ТУЙСÖ БÖРЙÖ СЬÖЛÖМ 3 страница

— Мыйсянь этö — охота тöдны — тэнат нерваэт тшыксисö? — чикыртыштiс синнэсö Сима.

— Думайтан, менам нiя чугуннöйöсь? — Проня лэбтiс кольцосö синнэз весьтас, дыркодь метитчис и не чапкис, а тойыштiс сiйö одзлань. Кольцо шовкнитiс-öшöтчис шöрись тув вылö. — Эм 25!.. Кöбы вöлiсö и чугуннöйöсь, дак сёровно бы нiя чирйисисö... Ме эд морт и тожö бы морт моз ола, но оз сетö...

— Этö кин жö оз сет тэныт овнытö? — бöра чикыртiс синнэсö Сима.

— Да вот кöть бы и тэ... Гижöмат тай извещеннё, мед локтас пö правленнёö... Мый тэныт месянь колö? — кыдзкö кеймисьöмöнмоз юалiс Проня. — Али бöра велöтны мöдан, кыдз овны?

— Тэ, Проня, комсомолец, и ме, кыдз татiсь секретарь, мöдi тшöктыны взноссэз вежтыны, — ответитiс Сима. — Но и, конечно, удж йылiсь баитны. Мöдiк год ни эд некытöн он уджав.

— Но и мый? Тэ менö вердан али пасьтöтан? Али ме отирся умöльжыка ола? Тiйö диктаторрез, тiйö мортыслiсь свободасö пöдтатö, од сетö сылö борддэсö паськöтны, мед орёл моз лэбтiсьны вывлань и лолавны сöстöм рунас... Тэ шуан комсомолецöн менö, дак тöд: ме беспартийнöй.

— Этö кыдз вежöртны, баснитö тэнчит? — юалiс Сима.

— А сiдз и вежöрт, кыдз висьталi.

— И эттшöмсö баитан тэ?! Этаö тэнö школаас велöтiсö, учителлес вынсö ассиныс пуктiсö?.. — Сима сiдз лöгасис, что эз адззы, мый и висьтавны.

— Нiя сы понда деньга босьтiсö, — висьталiс Проня.

— Кытöн тэнат совестьыт, Проня? Эн я тэ мывкыдтö öшты?

— Недыр и öштыны, кöр тэнö быдыс кокалö... Тэ тöдан, кыдз миян законын гижöма: мортлöн эм право велöтчыны. А кытöн сiя, висьтав меным? Гижи вот ме заявленнё институтö, видзчиси ответ, лöсьöтчи экзаменнэз кежö, а меным кокушка мыччалiсö.

— Мыля? — юалiс Сима.

— А мыля рыжöй, — кыдзкö нёштöма серöмтчис Проня. — Справка корöны, что уджалi школа кончитöм бöрын. А кысь сiйö ме босьта, кин сетас?

— Тэ ачыт виноват, Проня. Колiс уджавны. Тöвчужьялiссес понда школа ыбöс игана... Лок миян дын, колхозас, уджалышт тöвсö, а тулыснас заочнöя пондан велöтчыны.

— Спасибо, — серöмтчис Проня, — эг велав нятяс кыскасьны. Да и ог понды бöбöтчыны, сёровно кывсяс: чожа велöтчыны муна. Ашын жö верма вайны комсомольскöй билетöс, оз ков сэсся.

Сима кывзiс и эз вермы вежöртны, мый сэтшöмсö койö Проня.

— Абу я тэ код, Проня? — дивуйтчис нывка.

— Эм невна. Вон тай ректiмö, — мыччалiс сiя турунын валяйтчан бутылка вылö. — Но басниö менам абу код... Ме муна семинарияö. Нева дорö, кытöн Пушкин кöркö ветлöтiс.

— Во, Пронь, правильнöя тэ баитан, — вдруг шыасис кинкö кокора сайсянь. Сима нёджжöвтiс сэтчин, паныт сылö петiс тракторист Гоша. А саясжык, уль вöр дорас, сулалiс трактор.

— А Пушкин вöлi сiйöн знаменитöй морт,

Что Нева дын тöдiс донсö радейтöмлiсь! —

нюжлалiс Гоша, Сима дынö шатласьöмöн сибöтчикö.

