Солдат бертiс

Мунiс Семён война вылö томöн да здоровöйöн, колис гортас кык челядьöн инькасö. А локтiс бöр пöв кок вылын да эшö öт сосыс шинельыслöн сюйыштöма брезентовöй ремень сайö.

Локтiс сэк, кöр сiйö деревняас некин ни эз видзчись, нельки иньыс: важын ни солдатка Марилö военкомат юöртiс, что Семён пуктiс ловсö. Родина понда.

Тэрмасьöмöн Семён дзурликтiс горт дынöдззас и казялiс сэтшöмö, кöдасянь сьöлöмыс чуть шöри эз пот: карта киссьöма, керку öшыннэз дорöмöсь пöввезöн, дзик покойниклiсь синнэз игналöмась.

Чапкис солдат котомкасö, пуксис посöдзас, лэдзис юрсö пидзöссэз вылас...

Видзчисис сiя долыт пантасьöм, а то мый петiс — керкуыс пустöй. Кытöн сэтiсь олiссес, кытöн иньыс, кытöн челядьыс?

— Весь тэ пукалан, Сенька, — кылiс солдат гуся голос аслас юр весьтiсь. — Некин тэныт паныт оз пет, некин бур кыв оз мыччы. Пыр ме ордö, шоччисьышт невна. И брагаок эм — талун праздник.

Этö баитiс Бобош Ванчик, Семёнлöн сосед. Сразу сiйö тöдiс солдат: кытшöмöн колис сизим год бöртi, сэтшöмöн и öнi адззис. Разь только кынöмыс эшö кызжык да рожабаннэс гöрджыкöсь лоöмась.

Нем эз висьтав паныт солдат, босьтiс котомкасö да ляшмасьöмöн мунiс Ванчик сьöрö.

Каннез гыжьясисö моросас, кöр сiя кыскис бутылка вина да пуксис пызан сайö, кöда вылö ваялiс сёян Ванчика.

Мыля сiя пукалö чужöй пызан сайын, мыля сы одзö паньсö пуктö чужöй инька, а не Мари?

— Чапкис иньыт гортсö, вежис тэнö мöдiк вылö, — лёк пон моз пурö-дойдö сьöлöмсö солдатлiсь Ванчик.

Курыт вöлi винаыс, но эта юöрыс солдат понда сысся курытжык. Но крепитчис солдат, терпитiс этö курытсö.

— Менам иньö бы керис сiдз — чашкöтi бы коккесö, — тэчö Ванчик гöсьыс одзö лёк кыввез. — Да и мöдыслiсь бы юрсö нетшкöвтi да конувтас сюйыштi.

Ружтыштiс Семён, шы эз сет, только öддьöнжык лöзöтiс ранасянь кöрчитчöм рожабаныс.

Ванчик удiс мöдпырся, шуис:

— Не морт лоан, кыдзи он вежтiсь.

— Кин сiя — мöдыс?

— Госпитальын татöн куйлiс да и кольччис. Колхозыс керку отсалiс сувтöтны. Война вылас неделя вöлi, а эстöн герой... дöваэс коласын.

— Öтлаын сыкöт вöлiн? — юалiс Семён.

— Эг сюрлы, бронь сетлiсö.

И телефон деревняын абу, а виль юöр öтiк минутаöн быдöс керкуэсö кытшöвтiс. Эз на ешты Семён пызан сайись петны, кыдз кывсьöма ни Марилö важ жöникыс локтöм йылiсь. И вот сiя, мышкыртчöм да повзьöм, котöрöн вöтчö виль жöникыс сьöрö, кöда тэрмасьö пантасьны калека солдаткöт.

Казялiс нiйö Ванчик, чепöссис öшын дынö, чирзö:

— Вон нiя, видзöт, Сенька! Ноко пет да пантав бытшöмика сiйö геройсö!

Чеччис солдат пызан сайись, нюжöтыштiс гимнастёрка подувсö бöрланяс — жольнитiс морос вывсис медаллезöн — да петiс лудовкаа улицаö.

