Кеймат я тiйö, бур отир, еныслö? Одö? Оз и ков! Ме, пемыт морт, прокод кейми, матiсь вичкуэсö быдöс кытшлалi, джын мылаöс сэтчö пуктi, а мый кори еныслiсь — эз сет.
Вот и мунi сэк попыс дынö гортас да шуа: батюшко-поп, мыся, пöрисьмамö ни Сенюöкöт, а еныс öнöдз, мыся, дитёсö миянлö эз сет. Мыля нö, мыся, сiдз? Али умöля кейми, Микола Угодникыс одзын эг копрась? Али кöшелёкöс джоджувсис эг кыскыв, эг тэч еныс одзö руббесö? А батюшкоыс паль кодь ён вöлi — кучикыс госсяняс потны готов. И ме чайта, сылöн еныс токо кыв йылас вöлi, а юрас совсем мöдiк — мирскöй суета. Сiйöн и ляпкис меным сэтчö: тэныт, шуö, грешнöй, еныс оз вермы отсавны, эта шогöтыс пö не духовнöй, а плотскöй. Мужик дынö, шуö, мун, сылö кеймись.
Тьфу, мыся, öнджа! — сьöвзи сылö гöрд рожаас. Да только не сылö инми, а Христосыслiсь синсö дулльöсьтi.
Сэксянь вичкуас и кокöн эг тальччыв.
ШОГÖТ ВУЖЫС ЮРЫН ОЛÖ
Посöдзын пукалöны кык старуха: öтыс кöсыник-кöсыник, дзик косьтöм масляк, а мöдыс пучка кодь ён — кöсыник коддес кыка петасö. Кызыс пукалö да чöлö, а мöдыс сюрибыдман моз сярзьö-висьтасьö:
— Таво бöра ветлi Зыбунича-матушкаыс дынö, дак тожно тöдi, кытшöм бур лекарка сiя. Видзöтас токо тэ вылö — и резьöтас-висьталас, мыйсянь тэ шогалан: али ен мыжйис, али йöзсянь сюрис, али пöрöс кутiс. Синнэс сылöн шуч мортсö адззöны — регеннöйöсь пö. Мöйму нёрны пондi да сы дынö жö котраси — юрнам эг вермы сэк... Царство небеснöйö сылö, кулас дак, — отсалiс. Жомтурун сетлiс, и öнi дугдiс юрö висьны, токо шупкалö, икота...
Дак вот мунi öнi и шуа: Зыбунича-матушка, он кö отсав, дак коктöм лоа. Тэ вылö токо надеяыс...
Видзöтiс сiя коккезöс, горвыв сёрдiсь турун судзöтiс да мыччис меным. Заварит, шуö, сизим зэрись вотьваöн да сизим неделя васö ю. И коккетö, шуö, тожно сизим ключын, кöдна шондi паныт петöны, миссьöтлы... Ме босьтi турунсö и шуа: дак тэ тайнö мöймусясö жö сетiн, кöдöн юрöс веськöтiн, а менам эд коккезö öдiсö, нёштöм дукöн ни боссисö. А сiя нёджжöвтiс регеннöй синнэзнас ме вылö да горöтчис: тэ, шуö, эн видзöт сы вылö, что коккет дуксялiсö. Мыля нiя оз лоö дукöсьöсь, кöр дука местасянь быдмöны? А быд шогöтлöн пö вужыс юрын олö, сiйöн и сэтшöм турун сета...
Спасибо Зыбунича-матушкалö, ась сетас еныс сылö царство небеснöйö — велöтiс менö, мывкыдтöм юрöс. Вот пондас зэрасьны, дак öкта вотьвасö. Öтiк зэрись рудзöтi ни ви латкаö...
Дата добавления: 2015-11-16; просмотров: 65 | Нарушение авторских прав
| <== предыдущая страница | | | следующая страница ==> |
| СОЛДАТ БЕРТIС | | | ЭН КАЗЬТЫ ЛЁК КЫЛÖН |