сы вылö кокнас и тшöктiс:

— Давай висьтась, Петра, кин тэнö ускайтiс...

Петра мыдза лэбтыштiс вöйöм синнэсö, мыйкö мöдiс горöтчыны, да горшас дзик коска тасасис.

— Но! — тэрмöтiс Пиля.

Старцев пукалiс юрсö öшöтöмöн и только куимöт «но» бöрсянь лажмытжыка лэдзис пельпоннэсö да шуис:

— Эд стрöйдö, зонкаэз... вита гортын...

— Мийö самосудсö ог керö.

Зонкаэз шытöг видзöтiсö эта гöжöм рака кодь морт вылö и эз веритö, что ны одзын вöлi гöрд партизан, повтöм Петра Старцев. Не сэтшöмö сiйö тöдлiсö кырйывса. Бöбсялiс мортыс, роднöй зон вылö чер лэбтiс! Мый сыкöт лоис, кытшöм пон пурис?

Дзугис лöньсö Ванюш.

— Мый понда зонтö мöдiн?..

Петра чöлiс, бытьтö онмöссис. Только куньöм синнэзсис пичкисисö синваэз, ыскöвтiсö, поперегалiсö ныр бокись кырöввесö да кышасисö уссэзас. Петра эз кыв синваэсö: син одзас вöлi мöдiк — Дёмалöн югыт керкуыс, а пеллезас сулалiс сылöн виа басниыс: «Вит кашник гортат, а иньыт бöра дженыт кока. Кулан тшыгйöн, сетан кö няньтö государстволö. Вузав меным. Оз коль кöдзны — ме сета. А зонжугтö öмлöсав. Конан, вон, молодец зонкаыт...»

— Дёма сомуститiс, Ванюш... Кодувьям. Спасибо тiянлö — умöльыс эз аркмы... дурми самогонсяняс.

— Верита, Петра. Мун гортат. А чертö...— Ванюш мöдiс шуны, медбы татчö колис, но кыв йывсис мезмис мöдiк: — дзимляв.

* * *

Дёма ордö иньдöтчисö быдöнныс. Комсомолеццезкöт мунiс и бригадир Стёпка-кавалерист, чукыля кока, хитрöйкодь, но бур морт. Кöр комиссия сибöтчис кулак усадьба дынö, Дёмалöн басöк воротаыс оссис, и быдöнныс казялiсö тöбалöм подводаэз. Справнöй вöввез куртiсö коккезнаныс, öвтiсö тшöтшкöртöм бöжжезöн, йирисö öмлöссэз — корсисö туйö.

Дёма казялiс локтiссесö, сувтiс вöввес одзö, бытьтö мöдiс сайöвтны тыра доддесö аснас. Вывтас вöлi матерьёöн вевттьöм тулуп, кокас — серöтöм дора чочком пимиэз.

— Мийö тэ дынöдз, Дёма, — пондöтiс Ванюш.

— Адзза, что не гуна вылö каят, — пиннес пырйöт висьталiс Дёма.

— Пырам керкуас.

— Некöр тiянкöт нювсьыны. Колö дак пырö, а ме мунi.

— Некытчö тэ он мун, — поперегалiс сiйö Ванюш.

— Мун одзсим, зырымöсь бедь, а то кишкаэтö лэдза, — грöзитчис Дёма и трекнитiс вожжиэсö. Но Стёпка кватитiс вöвсö сермöтöттяс, вöв чепöссис бокö и чушкайтöмöн сувтчис чорыт киа неважся кавалерист одзö.