— А-а! Симаок-аканёк, небыт тырпа дудiок! — топöтiс сiя бырöм сандалиэзнас. — Лок жö бердам жмитышта да чупи-чупи окышта, — и малыштiс кинас Сима морос кузя. Нывка ачыс эз казяв, кыдз лячкис-сöтiс Гошалö рожабан кузяс и уськöтчис котöртны гортланяс. А бöрсяняс поткöтiс русö Пронялöн гора сералöм да Гошалöн видчöм.

* * *

Мунiс, бöрö колис гора-гыма июль. Видззез вылын, остожьяэзын, дзик табуноккезöн сулалiсö зороддэз. Сюзя дорын кышöтiс кузь заа да кора кукуруза, а лун покатын, шондi морос вылас, шушкöтчис рам тöлоккöт рудзöг. Лун-мöд бöртi эшö сiя вöлi мöдкодь, унажык шеппес видзöтiсö вывланьö да вöлiсö вöснитжыкöсь. А талун, видзöт тэ, кызсялöмась, чурдöмась да нюжöтöны кельыдкодь уссэзнысö увлань, бытьтö нырыштö нiйö жарыс, моритö шондi югöрыс, сунöтö.

Сунöтö и Симаöс. Етша сiя талун узис, а автобусын, кыдз зыбкаын, дюттьöтö, и мотор гусьöника сьылö онмöсьтан песня. Вашöтö бы онсö нывка, да некыдз оз вермы. Лэбтас юрсö, гуддяс синнэсö, видзöтыштас öшынö и бöра усяс тöдвылас повестка. А сэтöн гижöма, что гражданка Яроваöс август 2 лунö корöны судö. И судитчö сы вылö Малань. Кытшöм позор: мöдöны судитны комсомольскöй организацияись секретарьöс!

Пондас думайтны этадз, и синнэс бöра куньсясö, юрыс легыр öшöтчас морос вылас. Но и узикас думаыс бергалö эта повестка гöгöр.

Сима саймис бура зэгнитöмсянь, нёджжöвтiс, кытi мунö автобус.

Бöрас кинкö сералöмöн горöтчис:

— Сразу тöдчö, что районнöй центрö пырамö! Адззан, кыдз брякйö.

Былись эстöн туйыс вöлöма умöльжык, и автобусын сэтшöм бус лэбтiсис, кыдз вартан машина дынын.

Кинкö тшöктiс сувтöтны автобуссö, и Сима чеччис да иньдöтчис ВЛКСМ райкомлань. Сiйö панталiс сы кодь жö лöз сина да бусöй рöма юрсиа нывка — сой да и только! Нельки платьеыс сылöн вöлi сэтшöм жö, кытшöмö Сима небис кольöм субботаö. Этö вöлöма первöй секретарь — Лопарина, кöда и колiс Сималö.

Лопарина тшöктiс висьтавны, мый вайöтiс Симаöс эттшöм дзирыт кадö деревняись. И былись, талун Сималö колiс мунны бригадаö, кытчö вашöтiс Тасим комбайнсö, а сiя то районын. Да разь нывка чапкис бы ассис уджсö, ежели бы сылöн эз вöв ыджыт дело? Вот и суд вылö колö мунны, висьтавны, что Маланьлöн эм роднöй ныв, кöдалiсь челядьсö быдтiс Сима, а öнi дозирайтö нiйö сылöн айыс. Роднöй нылыс и копейка оз мыччы Маланьлö. А Сима кöть невнаöн, да отсалö айыслö.

Быдöс этö Сима висьтасис Лопариналö и корис сысянь отсöт — дорйыны позорсянь, не керны судсö. Но Лопарина вежöртöтiс нывкасö, что райком судсö оз вермы падмöтны и что эта эшö абу позор, сiйöн Сималö колö повтöг мунны судас. Сэтчин пö кывзасö делосö и вежöртасö, что Ярова абу виноватöй.

Сима кывзiс этö баснисö, гогышалiс юрнас, а кöр Лопарина дугдiс баитны, юöртiс:

— Менам эшö мöдiк дело эм. Олö миян деревняын Проня Гурин, комсомолец. Некытöн оз уджав. Баитi ме сыкöт кыкись ни, но менам нем оз пет. Вичкуö мöдö мунны уджавны.

— Вичкуö? — дивуйтчис Лопарина. — Тэ быль баитан?

— Быль. Öнi семинарияö лöсьöтчö. Билетсö ме одзö чапкылiс ни, да ме эг босьт.