— Здорово, вонöй! — сибöтчис сы дынö быгалöм гимнастёркаа винерик мужик, кöда мышкын сулалiс Мари да чышкис запоннас синнэсö.

Öшис лöгсянь Семёнлöн синбурыс, дрöж сывьялiс вывтырсö, кыдз вöвлi штыковöй атака одзын.

Секунда бöртi шагньöвтiс Семён винерик мужик дынö, кватитiс сiйö моросöттяс. И мöдыс, тыдалö, не полiсь — мöртчöтiс ассис чуннесö Семён гимнастёркаö.

Сулалöны, чушьялöны лöгöн, букышöн, дзик люкасись пороззэз, видзöтöны öтамöд вылö.

— Но, вачкы, Семён, охота кö тышкасьны! — тшöктö Марилöн виль жöникыс.

— Нет, пондöт тэ, — сысъялö пинь пырйöттяс Семён.

— Но, вачкы, вачкы, Семён, ежели ме виноват, — пыксьö мöдыс. А мыйöн вачкасö, кöр кыкыс понда только кык ки и нiя тыраöсь?

Казялiсö этö калекаэз, кыртöтiсö чуннезнысö мороссэз бердiсь, жмитчисö öтамöд дынö. И, может первуись, ны синнэзiсь чепöссис надз синва, кöдö пичкисö тöдвылö усьöм бойез, пожарöн югдöтöм пемыт ойез да тшынсянь пемытсялöм мича луннэз, жугдöм городдэз да вирсянь гöрдöтöм окоппез, вийöм челядь да стариккез, уна ны кодь жö калекаэз, кöдна бертiсö гортаныс война бöрсянь и эзö адззö ассиныс горттэзнысö, семьяэзнысö.

Дак виноват я эстöн солдатыс, кöда гöтрасис Мари вылын?

Виноват я Мариыс?

КИН ЭД МЫЙ РАДЕЙТÖ

Тöн менам чегис гормöччан. А гормöччантöг эд не олан ни, а öтiк маитчöм!

Котöртi ме гормöччаннам контораö, мед наряд босьтны. Мунi ме, старухажуг, куш киэзнам, да кыдзкö старик пантасис и велöтiс: гöснечöн пö колö мунны, надёжнöйжык сiдз.

Босьтi гöрд бутылка, нöбöтi сьöрам. Былись эд сiдз и эм: мавтан — кокнитжыка тарöвтчö.

Пыри контораö, гормöччанöс — пельöсö, бутылкасö — начальник одзö. А начальник синнэсö барöтiс и шуö:

— Тэ мыйлö сiйö вайин?

Печыктi ме горшам, кыдз тай винаюиссес керöны, да графин бокись стакансö одзас торс сувтöтi. Дело, мыся, эм, начальник, баитыштны колö. А сiя бытьтö оз и тöд, мый эта лоö, да и шуö:

— Тэ не я артистка, бабыс? Али буса отопки юр бердат пыркöтiсö? А ме сылö:

— Абу ме артистка, и валеттэзö быдöс сьöрам, да гормöччан вот колö вочны.

— Сэки вай гижöт.

— Кытшöм гижöт?

— Заявленнё инö, он вежöрт дак, — велöтö начальникыс. А кыдз ме сiйö гижа, ог куж да?

Но колхозным не бур отиртöм эд. Иньдöтiсö бур отирыс менö кужись морт дынö, нимсö и айнимсö висьталiсö.

Локтi кужись мортыс дынö гортас, видзöта: ме кодь жö пöрись ни, юрыс нач куш, дзик кольть. Вот и ладно, думайта, — кокнитжыка баитчам, чожжык делоыс аркмас.

— Мит Митрич, — кеймися ме, — гижышт-ко меным гижöток, эн откажит öтка пенсионеркалö.

