(ордч.: сёр вар.)
Кресенняö мийö Вовакöт, зонöкöт, пуксим автобусö и мунiм деревняö. Вуграсьны, купайтчыны, шондi вылын жаритчыны, сёйыштны ягöд да тшöтшкöр.
Локтiм медматiсь посадöдз, кежим расокланьö, кöда дорын тыдалiс неыджыт деревня да юок.
Недыр мыйись миян дозын вöлiсö дас гöгöр ёкыш да пескан.
— Черива, давай, пуам, — решитiм ми.
Вова кутчис весöтны черисö да керны бипур, а ме иньдöтчи деревняö, мед корны кинлiськö солок да кольтёк — вунöтчим сiйö гортiсь босьтны.
И вот ме деревняын. Муна улица кузя, видзöтча, кытчö бы пырны. Быд ворота одзын — тас: некин абу деревняас. «Да-а, — думайта, юрбöрöс гыжьялiкö. — Ковсяс котрасьны посадöдз». И вдруг кылi шовкöтöм. Уськöтчи сы ладорö, адзза: видзок вылöт котöртö шорок, а сэтöн вава вылын нöшöн мыйкö шовкйö-вартлö инька. Ён — каджыс пызанпöв пасьта, коккес — кряжжез. Но вот беда: инькаыт токо йöрнöсокöн, да и сылiсь подувсö павтыртöма да булавкаöн кос весьтас кутöма. Небытшöм, мыся, сэтшöм кадас сибöтчыны. А шорок саяс быдмö зöр — сорласьны ни пондöтчöм, воны лöсьöтчö. И как раз эта сюын ветлöтöны пияна порсь, кукань, тусясьöны дзодзоггез да курöггез. Инькаыт, тыдалö, сiдз натужнöя уджалö, что оз и казяв подасö.
Кватитi кок увтсим шать и котöртi вашöтны подасö: мыся, лэбта шум, а сы коста тёткаыс, кöр казялас менö, пасьтасьыштас. Но только сибöтчи ме подаыс дын, кыдз кылi бöрсяням кыз да лöг голос:
— Ой тэ, дзимшыр! Ноко чапкы бедьтö! А то волькöта сюргиэтö!
Бергöтчи ме, а сiя, лэдзчисьöм юрсиа, жаритчöм чужöма и сэтöр сина, одзам и сулалö и дзардö шондi вылас лым кодь чочком лядьбейезнас да небыт пельпоннэзнас.
— Тэ мый эстöн керан?
— Солок бы меным... Кольтёк эшö, — бобгыштi ме öшöмсянь. Инька пышналiс менö сьöд синнэзнас, серöмтчыштiс да юалiс:
— А деньгаыт эм я?
— Конечно, конечно, эм.
— Но дак мунам. Только кайöт вон нiйö корзинаэсö, отсав, — бергöтчис сiя и пондiс важнöя, дюттясьöмöн, оськавны деревнялань.
Ме котöртi вава дынö, адззи коромысла и кык ыджыт корзина, кöднö öдва-öдва лэбтi пельпоннэз вылам, да турьялöмöн кайи дорись керку дынö, кытöн видзчисис менö инькаыс.
— Чапкав-ко этö песоксö поленичö, а то öшлiсьны оз туй, — инька мыччалiс поткöтöм пес вылö.
Ме уджалi кыдз заводнöй, но сё жö чулалiс джын час, кöр тэчсис эта песыс.
— Сетö меным солок да кольттесö,— чашыктöмöн кеймися ме. — А то чериыс, натьтö, паськалiс ни.
— Кыным десяток?
— Кык кольть.
— Кык кольть? И тэ лысьтiн кык кольть понда манитны менö?
Тридцать или немымда!
— Но десяток сэк...
— Тридцатьö, шуöны! Али он кыв? Лок татчö да лöсьöт, кытчö тэчны.
— Некытчö меным сымдасö пуктыны да.
— Ладно, адззам мыйкö, не городскöйöсь, подикось, не нищöй кодьöсь. Бригадирша ме. Вежöртiн? — Сiя нуöтiс менö гуок дынö. — Ваньчикö квать деревняöн бергöтлö, — шыннялöмöн ни баитiс инька, важ нямöт вылö кольттесö тэчикö.
— Вот и тридцать. Босьт да сёй на здоровье. Куим руб тэсянь. Ме видзöтi чочком чукöрок вылас и думайтi, кыдз меным буржыка каттьыны кольттесö учöтик нямöтжугас. А бригадирша юалö:
— Мый, оз гленитчö?
— Поснитöсь жö да, а донаöсь.
— А тэныт гырисьöсь колöны? Сэк ачыт нiйö кольттяв, — лöгöн шуис инька и куртыштiс вöлi быдöс чукöроксö нямöтсорнас.
— Пожалуйста, — шуи ме, — эд босьтö бöр. Вот деньгаыс, — и нюжöтi пятёрка. Бригадиршалöн бöра мыччисис шынь-серöм, и сiя чышкис киэсö подулас, босьтiс деньгасö, нюкайтыштiс, шуч видзöтiс шондi весьтын да вежöртöтiс:
— Поди, виöсь нето госöсь... Сэтшöмсö шыр сёйö... Кывзы, а босьт-ко тэ эшö кык десятоксö, а совсö весь сета.
— Спасибо, тётка. Сет лучше сдача, а то подöн ковсяс...
— Ме тэныт абу тётка. А кöть и тётка бы вöлi, сёравно сдачаыс абу... На-ко совсö, ― сiя пуктiс меным кырымам чепöль етш руд сов и котöрöн петiс огородечö. А ме сы коста ректi сылiсь нямöтсö ― тэчи кольттесö шляпаам ― и ас кежам видi бригадиршасö.
Дзур-вир оссис ворота, и бригадирша ме одзö пуктiс ноша лук турун да кык кушман, домалöмöсь оча бöж.
― Вот тэныт сдачаыс туйö ― куим руб вылö лоас… Сёй на здоровье да эн казьты менö лёк кылöн…
Дата добавления: 2015-11-16; просмотров: 55 | Нарушение авторских прав
| <== предыдущая страница | | | следующая страница ==> |
| СЕНИКАЛÖН ВИСЬТАСЬÖМ | | | ЧЕРИВА ПОНДА КУИМДАС КОЛЬТЬ |