Секретарь, кöдалöн синнэс öнöдз югьялiсö, дзик лöз доннэз, кыдзкö сразу лажмалiс местаас, кымöртчис, лöньсис.

— Эшö öтiк тор мыччалö, что мийö уджалам умöля, — шуис сiя. — Он тöд, кöр сiя лöсьöтчö мунны?

— Мöдлун.

— Жаль, учöт срокыс... Ме гижа извещеннё, тэ сетан сылö. Ашын ась локтас татчö. Мыйкö пондыламö керны.

— Эта сiйö оз видз, — висьталiс Сима. — Сёровно мунас... А вот меным висьталiс Михаил Чуканов... Ог тöд, быль не быль. Пронялö колö армияö мунны, да комиссия сiйö бракуйтöма... Не комиссия, а сылöн тётка, айыслöн сой, врачöн сэтчин уджалö, — ловзисьтöг висьталiс Сима. — А Проняыс и кушык оз кер.

Лопарина сэк жö звонитiс военкоматö, юалiс, мыля эз босьтö армияö Проняöс, кöр сылöн годыс служитö ни. Трубкаын бубнитiс кыз голос, и Сима, мымда бы эз чурдöт пеллесö, нем эз вежöрт. А секретарь юасис да мыйкö гижыштлiс пызан вылiсь календарьö. Сэсся пуктiс трубкасö да шуис:

— Бура керин, Сима, что висьталiн меным эта йылiсь. А часöт висьтась, кыдз уджалан, кытшöм эшö отсöт колö райкомсянь комсомольскöй организациялö.

И Сима висьтасис. Висьтасис быдöс сiдз, кыдз эм. А Лопарина бöра мыйкö гижыштiс календарьö и медбöрын висьталiс, что лун-мöд бöртi вовлас колхозас.

* * *

Кöдкоста Сима ветлiс районö, Тасим сiя кадö вайöтiс комбайнсö Мысовскöй бригадаö: эстöн, песока-галяа мыс вылас, рудзöггес прокод воöны медодз и страда пондöтчö эта ыбсянь. Вот и öнi сэтöн орöттöг гурöтiсö кык «Беларусь», и ны бöрсянь ольсассисö кык сю лёдз.

Тасим вельдыр видзöтiс, кыдз чинö рудзöг кругыс, и пондiс лöсьöтны ненадёжнöй фара. Эта удж сайись сiйö и застанитiсö Иван Лукич да колхознöй парторг Михаил Петрович. Нiя кылöмась, что Тасим бура рисуйтö, и öнi тшöктiсö Чукановöс лэдзны газета-молния.

Иван Лукич отсалiс Тасимлö лöсьöтны электропроводка да проверитны сiйö, а Михаил Петрович сы коста баитiс вундiссезкöт. Сэсся Тасимöс пуксьöтiсö мотоцикл коляскаö и кыскисö правленнёö. Парторг сетiс вит «Молния». Вылын, öт бокас, вöлi печатайтöма гöрд краскаöн «Бур», мöдас — «Умöль». Бур отир йылiсь вöлi мый гижны: Михей кык туйö аслас лафетка вылын уджалöма; кукурузовод Иван Семушин керöма куимöдз подкормка ни. Но колхозас эшö сымда умöльыс, что мöд лист бокас тожö колiс мыйкö гижны. Михаил Петрович кошшис материал, а вильыс нем абу. Сэк Тасим висьталiс Сималiсь баснисö: Гоша пö удж коста вöлöма код, трактор сулöтöма весись.

— Ах тэ, дышкучик, ах тэ, бöбöтчука! — пондiс чидны Михаил Петрович. — Вон мыля сiя жагöна мырьяинсö весöтö. Но, чöв, велöтам ми тэнö!.. Тасим, рисуйт... карикатура.

Недыр мыйись веськыт лист бокын аркмис то кытшöм картина: вöр дорын сулалö трактор, труба вылын ур перкйö голи, а кабинаись мыччöма юрсö руч; кöз увтын Гоша коккезнас пыкö мыр, ачыс пичкö-юö бутылкаись вина.

— Бытшöм, — ошкис Михаил Петрович зонкалiсь рисуйтöмсö. — Давай мöддэсö кер чожажык и ыстамö бригадаэзö.

— Лоас керöма, — шуис Тасим и мышкыртчис мöдiк «Молния» весьтö.