Старикыт — сразу пызан сайö, гижсян прибор лöсьöтö. Пошто пö не так? Только штой-то головушка пö тяжела, дак лекарштво не найдешь ли невна? Найду, поди, мыся, только гиж.

Гижис. Дыр я, кöр кужан — раз два и готов! Гижис, сетiс меным. Видзöта: öддьöн басöка гижöма. Ошки да вöлись юалi:

— За работу-то, дедушка, што?

А сiя:

— Не, бабуся, не што, а што пятьдешат, ежели чочкомö...

Ох, батюшки! Öтiк шкелет, а — сто пятьдесят пö!.. А кыдз гöрдö, мыся, дак уна я? Сэки пö — триста.

Триста дак триста. Мый нö керан, гормöччантöг эд он ов. Коли сылö бутылкаöс.

Но и ладно. Котöртi контораö, сетi заявленнёöс начальникыслö. Лыддьöтiс сiя, мыйкö гижыштiс заявленнё пельöсас и тшöктiс нöбöтны сiйö кузницаö. Ме радся-рад: вот, мыся, аркмö делоö. Бумажкасö — пиам, гормöччансö — киам и кыш-паш кузнец дынö мунi. Вот, мыся, дона, тэныт начальствосянь гижöт, а месянь — гормöччан. А кузнецыт сэтчö и дöвгис:

— Тэ меным мöдiк наряд вай.

— Кытшöмö эшö?

— Сэтшöмö, кöда оз кышöт, а бульöтö.

— Кытiсь сэтшöмсö? — ог вежöрт ме. Кузнецыт давай видчыны:

— Тэ мый, савыр, тöн вöлись чужин, али порядоксö он тöд? Магазинiсь вай — вот кытiсь! Да не кытшöмкö шöма чай, а чочком юраö!

Тожно вежöртi, мый сылö колö, да и котраси лавкаас. Ох-хо-хо, дзугсис оланыс. Нач дзугсис. Вот и вежöрт сэтöн, кинлö — бутылка, а кинлö гижöт!

СIЙÖ ПОЗЬÖ

Зам локтiс зав дынö.

— Леон Горюныч, — леститчöмöн пондöтiс зам. — Вот докладок гижи, видзöтышт-ко сiйö.

— Мыйлö? — лöга и дженыта юалö Леон Горюныч. Сiя вексö баитö етша, кыдз шуöны, арся гымалöм моз горалö: гымыштас öтпыр — и вежöрт тэ, гымалö али пушкаись лыйисö.

— Критикуйтны мöда, — шуö зам, — кынымкö мортöс, дак, мыся, согласуйтны колö. Мед быдöс бур вöлi.

— Процент? — бöра юалö Леон Горюныч.

— Кыным процент критикуйтны шедöны? — догадайтчö зам. — Часöт висьтала... Ö-ö, двенадцать гöгöр.

— Уна.

— Кинöс нö сэк чапка докладсим? Вот Кузьма Евсеич, менам помощник.

— Помощник? — кымöртчö Леон Горюныч.

— Чапкы. Сiя — тэнат веськыт ки.

— Чиркнитi,— кокнитжыка ловзисьö зам.

— Эшö Василиса Семёновна. Позьö эд сiйö йывдыштны?

— Жöникыс кин?

— Абу жöникыс.

— Пияннэс?

— Нылыс штукатур, зоныс — инженер.

— Чапкы. Эшö кин?

— Лёнька Ручин. Аймамыс — колхозын. Дядь сылöн — бригадир.

— Чапкы. Эшö эмöсь?

— Öтiк кольччис, Леон Горюныч, — Ипат дедö, — сярзьö-баитö зам. — Сiя пенсионер, недыр кежö кутчис сторожö. Старухаыс гортас олö, некытöн оз уджав, челядь абу, ны увтырись некин начальникö эз пет.

— Коль. Сiйö позьö.

Зам шынньöвтiс, шаркнитiс кокнас небыт ковёр кузя и кокнит шагöн да долыт сьöлöмöн петiс зав дынiсь.

Дата добавления: 2015-11-16