— Не сэтшöмлö инмин, понял?! — шынньöвтiс Стёпка, кöстiс куимпöвса видчöм да петкöтiс вöвсö. Ванюш пöдналiс воротасö. Дёма пиньöвтiс öмсö, гирчыг керис пиннезнас да пондiс лöга бергöтлыны гöрдöтöм синнэзнас. Сiя готов вöлi орлавны этö голь-шмольсö, отопки новйиссесö, но не сiя кадыс, не сiя. Вöрзьöт — тюрьмаын сiсьтасö. Сiйö кулакöн шуöны, пиннезнысö йирöны сы вылö. А кытшöм сiя кулак? Но, работникöс видзö, хозяйство тырдоз. Дак мыйсянь? Уджалiс, эз дышöтчы. Овны кужис!.. Бöра жö зоныс, Маркоыс, гöрддэз дын служитiс, бур олансö дорйис. Не, сiя абу кулак, сiя — культурнöй няньвöдитiсь. Сiдз шуис Дёмаöс районiсь öтiк начальник.

Эттшöм думаэс невна чинтiсö Дёмалiсь öдсö, и сiя пырис керкуас да пуксис веськыта лабичö.

— Повесткасö получитiн? — негорöн юалiс Ванюш.

— Но дак мый?

— А вот мый: 18 центнер кыскан посадö.

— Тэ кин сэтшöмыс?

— Не ме, а государство корö, мед эз тшыгьялö рабочöйез.

— Дак коллективыс ась вердö! А ежели тэнат сьöлöмыт висьö, ассит сет. А меным нысянь не шоныт, не кöдзыт.

— Мыля нö сэки плугöн гöран, а не сабанöн, ветлан телегаöн, а не няридзöн? И кöдзан вон девятирядкаöн! Кöбы не заводыс, дак кöдзсян кудтö дудiэслö эн бы сет.

Дёма чеччöвтiс джодж шöрас, вартiс аслас сивилёнö и, дульсö резöмöн, горöтлiс:

— То кытöн сiя доброыс пукалö! То! Аслам горбöн заробитi да вот эна гаддя киэзöн!.. — Дёма треситiс паськыт долоннесö Ванюш одзын.

— Нiя только добросö кöбисö! — Пиля чикыртiс синнэсö и чорыта пуктiс кидолоньсö пызан вылö: — Тырмас, хозяин! Гиж расписка, что субботаöдз государстволö вежтан сюсö 12 центнер да кватьö встречнöй план сьöртi...

— А этö тöдан, кыдз рочöн шуöны? — горницаись чепöссис, кыдз пос увтiсь понок, Дёма монь да сувтiс кокчуннез вылас, медбы сюйыштны кузь Пилялö нырöмас кукиш.

—...да эшö 25 руб деньга, — кончитiс Пиля, бöбмöм Маркоикаöс одзсис вештiкö.

— Эн сюйлы юртö, тёковка! — зыкнитiс моньыслö Дёма да мыччалiс чуньнас горница вылö. — Вот мый, — нежык лöгöн пондöтiс Дёма, нёджжöвтiс лöньсьöм отир вылö да серöмтчис öм дорнас. — Кыска распискатöг, а лишньöйыс абу. Аслым, натьтö, ковсяс небны...

— Небны донтöмика, а вузавны — куимдонöн кульны? — бытшкис кыввезнас Пиля.

Дёма кымöртчис, мыйкö мöдiс содтыны, да эз ешты: керкуö пырис Конан и кешитчöмöн горöтлiс:

— Здорово, комсомолия! Сёят отирсö? Давай, пöльтö! А ме — гуляйта!

— Тэ мый шумитан, öнджа? Гыö, мый оз ков, — öмйис сiйö Пиля.

— А касьтiся талун. Петра пö зонсö кералöма, дак, мыся, юышта сы лов понда, — и кыскис кармансис полуштоф.

— Ах тэ, сюгйöсь пон, — Миша чепöссис местасис да шонтiс Конанлö пельбокас.

Мöдыс незьдiс, лэбтiс бутылкасö, медбы вачкыны Мишалö. Но Дёма пиян, Марко, одзалiс Конансö, и Мишка ойкнитiс да берездасис порог дорас. Пиля уськöтчис Марко дынö. Мöдыс кватитiс пурт и сылö паныт:

— Нянь колö?! Нянь?! А эта оз ков? Вирыс оз ков?!