А кöр вöлi керöма медбöрьяыс ни, зонка повзис. Гоша йылiсь мастерскöйын баитiсö сiдз: вöрзьöт назёмсö — дук лэбас. И важын ни бы сiйö, натьтö, иньдöтiсö косаöн ытшкисьны, да некинöс трактор вылас пуксьöтны. А Михаил Петровичся да Иван Лукичся чередь я кинкö сiйö эшö тöчитлiс. А вöлiсö и сэтшöмöсь, кöдна дорйисö Гошасö. Мый пö эшö сысянь колö, кöр тракторист уджалö неумöля? А что юыштлö, дак эта абу нем. Ютöг и тракторыс пö оз ов.

Вот Гоша и ветлöтiс дзик чатыра коссёпу да вартiс ассис мороссö: полöны пö менчим!

Тасим сыись эз пов ачыс, но мый шуас Сима, мый думайтас нывкаыс сы йылiсь? А может, Гошаыс эз вöв код, а просто шоччисис, ыркöтчис вуджöрас? Думайттöг этö керис Тасим. Да, думайттöг. Оз радейт сiя Гошасö, лöгыс сы вылö петö невна. Сiйöн, мыля Симаöс обижайтö, сылiсь ёртсö. И вот лöгыс вермис сылiсь вежöрсö. А лöгыс мортлö, шуöны, унажыксö дзугö, нежели отсалö.

— А вон кытчö тэ дзебсисьöмат! — порогсянь гажöна горöтчис Сима.

И зонка сразу вежöртiс, что Сима не весь ветлiс районö. Но сёжö юалiс:

— Кыдз, Симка?

— Семнадцать!

— Мый — семнадцать?

— А мый — кыдз? — шуис Сима да серöмтчис ачыс и Тасимöс серöмтöтiс. — Быдöс бур! Вот висьтася, кывзы.

— Сима, норовит, — сувтöтiс сiйö Тасим. — Бур дак бур. А ме, натьтö, не сiдз кери... Но абу эшö сёр. То видзöт.

Сима нёджжöвтiс рисунок вылас и шынньöвтiсö сылöн синнэс, тырппес, шынньöвтiс быдöс чужöмыс.

— Этö Гоша? — юалiс сiя. — Но да! Вон и номерыс сылöн — 3. Тэ молодец! Не молодец, а Кукрыниксы!

— Эн на радуйтчы! — поперегалiс Симаöс Чуканов. — Вермас «керксы-никсы» петны. Тöдан эд сiя кытшöм жель! Может, не керны?

— Ох тэ-э, рыцарь, — висьталiс Сима. — Вунöтiн разь: полан — эн кутчы, а кутчин — эн дрöжит!

* * *

Куим лунсö первöй комсомольскöй экипаж ыб вылас вöлi пемытсянь пемытöдз. Комбайн орöттöг ньылалiс и ньылалiс конечтöм сю лёдзсö, дзик нюлiс зу кодь вундöм подсö — и öтiк тылöпок эз коль. А бöрсяняс пуксьöтлiс додь ыжда идзас юррез да маросаа руö пöльтiс йикиа бус. Кадiсь кадö комбайн дынö сибöтчылiсö вöввез, машина сувтчыштлiс минута-мöд кежö, Сима осьтлiс бункерись заслонка, и сю, золото рöма сю, дзик мешöк уссёись гиззис ыджыт ящикö. Öтдруг эта сюкöт нывка синнэзiсь, сы сьöлöмись чеччис гаж — няньбыдтiсьлöн гаж.

Но нёльöт лунас эта гажыс, эта счастьеыс, орис: молотилка вдруг дугдiс уджавны. Тасим вельдыр кошшис, мый лоис, и адззис вöлись сэк, кöр сiйö вöтiс Михей аслас комбайнöн. Зонка сразу жö пондiс чöвтны шатунсö, а Симаöс иньдöтiс мастерскöйö. «Сiдз и тöд, что лунджынсö öштан, — думайтiс Тасим. — Кöр сiйö эшö сэтчин керасö?»

Михей сувтöтiс комбайнсö, юалiс, мый лоис.

— Кытсав бöр Симасö, — тшöктiс сiя. — Менам запаснöй эм. И тэ тожö аслыт вильöсь кер. Нiя часто жугалöны. Адззан, кытшöм кыз лёдзыс! Оз терпитö... Тi лöсьöтö, а ме муна вартны.

Тасим шутньöвтыштiс да пондiс макайтны Сималö: лок пö бöр.

Кöть и чожа сю бöра пондiс гиззьыны бункерö, кöть и Сима сё сiдзжö сьылiс кытшöмкö басöк песня, а Тасимлöн мылякö эз ло одззася гажыс. Сiя вашöтiс машинасö перыта — сюыс кöс да и ыбыс волькыт, — но пукалiс дзик пым лабич вылын и сё видзчисис, что вот-вот мыйкö бöра лоас, и сiя оз ешты талун тыртны ассис нормасö. Эттшöм напряженнёын чулалiс вельдыр. Зонка öнi эз ни пукав, а сувтсöн, дзик корабль вылын штурвальнöй тумана кадö, синнэсö мöртчöтiс машиналö паныт котöртан лёдз вылö. «Только бы видзсьыны öбедöдз, а сэсся быдöс важмоз мунас, — думайтiс комбайнер. — Öбед коста позяс видзöтыштны машинасö, да и шоччисьыштам невна. Сё кокнитжык лоас...» А лёдз сё котöртiс и котöртiс паныт, а мöд дорыс сылöн кыссис мыс шöрас и кайис небоö. Комбайнерлiсь думаэсö дзугис кытшöмкö гольöтöм.

— Бöра, чёрт! — горöтчис Тасим и сувтöтiс машинасö, нёджжöвтiс бöрас: бункер кузя вартiс кулакнас Сима.

— Бункерыс тырис! — горöтлiс сiя. — А вöввезнас вон кытöнöсь вöлись.

— Уф-ф! Но пöжö! — сьöкыта ловзисис зонка да чышкис йöрнöс соснас пымалöм чужöмсö. — Мый нiя сэтчин маласьöны? Ноко тэрмöт, Сима! — ачыс пондiс видзöтны комбайнсö, эз я кыт жугав.

Нывка ур моз чылiс — кайис бункер вылö, босьтiс пуовöй зыр да пондiс макайтны сiйöн. Одзись телегаын пукалiсьыс казялiс сiйö да тожö размöд öвтыштiс лöз чышьянокöн, но вöв сё сiдз жö мунiс-вугралiс, немымда эз содты шагсö.

— Тасим, кытшöмкö нывка тэныт чышьянокöн макайтö, — юöртiс сералöмöн Сима.

— Кытöн? — петiс комбайн увтiсь Чуканов. Но Сима тöдiс ни, кин сiя локтö сю кыскалiссескöт, и чирöстiс:

— Аннушка! Анна Юрова локтö, — и кыш-паш лэдзчис му вылас да уськöтчис подружкаыс дынö, кöдакöт одиннадцать год пукалiс öтiк парта сайын, кöдалiсь медбöрья годас уроккез вылын часто лыддьöтiс стихотвореннёэз Иньва йылiсь да сэтöр сина зонка йылiсь. А сiдз кыдз сэтöр синаыс классас вöлi öтiк и тожö гленитчис Сималö, Аннушкалiсь стиххесö подружкаыс некöр эз лыддьöтлы конецöдз и прокод тшöктылiс гижны тулыс йылiсь — годiсь медбур, медкокнит да медгажа кад йылiсь. Но тулысыс сэтöр сина зонкатöг Аннушкалö кажитчис ар кодьöн, а зэра-пужа кадсö Аннушка эз радейт и сё гижис сэтöр синнэз йылiсь. Öтiкö ны коласiсь Юровалiсь печатайтiсö газетаö.

— Сима! — радъялiс Аннушка. — Кытшöм тэ молодец! Во! — и мыччалiс кыз да дженытик чангыля певсö. — Ме тэ йылiсь... забыль, тiян йылiсь понда репортаж гижны. Ох, и гижа!

Нывкалö, тыдалö, вöлi сэтшöм долыт, что сiя куньыштiс синнэсö да шовкнитiс кывнас, бытьтö сiйö гöститöтiсö маöн.

— А часöт висьтасьö, кыдз уджалат. — Аннушка кыскис карандаш да блокнот. — Ой, чуть эг вунöтчы... Тiян одзын газетаись корреспондент! — Аннушка кутыштiс чепöллезнас юбка боккесö и мышкыртыштiс юрсö.