Дёма шамыртiс зонсö бöрсяняс, бакöстiс-горöтiс: — Мунö! Мунö эстiсь, кытчöдз дзоньöсь!.. Марко, öвсьы, тюрьмаын сiсьтасö!

Вдруг кысянькö петiс Петра Старцев черöн, кöдöн час одзтi мöдiс керавны зонсö.

— А-а, виръюись! Бедноталiсь вир лэдзны?! Оз ло эта, кытчöдз ловья гöрд партизан Петра Старцев, оз ло! — и Петра макнитiс чернас Марко вылö.

Ванюш чепöссис ны коласö, кутiс черпусö — и эта кадö занавеска сайсянь кожгис-лыйис пишаль. Ванюш спина кузя бытьтö вачкисö нöшöн. Сiя дивуйтчöмöн видзöтiс комланьö, дзик мöдiс серöмтчыны, и син одзас вдруг быдöс бергöтчис: занавеска, кöдасянь кайис тшынок, Дёма монь, Пиля, Ванюшлöн меддона ёрт Пиля. Мыйкö сукгöрд койыштiс Ванюшлö синнэзас, и сiя сразу вежöртiс — этö знамя, гöрд знамя нянь обоз весьтын. Но знамя орласис, öшис, а сы туйö Ванюш казялiс айсö. Сiя куйлiс гуна шöрын, сöстöм шогдi ворох вылын. Вир едöма сю вылас, кöдö караулитiс айыс, гöрд вир. Вир и сю... Сю и вир.

Минутнöй лöньсьöмсö, кöда кыссис ровно быдса век, орöтiс гора камгöм — ичмонь киись нильдiс двухстволка.

Дёма кавöстiс-ойнитiс пон моз, пидзыртiс кулаккесö, чеччöвтiс моньыс дынö да наотмаш сöтiс сы чужöм кузя. Ичмонь тур-бар таралiс пызанланьö, пöрöтiс сiйö öтлаын бекöрпанькöт.

И сэк Дёма ворота дынсянь Кырйыв вевдöрöт паськалiс, дзик гымыштiс, Пилялöн голос:

— Вийисö, гаддэз! Комсомолецöс вийисö!..

* * *

Кырйылын пондiсö герьясьны сразу кыкнан конецас. Лажмытик, пöлiня бока керкуокын, кöдалiсь крышасö сiдз и эз вермö лöсьöтны ая-зона, Ванюш морос вылын садясьтöг герьялiсö мам да баб. Пöрисьмöм, вöйöм сина, кöднаын тöдчис ыджыт горе, сулалiс Пиля. Шытöг чышкисö, может, первуись надз, курыт синваэз мöдiк комсомолеццез да мужиккез. Эз вöв только Петра Старцев: сiя эз лысьт пырны Ванюш керкуö, и, топ ранитöм зверь, шапкатöг ветлöтiс картабöрись столаэзöт, йирис пиннесö да вартiс кымöснас йöрись сырссэз бердö.

А лöньсьöм лог сайын уннялiс-горзiс Дёмиха, проклинайтiс коллективсö, комсомолеццесö, зонсö, жöниксö, моньсö — мортвийисьöс — и быдöс этö невежöртана, дзугсьöм лёк олансö. Сiя ляшмасис милиционеррез бöрсянь, кöдна нуöтiсö жöниксö, зонсö моньнас, и умöль голосöн герьясис-люлльöтiс, кыдз горзöны покойник понда.

Ашынас колхознöй амбар дынсянь вöрзьöтчис гöрд обоз. Пöлiня бока керку весьтын ямщиккез чöвтлiсö шапкаэз и мунiсö одзлань. Южöтiсö додь полоззэз, павьялiс да шовкöтiс гöрд флаг, а отир думайтiсö, что эта няньсянь, кöдö нiя кыскöны, быдмас, непременно быдмас, виль, вöвлытöм урожай.

Сьöкыта быдтöм нянь, чöскыт крестьянскöй нянь!

Дата добавления: 2015-11-16