— Аннушка, былись этö? — юалiс Сима и, кöр корреспондентыс гогынь керис кудриа юрнас, шуис:

— А тэ мöдiн эд институтö пырны?

— Мöдi, да вот корисö газетаас. Тэ жö тöдан, что менам призваннё — гижны. А велöтчыны понда. Заочнöя.

Тасим только пöв пельнас кывзiс нылiсь баснисö: сiя ректiс бункерсö и заводитiс машинасö, но Аннушка öдззис öвтны киэзнас, кытсалiс сiйö дынас. Мыйкö горöтлiс и Сима: сылö, тыдалö, охота вöлi, медбы комсомольскöй экипаж йылiсь гижисö газетаö. Чуканов лэдзчис ны дынö, шуис:

— Аннушка, рытнас вовлы нето видзчись павжунöдззас. Вон менö бöра вöтöны ни, — мыччалiс Михей комбайн вылö. — Да, вот мый: гиж-ко Михейыс йылiсь. Вот сiя герой!

— Не, не! Перво тэ висьтась! А сiя некытчö оз мун ме дынiсь.

— Да мый ме висьтася? — пыксис Тасим. — Вöлись уджавны пондöтча. Да и машинаыс важ, жугавлiс ни талун...

— Кöр пондöтчит вартны? Уна я сюсö кыскисö? — пондiс юасьны Аннушка.

Керны вöлi нем: Тасим ыш ловзисис да тэрмасьöмöн кутчис висьтасьны Сима йылiсь, машина йылiсь, бур урожай йылiсь. А корреспондент сё юасис и юасис, и Тасимлö кажитчис, что чулалiс час гöгöр ни, а страда коста öштöм чассö сыбöрын неделяöн он веж.

— Аннушка, эн кыскы ловöс, тырмас юасьны, — корис комбайнер. — А то пышша.

— Миян киись тэ он пышшы! — серöмтчис Аннушка и мигнитiс Сималö. — Сiдз эд?

— Мун, Аннушка, эн серав, — бергöтчис сы дынiсь Сима. Но подружкаыс жмитчыштiс сы бердö да мыйкö пондiс шушкыны Сималö пель одзас. Сима сералiс да беринялiс юрнас. Тасим адззис, что сэтшöм басниыс сылö гленитчö, но... колö уджавны, некöр сулавны: локтiсö сю кыскыны, а бункерас росöн чышкöма. Зонка кайис аслас местаö, содтiс газ. Сима, кыдз кöркö школасянь бертлiкö, сетiс Аннушкалö падей — а Лопарын сiйö шуöны одзöс — и чеччöвтiс лисничок вылö. Комбайнер макнитiс корреспондентлö кепканас, вештiс бокö рычаг, и машина вöрзис местасис. Важмоз öдззис ырöтны-сьывны мотор, йирка-ёрка сяркöтны молотилка, шардöтны-уннявны барабан. И Аннушка, и Сима, и сюкыскалiсь вöвнас — быдöс сразу петiс Тасим юрись. Ыбыс, оланыс, быдöс мирыс Тасим понда öнi чукöртчис öтiклаö — лёдз нырö. Но только ештiс керны öтiк кытшöв, кыдз комбайнсö вöтiс да сувтчис газик. Машинасис петiс нывка да макнитiс блокнотöн Тасимлö. «Бöра корреспондент! — дзарнитiс сы вылö Тасим. — И кысянь нiя менам юр вылö киссьöны? Ог сувт, ась видзчисьö павжунöдззас». А бöрас горöтлiс ни Сима, тшöктiс сувтчыны.

— Этö ме дынö локтiсö, Тасим, секретарь Лопарина локтiс, — висьталiс сiя да лэдзчис паныт статя чочком нывкалö.

Тасим ловзисис кокнита да вашöтiс машинасö одзлань, кытöн сiйö видзчисисö вöввез.

А павжуннас Сима мавтiс машинасö да висьтасис Тасимлö:

— Некытшöм преступленнё пö Проняыс абу керöма. А öтiлунö комиссия вöлöма. И öнi зонкаыт здоров ни и армияö мунö! Вот мийö и вермимö! — радуйтчис нывка.

— Мыйöн и кинöс тiйö вермитö? — юалiс Тасим.

— Вермимö поппесö, мырддимö ны киись эшö öтiкöс, вот мый!

— Эта не тiян заслугаыс, — баитö Тасим. — Ежели бы тiйö кужит пыркöтны сы юрись еннэсö да молитваэсö, сэк вермит бы!

— А тэ чайтан Проняыс веритö еныслö? Кыдз бы не сiдз! Сылöн юрас не еннэз, да и некытшöм молитва сiя оз тöд. Паразит сiя, вот кин! Тэ тöдан, мый сiя меным висьталiс, кöр билетсö вайис? Меным, шуö, кöть чёртлö, кöть енлö служитны, да мед сьöм локтiс. Висьтала, шуö, сизимись «аллилуя» да öтпырись «аминь» — и карманö тырас. А кыдз карманат жольöтö, дак и оланыс оз бöрд, и гöгыт оз вöрзьы... Ме тöда, что армияас сiйö мортö пöртасö.

— Сiя и армияас асьсö оз понды орöтны, шоныт места адззас.

— А ме сэтчин письмо гижа, мыся, сiя сэтшöм-этатшöм и сы сьöрын колö бура видзöтны. Комсомольскöй организацияö гижа и командирыслö юöрта!

— Сiдз и гиж, что лопарскöй комсомолеццез нем оз вермö керны асланыс ёрткöт... Тiйö уджалö пö миян понда, а мийö ыркöтчыштам сы коста.

— Лучше зубытсö öтпыр кывны, нежели шогсö уна год новйöтны.

— Сiя-ту сiдз, да сёжö... Но, давай уджавны, а то кымöртчö.

Зэра кымöррез пондiсö гыасьны-ветлыны павжунсянь, но небоыс вöлись рытъявнас быдсöн гудыртчис да везтiс шондiсö дзик руд гынöн. Ойвывсянь шочыника пондiс чепсасьлыны уль тöвныр: руыштас, вöрзьöтас сю лёдзсö, перкйыштас идзас чукöрись кынымкö тылöп да бöра лöньсяс, бытьтö ыжмалыштлö, орсöтчö да пешлö ассис вынсö. Сыбöрын чибуöн гöнитас-локтас тöвчик, кватитас гривка вылiсь бус, идзас чир, йики да дзик мутовкаöн соровтас-лэбтас босьтöм ёгсö кымöррез увтас.

А канюк сё горзöмöн-горзö, то ли корö зэрсö, то ли ёрдö пемыт кымöрсö да ассис олансö, шевкйö некодьыник борддэзнас, ровно путрайтчö сукмöм руас. И чикиссез сё сiдз жö панöны шöрттöм дöранысö крутик весьтын, кресталöны ва вевдöрсö вожа бöжжезнаныс.

Кымöр сукмö, сьöдöтö, сьöкытсялö. Лоас зэр, ыджыт зэр. Тасим тэрмасьö: колö öктыштны лёдззесö, не сюрöтны зэр увтас. Комбайн уджалö ровнöя, джöмдавтöг нетшкöвтчö одзлань и одзлань. Вот и медбöрья лёдз куйлö сы одзын, дзик веж дöра ольсассьöм. Вот и конецыс сылöн ырк локтiс. Сима ректö бункерсис сюсö телегаö, а Тасим видзöтö комбайн. Вот и вöвнас мунiсö, Сима лэдзчис му вылас, сыналö пашмöм юрсисö.

— Быдöс, Сима! — горöтлö зонка.

— Мый быдöс? — эз вежöрт нывка.

— Мыся, шамья-гымья мырьяинын ягöдалiс, ягöдсö дозö коттис, а корсö киля коколлезö чукöртiс... Вежöртiн?

— Тэ Эзоп тай! — серöмтчис Сима. — Только эзоппесö некин ни öнi оз радейт.

— И тэ он? — юалiс зонка да сибöтчис Сима дынö. — А кинöс нö тэ радейтан, Симушка?

Зонка первуись сiдз шуис ассис отсалiсьсö, и Сималöн сылiс сьöлöмыс, лоис сэтшöм шоныт, бытьтö горчигаа сур юис, кытшöмöн кöдковну юкталiс сiйö Савельевна. Шонытыс кайис юрас, лэдзчисис коккезö, мунiс быд жилаöт да öзтiс чужöмсö. Мыйсянь бы этö? Поди эна чим сьöд син доноккезсянь, кöдна видзöтöны сы вылö да йиджöны сьöлöмöдз, но оз бытшкö, а вильдöны, чöскöтöны сьöлöмсö, тшöктöны орсны вирсö, тшöктöны, дзик виноватöйöс, мышкыртны юрсö?

Зонка тэ зонка! Кöбы тöдiн, кытшöм долыт висян тэ керин нывкаыслö эттшöм ласков, сьöлöм сотан баснинат!

Гизь койыштiсö медодзза зэр воттез комбайн кузяс, бытьтö вылiсянь анькытш киссис, и сэк жö зэрлöн кузь сыввес татшкисисö муас. Пöим кодь кöс бусыс чепöссьыштiс вывланьö, но крут зэрыс сiйö вартiс сюпод бердас и сразу жö незьдöтiс.

— Пуксьы чожжык, а то коля! — горöтiс Тасим. — Ланьтiн я мый я, Сима?

Зэр клёшшитiс-кисьтiс, а нывка сулалiс, киэсö одзланьö нюжöтöмöн, видзöтiс, кыдз кырыммезас дзолльö-котöртö сöдз ваыс, и сералiс. Ачыс сiдз ни вамис — сунистор, натьтö, косыс эз кольччы, а сё ваксис. Только сэк, кöр вöрзис машинаыс, кöр колесоэс кыртöтiсö да каттисö ас берданыс вазьöм му вевдöрсö, Сима чепöссис комбайн сьöрö, вöтiс сiйö, кайис Тасим дынö да горöтiс:

— Ме радейта сiйö, кинлöн сьöлöмыс ме понда потö! Этö горöтöмсö пöдтiс зэрлöн гиззьöм да моторлöн гор. Тасим только гогыш керис юрнас: бур пö! — кöть чередь я кылiс, мый йылiсь баитiс нывкаыс.

А может, и вежöртiс, кылiс сьöлöмнас.

Зэрны дугдiс сiдз жö крута, кыдз и пондöтчис. Но му весьтын сё öшалiсö зэра кымöррез, кöдна быд минутаö лöсьöтчисö мöдпöв койыштны, гывьявны нятьсялöм мусö. Вартöм йылiсь öнi нем вöлi и баитны, и Тасим кежöтiс машинасö горт дынас, а Сима корсис проведайтны айсö. Улицаын вöлi нять, и нывка мунiс деревня бöрöт, видззез кузя. Ештiс только кайны важ гортас да пырны огородечö, кыдз сiйö кытсöвтiсö улицасянь: сэтчин сулалiсö Проня да Гоша. Нiя вöлiсö кымöраöсь, кыдз эта рытыс жö, и вöрöтчисö дыша. Зато кыкнанныс пасьтасьöмась дзик свадьба кежö: галошаэзын муркöтыштлiсö виль ботинкиэз, кышöтiсö дона плащщез, гусялiсö син лöзкодь рöма йöрнöссэз да сера галстуккез. «Киноö мунöны, — вежöртiс Сима. — Оз я мöдö и менö рочавны?»

— Кывза, — висьталiс сiя здоровайтчöм бöрын. — Баит, Проня.

Кузь басниа Проня пондöтчис баитны ылiсянь да чуклясьöмöн: перво юасис öтi-мöдi, сэсся пондiс норасьны аслас ай вылö. Сэк Сима вежöртiс, мыйлö локтiс сы дынö Проня: кеймисьны, мед комсомольскöй секретарь эз дзуг весьолiсьлiсь планнэсö.

— Тэ мый старуха моз кадсö каттян? — поперегалiс сiйö Сима. — Висьтав, мый колö месянь, а то ме кыдз согра вами.

Гоша вештiс ёртсö бокö, шуис:

— Ме тожö ог куж чуклясьны. Вот мый, акань: тэ отирыслiсь коккесö эн клюкав — ачыт усян. Кывсис, что Пронялö мешайтны мöдан. Чапкы сiйö, не делосö. Охота сылö попöн лоны — ась лоö. Попыс тожö отирыслö не враг, не фашист кытшöмкö. И эшö: висьтав художникытлö, мед часöт жö кульыштiс ассис стряпнясö нето юрсö летöвта да конувтас сета. Вежöртiн?

— Быдöс? — юалiс Сима. — Сэк кывзы менö. Пронялöн кылыс аслас эм, ачыс висьталас. А Тасим сэтöн не виноват: тшöктiсö и керис. А тшöктi ме.

Дата добавления: 2015-11-16